Taamanikkut ullumikkullu Guutip anersaavanit siulersorneqarneq

‘Tamakku tamaasa Anersaap taassuma ataasiusup nammineq piumasaminik sunniutigai.’ — 1 KORINTHIMIUT 12:11.

1. Allaaserisami matumani suut sammissavavut?

 UKIUMI 33-mi piinsip ullua pissanganartunik pisoqarfiuvoq. (Apustilit Suliaat 2:1-4) Ulloq taanna Guutip anersaani kiffaminut kuimmagu taassuma anersaani atorlugu inunnik siulersueriaasia allanngorpoq. Allaaserisami matuma siuliani sammivarput itsaq Guutip anersaani kiffaminik aalajaatsunik ikiuinermini assigiinngitsutigut qanoq atortaraa. Ilagiilli kristumiut pilersinneqarnerat sioqqullugu tamatumalu kingorna Guutip anersaavata Guutimut kiffaasunik siulersueriaasiata suna assigiinngissutigaat? Kristumiullu Guutip anersaavata illernartup siulersuinera ullumikkut qanoq iluaqutigaat? Tamakku allaaserisami matumani sammissavavut.

“[Jehovap] kiffaraanga”

2. Maria Guutip anersaava pillugu sumik ilisimasaqarpa?

² Anersaaq illernartoq inimi qullermi Jerusalemimiittumi kuineqarmat Maria najuuppoq. (Apustilit Suliaat 1:13, 14) Ullorli tamanna sioqquterujussuarlugu Jehovap anersaaminik tupinnartuliorsinnaanera nalunngereerpaa. Ukiut 30-t sinnerlugit tamatuma siorna Jehovap ernermi qilammi inuunera nunarsuarmut nuuppaa. Jehovap anersaani illernartoq atorlugu Maria angummik ilaqarsimanngikkaluartoq naartulersippaa. — Matthæusi 1:20.

3, 4. Mariap qanoq isiginnittaaseqarluni ersersippaa, qanorlu ilaarsinnaavarput?

³ Sooq Jehovap Maria toqqarpaa? Maria inngilimit oqarfigineqareerluni Guutip ernera erniarissagaa ima oqarpoq: “[Jehovap] kiffaraanga. Oqaatsisit malillugit pineqarlanga.” (Lukasi 1:38) Mariap inuttut qanoq ittuunera oqaasianit paasinarpoq. Ingerlaannaq akinermigut ersersippaa Jehovap kissaataatut iliornissani piareersimaffigalugu. Inngili aperinngilaa naartunini pillugu inuit qanoq eqqarsassanersut Josefilluunniit katikkumajunnaassaneraani annilaangagineranngilaa. Oqarami Jehovap kiffarigaani ersersippaa Jehovamik tatiginnilluinnarluni.

⁴ Ilaannikkut misigisarpit Guutimut kiffartorninni akisussaaffitit artupajaarlugit? Tamatta imminut ima aperisariaqarpugut: ‘Jehovap piumasani naapertorlugu isumaginnikkumaartoq tatigilluinnarpara? Jehovap uannut suliassiissutaa ilumut suliarerusuppara?’ Tatigilluinnarsinnaavat Guutip imminik tatiginnilluinnartunut Kisimilu Oqartussaasutut piumasaanik akuerinnittunut anersaani tunniukkumaaraa. — Apustilit Suliaat 5:32.

Petrusi anersaamit illernartumit ikiorneqartoq

5. Ukiumi 33-mi piinsip ullua sioqqullugu anersaap illernartup Petrusi qanoq ikiorpaa?

⁵ Ukiumi 33-mi piinsip ullua sioqqullugu,  Mariamut pisoqarsimaneratut, Petrusip anersaaq illernartoq nammineerluni malugisimavaa. Jiisusip Petrusi apustilillu allat anersaapilunnik anisitsisinnaanngortippai. (Markusi 3:14-16) Biibilimi toqqaannartumik allassimanngikkaluartoq Petrusi taamaaliorsimagunarpoq. Aamma Jiisusip Galilæap Tasersuata qaavatigut pisoqqummani Petrusi anersaap illernartup ikiuineratigut taamaaliorpoq. (Atuakkit Matthæusi 14:25-29). Erseqqippoq Petrusip anersaap illernartup ikiuinera tatigigamiuk tupinnartunik iliuuseqarsinnaasoq. Anersaap tamatuma Petrusi ajoqersukkallu allat allarpassuarnik qanittukkut iliuuseqarsinnaalersissavai.

6. Ukiumi 33-mi piinsip ulluani tamatumalu kingorna Guutip anersaavata Petrusi qanoq ikiorpaa?

⁶ Ukiumi 33-mi piinsip ulluani anersaap illernartup Petrusi allallu tupinnartuliornikkut Jerusalemimut tikeraat oqaasii atorlugit oqalussinnaalersippai. Taava Petrusi sassarluni katersorsimasunut oqalulerpoq. (Apustilit Suliaat 2:14-36) Petrusi ilaannikkut qunutuujusarpoq eqqarsaqqaaraniluunniit iliuuseqartarluni. Anersaamilli illernartumik tunineqareerluni malersorneqaraluarluni oqaluusseqqujunnaarneqaraluarlunilu sapiilluni oqaluussivoq. (Apustilit Suliaat 4:18-20, 31) Guutip anersaani atorlugu Petrusi immikkut ittumik ilisimasaqalersippaa. (Apustilit Suliaat 5:8, 9) Allaat Guutip anersaavata toqusunit makititsisinnaalersippaa. — Apustilit Suliaat 9:40.

7. Jiisusip ajoqersuutai suut Petrusip taninneqareerami aatsaat paasivai?

⁷ Piinsip ullua sioqqullugu Petrusi Jiisusip ajoqersuutaasa ilarpassuinik paasinnissimavoq. (Matthæusi 16:16, 17; Johannesi 6:68) Ajoqersuuteqarporli Petrusip piinsip ulluata kingorna aatsaat paasisaanik. Assersuutigalugu Petrusip paasisimanngilai Kristusi ullut pingajuanni anersaatut makititaassasoq aamma Kristusip naalagaaffia qilammiissasoq. (Johannesi 20:6-10; Apustilit Suliaat 1:6) Paasisimanngilaa inuit ilaat anersaanngorlutik naalagaaffimmi qilammiittumi naalakkersuissasut. Piinsip ulluani nammineq anersaamik illernartumik taninneqareerluni qilaliartussatullu toqqarneqareerluni Jiisusip ajoqersuutai tamakku aatsaat paasivai.

8. Tanitat savallu allat sunik ilisimasaqalersinnaappat?

⁸ Jiisusip ajoqersugaasa anersaamik illernartumik tunineqareerlutik ajoqersuutinik siornatigut paasisimanngisaminnik paasinnissinnaalerput. Anersaap illernartup Kristumiut Allagaataannik Grækerisuunik allattut isumassarsisillugit Jehovap siunertaa pillugu sallusuissutinik tupinnangaartunik nassuiaasippai. (Efesosimiut 3:8-11, 18) Ullumikkut tanitat savallu allat sallusuissutinik taakkuninnga atuaqqissaarlutillu paasinnissinnaapput. (Johannesi 10:16) Anersaap illernartup ikiuineratigut Guutip oqaasianeersunik ilisimasaqarsinnaanerit paasisaqarsinnaanerillu qujamasuutigaajuk?

 Paulusi ‘Anersaamik Illernartumik ilumioqangaalersoq’

9. Anersaap illernartup Paulusi susinnaanngortippaa?

⁹ Ukiumi 33-mi piinsip ulluata kingorna ukiup ataatsip missaa qaangiuttoq Saulusi, Paulusitut ilisimaneqalersoq, aamma anersaamik illernartumik taninneqarpoq. Guutip anersaavata Paulusi iliuuseqarsinnaalersippaa uagut ullumikkut suli iluaqutigisatsinnik. Assersuutigalugu anersaap illernartup Biibilip atuagartaanik 14-inik isumassarsisillugu allatsippaa. Petrusimik ikiuinermisut anersaap illernartup Paulusi ikiorlugu qilammi toqujuitsuunermik neriuut pillugu paasitippaa allatsillugulu. Aamma anersaap illernartup Paulusi anersaapilunnik anisitsisinnaanngortippaa, napparsimasunik ajorunnaarsitsisinnaanngortippaa toqusumillu makititsisinnaanngortillugu! Anersaalli illernartup Paulusi pingaaruteqarnerusumik iliuuseqarsinnaalersippaa, soorlu ullumikkut Guutip kiffai taamaaliorsinnaatikkai, naak tupinnartuliornikkut pisanngikkaluartoq.

10. Paulusip oqalussinnaaneranut anersaaq illernartoq qanoq sunniuteqarpa?

¹⁰ Paulusi, ‘Anersaamik Illernartumik ilumioqangaalersoq’, angakkuartartoq sapiilluni oqaatsikkut akiorpaa. Cypernip naalagaatitaata oqaloqatigiinneq tamaat tusarnaareerlugu “[Jehovap] ajoqersuutaa tupigusuutigingaarlugu” sallusuissut ilassivaa. (Apustilit Suliaat 13:8-12) Qularnanngitsumik Paulusip nalusimanngilaa sapiilluni sallusuissummik oqaluussissutiginnissaguni Guutip anersaava qanoq pingaaruteqartigisoq. (Matthæusi 10:20) Kingusinnerusukkut ilagiinnut Efesosimiittunut qinnuteqquvoq ‘oqaasissaminik tunineqartaqqulluni’. — Efesosimiut 6:18-20.

11. Paulusi Guutip anersaavanit qanoq siulersorneqarpa?

¹¹ Anersaap illernartup Paulusi oqaluussinerani ikiortarpaa, ilaannikkulli sumiiffinni aalajangersimasuni oqaluusseqqusarnagu. (Apustilit Suliaat 13:2; atuakkit Apustilit Suliaat 16:6-10). Jehovap anersaani atorlugu ullumikkut oqaluussineq suli siulersortarpaa. Paulusitulli Jehovap kiffai naalattut tamarmik sapinngisartik tamaat sapiillutik aallussilluarlutillu sallusuissummik oqaluussissutiginnipput. Guutip uagutsinnik siulersuinermini anersaaminik atueriaasia Paulusimik siulersuineranit allaanerugaluartoq, qularutigissanngilarput Jehovap anersaani aqqutigalugu eqqortuliorusuttut sallusuissummut kajungilersissagai. — Johannesi 6:44.

“Malunnangaartuliat assigiinngillat”

12-14. Guutip anersaava taassuma kiffaanut assigiimmik sunniuteqartarpa? Nassuiaruk.

¹² Jehovap ukiuni hundredelinni siullerni ilagiinnik tanitanik pilluaqqusisarnera atuarlugu ullumikkut uagutsinnut kajumissinangaarpoq. Taamanikkut anersaap illernartup kristumiut ‘tunissutinik’, imaluunniit piginnaassusernik, immikkut ittunik tunivai. Paulusi ilagiinnut Korinthimiittunut tunissutit taakku pillugit allakkami ima allappoq. “Saammaannermit tunissutit assigiinngillat, Anersaarli taannaajuarpoq. Kiffartuutit assigiinngillat, Naalagarli taannaajuarpoq. Malunnangaartuliat assigiinngillat, Guutili taannaajuarpoq sunik tamanik tamani sunniisoq.” (1 Korinthimiut 12:4-6, 11) Paulusi allappoq Jehovap aalajangersimasumik siunertaqarluni anersaaq illernartoq kiffaminut assigiinngitsunut assigiinngitsumik sunniuteqartissinnaagaa. ‘Savarpannguit’ aamma ‘savat allat’ anersaamit illernartumit siulersorneqarput. (Lukasi 12:32; Johannesi 10:16) Anersaarli  ilagiinniittunut assigiinngitsumik sunniuteqartarpoq.

¹³ Assersuutigalugu utoqqaanertat anersaamit illernartumit toqqarneqartarput. (Apustilit Suliaat 20:28) Kristumiulli anersaamit illernartumit taninneqartut tamarmiunngitsoq ilagiinni utoqqaanertaapput. Tamatumannga paasinarpoq Guutip anersaavata ilagiinniittunut ataasiakkaanut sunniuteqartarnera assigiinngitsuusoq.

¹⁴ Anersaap tanitat Guutimut qitornaalersimanerannik qularunnaarsippai, anersaarlu taannarpiaq atorlugu Jehovap Jiisusi qilammut makitippaa. (Atuakkit Romamiut 8:11, 15). Anersaaq tamanna atorlugu Jehovap silarsuaq tamaat pinngortippaa. (1 Mosesi 1:1-3) Tamannalu atorlugu Besal’eli tupermi naapeqatigiittarfimmi immikkut ittunik suliaqarsinnaalersillugu piginnaaneqalersippaa, Samsonilu nukittoorsuanngortippaa allat iliuuserisinnaanngisaannik iliuuseqarsinnaalersillugu Petrusilu immap qaavatigut pisussinnaalersillugu. Tassa Guutip anersaavanit siulersorneqarneq aamma Guutip anersaavanit taninneqarneq assigiinngillat. Anersaamit illernartumit taninneqarneq Guutip anersaavata sunniisarnerisa ilaannaraat. Guutip kikkut anersaaminit taninneqassanersut aalajangertarpaa.

15. Guutip anersaavanik illernartumik taninneqartarneq naassaanngitsumut ingerlaannassava? Nassuiaruk.

¹⁵ Guutip anersaava taassuma kiffaanut aalajaatsunut assigiinngitsorpassuartigut sunniuteqartuaannarsimavoq. Inuit Guutimit  taninneqartarnerat sioqqullugu ukiuni tusindilikkuutaani sunniuteqartarsimavoq. Anersaamik illernartumik taninneqartarneq ukiumi 33-mi piinsip ulluani aallartippoq, taninneqartarnerli naassaanngitsumut ingerlaannassanngilaq. Unitsinneqaraluartoq anersaaq illernartoq Guutip innuttaasa taassuma piumasaatut iliornissamut iluaqutigisaannik sunniuteqartuassaaq.

16. Jehovap kiffai anersaaq illernartoq iluaqutigalugu ullumikkut sulerippat?

¹⁶ Jehovap kiffai anersaaq illernartoq iluaqutigalugu ullumikkut sulerippat? Saqqummersitat 22:17-imi tamanna ima akineqarpoq: “Anersaarlu nuliartaarlu oqarput: ‘Qaagit!’ Tusartorlu oqassaaq: ‘Qaagit!’ Imerusuttoq aggissaaq, piumasullu imeq inuussutaasoq akeqanngitsumik pissavaa.” Anersaamit illernartumit killinneqarlutik ullumikkut kristumiut imeq inuussutaasoq ‘piumasunut’ neqeroorutigaat. Kristumiut tanitat savanit allanit tapersersorneqarlutik tamatumani siulersuipput. Eqimattat taakku marluullutik anersaamit illernartumit siulersortipput. Tamarmik Jehovamut tunniulluinnarnertik “Ataatap Ernerullu Anersaallu Illernartup aqqani” kuisinnikkut ersersippaat. (Matthæusi 28:19) Tamarmillu anersaap inerititaa inuunerminni ersersippaat. (Galatiamiut 5:22, 23) Guutip anersaava iluaqutigalugu inooriaasertik taassuma iluarisaanik sapinngisartik tamaat minguitsuutinniarsaraat. — 2 Korinthimiut 7:1; Saqqummersitat 7:9, 14.

Anersaaq illernartoq qinnutigiuaruk

17. Guutip anersaava pigalugu qanoq ersersissinnaaviuk?

¹⁷ Qilammi nunamiluunniit naassaanngitsumik inuunissamik neriuuteqaraluaruit Jehovap ‘pissaanermik asseqanngitsumik’ tunisinnaavaatit naggatissap tungaanut assuarnaattuarsinnaaqqullutit. (2 Korinthimiut 4:7) Oqaluussinerit pillugu inussiarniiffigineqarsinnaavutit illaruaatigineqarlutilluunniit. Tamannali unissutiginngikkukku ersersissavat Guutip anersaava pigalugu. Eqqaamajuk ‘pilluassasutit Kristusip aqqa pissutigalugu mitaatigineqaruit naalannassutsip anersaavata, tassa Guutip Anersaavata, najormatit’. — 1 Petrusi 4:14.

18, 19. Jehovap anersaani illernartoq atorlugu qanoq ikiussavaatit, qanorlu iliortuartariaqarpit?

¹⁸ Guutip anersaani illernartoq eqqortuliorusullutik tamatuminnga qinnutiginnittunut tukkorluni tunniuttarpaa. Anersaap piginnaaffigisannik pikkorinnerulersiinnarnak aamma Guutimut kiffartorninni sapinngisannik iliornissannik kissaateqarnerulersissinnaavaatit. “Guutimi tassaavoq ilissinni sunniisoq piumassuseqartittarlusi naammassisaqartittarlusilu piumasani ajunngitsoq naapertorlugu.” Anersaaq illernartoq iluaqutigiitigalugu ‘oqaaseq inuuneqaataasoq aalajangiunniarlugu’ iliuutsitit iluaqutigissavatit ‘annaanneqarnissavit mianerinnillutit uulillutillu noqqaassutiginissaanut’. — Filippimiut 2:12, 13, 16.

¹⁹ Guutip anersaavanik tatiginnilluinnarlutit Jehovap suliassiissutigisai uummatikkut iluunngarlutit suliarikkit, pikkoriffiginiarsarikkit Jehovamullu ikioqqugit. (Jaaku 1:5) Oqaatsimi paasinissaanut, ajornartorsiutit naammagalugit atornissaannut nutaarsiassallu nuannersup oqaluussissutiginissaanut pisariaqartumik ikiussavaatit. Jiisusi ima neriorsuivoq: “Qinujuaannaritsi, tunineqassaasi taava; ujarlertuaannaritsi, nanisissaasi taava; kasuttortuaannaritsi, mappiunneqassaasi taava.” (Lukasi 11:9, 13, NV) Tamatumani anersaap illernartup qinnutigineqarnissaa aamma pineqarpoq. Tassa Jehova qinnuigiuaruk Guutip kiffaasa aalajaatsut anersaamik illernartumik siulersorneqartut assiginissaannut.

Uku nassuiarsinnaavigit?

• Sutigut Maria ilaarsinnaavarput pilluaqqusaallutalu?

• Paulusi anersaamit illernartumit qanoq siulersorneqarpa?

• Ullumikkut Guutip kiffai anersaamit illernartumit qanoq siulersorneqarpat?

[Atuaqqissaarnermi apeqqutit]

[Qupp. 20-mi assiliartaq]

Guutip anersaavata Paulusi anersaapilunnik akiuisinnaalersippaa

[Qupp. 22-mi assiliartaq]

Ullumikkut anersaap illernartup kristumiut, qanorluunniit neriuuteqaraluarpata, ikiorsinnaavai