Arnat kristumiut aalajaatsut — Guutimut kiffaasut pingaartinneqartut

„Takujuminassuseq peqquserlunneruvoq [pisuusaamerinnaasinnaavoq, NV], pinnissuserlu piunngitsuuvoq [piunngitsuusinnaavoq, NV]; arnarli [Jehovamik] mianerinnittoq tassaavoq nersortarialik.“ — USSATIT 31:30.

1. Silarsuarmi pinnissutsimut isiginnittaatsimut sanilliullugu Jehova qanoq isiginnittaaseqarpa?

 SILARSUARMI qallikkut ittut pingaartinneqangaarput, ingammik arnanut tunngatillugu. Jehovalli soqutiginerpaavai inuup ilorlikkut pissusii, utoqqaliartornermi allaat suli kusanarnerulersinnaasut. (Ussatit 16:31) Taamaattumik Biibilimi arnanut kajumissaarut imaappoq: „Pinnissusersi qallikkut ersiuteqartissanngilarsi, soorlu perlaajassinnik, pinnersaatinik kuultiusunik atisanilluunniit pinnersunik, ersiuteqartissavarsili uummammi, inummi isertugaasumi, anersaap pivaatsup qanilaartullu kusanassusiani aserortussaanngitsumi, Guutip isaani erlinnaqisumi.“ — 1 Petrusi 3:3, 4.

2, 3. Ukiuni hundredelinni siullerni nutaarsiassap nuannersup siaruarneranut arnat qanoq siuarsaaqataappat, qanorlu siulittuutigineqarpa?

² Arnat Biibilimi eqqartorneqartut ilarpassui taama nersortariaqartigisumik isiginnittaaseqarput. Ukiuni hundredelinni siullerni arnat taakkua ilaasa immikkut pisinnaatitaaffigaat Jiisusimik apustiliinillu ilaginninnertik namminnerlu pigisaminnik taakkuninnga isumaginninnertik. (Lukasi 8:1-3) Kingusinnerusukkut kristumiunik arnaqarpoq iivangkiiliumik oqaluussisartutut aallussilluartunngortunik; allat angutinik kristumiunik siuttuusunik, assersuutigalugu apustili Paulusimik, ikiuinerat pingaaruteqangaarpoq; aliallu immikkut ittumik inoroorsaartuupput, ilaatigut angerlarsimaffimminnik ilagiinnut ataatsimiiffiusinnaatitsinermikkut.

³ Siunertami naammassineqarnissaanut atatillugu Jehovap arnanik atorluaasarnissaa Biibilimi siulittuutigineqarpoq. Assersuutigalugu Joel 3:1, 2-mi allassimavoq angutit arnallu, utoqqaat inuusuttullu, anersaaq illernartumik ilumioqangaassasut Guutillu naalagaaffia pillugu nutaarsiassamik nuannersumik siaruarsaaqataassasut. Siulittuutip taassuma eqquunnera ukiumi 33-mi piinsip ulluani aallartippoq. (Apustilit Suliaat 2:1-4, 16-18) Arnat tanitat ilaasa tupinnartuliorsinnaalernertik tunissutisiaraat, assersuutigalugu siullittuisinnaalerneq. (Apustilit Suliaat 21:8, 9) Oqaluussinermi aallussilluarnermikkut anersaakkut ittumik sakkutoorpassuit taakku, qatanngutit arnat aalajaatsut, ukiuni hundredelinni siullerni kristumiussutsip siaruapallanneranut pissutaaqataapput. Aap, ima siaruapallatsigimmat Paulusi ukiup 60-ip missaani allassinnaasimavoq nutaarsiassaq nuannersoq ’qilaap ataani pinngortitanut tamanut oqaluussissutigineqareersoq’. — Kolossemiut 1:23.

Sapiissusertik, aallussilluarnertik inoroorsaartuunertillu pillugit nersualaarneqartut

4. Ukiuni hundredelinni siullerni ilagiinni kristumiuni arnat arlallit nersualaassallugit sooq Paulusi pissutissaqarluarpa?

⁴ Taamanikkut Paulusip arnat kiffartornerat qujamasuutigaa — soorlu ullumikkut nakkutilliisut kristumiut pingaartittaraat arnat kristumiut aallussilluartut kiffartornerat. Paulusip arnat aqqisigut taasaasa ilaat tassaapput „Tryfæna Tryfosalu Naalakkami sulisuusut“ aamma ’asasaa Persisi Naalakkami sulingaartoq’. (Romamiut 16:12) Euodia Syntykilu pillugit allappoq ’iivangkiiliu pillugu sorsussimasut peqatigaluni’. (Filippimiut 4:2, 3) Priskillap aamma Paulusi suleqatigaa, uimi Akvilap suleqatiginninneratut. Taassuma Akvilallu allaat „namminneq inuunertik navianartorsiortippaat“ Paulusi pillugu, tamannalu pissutigalugu Paulusi allappoq namminiinnaanngitsoq kisianni aamma ilagiit inuiaqatigiinneersut tamarmik taakku qutsavigisariaqaraat. — Romamiut 16:3, 4; Apustilit Suliaat 18:2.

5, 6. Ullumikkut qatanngutinut arnanut Priskilla sutigut maligassiuiva?

⁵ Priskillap aallussilluarneranut sapiissusianullu suna pissutaava? Tamanna Apustilit Suliaat 18:24-26-mi akineqarpoq, tassanimi atuarsinnaavarput uimi Apollosimik, angummik Alexandriamiumik oqallorissorsuarmik, sallusuissut saqqummersinneqartoq pillugu ilisimasaqarnerulersitsinerani ikiuisoq. Tassa Priskillap Allakkat apustilillu ajoqersuutaat ilisimaarai. Tamatuma kingunerisaanik pissuserpassuit ajunngitsut ineriartortissimavai, taakkulu pissutigalugit Guutimit uiminillu ilagiinnillu pingaartinnegangaalerpoq. Taamatulli pingaartinneqartigipput ullumikkut qatannguterpassuit arnat kristumiut oqaluussinermi suliniuteqangaartut, eqiasuillutik Biibilimik atuaqqissaartartut anersaakkullu inuussutissanik Jehovap „pilittaasoq ilumoortoq silatoorlu“ aqqutigalugu pilersitaanik pigiliussisartut. — Lukasi 12:42.

⁶ Akvila Priskillalu immikkut ittumik inoroorsaartuupput. Korinthimi Paulusi taakkunaniippoq, tupiliortutullu suleqatigiipput. (Apustilit Suliaat 18:1-3) Akvila Priskillalu Efesosimut, kingusinnerusukkullu Romamut, nuukkamik kristumiutut inoroorsaartuujuarput, allaat angerlarsimaffitsik ilagiinnut ataatsimiiffiusinnaatippaat. (Apustilit Suliaat 18:18, 19; 1 Korinthimiut 16:8, 19) Nymfap Mariallu, Johannesi Markusip anaanaata, aamma angerlarsimaffitik ilagiinnut ataatsimiiffiusinnaatippaat. — Apustilit Suliaat 12:12; Kolossemiut 4:15.

Ullumikkut pingaaruteqangaartut

7, 8. Ullumikkut kiffartornermi illernartumi arnarpassuit kristumiut nersornartumik qanoq suliniuteqarpat, sunalu qularutigissanngilaat?

⁷ Guutip suliareqqusaasa, ingammik oqaluussinerup, ilarujussua ukiuni hundredelinni siullernisut ullumikkut arnanit kristumiunit aalajaatsunit suliarineqarpoq, nersualaarneqarluartarpullu. Gwen, 2002-mi toqunissi  tikillugu ukiut 50-t sinnerlugit aalajaalluni Jehovamut kiffartortoq, pillugu uia ima oqarpoq: „Gwenip oqaluussisartutut aallussilluarnera maani illoqarfimmi ilisimaneqarluarpoq. Inuit tamarluinnaasa Jehovamut kiffanngorsinnaasorai taassumannga asaneqalersinnaasut neriorsuutaasalu piviusunngornerannut peqataalersinnaasut. Guutimut, Guutip peqatigiissortaanut uagutsinnullu ilumoorfiginninnera — aamma nikallungagaangatta asannittumik qiimmaallannartumillu oqaaserisartagai — aappariinnerput tamaat uanga qitornattalu annertoqqutigisarpavut. Inuunerput nalerisimaarnartuullunilu ulapaarfiuvoq. Maqaaseqaarput.“ Gwen uinilu ukiuni 61-ini aappariipput.

⁸ Arnat kristumiut titusindilikkuutaat, aappaqanngitsut aappallillu, pioneritut ajoqersuiartortitatullu kiffartorput, inuunermilu pisariaqartuinnaat naammagaat Guutip naalagaaffianik tusarliussaq oqaluussissutigiitigalugu sumiiffinni tamani, illoqarfissuarniit ulapiffiusuniit avinngarusimasunut. (Apustilit Suliaat 1:8) Arnarpassuit angerlarsimaffeqannginnissartik meeraqannginnissartillu aalajangiusimavaat Jehova tamakkiisumik kiffartorfigisinnaajumallugu. Qatannguteqarpoq uiminnik nakkutilliisutut angalasutut kiffartorneranni ilumoorfiginnillutik tapersersuisunik, qatanngutillu arnat tusindilikkuutaat nunarsuaq tamakkerlugu Betelini sulisarput. Qularutissaanngilaq arnat imminnut pilliutigeriaannaasut taakku ’inuiaat erlinnangaartortaannut’ Jehovap illuanik alutornartitsisunut ilaasut. — Haggaji 2:7, NV.

9, 10. Nuliaasut anaanaasullu kristumiut maligassiuinerannik pingaartitsinertik ilaqutaasut qanoq oqaatigaat?

⁹ Soorunami aamma kristumiunik arnarpassuaqarpoq isumagisassaminnik ilaqutaqaatigalutik Guutip naalagaaffiata soqutigisaanik salliutitsisunik. (Matthæusi 6:33) Pioneri arnaq aappaqanngitsoq ima allappoq: „Anaanama aalajaalluinnartumik uppernera maligassiuineralu pionerinngorninnut pissutaaqataangaarput. Aap, ilumut pionereqatinnaama ilagaat.“ Angut nuliani, anaanaasoq tallimanik inersimasunik panilik, pillugu ima oqarpoq: „Angerlarsimaffipput ipiitsuujuaannarpoq torersuujuaannarlunilu. Illorput torersuutikkuminartumik pisataqartippaa ilaqutariit anersaakkut ittunut piffissaqarsinnaaniassammata nukissaqarsinnaaniassammatalu. Taassuma sipaartuunera aningaasanillu annertusaarillaqqinnera pissutigalugit ukiuni 32-ni ullup ilaannaa sulisinnaasimavunga taamaalillungalu ilaquttanut anersaakkullu ittunut piffissaqarnerullunga. Nuliama aamma qitornavut eqiasuilluni sulinerup pingaaruteqarneranik ilinniartippai. Nersualaaginnarsinnaavara.“ Ullumikkut marluullutik New Yorkimi Jehovap Nalunaajaasuisa qullersaqarfianni sulisarput.

¹⁰ Angutip nuliani, anaanaasoq inersimasunik qitornalik, pillugu ima allappoq: „Susanip pissusii nersornerpaasakka tassaapput Guutimut inunnullu asanningaarnera, aamma paasinnittuunera, misiginneqataanera peqqusersuinneralu. Isumaqartuaannarpoq Jehova tunniussinnaasatta pitsaanersaannik tunineqartariaqartoq — najoqqutassiaq Guutimut kiffatut anaanatullu nammineq malittaa.“ Nuliami annertoqqusersuinera pissutigalugu angut taanna arlalinnik immikkut pisinnaatitaaffeqarpoq, ilaatigut utoqqaanertatut, pioneritut, nakkutilliisumut angalasartumut paarlattaasartutut aamma Napparsimmavinnut Attaveqartitanut ilaasortatut. Arnat taamaattut pingaaruteqangaarput uiminnut uppeqatiminnullu, pingaarnerpaamilli Jehovamut! — Ussatit 31:28, 30.

Arnat kisimiittut pingaartinneqartut

11. (a) Arnanik aalajaatsunik, ingammik uillarnernik, isumassuinini Jehovap qanoq oqaatigaa? (b) Uillarnerit kristumiut qatanngutillu arnat aalajaatsut allat aappaqanngitsut suna qularinngilluinnarsinnaavaat?

¹¹ Uillarnernik isumassuinini taakkununngalu soqutiginninnini Jehovap oqaatigisarpaa. (5 Mosesi 27:19; Tussiaat 68:6; Esaja 10:1, 2) Jehova allanngorsimanngilaq. Suli soqutigingaarpai uillarnerinnaanngitsut aammattaarli anaanaasut kisimiittut arnallu aappanissimanngitsut, taamaannissartik namminneq aalajangeramikku imaluunniit kristumiumik tulluartumik aapparisinnaasaminnik nassaannginnamik. (Malaki 3:6; Jaaku 1:27) Aapparmik kristumiumik annertoqquteqanngitsut Jehovamut aalajaatsumik kiffartortut illit ilagippatsit Jehovamit pingaartinneqangaarnerit qularinngilluinnarsinnaavat.

12. (a) Qatanngutit arnat kristumiut ilaasa Jehovamut ilumoorfiginninnertik qanoq ersersittarpaat? (b) Qatanngutitta arnat ilaasa misigissutsit suut akiortariaqarpaat?

¹² Qatannguterpassuaqarpoq arnanik kristumiunik aappanissimanngitsunik Jehovap taamaallaat „Naalakkami“ katinissamik peqqussutaa ilumoorfiginnillutik naalakkamikku. (1 Korinthimiut 7:39; Ussatit 3:1) Biibilimi ima neriorsoqqissaarneqarpugut: „[Jehova] ilumoorfiginnittumut ilumoorfiginnittarputit.“ (2 Samueli 22:26, NV) Amerlasuunulli aappaqanngiinnarnissaq unamminiarnartuuvoq. Qatanngut arnaq ima oqarpoq: „Aalajangerpunga taamaallaat „Naalakkami“ katinniarlunga, qullilisaqaangali ikinngutikka kristumiuulluartunik uinittut takugaangakkit, suli kisimiittunga.“ Qatanngut arnaq alla ima oqarpoq: „Ukiuni 25-ni Jehovamut kiffartorpunga, taassumunngalu ilumoorfiginnittuaannarnissara aalajangiusimavara,  kisianni kiserliortutut misigikatattarpunga.“ Nangippoq: „Qatanngutit arnat uattut atugaqartut qiimmassarneqartariaqarput.“ Qatanngutit ilumoorfiginnittut taamaattut qanoq ikiorsinnaavavut?

13. (a) Arnat Jeftap panianut pulaartartut qanoq ilinniarfigisinnaavavut? (b) Allatigut qanoq ersersissinnaavarput qatanngutit arnat aappaqanngitsut kisimiittulluunniit ilagiitsinniittut soqutigalugit?

¹³ Itsarsuarmeersumik assersuutissaqarpugut. Jeftap paniata aappaninnginnissani aalajangiummagu inuit paasivaat pilliuteqartoq. Qiimmassarniarlugu qanoq iliorpat? ’Ukiut nungullugit Jeftap Gileadimiup pania Israelikkut paniisa unnersiutigiartortarpaat ullut sisamat ukiukkut.’ (Eqqartuussisut 11:30-40, 1900/1961) Taamatuttaaq qatanngutinik arnanik aappaqanngitsunik ilumoorfiginnillutik Guutip inatsisaanut naalattunik pingaartitsinerput ersersittariaqarparput. a Aamma allatigut qanoq ersersissinnaavarput eqqarsaatigalugit? Jehova qinnuigisinnaavarput qatanngutivut arnat aalajaatsut asasavut annertoqqusersoqqullugit ilumoorfiginnillutik kiffartortuarsinnaaniassammata. Jehovamit ilagiinnillu kristumiunit tamanit asaneqartut pingaartinneqartullu uppernarsaavigineqartariaqarput. — Tussiaat 37:28.

Angajoqqaat kisimiittut qanoq iluatsissinnaanersut

14, 15. (a) Anaanaasut kisimiittut kristumiut sooq Jehova ikioqqullutik qinnuigisariaqarpaat? (b) Anaanaasut kisimiittut qanoq ilillutik qinnutitik naapertorlugit iliuuseqarsinnaappat?

¹⁴ Arnat kristumiut meeqqaminnik kisimiillutik pilersuisariaqartut perorsaasariaqartullu unamminiarnartorpassuit anigortariaqarpaat. Meeqqaminnilli Biibilimi najoqqutassiat malillugit perorsaanerminni Jehovamut ikioqqusinnaapput. Ilumoorpoq kisimiittuugaanni tamatigut anaanaasoqarlunilu ataataasoqarsinnaanngitsoq. Kisianni Jehovap anaanaasoq kisimiittoq pisussaaffippassuarminik naammassinninnissaanut ikiussavaa, upperluni qinnuigippani. Assersuutigalugu, pisiatit oqimaatsut inissiarsuarmi qullerpaamukaanniarlugit majuartarfikkuussagunanngilatit elevatoreqarpat. Taamatulli misigissutsikkut artorsaatit nammineerluni nammanniarsarineqassanngillat Jehovamut ikioqqulluni qinusinnaagaanni. Aap, taamaaliornissatsinnut allaat kajumissaarpaatigut. Soorlu Tussiaat 68:20-mi allassimasoq: „Unnersiutigineqarli [Jehova] ullut tamaasa, Guuti kissumiarterput.“ Aamma Petrusip allagai siulliit 5:7-imi kajumissaarneqarpugut isumakuluutivut tamaasa taassumunnga piseqqullugit ’isumassormatigut’ Ajornartorsiutinik isumakuluutinillu nanertuuteqaruit, taava nanertuutigisat Ataatannut qilammiusumut tunniuguk, taamaaliortuarillu. — 1 Thessalonikamiut 5:17; Tussiaat 18:7; 55:23.

¹⁵ Anaanaaguit kisimiittoq ilaatigut meeqqavit atuarfimmi sunnerneqarnissaat assuarnaassutsimikkulluunniit misilinneqarnissaat isumakuluutigisinnaavat. (1 Korinthimiut 15:33) Isumakuluutit taamaattut paasinarput. Kisianni Jehovamut qinunikkut saqqummiunneqarsinnaapput. Soormi meeqqatit ullaakkut atuariartortinnagit qinoqatigineranni isumakuluutit taamaattut ilannguttarukkit, immaqa ullormut allassimaffik oqaloqatigiissutigeriarlugu? Immikkut taasilluni qinnutit uummammit pisut meeqqat isumaannut sunniuteqangaarsinnaapput. Aammattaaq Jehovamit ikiorneqarlutillu pilluaqquneqassaatit Guutip oqaasia meeqqavit uummataannut puiuikkiutsitsiniarlugu naammagittarlutit ilungersoruit. (5 Mosesi 6:6, 7; Ussatit 22:6) Eqqaamajuk ’Jehovap isaasa sammivigigaat iluartut, ikioqqullutik nillianerat siutaasa tusartaraat’. — 1 Petrusi 3:12; Filippimiut 4:6, 7.

16, 17. (a) Ernerup anaanami asannittuunera qanoq allaatigaa? (b) Anaanaata isiginnittaasia meeraanut qanoq sunniuteqarpa?

¹⁶ Olivia, arfinilinnik meeralik, kisimiittunngoriataarpoq nukarliliartik inooriitsiaannertoq uimi nalunaajaasuunngitsup ilaqutariit qimammagit. Naammagittaalliornanili meeqqami Biibilimi najoqqutassiat malillugit perorsarnissaannut akisussaanini akueraa. Ernera Darren, maannakkut 31-nik ukiulik pioneriusoq ilagiinnilu utoqqaanertaasoq, taamani tallimat missaannik ukioqarpoq. Isumakuluutimi allat saniatigut Oliviap aamma isumakuluutigilerpaa Darren, suli akiortariaqakkaminik, ilungersunartumik peqqiilliuuteqalersoq. Meeraanini eqqaallugu Darren anaanani pillugu ima allappoq: „Suli eqqaamavara napparsimmavimmi siniffimmiillunga anaana utaqqillugu. Ullut tamaasa aggertarpoq, siniffimmalu sanianut ingilluni Biibilimik atuffattarpaanga. Taava Guutip Naalagaaffiata erinarsuutaasa ilaannik erinarsorfigisarpaanga, ’Qutsavigaatsigit, Jehova’ atorlugu. b Erinarsuutitsinneersoq taanna suli erinarsuutinnaaraara.“

¹⁷ Oliviap Jehovamut tatiginninnera asanninneralu anaanatut kisimiittutut iluatsinneranut pissutaaqataavoq. (Ussatit 3:5, 6) Ajunngitsumik isiginnittaaseqarnera  erserpoq meeqqaminik anguniagassiineratigut. „Anaanap piffissaq tamaat kiffartornissarput anguniagareqqullugu kajumissaartuarpaatigut,“ Darren oqarpoq. „Tamatuma kingunerisaanik qatanngutima tallimaasut ilaat sisamat uangalu piffissaq tamaat kiffartortuuvugut. Taamaattoq anaanap tamanna allanut usorsitsaatiginngisaannarpaa. Pissusii ajunngitsut malinniarsaraakka.“ Ilumoorpoq qitornaasut inersimasunngoraangamik tamakkeratik Guutimut kiffartortuaannartartut, Oliviap qitornaasa kiffartortuarnerattut. Kisianni anaanaasup Biibilimi najoqqutassiat sapinngisaminik maleruarunigit Jehovap siulersuinera asannittumillu annertoqqusersuinera tatigisinnaavaa. — Tussiaat 32:8.

18. Jehovap ilagiit kristumiut aqqutigalugit pilersitaanik pingaartitsinerput qanoq takutissinnaavarput?

¹⁸ Jehovap annertoqqusersuinerata ilarujussua ilagiit kristumiut taakkualu ataatsimiinnerini saqqummiunneqartut, kristumiutut peqatigiinnerat qatanngutillu angutit anersaakkut inersimalluartut, ’inuit tunissutaasut’, aqqutigalugit tunniunneqartarpoq. (Efesosimiut 4:8, NV) Ilagiinniittut tamaasa ineriartortinniarlugit utoqqaanertat aalajaatsut suliniuteqangaarput, ingammillu eqqumaffigaat „iliarsunnik uillarnernillu atugarliuutilinnik isumaginninneq“. (Jaaku 1:27) Taamaattumik Guutip innuttai qanimut attaveqarfigikkit immikkoorniartooqinallu! — Ussatit 18:1; Romamiut 14:7.

Siulersuinermut najoqqutassiamik ataqqinninneq ataqqinaataavoq

19. Sooruna nuliaasup uiminut naalatsigitinnera isumaqanngitsoq taassumannga nikanarnerusoq, assersuullu Biibilimeersoq suna eqqaaneqarsinnaava?

¹⁹ Jehovap arnaq angummut naammaataasutut pinngortippaa. (1 Mosesi 2:18) Taamaammat nuliaasoq uiminut naalatsigitippat isumaqanngivippoq taassumannga nikanarnerusoq. Paarlattuanilli naalatsigitinnini ataqqinaatigaa Guutillu piumasaanut naapertuuttumik piginnaanerpassuarminik atuisinnaassutigalugu. Ussatit kapitali 31-mi Israelimi nuliaasup pikkorissup piginnaanerpassui assigiinngitsut allaatiginneqarput. lkiortariallit ikiortarpai, nunaatinik pisisarpoq viinnequteqarfiliortarlunilu. Aap, „uiata tatigisarpaa, pissarsiassaaleqinngilaq,“ allassimavoq. — Versit 11, 16, 20.

20. (a) Arnap kristumiup piginnaanini Guutimeersut qanoq isigisariaqarpai? (b) Esterip sunik ajunngitsunik pissuseqarluni takutippaa, taamaammallu Jehovap qanoq atorsinnaavaa?

²⁰ Arnaq anneruniajuitsoq Guutimillu mianerinnittoq qaffanniarluni imminut nittarsaattuunngilaq uinilu unamminagu. (Ussatit 16:18) Kissaatigisani namminissarsiortut piniaannartanngilai, piginnaaninili Guutimeersut pingaartumik allat iluaqutissaannut atortarpai — ilaquttami, uppeqatimi sanilimilu iluaqutissaannut, pingaarnerpaamillu Jehovap iluaqutissaanut. (Galatiamiut 6:10; Titusi 2:3-5) Assersuutigalugu dronningi Esteri eqqarsaatigisinnaavarput. Pinnersorujussuugaluarluni anneruniajuippoq qullersarisaminullu naalatsigitilluni. (Esteri 2:13, 15) Katikkamili uiminik, kunngi Ahasverusimik, ataqqinningaarpoq kunngip nuliarisimasaanit dronningi Vashtimit allaanerulluni. (Esteri 1:10-12; 2:16, 17) Esterip aamma illuni utoqqaanerusoq, Mordokaji, ataqqinnilluni naalattarpaa — aamma dronninginngoreerami. Arnaanngilarli sanngiitsoq! Sapiilluni qulaarpaa Hamani, angut pissaaneqangaartoq naakkittaatsorlu juutit nungutitaatinniarlugit pilersaarutilik. Jehovap innuttami annaanneqartinneranni Esteri tupinnangaartumik atorpaa. — Esteri 3:8-4:17; 7:1-10; 9:13.

21.  Arnaq kristumiu qanoq Jehovamut suli pingaaruteqarnerulersinnaava?

²¹ Tassa ersarippoq arnat Guutimik mianerinnittut itsaq ullumikkullu Jehovamut taassuminngalu pallorfiginninnermut tunniusimalluinnartut. Taamaattumik Jehovap isaani pingaaruteqangaarput. Ilissi, qatanngutit arnat kristumiut, kajumissaarpassi Jehovap anersaavanit ilusilersorteqqullusi ’puuguttatut’ iluaqutaajartuinnartutut ’ajunngitsuliornissanut tamanut piareersimasutut’. (2 Timotheusi 2:21, NV; Romamiut 12:2) Jehovamut kiffaasut pingaaruteqangaartut taamaattut pillugit Biibilimi ima allassimavoq: „Suliami inerititai inuulluutiginiarligit; suliani pillugit nersorneqarli isaaffinni.“ (Ussatit 31:31) Tamassi immikkut pillusi taama oqartoqarsinnaagilitoq!

[Ilanngussat]

Eqqaamavigit?

• Ukiuni hundredelini siullerni arnat kristumiut ilaasa Jehovap isaani pingaaruteqangaarlutik qanoq takutippaat?

• Nalitsinni qatannguterpassuit arnat Guutimut pingaarutegangaarlutik qanoq takutippaat?

• Anaanaasut kisimiittut qatanngutillu arnat allat aappaqanngitsut Jehovap qanoq annertoqqusersorpai?

• Arnaq qanoq siulersuinermut najoqqutassiamik ataqqinnissinnaava?

[Atuaqqissaarnermi apeqqutit]

[Qupp. 4-mi ungalusaq]

MALIGASSIUISUT EQQARSAATIGINEQARSINNAASUT

Arnat aalajaatsut allat Biibilimi eqqartorneqartut pillugit atuarusukkuit allassimaffiit ataani innersuussutigineqartut atuarsinnaavatit. Arnat taakkua maligassiuinerannik eqqarsaatiginninninni paasiniarsinnaavat pissusii ajunngitsut qanoq ilaarsinnaanerlugit. — Romamiut 15:4.

◆ Sara: 1 Mosesi 12:1, 5; 13:18a; 21:9-12; 1 Petrusi 3:5, 6.

◆ Arnat Israelikkuusut tukkortut: 2 Mosesi 35:5, 22, 25, 26; 36:3-7; Lukasi 21:1-4.

◆ Debora: Eqqartuussisut 4:1-5:31.

◆ Ruthi: Ruthi 1:4, 5, 16, 17; 2:2, 3, 11-13; 4:15.

◆ Arnaq Shunemimioq: 2 Kunngit 4:8-37.

◆ Arnaq Kana’anikkuusoq: Matthæusi 15:22- 28.

◆ Martha Marialu: Markusi 14:3-9; Lukasi 10:38- 42; Johannesi 11:17-29; 12:1-8.

◆ Tabitha: Apustilit Suliaat 9:36-41.

◆ Filipip panii sisamat: Apustilit Suliaat 21:9.

◆ Føbe: Romamiut 16:1, 2.

[Assiliartaq]

Qatanngutinik arnanik aappaqanngitsunik ilumoorfiginnillutik Guutip inatsisaanut naalattunik pingaartitsinerit ersersittarpiuk?

[Assiliartaq]

Meeqqat atuariartortinnagit immikkut taallugit suut qinnutigineqarsinnaappat?