Sallusuissutip Guutia maligassarisiuk

„Guuti maligassarisiuk taassumunnga qitornaasutut asasaasutut.“ — EFESOSIMIUT 5:1.

1. Sallusuissut pillugu ilaat qanoq isumaqarpat, tamannalu sooq eqqortuunngila?

 „SUNAANA sallusuissut?“ (Johannesi 18:38) Ukiut 2000-ngajaat matuma siorna Pontiusi Pilatusi misigittaappaluttumik taama aperigami, isumaqannguatsiarpoq sallusuissummik ujaasineq asuliinnaasoq. Ullumikkuttaaq inuppassuit taassumatut isumaqarput. Sallusuissummik paasinninneq apeqquserneqartarpoq. Immaqa tusarsimavat inuit ilaannik oqartoqartoq inummut allamut ilumoortuusoq allamut ilumoortuusariaqanngitsoq, suut tamarmik assigiinngitsumik isigineqarsinnaasut, imaluunniit sallusuissut allanngorartuartuusoq. Eqqarsariaaserli tamanna eqqortuunngilaq. Misissueqqissaarnerup ilinniagaqarnerullu siunertaraat piviusunik paasinninnissaq, tassa silarsuaq avatangiiserput pillugu piviusut. Sallusuissutip qanoq paasineqarnissaanut inuup isumaa apeqqutaanngilaq. Assersuutigalugu, inuup tarnaa toqusinnaavoq toqujuitsuusinnaalluniluunniit. Diaavulu piviusuuvoq piviusuunaniluunniit. Inuuneq siunertaqarpoq siunertaqaraniluunniit. Tamakku tamaasa eqqarsaatigalugit akissut ataasiinnaq ilumoortuusinnaavoq. Aappaa ilumoorpoq, aappaa ilumuunngilaq. Tamarmik ilumoorsinnaanngillat.

2. Qanoq paasisariaqarpa Jehova sallusuissutip Guutigigaa, apeqqutillu suut misissussavavut?

² Allaaserisap matuma siuliani sammineqarpoq Jehova sallusuissutip Guutigigaa sallusuissullu pillugu suut tamaasa ilisimagai. Jehova tamatigut sallusuitsuuvoq taamaalillunilu assortuisiminit Saatani Diaavulumit allaanerulluinnarluni. Aammattaaq Jehovap tukkorluni sallusuissut allanut ilisimalersippaa. Apustili Paulusip kristumioqatini ima kajumissaarpai: „Guuti maligassarisiuk taassumunnga qitornaasutut asasaasutut.“ (Efesosimiut 5:1) Jehovamut nalunaajaasutut ilumoortumik oqalunneq sallusuissullu malillugu inuuneq eqqarsaatigalugit qanoq Jehova malissinnaavarput? Sooq tamanna pingaaruteqarpa? Qanorlu neriorsoqqissaarneqarpugut Jehovap ilumoortut iluarigai? Paasiniariartigu.

3, 4. Paulusip Petrusillu ’ullussani kingullerni’ pisussat qanoq allaatigaat?

³ Ullumikkut inuuvugut upperisarsiornikkut eqqunngitsut atugaangaarfianni. Apustili Paulusi Guutimit isumassarsisitaalluni allappoq „ullussani kingullerni“ makkunani inuppassuit Guutimut tunniusimaneq ileqqorisuusaaginnassagaat tamaviaarukkumanaguli. Ilaasa sallusuissut assortortarpaat ’silatusaallaqqissinnaanermikkullu aserorsimallutik’. Aamma ’inuit ajortut peqquserluttullu ajortumut nakkaakkiartuinnartussaapput, ilaminnik tammartitsillutik imminnullu tammartillutik’. Ilinniartuaannaraluarlutik „sallusuissummik ilisimannilerneq saperluinnarput“. — 2 Timotheusi 3:1, 5, 7, 8, 13.

⁴ Apustili Petrusip aamma isumassarsisitaalluni ullut kingulliit allaatigai. Siulittuutaa naapertorluinnarlugu inuit sallusuissut ilassiumanngiinnanngilaat, aammali Guutip Oqaasia sallusuissummillu Biibilimeersumik oqaluussisartut mitallertarpaat. Mitallersut taakkua piaaralutik silarsuaq Noap nalaani imermit qarsunneqartoq pingaarutilittut isiginngilaat, tamatumalu takutippaa eqqartuussisoqaqqikkumaartoq. Pissutsinik piviusunik qimarratiginninnertik inornartunillu kissaateqarnertik ajunaarutigissavaat Guuti piffissani nalliuppat guutiitsunik suujunnaarsitsilerpat. — 2 Petrusi 3:3-7.

Jehovap kiffaasa sallusuissut nalunngilaat

5. Pruffiiti Danieli naapertorlugu ’naggatissap nalliunnissaata’ nalaani qanoq pisoqassava, siulittuullu tamanna qanoq eqquuppa?

⁵ ’Naggatissap nalliunnissaanik’ allaatiginninnermini pruffiiti Danielip Guutip kiffaasa akornanni ineriartorneq allaalluinnartoq siulittuutigaa. Taakkua upperisarsiornikkut sallusuissutip pilerseqqinneqarnera misigiumaarpaat, ima allakkami: „Amerlasuut [Guutip oqaasia] misissoqqissaarumaarpaat, ilisimassullu annertusissaqaaq.“ (Danieli 12:4, NV) Jehovap innuttai peqquserluttorsuarmit paatsiveerutsinneqarnatillu tappiillisinneqanngillat. Biibili misissoqqissaaramikku eqqortumik ilisimasaqalerput. Ukiuni hundredelinni siullerni Jiisusip ajoqersukkani ilisimatippai ’siuneqassusiallu ammarlugu Allakkat paasisinnaalersillugit’. (Lukasi 24:45) Ullutsinni Jehova tamatumunnga assingusumik iliuuseqarpoq. Oqaatsini, anersaani ilagiinilu aqqutigalugit nunarsuaq tamakkerlugu inuit millionilikkuutaat sallusuissummik nammineq ilisimariikkaminik paasinnissinnaalersippai.

6. Sallusuissutit Biibilimeersut suut Guutip innuttaasa ullumikkut paasivaat?

⁶ Guutip innuttarimmatigut amerlasuunik ilisimalinngisaannagassaraluatsinnik paasisaqalerpugut. Apeqqutinut silarsuarmi ilisimatuujusut ukiuni tusindilikkuutaani eqqarsaatigisarsimasaannut akissutissat nalunngilavut. Assersuutigalugu nalunngilarput sooq naalliuuteqartoqarnersoq, sooq inuit toqusartut, sunalu pillugu inuit nunarsuarmi eqqissineq pilersissinnaanngikkaat ataasiussuseqarlutillu inuusinnaanngitsut. Aamma siunissap qanoq ikkumaarneranik erseqqissumik paasitinneqarpugut — Guutip naalagaaffiata nunarsuarmi Paratiisi, inuit naassaanngitsumik naammalluinnarlutik inuuffigisinnaasaat, pilerseqqissagaa. Jehovamik Qutsinnerussaartumik ilisarisimannilerpugut. Taassuma pissusia nuannersoq, taassumalu pilluaqqussappatigut qanoq iliortariaqarnersugut ilikkarparput. Sallusuissut nalunngikkutsigu suut eqqortuunnginnersut aamma paasisinnaavavut.  Sallusuissummik inuunitsinni maleruaanerput piffissaajaataasut iluaqutaanngitsut pilersaarutiginissaannut illersuutaavoq, inuunerpullu pitsaanerpaamik atorlugu. Taamaalilluta aamma siunissamut nuanningaartumik neriuutissaqalerpugut.

7. Kikkut sallusuissut Biibilimeersoq paasisinnaavaat, kikkullu paasisinnaanngilaat?

⁷ Illit sallusuissut Biibilimeersoq nalunngiliuk? Taamaappat erlinnangaartumik ilisimasaqarputit. Atuakkiortup atuakkioraangami inuit immikkut ittut eqqarsaatiginerusarpai. Atuakkat ilaat inunnut ilinniagartuunut allagaapput, allat meeqqanut imaluunniit immikkut ilisimasalinnut allagaallutik. Biibili tamanit pigineqarsinnaavoq, allanneqarsimavorli inuit aalajangersimasut taassuminnga paasinninnissaat pingaartitsinissaallu siunertaralugu. Jehovap allanneqartissimavaa nunarsuarmi inuit maniguuttut qanilaartullu eqqarsaatigalugit. Inuit taamaattut Biibili paasisinnaavaat, qanorluunniit ilinniagaqarsimanertik, innuttaaqatigiinni inissisimaffitsik, kulturikkullu naggueqatigiissutsikkullu tunuliaquttat apeqqutaatinnagit. (1 Timotheusi 2:3, 4) Inuilli eqqortumik isumaqarfiginninngitsut Biibili paasinngisaannassavaat, qanorluunniit silassoritigalutillu ilinniagaqarsimatigigaluarunik. Inuit makitasuut pingaarniartullu Guutip oqaasiani sallusuissutit naleqangaartut paasisinnaanngilaat. (Matthæusi 13:11-15; Lukasi 10:21; Apustilit Suliaat 13:48) Taamaallaat Guutip atuagaq taama ittoq allanneqartissinnaavaa.

Jehovap kiffai ilumoortuupput

8. Sooq Jiisusi sallusuissutaasutut oqaatigineqarpa?

⁸ Jehova assigalugu nalunaajaasui aalajaatsut ilumoortuupput. Jiisusi Kristusi, Jehovamut nalunaajaasuuvoq malunnarnerpaaq, ilinniartitsinermigut inooriaatsimigut toqunermigullu sallusuissut uppernarsarpaa. Jehovap neriorsuutai ilisimatitsissutigai sallusuissullu oqaasianiittoq ilungersorluni illersortarlugu. Taamaattumik Jiisusi oqarsimavoq nammineq sallusuissutaalluni. — Johannesi 14:6; Saqqummersitat 3:14; 19:10.

9. Ilumoorluni oqalunneq Biibilimi qanoq oqaatigineqarpa?

⁹ Jiisusi ’saammaannermik sallusuissummillu ulikkaarpoq’, ’peqquserlunnermillu qanermiugisaqanngilaq’. (Johannesi 1:14; Esaja 53:9) Kristumiut ilumoortut Jiisusip maligassiaa malittarpaat ilumoortuunermikkut. Paulusip uppeqatini ima siunnersorpai: „Taamaattumik salluliortarneq iperarniarsiuk ilumoortumillu immissinnut oqaluffigisarlusi. Immitsinnummi avatioqatigiippugut!“ (Efesosimiut 4:25) Tamatuma siorna pruffiiti Zakaria allappoq: „Immissinnut ilumoortumik oqaluffigisaritsi!“ (Zakaria 8:16) Kristumiut ilumoortuupput Guutip iluarisaanik iliorusukkamik. Jehova sallusuitsuuvoq sallunerup kingunipilui nalunngilai. Taamaattumik naleqqulluarpoq kiffami ilumoorlutik oqalunnissaat naatsorsuutigimmagu.

10. Sooq inuit sallusarpat, qanorlu ajortunik kinguneqartarpa?

¹⁰ Inuppassuit namminneq soqutigisatik siuarsarniarlugit sallulioriaannaasarput. Inuit sallusarput pillarneqarumanatik, arlaannik iluaqutisarsiniarlutik allanilluunniit nersorneqarumallutik. Sallunerli ileqqupiluuvoq assuarnartuullunilu. Sallutuullu Guutimit iluarisaalersinnaanngillat. (Saqqummersitat 21:8, 27; 22:15) Ilumoortuusutut ilisarisimaneqarutta, allat oqaatsivut upperissavaat; tatigissavaatigut. Ataasiaannarlutali sallusugut paasineqarutta, allat oqaatsivut qulariuaannalissavaat. Afrikamiut ima ussateqarput: „Salluliulaarnerup ilumoortorpassuit uppernarunnaarsittarpai.“ Ussat alla imaappoq: „Sallutooq ilumoorluniluunniit oqalukkaluaraangami upperineqartanngilaq.“

11. Sooq ilumuussuseq tassaaginnanngila sallunaveersaarneq?

¹¹ Ilumoortuuneq tassaaginnanngilaq sallunaveersaarneq. Aamma qanoq inooriaaseqarnermut attuumassuteqarpoq. Kikkuunitsinnik ersersitsisarpoq. Oqaasiinnatsigut sallusuissut ilisimaneqartilersittanngilarput, aammali iliuutsitsigut. „Illit allanut ajoqersuisuusutit imminut ajoqersunngitsoorpit?“ apustili Paulusi allappoq. „Oqaluussisartutit: ’Tillissanngilatit,’ nammineq tillittarpit? Oqartartutit: ’Allasiussanngilatit,’ nammineq allasiortarpit?“ (Romamiut 2:21, 22, NV) Allat sallusuissummik oqaluussiffigisinnaassagutsigik, iliuutsitsinni tamani ilumoortuusariaqarpugut. Ilumoortuusutut peqqusersuitsuusutullu ilisarisimaneqarutta, tamanna inuit oqaatsitsinnik qisuariarfiginninnissaannut sunniuteqangaassaaq.

12, 13. Niviarsiaraq ilumuussuseq pillugu qanoq allaaserisaqarpa, taamalu qutsitsigisunik najoqqutaqarneranut suna pissutaava?

¹² Aamma Jehovap kiffaasa inuusuttut ilumoortuunerup pingaaruteqassusia paasisimavaat. Jenny, 13-inik ukiulik, allaaserisaqarluni allappoq: „Peqqusersuitsuuneq pingaartingaarpara. Ajoraluartumik ullumikkut peqqusersuilluinnartut amerlanngillat. Imminut neriorsorpunga peqqusersuittuaannarniarlunga, aamma naak ilumoorlunga oqalunnera maannakkorpiaq uannut ikinngutinnulluunniit iluaqutaasussaanngikkaluartoq. Ikinngutissarsiortarpunga sallusanngitsuinnarnik peqqusersuitsuinnarnillu.“

¹³ Jennyp ilinniartitsisuata allaaserisaq ima oqaatigaa: „Ileqqussat ileqqorissuserlu eqqarsaatigalugit qaqutigoortuuvoq ilittut ukiullit taama aalajangersimatiginerat. Nalunngilara najoqqutarisatit aalajangiusimassagitit, aalajaatsumik pissuseqaravit.“ Suumuna niviarsiaraq taanna taama aalajaatsigisumik pissuseqartikkaa? Allaaserisani aallaqqaaseramiuk  Jenny allappoq upperisani ’najoqqutarisaminut aalajangiisuusoq’. Maanna allaaserisaqarneranit ukiut arfineq-marluk qaangiupput. Ilinniartitsisup ilimagisaatut Jehovap Nalunaajaasuisa ilaattut ileqqussatigut maleruagassat qutsissut maleruartuarpai.

Jehovap kiffaasa sallusuissut ilisimaneqalersittarpaat

14. Sooq Guutip kiffai sallusuissummik siuarsaanissaminnut immikkut akisussaaffeqarpat?

¹⁴ Soorunami Jehovap Nalunaajaasuinnaanngitsut aammali inuit allat ilumoorlutik oqaluttarput peqqusersuitsuuniartarlutillu. Tamatumunngali atatillugu Guutimut kiffaasutut immikkut akisussaaffeqarpugut. Sallusuissummi Biibilimeersoq uagutsinnut paarititaavoq — sallusuissut naassaanngitsumik inuulersitsisinnaasoq. Taamaattumik ilisimasarput tamanna allanut ingerlateqqittariaqarparput. Jiisusi oqarsimavoq: „Kinaluunniit angisuumik tunineqarsimasoq angisuumik piumaffigineqassaaq.“ (Lukasi 12:48) Aap, Guuti pillugu ilisimasaminnik erlinnartumik paarsitinneqartut angisuumik piumaffigineqassapput.

15. Allat sallusuissummik Biibilimeersumik oqaluttuukkaangakkit suna nuannaarutigisarpiuk?

¹⁵ Nuannersuuvoq allat sallusuissummik Biibilimeersumik paasitinnissaat. Ukiuni hundredelinni siullerni Jiisusip ajoqersugaasa oqaluussisarnerattut nutaarsiassaq nuannersoq oqaluussissutigaarput — tusarliussaq nuannersoq inunnik neriuuteqalersitsisoq, tassa inunnut ’paarinerlugaallutillu naakkinarsisimangaartunut’ ’anersaapiluillu ajoqersuutaannit’ tappiillisinneqarlutillu tammartitaasimasunut. (Matthæusi 9:36; 1 Timotheusi 4:1) Apustili Johannesi allappoq: „Qitornakka sallusuissummi inuusut tusarlugit tassa tamanit uannut nuannernerpaaq.“ (3 Johannesi 4) Johannesimut nuannaarutaangaarsimavoq ’qitornaasa’ — immaqa nammineq sallusuissummik ajoqersorsimasaasa — aalajaannerat. Uatsinnuttaaq nuannaarutaangaartarpoq inuit Guutip oqaasianik qujamasuutiginnittut takugaangatsigik.

16, 17. (a) Suna pillugu tamarmiunngitsoq sallusuissut ilassivaat? (b) Sallusuissummik Biibilimeersumik oqaluussisarnerit qanoq nuannaarutigisinnaaviuk?

¹⁶ Sallusuissut tamakkeratik ilassissagaluaraat, Jiisusip Guuti pillugu sallusuissut oqaluussissutigaa naak nuannarineqanngikkaluarluni. Juutit assortuisut ima oqarfigai: „Sallusuissut oqaluuserigakku sooq upperinngilisinga? Guutimit pisup Guutip oqaasia tusaasarpaa; ilissili tusaanngilarsi Guutimit pisuunnginnassi.“ — Johannesi 8:46, 47.

¹⁷ Jiisusip maligassiaa malipparput aamma allat Jehova pillugu sallusuissummik erlinnartumik oqaluttuutinngitsoorumanngilavut. Soorunami naatsorsuutiginngilarput tusarliussavut tamarmik upperineqassasut, Jiisusimmi oqaluussiffigisaasa tamakkeratik oqaasii upperaat. Eqqortuliornerpulli nuannaarutigisarparput. Jehovap asannilluni kissaatigaa inuiannut sallusuissut oqaluussissutigineqassasoq. Kristumiut sallusuissummik paarsitinneqaramik, silarsuarmi taartumi qaammaqqusersuisunngorput. Oqaatsitsigut suliatsigullu sallusuissutip qaamaneranik qaamatitsinitsigut Ataatatta qilammiusup naalannaatissaanut allat ikiorsinnaavavut. (Matthæusi 5:14, 16) Tamanut ilisimatitsissutigaarput Saatanip  salluliuutaanit nigorsimaniarluta Guutillu oqaasianik minguitsumik ilumoortumillu illersuilluta. Sallusuissut ilinniarsimasarput allanullu oqaluttuarisarput tamatuminnga ilassinnittunut piviusumik kiffaanngissuseqalersitsisinnaavoq. — Johannesi 8:32.

Iliuutsinni tamani ilumoortuugit

18. Sooq aamma qanoq Jiisusip Nathanaeli iluaraa?

¹⁸ Jiisusip sallusuissut asavaa allanullu oqaluussissutigalugu. Nunarsuarmiitilluni ilumoortut immikkut iluarai. Nathanaeli pillugu Jiisusi oqarpoq: „Kiisami aajuna Israelikkuusoq peqquserlunneq ajortoq.“ (Johannesi 1:47) Nathanaeli, qularnanngitsumik aamma Bartholomæusimik taaneqartartoq, apustilit aqqaneq-marluk toqqarneqarmata taanna toqqarneqartut ilagaat. — Matthæusi 10:2-4.

19-21. Angut tappiitsuusimasoq ilumoorluni oqalukkami qanoq pilluaqquneqarpa?

¹⁹ Johannesip iivangkiiliuani kapitalimi ataatsimi angut peqqusersuitsoq alla Jiisusip immikkut iluarisaatut oqaluttuarineqarpoq. Atia naluarput, nalunngilarpulli angut taanna qinnuuloortartuusoq inunnguutsiminillu tappiitsuusoq. Inuit tupigusuutigeqaat Jiisusip tappissisimmagu. Tupinnartuliornikkut ajorunnaarsitsinera farisæerit ilaasa aamma tusarpaat. Sallusuissut uumigaat isumaqatigiillutillu aalajangerpaat Jiisusimut uppertut tamarmik synagogimit peersitaasariaqartut. Tamanna angutip tappiitsup angajoqqaavisa nalunngilaat. Taamaattumik annilaangallutik farisæerit salloqittarpaat nalunerarlugulu ernertik maanna qanoq ililluni tappissisimanersoq, kialuunniit tappissisimaneraa. — Johannesi 9:1-23.

²⁰ Taamaattumik angut tappissisinneqarsimasoq farisæerinit qaaqquneqaqqippoq. Kingunissaa soqutiginagu nakimaalluni ilumoortumik oqaluttuuppai. Nassuiaappai qanoq ajorunnaarsinneqarsimanerluni, Jiisusilu tappissisitsisuusoq. Tupigusuutigaa angutit nuimasut ilinniarluarsimasullu taakkua Jiisusip Guutimeersuunera upperinngimmassuk, qunusuillunilu kajumissaarpai paasisariaqaraat: ’Taanna Guutimit pisuunngikkuni qanoq iliorsinnaassanngitsoq.’ Farisæerit akissutissaqannginnamik kannguttaatsuunerarlugulu ittuujuitsuunerarpaat, ajallugulu anisippaat. — Johannesi 9:24-34.

²¹ Jiisusip qanoq pisoqarsimanera tusaramiuk asannilluni angutip tappiitsuusimasup ujarnissaa piffissaqarfigaa. Nanivaa upperneralu ineriartorteqqillugu. Assersuutigalugu Jiisusip toqqaannartumik oqarfigaa Missiarsiulluni. Angut taanna ilumoorluni oqalukkami pilluaqquneqangaarpoq. Qularutissaanngilaq ilumoorlutik oqaluttut Guutimit iluarineqartut. — Johannesi 9:35-37.

22. Sooq ilumoortuusariaqarpugut?

²² Sallusuissut malillugu inuuneq ilumooruttariaqarparput. Guutimut inoqatinullu ajunngitsumik attaveqarneq attattuassagutsigu ineriartortissagutsigulu tamanna tunngaviulluinnartuuvoq. Ilumoortut isertugaqartariaqanngillat. Ilumoortuupput, ilassiortuullutillu tatiginartuullutik, Jehovallu tamanna pingaartippaa. (Tussiaat 15:1, 2) Ilumuunngitsulli sallutuujupput, tatiginartuunatillu peqquserluttuullutik — taamaalillutillu Jehovamit iluarineqarnatik. (Ussatit 6:16-19) Taamaattumik ilumoortuunissaq aalajangiusimajuaruk. Sallusuissutip Guutia maligassariniarlugu sallusuissut ilisimasariaqarparput, ilumoorluta oqaluttariaqarluta sallusuissullu naapertorlugu inuusariaqarluta. (wE 1/8 03)

Uteqqiinermi apeqqutit

• Sooq qujamasuutigisariaqarparput sallusuissummik ilisimanninnerput?

• Jehova qanoq maligassarisinnaavarput aamma qanoq ilumoortuusinnaavugut?

• Allanik sallusuissummik Biibilimeersumik oqaluttuussisarneq qanoq iluaqutaasarpa?

• Sooq ilumoortuuneq pingaaruteqarpa?

[Atuaqqissaarnermi apeqqutit]

[Assiliartaq]

Kristumiut sallusuissummik Biibilimeersumik paarsitinneqarput kajumillutillu allat tamatuminnga oqaluttuuttarlugit

[Assiliartaq]

Angut tappiitsuusoq Jiisusip tappissisitaa ilumoorluni oqalukkami pilluaqquneqangaarpoq