Ajoqersuut juutiussutsimut, kristumiussutsimut islamimullu annguppoq
Ajoqersuut juutiussutsimut, kristumiussutsimut islamimullu annguppoq
„Upperisarsiorneq ilaatigut tassaavoq inuit ullut arlaanni toqusussaanerminnut tuppallersaatitut atortagaat, neriorsuutigineqarmat ilerrup ungataani pitsaanerusumik inuuneqartoq imaluunniit ernioqqiffeqartoq taakkuluunniit marluutillugit toqunermi anguneqarsinnaasut.“ — TYSKEQ ATUAKKIORTOQ GERHARD HERM.
1. Upperisarsiornerit amerlanersaasa toqup kingorna inuunermik neriorsuutertik ajoqersuummik tunngaviusumik sumik tunngaveqartippaat?
UPPERISARSIORNERIT toqup kingorna inuuneqarneranik neriorsuuteqartut tamarmik ajoqersuutigaat inuk toqujuitsumik tarneqartoq toqunermi silarsuarmut allamut pisartumik imaluunniit pinngortitamut allamut ingerlaqqittartumik. Soorlu immikkoortortami matuma siulianiittumi paasigipput inuup toqujuissuseqarneranik upperisaqarneq Kangiani upperisarsiornernut aallaqqaammulli atalluinnarsimavoq. Taavami juutiussuseq, kristumiussuseq islamilu eqqarsaatigalugit qanoq ippa? Ajoqersuut tamanna qanoq ililluni upperisarsiornerni tamakkunani qitiulersimava?
Juutiussutsip griikerit paasinnittaasii atulerpai
2, 3. Encyclopaedia Judaica naapertussagaanni Allakkat Illernartut Hebriiarisuut tarnip toqujuitsuuneranik ajoqersuummik imaqarpat?
2 Juutiussutsip oqaluttuarisaanera Abrahamimit aallartippoq, tassa ukiut 4000-t missaanniittut matuma siorna. Allakkat Illernartut Hebriiarisuut ukiunik naatsorsuisalerfitta siorna 1500-kkunni allanneqalerput, naammassineqarlutillu Sokratesip Platonillu tarnip toqujuitsuuneranik isumaliutersuutiminnik saqqummiussinerata nalaani. Allakkani tamakkunani tarnip toqujuitsuuneranik ajoqersuut nassaassaava?
3 Encyclopaedia Judaica-mi ima allassimasoqarpoq: „Aatsaat Biibilip allanneqarluni naammassineqarnerata kingorna tarnip toqujuitsuuneranik upperisaq ersarissumik pilerpoq . . . kingornalu juutit kristumiullu upperisaasa tunngaviinut ilaalerluni.“ Nangilluni allassimavoq: „Biibilip nalaani inuk tamarmiusutut isigineqarpoq. Tarneq timimit immikkuullarissutut isigineqanngilaq.“ Aallaqqaammut juutit upperaat toqusut makititaajumaartut, tamannalu „tarnip toqujuitsuuneranik upperisamut paarlaanneqassanngilaq,“ qinerlerfissiami tassani erseqqissarneqarpoq.
4-6. Tarnip toqujuitsuuneranik ajoqersuut qanoq ililluni juutiussutsip ’tunngaviinut’ ilaalersimava?
4 Taavami qanoq ililluni ajoqersuut tamanna juutiussutsip ’tunngaviinut ilaalersimava’? Oqaluttuarisaaneq tamatumunnga akissutissaqarpoq. Ukiumi 332-mi u.n.s. Alexanderersuup Kangiata Qiterliup ilarujussua imaaliallaannaq tiguarpaa. Jerusalemimut tikikkami juutinit tikilluaqqusaasorujussuuvoq. Juuteq oqaluttuarisaanermik ilisimatooq Flavius Josefus, ukiuni hundredelinni siullerni inuusoq, naapertussagaanni allaat juutit Alexanderersuarmut takutissimavaat siulittuut Danielip allagai-niittoq ukiunik 200-nik siusinnerusukkut allanneqarsimasoq, Alexanderersuullu ajugaaneranik ersarissumik allaatiginnittoq taassuminngalu ’griikerit kunngiat’-tut eqqartuisoq. (Daniel 8:5-8, 21) Alexanderersuup kingoraartaasa taassuma pilersaarutaa nangippaat, tassa naalagaaffik tamaat griikerinngorsassallugu, griikerit oqaasiisa, kulturiata isumaliutersuutaasalu tamaanga eqqunnerisigut. Juutit kulturiat griikerit kulturiannit sunnerneqanngitsoorsinnaajunnaarpoq.
5 Ukiunik naatsorsuisalerfitta siorna 200-kkunni Septuaginta, Allakkat Hebriiarisuut griikerisuunngortinneqarnerat siulleq, suliarineqalerpoq. Tamatuma kingunerisaanik juutiunngitsorpassuit juutit upperisaannik ilisimannilerlutillu ataqqinnilerput, allaallu ilaat juutit upperisaannut ilanngullutik. Illua’tungaanili juutit griikerit eqqarsartaasiannik paasinnilerput, ilaallu isumaliutersortartunngorput, taakkununnga nutaajulluinnartumik. Isumaliutersortartunngortut taakkua ilagaat Filon Alexandriamiu, ukiuni hundredelinni siullerni inuusoq.
6 Filonip Platon assut ataqqisimavaa juutiussuserlu griikerit isumaliutersortartuisa oqariartaasii atorlugit nassuiarniartarlugu. Atuakkami Heaven — A History-mi ima allassimasoqarpoq: „Platonip isumaliutersuutaasa ileqqutoqqallu Biibilerpalaartut asseqanngilluinnartumik katiternerisigut Filon kingorna kristumiunut [juutinullu] eqqarsarumatuunut aqqutissiuussivoq.“ Filon tarneq pillugu qanoq isumaqarpa? Atuakkami nangilluni allassimavoq: „Taanna isumaqarpoq toqup tarneq inunngornerup siorna pissuserisimasaanut utertittaraa. Tarneq anersaat silarsuaannut atammat timimi inuuneq sivikitsuinnaasarpoq, amerlasuutigullu pilluaaffiusarluni.“ Juutit eqqarsarumatuut tarnip toqujuissusianik upperisaqartut allat taaneqarsinnaasut tassaapput Isaac Israeli, juuteq nakorsaq tusaamasaq 900-kkunni inuusimasoq, aamma Moses Mendelssohn, juuteq tyskiusoq isumaliutersortartoq 1700-kkunni inuusimasoq.
7, 8. (a) Tarneq Talmudimi qanoq nassuiarneqarpa? (b) Kingorna juutit paasiuminaatsulersaarutaanni tarneq qanoq oqaatigineqarpa?
7 Atuagaq juutit inuunerannut eqqarsartaasiannullu annertuumik sunniuteqarsimasoq tassaavoq Talmud — ’oqaatsikkut inatsisinik’ taaneqartunik eqikkaalluni allattukkat kingorna oqaaseqaatitalersorneqarlutillu ilaartorneqartut, ukiunik naatsorsuisalerfitta kingorna ukiut 100-kkut aallarnerfigalugit ukiullu akulliit tikillugit rabbinit, tassa juutit ajoqersuisuinit, katersorneqarlutillu aaqqissorneqartut. „Rabbit Talmudimik suliarinnittut toqup kingorna tarnip piujuaannartarnera upperaat,“ Encyclopaedia Judaica-mi allassimavoq. Talmudimi allaat eqqartorneqarpoq toqusimasut inuusunut attaveqartartut. „[Rabbit] tarnip siusinnerusukkut piusimanera upperaat, qularnanngitsumik Platonilerisunit sunnerneqarnermik kingunerisaanik,“ Encyclopædia of Religion and Ethics-imi allassimavoq.
8 Kingorna juutit paasiuminaatsulersaarutaanni, Kabbalami, allaat toqup kingorna inooqqittarnermik ajoqersuut saqqummiunneqarpoq. Tamanna pillugu The New Standard Jewish Encyclopedia-mi ima allassimasoqarpoq: „Eqqarsaat Indiamit pilerfeqarsorinarpoq. . . . [Eqqarsaat] Kabbalami eqqaaneqaqqaarpoq atuakkami Bahir-imi, taavalu, Zoharimit kingornalu, paasiuminaatsorsiuut akornanni nalinginnaasumik akuerisaalersimavoq chassidistit upperisaanni atuakkiaannilu pingaaruteqalersimalluni.“ Ullumikkut Israelimi toqup kingorna inooqqittarnermik ajoqersuut juutit ajoqersuutaattut akuerisaalluinnalersimavoq.
9. Ullumikkut juutiussutsip immikkooqatigiivisa amerlanersaanni tarnip toqujuitsuunerarneqarnera qanoq isumaqarfigineqarpa?
9 Tassa tarnip toqujuitsuuneranik ajoqersuut griikerit isumaliutersuutaannit sunnerneqarnikkut juutiussutsimut eqqunneqarsimavoq, ullumikkullu juutit immikkooqatigiit assigiinngitsut amerlanersaannit akuerisaalluni. Ajoqersuut tamanna qanoq ililluni kristumiuunerartut ajoqersuutaannut ilaalersimava?
Kristumiuunerartut Platonip eqqarsaatai atulerpaat
10. Spaniamiu isumaliutersortartoq nuimasoq Jesusip tarnip toqusuitsuuneranut isumaa pillugu qanoq oqarsimava?
10 Kristumiussuseq ilumoortoq Jesus Kristusimit aallarnerneqarpoq. Miguel de Unamuno, 1900-kkunni isumaliutersortartoq atuakkiortorlu nuimasoq Spaniamiu, Jesus pillugu ima allassimavoq: „Taassuma timikkut makinnissaq juutit eqqarsartaasiannut naapertuuttoq upperaa, tarnip toqujuitsuunera [griikerit] Platonimut isumaqataasut eqqarsartaasiannut naapertuuttoq pinnagu. . . . Tamatumunnga uppernarsaatissat nassuiaatini assuarnaatsuni tamani nassaassaapput.“ Unamuno ima naggasiivoq: „Tarnermik toqujuitsuuneraaneq . . . tassaavoq Guutimik nalusut ajoqersuutaat isumaliutersortartorpalaartoq.“
11. Griikerit isumaliutersuutaat qanga kristumiussutsimut iseriartuaalersimappat?
11 „Guutimik nalusut ajoqersuutaat isumaliutersortartorpalaartoq“ tamanna qanga kristumiussutsimut eqqunneqarpa? New Encyclopædia Britannica-mi ima allassimasoqarpoq: „Kristusip inunngornerata kingorna ukiut hundredellit aappassaata qiteqqunnerani kristumiut griikerit isumaliutersuutaannik ilinniartinneqarsimasut misigilerput upperisartik griikerit isumaliutersortartuisa oqariartaasii atorlugit oqaatigisinnaasariaqarlugu, namminneq silassorissutsimikkut nalerisimaarumallutik Guutimillu nalusut isumataartissinnaajumallugit. Taakkua Platonip isumaliutersuutai atussallugit iluarinerpaavaat.“
12-14. Platonip isumaliutersuutaasa kristumiussutsimut akulerunneqarnerannut atatillugu Origenes Augustinilu qanoq pingaaruteqarpat?
12 Isumaliutersortartut kristumiuunerartut ajoqersuutaannut sunniuteqarnerpaasimasut ilaat marluk tassaapput Origenes Alexandriamiu (185-254 u.n.k.-p miss.) aamma Augustin Hippomiu (354-430 u.n.s.). Taakku pillugit New Catholic Encyclopedia-mi ima allassimavoq: „Kangiani Origenesip Kitaanilu Augustinip sunniineratigut aatsaat isummiunneqarpoq tarneq tassaasoq anersaakkut timi, pissusialu isumaliutersortartorpalaartumik nassuiarneqarluni.“ Origenesip Augustinillu tarneq pillugu isummatik suna tunngavigalugu ineriartortissimavaat?
13 Origenes ilinniartitaasimavoq Clemensimit Alexandriamiumit, ’ilagiinni ajoqersuisuunerni siullersaalluni griikerit tarneq pillugu ajoqersuutaannik atorsimasumit’, New Catholic Encyclopedia-mi allassimavoq. Platonip tarneq pillugu eqqarsaatai Origenesimut assut sunniuteqarsimassapput. „[Origenesip] tarneq pillugu ajoqersuut Platonimit pissarsiarisimasani tamaat kristumiut ajoqersuutaanni ineriartortissimavaa,“ upperisarsiornermik ilisimatooq Werner Jaeger The Harvard Theological Review-imi taama allassimavoq.
14 Kristumiuunerartut ilaasa Augustin itsaq eqqarsarumatuut annersaattut isigaat. Augustin 33-nik ukioqarluni „kristumiussutsimut“ nuunngikkallarami isumaliutersuutinik soqutigisaqarluinnarsimavoq Platonilerisunullu nutaanut ilanngussimalluni. * Kristumiussutsimulli nuunnermi kingorna Platonilerisutut nutaatut eqqarsartaatsini attatiinnarpaa. „Taassuma qarasaa tassaavorlusooq aatsitsivik Testamentitaami upperisap griikerillu isumaliutersuutaasa Platonerpalaartut ataatsimut aatsinneqarfiat,“ The New Encyclopædia Britannica-mi allassimavoq. New Catholic Encyclopedia-mi nassuerutigineqarpoq Augustinip ’[tarneq pillugu] ajoqersuutaa, 1100-kkut naanerat tikillugu Kitaani oqaluffeqarfinni najoqqutaasoq, annerpaatigut Platonilerisunit nutaanit pilerfeqartoq“.
15, 16. 1200-kkunni Aristotelesip ajoqersuutaanik soqutigisaqalerneq oqaluffeqarfiup tarnip toqujuitsuuneranik ajoqersuutaanik allanngortitsiva?
15 Aristotelesip ajoqersuutaa 1200-kkunni Europami siaruaatilerpoq. Tamatumunnga ingammik pissutaavoq Arabiamiut isumaliutersortartuisa atuakkiaasa, Aristotelesip allagai pillugit amerlasuunik oqaaseqaatitallit, latinerisut pineqarsinnaalernerat. Katuuleq upperisarsiornermik ilisimatooq isumaliutersortartorlu Thomas Aquinasimik atilik Aristotelesip eqqarsariaasianit assut sunnertissimavoq. Thomas Aquinasip allagai pisuullutik Aristotelesip eqqarsaatai Platonip eqqarsaataanit annermik ilagiit ajoqersuutaannut sunniuteqarput. Tamannali tarnip toqujuitsuuneranik ajoqersuummut sunniuteqanngilaq.
16 Aristotelesip ajoqersuutigaa tarneq timimut avissaartitassaanngitsumik atalluinnartuusoq toqullu kingorna avissaarluni ingerlaqqinneq ajortoq, inummilu naassaanngitsoqaruni, tassaasimassasoq silassorissuseq tigussaanngitsoq kinaassuseqanngitsorlu. Tarneq pillugu paasinnittaaseq tamanna oqaluffeqarfiup tarnermik kinaassusilimmik toqup kingorna inooqqittartumik upperisaanut naapertuutinngilaq. Taamaattumik Aristotelesip tarneq pillugu isumaa Thomas Aquinasip tamatumunnga naleqqussarpaa oqarluni tarnip toqujuissusia sianissutsikkut uppernarsarneqarsinnaasoq. Taamaalilluni tarnip toqujuitsuuneranik oqaluffeqarfiup ajoqersuutaa allanngunngilaq.
17, 18. (a) 1500-kkunni iluarsaaqqinneq tarneq pillugu ajoqersuummik allanngortitsiva? (b) Kristumiuunerartut assigiinngitsut amerlanersaat tarneq pillugu qanoq upperisaqarpat?
17 1300-kkunni 1400-kkunnilu, ukiuni nutaanngoqqiffiusuni, Platon soqutigineqaleqqippoq. Italiami kinguaariit tusaamasat Medicikkut allaat Platon-akademiimik Firenzemi pilersitsipput Platonip isumaliutersuutaanik ilisimatusarneq siuarsarniarlugu. 1500-kkunni 1600-kkunnilu Aristotelesimik soqutiginninneq milliartorpoq. 1500-kkunni iluarsaaqqinnermi tarneq pillugu ajoqersuut allanngortinneqanngilaq. Naaggaartut iluarsaaqqittuisa anniarfimmik ikumasumik ajoqersuut assortoraluarlugu naassaanngitsumik pillarneqarnissamik naassaanngitsumillu akissarsisinneqarnissamik ajoqersuutit akueraat.
18 Taamaattumik kristumiuunerartut immikkoortuisa amerlanersaanni tarnip toqujuitsuuneranik ajoqersuut suli nassaassaavoq. Isumaliutersortartoq Amerikamiu ima oqarsimavoq: „Nunani killerni inuit amerlanersaannut upperisarsiorneq tassaavoq toqujuissuseq — allamik naamik. Guuti tassaavoq toqujuitsuutitsisoq.“
Toqujuissuseq islamilu
19. Islam qanga pilerpa, kialu pilersippaa?
19 Islam pilersimavoq Muhamed 40-t missaanni ukioqarluni pruffiitinngortinneqarmat. Musliimit amerlanersaat isumaqarput Muhamed saqqummersitsivigineqartarsimasoq ukiut 20-23-t missaanniittut ingerlaneranni, ukiup 610-p u.n.k missaanit 632-mi u.n.k. toqussi tikillugu. Saqqummersitat tamakku Koranimi, atuakkami musliimit illernartitaanni, allattorneqarsimapput. Islamip pilernerata nalaani tarneq pillugu ajoqersuut Platonimit naggueqartoq juutiussutsimut kristumiussutsimullu eqqunneqareersimavoq.
20, 21. Musliimit ’inuunerup aappaa’ pillugu qanoq upperisaqarpat?
20 Musliimit upperisartik itsaq hebriiarinut kristumiunullu saqqummersinneqarsimasut inaarutaattut isigaat. Allakkat Hebriiarisuut aamma Allakkat Griikerisuut Koranimi innersuussutigineqartarput. Tarnilli toqujuitsuuneranik ajoqersuut eqqarsaatigalugu Korani allakkanit taakkunannga nigorsimalluinnarpoq. Koranip ajoqersuutigaa inuk tarneqartoq toqup kingorna inooqqittartumik. Aammattaaq Koranimi eqqartorneqarput toqusut makinnissaat, ulloq eqqartuutiffik tarnillu inaarutaasumik atugassaa — qilammi naatsiivimmi paratiisiusumi inuuneq imaluunniit anniarfimmi ikumasumi pillagaaneq.
21 Musliimit isumaqarput toqusup tarnaa Barzakh-imut, imaluunniit „avissaarneq“-mut, pisartoq, „sumiiffimmut pissutsimulluunniit toqup kingorna eqqartuunneqarnerullu siorna orninneqartartumut“. (Sura 23:99, 100, The Holy Qur-an, ataani ilanngussaq) Tassanigooq tarneq ilisimalluni „ilerrup pillaanera“-nik taaneqartumik atugaqartinneqartarpoq inuttut ajortuusimappat, imaluunniit aalajaatsuusimappat pilluarnermik misigisaqartinneqartarluni. Allaalligooq aalajaatsuusimasut inuunerminni ajortuliarisimasatik pillugit arlaatigut anniartinneqartarput. Ullormi eqqartuutiffimmi ataasiakkaat atugassaat, ’akunniffimmi’ tamatumaneereerneranni pisussat, aalajangerneqartarput.
22. Arabiamiut isumaliutersortartui tarneq pillugu assigiinngitsunik qanoq isumaliutersuuteqarsimappat?
22 Tarnip toqujuitsuuneranik ajoqersuut Platonilerisut sunniineratigut juutiussutsimut kristumiussutsimullu eqqunneqarsimavoq, islamimili aallaqqaammulli atuussimavoq. Tamannali isumaqanngilaq Arabiamiut isumaliutersortartuisa islamip ajoqersuutai griikerit isumaliutersuutaannut kattutitinniarsimanngikkaat. Iluamimmi oqaatigissagaanni Arabiamiut silarsuaat Aristotelesip suliaanik annertuumik sunnerneqarsimavoq. Arabiamiullu isumaliutersortartuisa nuimasut, soorlu Avicennap Averroësillu, Aristotelesip eqqarsaatai tunngavigisarsimavaat nassuiartarlugillu. Griikerilli eqqarsaataasa islamillu tarneq pillugu ajoqersuutaata kattutitinniaraluarneranni isumaliutersuutinik akerleriinnik pilersitsiartuaarsimapput. Assersuutigalugu, Avicenna oqarsimavoq tarneq kinaassusilik toqujuitsuusoq, tamannali Averroësip akerleraa. Taamaakkaluartorli tarnip toqujuitsuuneranik ajoqersuut musliimit upperisaannut ilaajuarsinnarpoq.
23. Juutiussuseq, kristumiussuseq islamilu tarnip toqujuitsuuneranik ajoqersuut pillugu qanoq isumaqarpat?
23 Tassa paasivarput tarnip toqujuitsuuneranik ajoqersuut juutiussutsimi, kristumiussutsimi islamimilu nassaassaasoq.
[Quppernerup ataani ilanngussaq]
^ imm. 14 Platonip isumaliutersuutaanut ukiuni 200-kkunni Romami Plotinosimit nutarterneqarsimasunut tapersersuisut.
[Atuaqqissaarnermi apeqqutit]
[Qupp. 14-mi assiliartaq]
Alexanderersuup tiguaanerata kingunerisaanik juutit kulturiat griikerit kulturiannit annertuumik sunnerneqarpoq
[Qupp. 15-mi assiliartat]
Origenesip, qulliup, Augustinillu Platonip isumaliutersuutai kristumiussuserlu kattutitinniarsarisimavaat
[Qupp. 16-mi assiliartat]
Avicenna, qulleq, oqarsimavoq tarneq kinaassusilik toqujuitsuusoq. Averroësip tamanna isumaqatiginngilaa