INUIT ilaat oqartarput takusinnaasatik kisiisa upperalugit. Tamannali sianiitsorpallanneruvoq. Piusummi amerlasoorpassuit takunikuunngisaannarpavut. Ataatsimik eqqaasaqarsinnaavit? —

Silaannarmi najuuttagarput? Malugisinnaavarput? — Assat qanivit saanut piseriarlugu supooriaruk. Malugisaqarsinnaavit? — Aap, silaannaq malugisinnaavat, kisianni takusinnaanngilat, ilaa?

Eqqartoreerparput anersaaqartoq, tassa kinaassusillit ersinngitsut. Anersaanik ajunngitsoqarlunilu ajortoqarpoq. Ajunngitsunik eqqaasaqalaarit. — Aap, Jehova Guuti Jiisusilu ajunngitsuupput, aamma ajunngitsunik inngileqarpoq. Ajortunimmi inngileqarpa? — Aap, Biibilimi allaqqavoq ajortunik inngileqartoq. Taakku sumik ilikkagaqarfigivigit? —

Nalunngilarput inngilit ajunngitsut ajortullu uagutsinnit nukittunerusut. Ajoqersuisorsuaq inngilit pillugit ilisimasaqartorujussuuvoq. Namminermi maani nunarsuarmi inunngunngikkallarami inngiliugami. Inngilit allat qilammeeqatigivai, millionilippassuillu nalunngisaralugit. Upperaajuk inngilit tamarmik immikkut ateqartut? —

Ilikkareerparput Guutip ullorissat tamaasa immikkut ateqartikkai. Taamaammat qularnanngitsumik inngilit tamarmik ateqarsimassapput. Nalunngilarpullu imminnut oqaluussinnaasut, Biibilimimi eqqaaneqarput ‘inngilit oqaasii’. (1 Korinthimiut 13:1) Suummita inngilit oqaluuserisarpaat? Ilimagaajuk uagut nunarsuarmiuusugut oqaluuserisaraatigut? —

 Nalunngilarput Saatanip inngiliisa, anersaapiluit, Jehovamut naalanngitsinniarsarisaraatigut. Oqaaluuserisarsimassavaat qanoq naalanngitsinniarsinnaanerluta. Kissaatigaat uagut assigissagivut Jehovamit nuannarisaajunnaarniassagatta. Guutimmi inngiliisa aalajaatsut? Oqaluuserisarpaatigut? — Aap, oqaluuserisarpaatigut. Ikiorusuppaatigut. Maanna tusassavat Guutip inngiliisa ilaasa qanoq inuit Guutimut asannittut kiffartuussisullu ikiorsimaneraat.

Anguteqarpoq Danielimik atilimmik. Babylonimi najugaqarpoq, tassanilu amerlasuut Jehova asanngilaat. Allaat inatsisiliortoqarsimavoq kinaluunniit Jehovamut Guutimut qinusoq pillarneqassasoq. Danielili Jehovamut qinussaarumanngilaq. Nalunngiliuk taava qanoq Danieli pineqarnersoq? —

Inuit ajortut itersaliamut løvit akornannut nakkartippaat. Løvit kaattorsuit kisimeeqatigai. Nalunngiliuk taava susoqarnersoq?  — Danieli ima oqaluttuarpoq: ‘Guutip inngilini aallartippaa løvillu qarni matullugit’. Ajoquserneqanngilarluunniit! Inngilit Jehovamut kiffartortunut tupinnaannartunik iliuuseqarsinnaapput. — Danieli 6:19-23.

Aamma Petrusi parnaarussaasimatillugu taamaaliorput. Eqqaamagunarpat Petrusi Ajoqersuisorsuup Jiisusip Kristusip ikinngutaasa ilagigaat. Petrusi oqartarmat Jiisusi Guutip ernerigaa amerlasuut nuannarinngilaat. Parnaarussaatippaat, sakkutuullu paarsipput qimaassanngimmat. Ikiortissaqarnerpami? —

Petrusip assai kalunneqarput, paarsisullu marluk akornanni sinippoq. Biibilimi allaqqavoq susoqarnersoq: ‘Tassanngaannaq Jehovap  inngilia takkuppoq, qaamanerullu ini qinngorpaa. Inngilip Petrusi saneraagut attorlugu itersarpaa oqarfigalugulu. “Makikkasuarit!”’

Taava kalunnerit Petrusip assaanit katapput! Inngilillu oqarfigaa: ‘Atisaleriarlutit aloquseriarlutillu malinnga!’ Paarsisullu unitsissinnaanngilaat. Illoqarfiup anisariaanut saviminiusumut pipput, taannalu nammineq ammarpoq! Inngilip Petrusi aniguisippaa, Petrusip nalunaajaanini nangissinnaaniassammagu. — Apustilit Suliaat 12:3-11.

Guutip inngiliisa aamma uagut ikiorsinnaavaatigut? — Aap, taamaaliorsinnaapput. Taava imaappa ajoqusernissatsinnut illersortuaannassagaatigut? — Naamik, sianiilliorutta ajoqusitsaalisinnaanngilaatigut. Sianiilliunngikkaluaruttaluunniit ajoqusersinnaavugut. Inngilimmi tamatuma pinngitsoortinnissaa suliassarinngilaat. Guutip immikkut ittumik suliassaqartippai.

Biibilimi allaqqavoq inngilip inuit tamaasa oqarfigigai Guutimut pallorfiginnissasut. (Saqqummersitat 14:6, 7) Qanoq ililluni inngili inunnut taama oqarsinnaagami? Qilammit suaartarami inuit tamarmik tusaasinnaasaannik? — Naamik, inngililli Jiisusip ajoqersugai nunamiittut Guuti pillugu allanik oqaloqateqarnissaannut siulersortarpaat; tassa tamanna nalunaajaanermik taasagarput. Inngilit isumagisarpaat inuit Guutimik ilisarisimannerusulluinnartut Guutimik ilisarisimannilernissaat. Uagut nalunaajaanermi peqataasinnaavugut, taava inngilit ikiorumaarpaatigut.

Taavami Guutimik asanninngitsut nalunaajaanissarput sapernarsisippassuk? Parnaarussaatillutaluunniit? Taava inngilit aniguisissavaatigut? — Taamaaliorsinnaapput. Tamatigulli aniguisitsineq ajorput.

Paulusi, Jiisusip ajoqersugaasa ilaat, taamanikkut parnaarussaavoq. Umiarsuarmut ilaatillugu aallartinneqarpoq, silarlulerporlu. Inngililli ingerlaannaq aniguisinngilaat. Suli amerlanerusut Guuti pillugu  tusarniassammata. Inngili ima oqarpoq: “Paulusi, erseqinak! Kaasarimut sassarumaarputit.” Aap, Paulusi kaasarimut, nunarsuarmi pissaaneqarnerpaamut, nalunaajaanissaminut periarfissinneqassaaq. Inngilit Paulusi sumiinnersoq nalunngittuaannarpaat, ikiortarpaallu. Aamma uagut ikiortassavaatigut eqqortumik Jehova kiffartuukkutsigu. — Apustilit Suliaat 27:23-25.

Inngilit aamma allamik pingaarutilimmik suliassinneqarput, tamannalu qanittukkut naammassissavaat. Guutip ajortunik, imminik pallorfiginninngitsunik, piiaanissaanut piffissarititaa qanillivoq. Inuillu inngileqarneranik upperinninngitsut, takusinnaannginnamikkit, paasilissavaat kukkusimallutik. — 2 Thessalonikamiut 1:6-8.

Tamanna uagutsinnut qanoq sunniuteqarami? — Guutip inngilii iligigutsigit ikiussavaatigut. Iligivavulli? — Jehova kiffartuukkutsigu iligissavavut. Jehovalu kiffartuukkutsigu allat aamma taamaaliussasut oqaluttuukkumassavavut.