TAKORLOORIARUK tunissutisillutit. Tamanna nuannaarutigissaviuk? — Qujariarlutit tunisisoq puiuinnassaviuk? Imaluunniit eqqarsaatigissaviuk taamalu iliorsimanera nuannaarutigalugu? —

Jehovap Guutip nalissaqanngivissumik tunisimavaatigut. Ernini Jiisusi Kristusi nunarsuarmut aallartippaa, Jiisusillu tassani inuunini uagut pilluta pilliutigaa. Nalunngiliuk sooq uagut pilluta toqusariaqartoq? — Tamanna tusassavat pingaaruteqartorujussuummammi.

Soorlu kapitalimi 23-mi ilinniaripput Adami ajortuliortoq Guutip inatsisai naammalluinnartut unioqqutikkamigit. Ajortilu uagutsinnut kingornutsippaa tamatsinnut ataataagami. Taamaattumik sumik pisariaqartitsisoraatigut? — Ataatartaartariaqarpugut. Taannalu naammalluinnartuusariaqarpoq nunamiitsillunilu ajortuliunngilluinnarsimassalluni. Kina taamatut uagutsinnut ataataasinnaasoraajuk? — Jiisusi.

Jehovap Jiisusi nunamut aallartippaa Adami taarserlugu uagutsinnut ataataasinnaaleqqullugu. Biibilimi ima allassimavoq: “‘Inuk siulleq, tassa Adami, tarninngorpoq uumassuseqartoq.’ Adamili kingulleq anersaanngorpoq uumassuseqalersitsisoq.” Kinaava Adami siulleq? — Tassaavoq Guutip nunamit, imaluunniit pujoralammit, pinngortitaa. Kinaavami Adamip aappaa, imaluunniit Adami kingulleq? — Tassa Jiisusi. Tamanna Biibilimi ersersinneqarpoq ima allassimasoqarami: “Inuk siulleq [Adami] issumit pivoq, nunamiittuulluni, inuup aappaa [Jiisusi] qilammit pivoq.” — 1 Korinthimiut 15:45, 47; 1 Mosesi 2:7.

Jiisusi Adamimit ajortimik kingornutaqanngilaq. Inunngorpoq inuunini Guutip qilammit Mariap illiaanut nuummagu nunami inunngorsinnaaniassammat.  Taamaammat inuuvoq naammalluinnartoq. (Lukasi 1:30-35) Taamaattumillu Jiisusi inunngormat inngilip savanik paarsisut ima oqarfigai: “Ullumi ilissinnut erniuvoq annaassisoq.” (Lukasi 2:11) Kisiannimi inoorlaaq Jiisusi qanoq annaassisunngussagami? — Inersimasunngoqqaartariaqarpoq soorlu Adami angut inersimasuusoq. Taamaalilluni Jiisusi ‘Adamiulerpoq kingulleq’.

Jiisusi, annaassiserput, aamma “Naassaanngitsumik Ataataq”-mik taaneqarpoq. (Esaja 9:5, 6) Aap, Jiisusi naammalluinnartoq Adamimut taarsiullugu ataatagilersinnaavarput taanna ajortuliornini pissutigalugu naammalluinnartuujunnaarmat. Ilumut ‘Adami kingulleq’ ataatatsitut nammineq toqqarsinnaavarput. Soorunami Jiisusi aamma ataataqarpoq, Jehova Guuti.

Jiisusi pillugu ilinniarnitsigut annaassisorilersinnaavarput. Eqqaamaviuk sumit annaanneqassasugut? — Tassa ajortimit toqumillu Adamimit kingornussatsinnit. Jiisusi naammalluinnartumik inuuneqarpoq, inuunerlu taanna pilliutigaa. Taamatut uagut pilluta iliuuseqarnera utertitsissummik taaneqartarpoq. Tamanna isumaqarpoq Jiisusip inuunini utertinniarluta akigigaa, tassa ajortimit toqumillu ‘utertilluta’. Jehovap tamatuma pisinnaanissaa isumagaa. — Matthæusi 20:28; Romamiut 5:8; 6:23.

Puiunngisaannassavarput Guutip erneratalu uagutsinnut iliuuserisimasaat, ilaa? — Jiisusi ajoqersukkami tamatuminnga eqqaamannittuarnissaannut pingaarluinnartumik iliuuseqarpoq. Maanna tusassavat sunaasoq.

 Takorlooriaruk Jerusalemitoqqami illumiillutit. Unnuppoq, illup qalianiipputit, inimi tassani Jiisusi apustiliilu nerrivik kaajallallugu katersuussimapput. Sava siataq, timiusat viinnilu aappaluttoq nerrivimmiipput. Immikkut ittumik nereqatigiipput. Nalunngiliuk sooq? —

Ukiut hundredelippassuit tamanna sioqqullugu Jehovap Israelikkunnut qanoq iliorsimaneranik eqqaassutissatut nereqatigiinneruvoq, tassa Egyptenimi inussiaataagallarmata. Taamani Jehovap innuttani ima oqarfigai: ‘Ilaqutariit immikkut tamarmik savamik toqutsissapput, aavatalu ilaa illup matserfiinut  tarnutissallugu.’ Nangillunilu oqarpoq: ‘Illussinnut iseritsi savatorlusilu.’

Israelikkut taamaaliorput. Unnuarlu taanna Guutip inngiliata Egypteni tamaat ingerlavigaa. Illut amerlanersaanni angajulliliat inngilip toquppai. Inngililli illup matserfia aammik tanissimasoq tikikkaangamiuk qaangiinnartarpaa. Illuni taakkunani meeqqanik toqusoqanngivippoq. Farao, Egyptenip kunngia, Jehovap inngiliata iliuuserisai pissutigalugit annilaangavoq. Taamaattumik Faraop Israelikkut ima oqarfigai: ‘Aallarniaritsimi! Inussiaajunnaarpusi. Egyptenimiit aallarasuaritsi!’ Taava Israelikkut qatigattuujutitik siutituujutitillu usilersoriarlugit aallarput.

Jehovalli kissaatiginngilaa aniguisitaasimanertik puiussagaat. Ima oqarpoq: ‘Ukiumut ataasiarlusi unnuk manna nerisassi assinganik nerisassaasi.’ Poorskisiummik taaneqarpoq ukiup tamatuma nalaa poorskimik taaneqartarmat. Oqaaseq ‘poorski’ oqaatsimik ‘qaangiineq’-mik naggueqarpoq. Inngilimmi illut matserfiinnik aammik taniisimasut ‘qaangiinnarpai’. — 2 Mosesi 12:1-13, 24-27, 31.

Jiisusip apustiliisalu poorskisiummik nereqatigiitsillutik aniguisitaaneq tamanna eqqarsaatigisimassavaat. Kingorna Jiisusi pingaaruteqangaartumik iliuuseqarniarpoq. Siullermilli Judasi anisippaa. Tassa apustili ilumuunngitsoq. Taava Jiisusip timiusat sinneruttut ilaat tiguaa qinullunilu. Timiusaq aggorpaa ajoqersukkaminullu agguaallugu. Ima oqarpoq: ‘Tigusiuk nerillugulu. Timiusaq tamanna isumaqarpoq timiga toqunikkut ilissi pillusi pilliutigisassara.’

Taava Jiisusip ermuseq viinnimik aappaluttumik imalik tiguaa. Qinoreeramilu ermuseq ingerlaartippaa oqarlunilu: ‘Tamassi imerfigissavarsi.’ Nangipporlu: ‘Viinni tamanna isumaqarpoq aaga. Qanittukkut aaga pilliutigissavara ajortissinnik annaanniarlusi. Taamaaliortaritsi uanga eqqaaniarlunga.’ — Matthæusi 26:26-28; 1 Korinthimiut 11:23-26.

 Maluginiarpiuk Jiisusip ajoqersukkani oqarfigigai eqqaaniarlugu taamaaliortuartassasut? — Poorskisiummik nerisarunnaassapput. Taarsiullugu ukiumut ataasiarlutik Jiisusip toqunerata eqqaaniarnissaanut nereqatigiinneq immikkut ittoq peqataaffigisassavaat. Tamanna Naalakkap unnukkorsiortitsineranik taaneqartarpoq. Ullumikkut aamma eqqaaniaanermik taasarparput. Sooq taamaaliortarpugut? — Tassa nalliuttorsiornerummat Jiisusip Ataataatalu, Jehovap Guutip, uagut pilluta iliuuserisimasaannik eqqaasitsissut.

Timiusaq Jiisusip timaanik uagutsinnut eqqaasitsissutaassaaq. Timini pilliutigiumavaa naassaanngitsumik inuusinnaaqqulluta. Viinnimi aappaluttoq? — Viinni aappaluttoq Jiisusip aavata qanoq naleqartigineranik uagutsinnut eqqaasitsissutaassaaq. Savaaqqap poorskisiutip aavanit, taamani Israelikkut Egyptenimit anilerlutik matserfinnut tarnutaannit, naleqarnerungaarpoq. Nalunngiliuk sooq? — Biibilimi allassimavoq Jiisusip aavagut ajortitsinnik isumakkeerfigineqarsinnaasugut. Ajortivullu tamarmik isumakkeerfigineqarpata napparsimasarunnaassaagut utoqqalisarunnaarluta toqussanatalu. Eqqaaniaanermik nalliuttorsioraangatta tamanna eqqarsaatigisassavarput.

Eqqaaniaanermi tamatta timiusamik viinnimillu ilangiissaagut? — Naamik. Ilangiisussat tassaapput Jiisusip ima oqarfigisai: ‘Uanga naalagaaffinni peqataassaasi issiavissaarsuarni issiallusi qilammi ilagalunga.’ (Lukasi 22:19, 20, 30) Tamanna isumaqarpoq Jiisusi qilammi kunngioqatigissagaat. Jiisusimik qilammi naalakkersueqateqarnissamik neriugisallit kisimik timiusamik viinnimillu ilangiissapput.

Timiusamik viinnimillu ilangiinngikkaluarluta eqqaaniaanermut najuuttassaagut. Sooq? — Jiisusip aamma uagut pilluta inuunini pilliutigimmagu. Eqqaaniaanermut najuukkaangatta takutittarparput Guuti Jiisusilu puiorsimanagit. Jehovap uagutsinnut tunissutaa angingaartoq eqqaamavarput.