JIISUSI peroriartortilluni tusaramiuk meeraalluni qanoq sernissorneqarsimalluni Jehovamut qinunikkut qujamasussimassasoraajuk? — Jiisusip tusaramiuk Egypteniliaalluni annaassimagaanni Mariamut Josefimullu qanoq oqarsimassasoraajuk? —

Maannakkut Jiisusi meeraaraajunnaareerpoq. Nunamilu maani najugaqarunnaareerpoq. Kisianni maluginikuuiuk inuit ilaasa suli Jiisusi meeraaqqatut nersutaatit nerisarfianiittutut isigigaat? — Juullip nalaani tamanna takuneqarsinnaasarpoq, Jiisusi naalungiarsuusoq sumiiffippassuarni assiliarineqartarmat.

Jiisusi suli uumasoraajuk naak maani nunamiikkunnaaraluartoq? — Toqusunit makititaasimavoq, maannalu qilammi pissaaneqangaarluni kunngiuvoq. Kiffartortini sernissorniarlugit qanoq iliorsinnaasoraajuk? — Taamani nunami inuugallarami takutippaa asannitsini sernissorsinnaallugit. Maanna tusassavat  ullut ilaanni ajoqersukkani umiatsiaqatigitillugit qanoq sernissuisoq.

Unnukkiartulerpoq. Galilæap Tasersuata sinaani ulloq naallugu ajoqersuisimavoq. Taseq 20 kilometerit missaatut takitigivoq 12 kilometerillu missaatut atitutigaluni. Ajoqersukkanilu oqarfigai: “Tasersuup akianut ikaarta.” Umiatsiamullu ikipput akiata tungaa toraarlugu aallarlutik. Jiisusi qasusorujussuuvoq, aquanukarpoq, innarporlu sinilerlunilu.

Ajoqersukkat eqqumaniarput umiatsiaq aqunniarlugu. Piffissap ilaa ingerlalluarpoq, anorlileriataarporli. Anori sakkortusigaluttuinnarpoq mallileraluttuinnarlunilu. Mallit umiatsiaq uligarpaat, immakkaluttuinnarporlu.

Ajoqersukkat umiatsiaq kivissasoralugu annilaangasorujussuupput. Jiisusili annilaanganngilaq. Suli sinippoq. Naggataatigut ajoqersukkat itersarpaat imalu oqarlutik: ‘Ajoqersuisoq, Ajoqersuisoq, annaatsigut. Umiulerpugut!’ Taava Jiisusi nikuippoq anori mallillu oqarfigalugit: “Nipangerit, qatsorit!”

 Anorlerunnaarasuarpoq, taserlu qatsorluni. Ajoqersukkat tupigusupput. Tamatumunnga assingusumik takusimanngisaannarput. Imminnut ima oqarfigipput: “Kinaaneramiuna anorersuarmik tasersuarmillu naalakkiisinnaasoq naalatsillugillu?” — Lukasi 8:22-25; Markusi 4:35-41.

Uagut nalunngilarput Jiisusi inuk nalinginnaasuunngitsoq, ilaa? — Nalunngiliuk pissaaneqangaarnini sumit pigaa? — Ajoqersukkat Jiisusimik najorneqartillutik annilaangasariaqanngikkaluarput. Tupinnartuliorsinnaavoq inuit allat sapigaannik. Ullut ilaanni Jiisusip tatsimiilluni aamma anorersuartoq iliuusianik allamik oqaluttuutissavakkit.

Tamanna ulloq alla pivoq. Unnuppoq, Jiisusillu ajoqersukkani oqarfigai umiatsiamik tatsip akianut siulliullutik aallassasut. Taava Jiisusi qaqqaliarpoq kisimiikkumalluni. Tassani eqqissisimanartumiilluni Ataataminut, Jehovamut Guutimut, qinusinnaavoq.

 Ajoqersukkat umiatsiamut ikipput taserlu ikaarlugu aallarlutik. Anorlileqqipporli. Anori sakkortusigaluttuinnarpoq. Unnuaavorlu. Ajoqersukkat tingerlaat aqqarpaat ipulerlutillu. Ingerlangaarsinnaanngillalli anori assoramikku. Umiatsiaq malissuarni uaavoq, imermillu uligarneqarput. Sapinngisartik tamaat nuna anguniaraluarpaat, iluatsissinnaanngilaalli.

Jiisusi suli kisimiilluni qaqqamiippoq. Sivisuumik tassaniippoq. Takuaalu ajoqersukkat ajornartorsiortut tatsimi mallersumi. Qaqqamiit aterpoq tatsillu sinaanukarluni. Jiisusip ajoqersukkani ikiorusuppai, tatsillu qaavatigut pisulluni ornilerpai!

Illit immakkut pisoriassagaluaruit qanoq pisoqassasoraajuk? — Kivissaatit, immaqalu ipillutit. Kisiannili Jiisusimut taamaanngilaq. Immikkut ittumik piginnaaneqarpoq. Umiatsiaq Jiisusip pisulluni ornitaa ungasingaatsiarpoq, aatsaallu ullaaralaakkut ajoqersugaasa takulerpaat tasersuakkut pisuttoq. Upperinngikkaluarpaat. Ersinermillu nilliapput. Jiisusilli oqarfigai: “Nikalloqinasi, uangaavunga; erseqinasi.”

Jiisusi umiatsiaannut ikimmat anorersuaq qatsorpoq. Ajoqersukkat tupigutsaqqingaarput. Jiisusillu saanut pallorput oqarlutillu: “Ilumut Guutip erneraatit.” — Matthæusi 14:22-33; Johannesi 6:16-21.

Tupinnarsimassaqaaq taamani inuulluni takullugulu Jiisusi taamaaliortoq, ilaa? — Nalunngiliuk sooq Jiisusi tamakkuninnga tupinnartuliortartoq? — Tassa ajoqersukkani asagamigit ikiorusukkamigillu. Aammali takutikkusukkamiuk pissaaneqangaarluni, pissaaninilu Guutip naalagaaffiani naalakkersuisunngoruni atorumaarlugu.

Ullumikkuttaaq Jiisusip kiffani Guutip naalagaaffianik oqaluussitillugit Saatanimit akornusersorneqaraangata pissaanini  atortarpaa ikiorniarlugit. Kiffanili napparsimatsaaliniarlugit imaluunniit napparsimanerini ajorunnaarsinniarlugit pissaanini atorneq ajorpaa. Allaammi Jiisusip apustilii tamarmik toqupput. Johannesip qatanngutaa, Jaaku, toqutaavoq, Johannesilu nammineq parnaarussaavoq. — Apustilit Suliaat 12:2; Saqqummersitat 1:9.

Ullumikkut aamma taamaappoq. Inuit Jehova kiffartorfigigaluarunikku kiffartorfiginngikkaluarunikkuluunniit tamarmik napparsimalersinnaapput toqullutillu. Qanittukkulli Jiisusip Guutip naalagaaffiani kunngitut allanngorluinnartoqarnissaa isumagissavaa. Taamanikkussamut annilaangasoqartariaarussimassaaq, Jiisusimmi pissaanini naalatsimi tamarmik iluaqutissaannut atussavaa. — Esaja 9:5, 6.