NAMMINEQ nuannarisaannannik iliorusuttaraluarpit? Ilaannikkut kissaatigisarpiuk allaninngaanniit naalakkersorneqarusunnak? Qanoq isumaqarpit ilumoorlutit oqassaguit? —

Kisianni sunaana pitsaanerpaasoq? Nammineq isummamik malinninnissaq? Imaluunniit pitsaanerussava ataatavit anaanavillu oqaasii naalakkukkit? — Guuti oqarpoq ataatat anaanallu naalassagitit, taamatullu oqaruni pissutissaqarluarsimassaaq. Paasiniariartigu suusinnaanersoq.

Qassinik ukioqarpit? — Nalunngiliuk ataatat qassinik ukioqarnersoq? — Anaanat, aataat aanaallu qassinik ukioqarpat? — Ilinninngaanniit sivisunerujussuarmik inuusimapput. Sivisunerusumik inuusimasut ilikkagaat amerlanerujussuusarput. Tusarnikuusaat takunikuusaallu misilittagaallu amerlanerujussuupput. Taamaattumik meeqqat utoqqaanerusut ilinniarfigisinnaavaat.

Ilinniit nukarliunerusumik nalunngisaqarpit? — Taakkunannga ilisimasaqarneruit? — Sooruna ilisimasaqarnerusutit? — Aap, illit sivisunerusumik inuunikuugavit. Nukarlerniit sivisunerusumik ilinniarnissannut piffissaqarnikuugavit.

 Kisianni kinaana ilinnit, uannit inunnillu allanit sivisunerusumik inuusoq? — Jehova Guuti. Uagutsinnit ilisimasaqarneruvoq. Taamaammat iliuuseqaqqugaangatigut qularineq ajorparput naalakkutsigu pitsaanerpaasoq, naak immaqa ilaatigut naalannissaa sapernarsinnaagaluartoq. Nalunngiliuk allaat Ajoqersuisorsuup ilaanneeriarluni naalannissani sapernartittaraa? —

Ilaanni Guutip Jiisusi aperaa sapernangaartumik iliuuseqarsinnaanersoq. Jiisusip tamanna qinnummini eqqaavaa, soorlu uani takusinnaagipput. Ataataminut qinuvoq suliassani sapernartoq suliarinngiinnarsinnaanerlugu. Oqarpoq: “Ataataq, piumaguit ermuseq manna uannit peeruk.” Tassani takusinnaavarput Jiisusimut ajornaatsuujuaannanngitsoq Guutip piumasaanik iliuuseqarnissaq. Jiisusili qinnummi naggataani qanoq oqarpa? Nalunngiliuk? —

Naggataatigut Guutimut ima oqarpoq: “Uanga piumasara pinnani illit piumasat pili.” (Lukasi 22:41, 42) Aap, kissaatigaa Guutip piumasaa pissasoq, nammineq piumasani pinnani. Guutillu piumasaatut iliorpoq.

Tamanna qanoq ilinniarfigisinnaavarput? — Ilinniarfigisinnaavarput eqqortuliussalluta Guutip oqaasia malikkutsigu, uagutsinnulluunniit ajornakusooraluarpat. Aamma allamik ilikkagaqarsinnaavugut. Suusoraajuk? — Ilikkarsinnaavarput Jiisusi tassaanngitsoq Guuti. Inuit ilaat oqartarmata Jiisusi Guutiusoq. Kisianni Jehova Guuti ernerminit Jiisusimit angajulliuvoq, Jiisusimillu ilisimasaqarnerulluni.

Guuti naalakkaangatsigu takutittarparput asallugu. Biibilimi ima allaqqavoq: ‘Guutimut asanninneq tassaavoq inassutai  maleruaratsigit, inassutaalu artornartuunngillat.’ (1 Johannesi 5:3) Taamaammat erseqqippoq tamatta Guuti naalattariaqaripput. Aamma illit taamaaliorusupputit, ilaa? —

Biibilerput saqqummilaariartigu takullugulu Guuti qanoq oqarsimanersoq meeqqat qanoq iliortarnissaat pillugu. Efesosimiunut allakkani kapitali 6 versi 1-imiit 3-mut atuariartigu. Ima allaqqavoq: “Qitornaasusi, angajoqqaasi naalassigit Naalakkami, tamanna iluarmat. ‘Ataatat anaanallu ataqqikkit!’ Tassa inassut neriorsuutitalik siulleq: ‘Atugarissaaqqullutit inuummersoqqullutillu nunami.’”

Takusinnaasattut Guuti Jehova oqarpoq ataatannut anaanannullu naalassasutit. ‘Ataqqikkit’ qanoq paasisariaqarami, allassimaneratut? Isumaqarpoq oqartussaasuunerat akuerisariaqarit. Guuti aamma neriorsuivoq angajoqqaatit naalattarukkit ingerlalluarumaartutit.

Maanna oqaluttuutissavakkit inuit naalattuunertik pillugu annaanneqartut pillugit. Taakkua itsarsuaq illoqarfissuarmi Jerusalemimi inuusimapput. Innuttaasut amerlanerit Guuti tusaajumanngilaat. Taamaattumik Jiisusip taakku paasitippai Guutip illoqarfimmik aseruiumaarneranik. Jiisusilli aamma oqarfigai eqqortuliorneq nuannarigunikku qanoq annattoqarsinnaasoq. Ima oqarpoq: ‘Takugussiuk Jerusalemi sakkutuunit unguneqarsimasoq, taava nalussanngilarsi piuneerussaaffissaa qanillisoq. Taamaalippat Jerusalemimiit qaqqanut qimaanissamut piffissanngussaaq.’ — Lukasi 21:20-22.

Jiisusip oqarneratut pisoqarpoq. Romamiut sakkutuui Jerusalemi saassukkiartorlugu tikiupput, illoqarfillu ungullugu. Kisiannili tassanngaannaq arlaannik pissuteqarsimagunarlutik tunuariataarput. Illoqarfimmiittut amerlanerit isumaqaramik ulorianartueruttoq, tassaniiginnarput. Jiisusimuna qanoq ilioqqugaluarai? — Illit tassani illoqarfimmi ineqartuuguit qanoq iliorsimassagaluarpit? — Jiisusimut upperluartut angerlarsimaffitik qimappaat, qaqqanullu Jerusalemimiit ungasissorujussuarmiittunut qimaallutik.

 Ukiorli ataaseq ingerlavoq Jerusalemi suli saassunneqarnani. Ukiorlu ataaseq ingerlaqqippoq suli susoqarani. Aamma ukioq ataaseq ingerlaqqippoq suli susoqarani. Inuit isumaliulersimassapput illoqarfimmiit qimaasut sianiilliorsimasut. Kisiannili ukiut sisamassaanni — Romamiut sakkutuui takkuteqqipput! Illoqarfik ungoqqippaat. Massakkullu qimaanissaminnut kingusinaarput. Taamanilu sakkutuut illoqarfik tamaat aserorpaat. Illoqarfimmiittut tamangajammik toqupput; sinnerilu tigusatut aallarunneqarput.

Jiisusimummi naalattut qanoq pippat? — Isumannaatsumiipput. Jerusalemi ungasissorujussuuaat, taamaammat suneqanngillat. Naalanneq illersuutigaat.

Naalanneq aamma ilinnut illersuutaasinnaava? — Immaqa angajoqqaavit aqqusinermi pinnguaqquneq ajorpaatsit. Sooruna taama oqartartut? — Taama oqartarput biilimit aporneqarsinnaagavit.  Immaqa ullut arlaanni imatut eqqarsassaatit: “Maani biileqanngilaq. Susoqarnavianngilaq. Meeqqammi allat aqqusinermi pinnguarput, arlaannaalluunniit aportinnikuunngilaq.”

Jerusalemimiittut amerlanerit aamma taama eqqarsarput. Romamiut sakkutuui tunuarmata suna tamarmi eqqisserpasippoq. Inuit amerlasuut illoqarfimmiiginnarput, taava sooq allat qimaassappat? Mianersoqquneqareerput, kisiannili tusaajumanngillat. Taamaalillutik inuunertik annaavaat.

Allamik assersuuteqariarta. Ikitsisinik pinnguarnikuuit? — Immaqa ikitseriarlutit inneq isiginnaassallugu nuannaraat. Kisianni ikitsisinik pinnguarneq ulorianartorujussuusinnaavoq. Illu ikuallalersinnaavoq, toqusinnaavutillu!

Ilaannikkuinnaq naalattarnissaq naammanngilaq. Naalattuaannaruit tamanna ilinnut illersuutaangaassaaq. Kinaana ima oqartoq: ‘Qitornaasusi, angajoqqaasi naalattarsigit’? — Jehova Guuti taama oqarpoq. Aamma eqqaamassavat taama oqarpoq asagamitit.