OQARATAARNEQ qanoq isumaqarpa? Nalunngiliuk? — Assersuuteqariarta. Pikkorippallaarfiginngisannik suliaqarlutit misilinnikuuiuk? Immaqa pississaarlutit ungasissumulluunniit arsamik isimmitsillutit? — Misiliininni takunnittoqarpat imaassinnaavoq taanna ima oqartoq: “Ha! Ilinnit pikkorinneruvunga!” Taama oqaraanni oqarataarneruvoq.

Oqarataarfigineqarlutit nuannaraajuk? — Naamik, ilaa? Isumaqarpit illit allat taama iliorfigigukkit nuannarissagaat? — Naamik, nuannerneq ajorpoq oqartoqaraangat ‘ilinnit pikkorinneruvunga’, ilaa? — Isumaqarpit taamaaliorneq Jehovap nuannarigaa? —

Ajoqersuisorsuaq allanit pikkorinnerusorisunik nalunngisaqarpoq. Taakku imminnut nersualaarput, allallu tamaasa nikagalugit. Ullut ilaanni Jiisusip taakku oqarataarnerup ajorluinnartuuneranik oqaluttuuppai. Tusassavat.

Farisiiari ilanngaaserisorlu pillugit oqaluttuaavoq. Farisiiarit angutaapput Guutip inatsisaanik ajoqersuisartut allanillu iluarnerusutut naapertuilluarnerusutullu pissusilersortarlutik. Jiisusip oqaluttuaani farisiiari Jerusalemimiittumut naalaffimmukarpoq Guutimut qinujartorluni.

Aammali Jiisusi oqaluttuarpoq ilanngaaserisoq Guutimut qinujartorluni tassunnartoq. Inuit amerlanerit ilanngaaserisut nuannarinngilaat. Isumaqarput taakku periarfissaqaleraangamik inoqatiminnut peqquserluttuaannartut. Ilumoorporlu ilanngaaserisut unneqqarissuujuaannanngitsut.

Naalaffimmi farisiiari Guutimut ima qinulerpoq: ‘Guutiaa! Qutsavigaakkit inuttut allatulli ajortuliortartutut innginnama! Peqquserlunneq  ajorpunga allatulluunniit eqqunngitsuliussananga. Uumatulluunniit ilanngaaserisutut inngilanga. Aap, iluartuuvunga. Sapaatip-akunneranut marloriarlunga nerineq ajorpunga eqqarsaatiginiarlutit. Pissarsiamalu tamarmik qulingi naalaffimmut tunissutitut tunniuttarpakka.’ Oqartoqarsinnaavoq farisiiari taanna allanit pitsaanerusorisoq, ilaa? — Allaat Guutimut taama oqarpoq.

Ilanngaaserisorli allaanerulluinnarpoq. Qinutilluni qilaap tungaanut qiviarusunngilarluunniit, ungasillillunili nikorfaannarluni sikingalluni qinuvoq. Ajortini aliasuutigingaaramigit sakkissamigut imminut tilluppoq. Guuti oqarfigerusunngilaa ajunngitsuulluni. Aap, ima oqarpoq: ‘Guuti, ajortiliuvunga, naakkittarfiginnga.’

Angut sorleq Guutimit iluarisaasoraajuk? Farisiiari imminut iluartuutittoq? Ilanngaaserisorluunniit ajortuliorsimanerminik aliasuutiginnittoq? —

Jiisusi oqarpoq ilanngaaserisoq Guutip iluarigaa. Soormitaava? Aap, Jiisusi nassuiaavoq: ‘Kinaluunniit allanit pikkorinnerorusuttoq nikanarsisitaassaaq. Imminulli nikanartittoq akitsisinneqassaaq.’ — Lukasi 18:9-14

Jiisusimuna oqaluttuamini sumik ilinniartinniaraatigut? — Ilinniartinniarpaatigut allanit ajunnginnerulluta misigissanngitsugut. Imaassinnaavoq allanit ajunnginnerulluta oqarneq ajortugut. Iliuutsittali takutissinnaavaa taama isumaqartugut. Amerlanersavut qularnanngitsumik  ilaatigut taamaaliortarput, ilaa? — Maanna tusassavat apustili Petrusi ilaanni taamaaliortoq.

Jiisusip apustilini oqarfigeqqammerpai akeqqaminit tiguneqaruni tamarmik qimarratigissagaanni. Petrusi oqarataarluni ima oqarpoq: ‘Tamarmilluunniit qimakkaluarpatsit, uanga qimanngisaannassavakkit!’ Petrusi imminut tatigivallaarpoq, kukkullunilu, Jiisusimi qimaannarpaa. Taamaakkaluartorli Jiisusimut uterpoq. Tamanna atuakkami matumani kapitali 30-mi atuarsinnaavarput. — Matthæusi 26:31-33.

Nalitsinneersumik assersuuteqariarta. Oqariarta atuartutit ilinniartitsisullu ilaata illit atuaqatillu apeqquteqarfigigaasi. Illit ingerlaannaq akisinnaavatit, atuaqatilli akisinnaanani. Soorunami nuannerpoq akisinaalluni. Pikkorinnerusutulli misigissavit allap akissutaa nalummagu? — Imaluunniit asannittuliornerua alla ajortumik oqaluuserissallugu imminut pingaartinniaannarluni? —

Farisiiari taamaaliorpoq. Oqarataarutigaa ilanngaaserisumit ajunnginnerunini. Ajoqersuisorsuulli tamanna ajornerarpaa. Imaassinnaavoq inuk allamit arlaannut pikkoriffigisaqarnerusoq. Imali paasisariaqanngilaq taanna allamit pikkorinnerusoq.

Allanit ilisimasaqarnerugutta taava pissutissaqarpugut oqarataarnissatsinnut? — Eqqarsaatigeriaruk kia niaqqumik qaratsamillu eqqaamassutigisatsinnik tunisimagaatigut. Uagut nammineq? — Naamik, ilaa? Guutimuna. Ilisimasattalu amerlanersaat allanit ilikkarnikuuavut. Immaqa atuakkani atuarpavut. Imaluunniit arlaata tamanna pillugu oqaluttuussimavaatigut. Nammineerlutalu ilikkarsimagutsigu qanoq ililluta ilikkarparput? — Qarasarput Guutip tunniussaa atorlugu.

Ilungersuussisoqarpat nersualaarnissaa pitsaasuuvoq. Iliuusia nuannaralugu oqarfigiuk. Immaqa ikiorsinnaavat suli ajunnginnerusumik  iliornissaanut. Allat ilinnut taamaaliornissaat kissaatigaat, ilaa? —

Assersuutigalugu ilaat allanit nukittunerupput. Immaqa qatanngutinnit nukittuneruvutit. Tamannali oqarataarutiginiassaviuk? — Naamik. Allisarpugut nukittuunngortarlutalu nerisaratta. Jehova Guuti siallersitsisarmat seqinnersitsisarmallu naatitat naasinnaanngortarput, taamaalillutalu nerisassaqalertarpugut, ilaa? — Jehova qutsavigissavarput angisuunngorlutalu nukittuunngoratta. — Apustilit Suliaat 14:16, 17.

Arlaannattaluunniit nuannarinngilaa allat oqarataartut tusaassallugit, ilaa? — Eqqaamaniartigit Jiisusip oqaasii uku: “Qanorlu inunnut iliorfigeqqugussi ilississaaq taamatut iliorfigisigit.” Tamanna maleruarutsigu Ajoqersuisorsuup oqaluttuarisaani farisiiari assigilinngisaannassavarput. — Lukasi 6:31.

Ilaanni Jiisusi oqarfigineqarpoq ajunngitsuusoq. Jiisusip qanoq akivaa? Ima oqarpa: ‘Aap, ilumoorputit’? — Naamik, ima oqarpoq: “Allamik ajunngitsoqanngilaq, ataaseq kisimi, tassa Guuti.” (Markusi 10:18) Ajoqersuisorsuaq naammalluinnartuugaluarluni  imminut nersualaanngisaannarpoq. Imminulli nersualaarnani Ataatani Jehova nersualaarpaa.

Uaguttaaq taamaaliorsinnaavugut? — Aap, oqarataarnata imminullu nersualaarnata Pinngortitsiserput, Jehova Guuti, nersualaarsinnaavarput. Kusanartumik takusaqaraangatta, soorlu seqernup tarrikkiartornera allamilluunniit pinngortitaanik alianaatsunik, allanut oqarsinnaavugut: ‘Tassa Guutitta, Jehovap, pinngortitai alianaatsut!’ Piareersimajuaannarta Jehovap iliuuserisarpassuinut, siunissamilu iliuuseriumaagaanut, ajunngitsumik oqaluuserininnissatsinnut.