TAMATTA pilluarusuppugut, ilaa? — Nalunngiliuk sooq inuit taama amerlatigisut pilluanngitsut? — Pilluarnerup isertugaataa nalugamikku. Isumaqarput pillualertoqartartoq amerlasoorpassuarnik pigisaqaraanni. Immaqa arlaannik pisaaraangamik nuannaangaalertarput sivikitsumilli.

Maanna isertugaat tusassavat. Tassa Ajoqersuisorsuup oqaatigisaa: “Tunisineq pilluarnarneruvoq tigusinermit.” (Apustilit Suliaat 20:35) Qanoruna pillualertoqartartoq? — Aap, allanik tunisisarnikkut allanullu iliuuseqartarnikkut. Tamanna nalunngiliuk? —

Eqqarsaatigilaariartigu. Jiisusi oqarpa tunisikkutta pillualissanngitsugut? — Naamik, taama oqanngilaq. Tunisinnissat nuannaraat, ilaa? — Aap, inuit tamarmik nuannaraat.  Allat nuannarilluakkatsinnik tunigaangatigut nuannaalertarpugut.

Jiisusili oqarpoq tunisineq pilluarnarnerusoq. Allanit tamanit annerusumik uagutsinnik tunisisoq kinaasoraajuk? — Ilumut, tassa Jehova Guuti.

Biibilimi allassimavoq Jehovap inuit ‘inuunermik anersaartornermillu allanillu tamanik tunisarai’. Aamma seqinermik sialummillu tunisisuuvoq taamaalilluni naatitat naasinnaalerniassammata uagullu nerisinnaaniassagatta. (Apustilit Suliaat 14:17; 17:25) Tupinnanngilaq Jehova Biibilimi ‘Guutitut pilluartutut’ taaneqarmat. (1 Timotheusi 1:11) Pilluartuuneranut pissutaasut ilaat tassaavoq tukkortuunera. Uaguttaaq tunisinikkut pilluarneq misigisinnaavarput.

Suuteqarattami allanut tunniussinnaasatsinnik? Qanoq isumaqarpit? — Tunissummik akilimmik tunisiniarutta sipaartariaqarpugut akissaqalernissatta tungaanut.

Tunissutilli tamarmik pisiarineqartariaqanngillat. Assersuutigalugu kiattorujussuuppat imermik nillertumik imissalluni iluassaqaaq. Imerusuttumukaruit immillugulu tunisinerup pilluarnassusia misigissavat!

Ullut ilaanni immaqa anaanat kaageeralioqatigisinnaavat. Nuannerpoq, nerillugillu mamaqaat. Namminerli tamaviisa nerineraninngarnit nuannernerusoqarpoq. Sunaava? — Tassa ikinngutivit ilaannut ilaat tunniullugit. Ullut ilaanni taamaaliorusussinnaavit? —

Ajoqersuisorsuup apustiliisalu tamarmik tunisinikkut pilluarneq misigereerpaat. Nalunngiliuk inunnut sumik tunisinersut?  — Pitsaanerpaamik tunisipput. Tassa Guuti pillugu sallusuissut. Tamanna ilisimavaat, nuannaarlutillu allanut ingerlateqqippaat. Taamaaliorput kimilluunniit aningaasanik tunineqaratik.

Apustilip Paulusip ikinngutigilluagaasalu ilaata, ajoqersukkap Lukasip, ullut ilaanni arnaq aamma nuannaarluni allanik tuniserusuttoq naapippaat. Kuussuup eqqaani naapippaat. Paulusi Lukasilu takanunga aterput tusaramikku takanani Guutimut qinusarfeqartoq. Taamaapporlu takanunga pigamik arnat Guutimut qinusut takuaat.

Taava Paulusip Jehova Guuti taassumalu naalagaaffia pillugit nutaarsiassamik nuannersumik oqaluussiffigilerpai. Ataaserlu ilaat tusarnaarluaqqissaarpoq; Lydiamik ateqarpoq. Kingornalu Lydia iliuuseqarusulerpoq takutikkusukkamiuk nutaarsiassaq nuannersoq tusakkani qanoq nuannaarutigitigalugu. Pilereqaluni Paulusi Lukasilu ima oqarfigai: “[Jehovamut] ilumoortuusorigussinga taava illunnut iseritsi tassaniillusilu.” Allaat aggertinniarlugit kimigiiserfigai. — Apustilit Suliaat 16:13-15.

Lydiap nuannaarutigaa Guutimut kiffartortunik pulaartoqarnini. Nuannarai Jehovap Jiisusillu ilinniarnissaannut ikiormanni paasitimmannilu inuuneq naassaanngitsoq qanoq anguneqarsinnaanersoq. Nuannaarluni Paulusi Lukasilu nerisassaannik tunivai siniffissaqartillugillu. Lydiap tunisinissani kissaatigivikkamiuk tunisinerup pilluarnarnera misigaa. Tamanna eqqaamassallugu pitsaassaaq. Imaassinnaavoq allat oqarfigigaatigut tuniseqqulluta. Namminerli kissaatiginngikkutsigu pillualissutiginavianngilarput.

Assersuutigalugu oqariarta mamakujuttuuteqartutit nerinissaat qilanaarisannik. Oqarfigigaluarukkit meeraq alla ilaannik tuneqqullugu taava nuannaarlutit tunniutissagaluarpigit? — Ullulli ilaanni mamakujuttuuteqarlutit ikinngutiginerpaasavit ilaat naapikkukku taava immaqa nammineq isumassarsissaatit ilaannik tunerusullugu. Tamanna nuannaarutigissavat, ilaa? —

 Inuk alla ima asatigisinnaavarput tamanik tuniumallugu sumilluunniillu erliguunnagu. Guutimut asanninnerput alliartorpat taamatut misigissaagut.

Ajoqersuisorsuup arnaq piitsoq taama misigisoq nalunngilaa. Ullut ilaanni arnaq taanna Jerusalemimi naalaffiup eqqaaniittoq takuaa. Aningaasannguanik marluinnarnik peqarpoq; tassa pituai. Tamaasali tiguai aningaasanullu nakkaatitsivimmut naalaffimmut tunissutinut atorneqartussamut nakkartillugit. Oqarfigineqanngilaq taamaaliussasoq. Amerlanerit tassaniittut taamaaliornera sianiginngilaat. Tunissuteqarporli Jehova ilumut asagamiuk. Tunisinerup pilluarnarnera misigaa. — Lukasi 21:1-4.

Assigiinngitsorpassuartigut tunissuteqarsinnaavugut. Ilaat eqqaasinnaavigit? — Ilumut kissaatigalugu tunisigutta tamanna pillualissutigissavarput. Taamaattumik Ajoqersuisorsuup ima oqarfigaatigut: “Tunisiuartaritsi.” (Lukasi 6:38, NV) Taamaaliorutta allat nuannaartissavavut. Namminerli suli nuannaarnerulissaagut tassami tamatuma inuk pillualersittarmagu!