TAKORLUULAARIARUK niviarsiaraq anaanaminut ima oqartoq: “Atuareeruma ingerlaannaq angerlarumaarpunga.” Soraaramili ikinngutini pinnguaqatigerujuulerpai. Kingornalu anaanaminut ima oqarluni: “Ilinniartitsisup aperigaminga atuareeruma ikiuussinnaanersunga.” Isumaqarpit taama oqassalluni eqqortuliornerusoq? —

Takorlooriarulluunniit nukappiaraq inimi arsarluni eqqugaqartoq aseruilluni. Eqqortuussava kingorna ima oqaruni: “Naluara kina taamaaliorsimanersoq”? —

Ajoqersuisorsuup oqaluttuuppaatigut suna eqqortuunersoq. Ima oqarpoq: ‘Angernersi isumaqartissavarsi: Aap, naaggaarnersilu isumaqartissavarsi: Naagga. Taakkununnga ilanngunneqartut ajortumit pipput.’ (Matthæusi 5:37) Jiisusi taama oqarami qanoq isumaqarpa? — Isumaqarpoq eqqortumik oqartassasugut.

Ilumoortumik oqalunnerup qanoq pingaaruteqartiginera pillugu Biibilimi oqaluttuaqarpoq.  Tassani oqaluttuarineqarput inuit marluk Jiisusimut ajoqersugaanerartut. Tusassavat qanoq pisoqarnersoq.

Jiisusip toqunerata kingorna qaammatit marluinnaat qaangiupput. Nunanit ungasissunit inuppassuit Jerusalemiliarput nalliuttorsiorneq pingaartoq juutit piinsimik taasagaat nalliuttorsiutigiartorlugu. Apustili Petrusi pissanganartumik oqalugiarpoq Jiisusi Jehovap toqusunit makitissimasaa pillugu. Jerusalemiliarsimasullu amerlanersaat aatsaavissuaq Jiisusi pillugu tusagaqarput. Maannalu suli tusagaqarnerorusupput, qanormi iliussappat?

Naatsorsuutigisaminnit sivisunerusumik illoqarfimmiipput. Piffissallu ingerlanerani tikeraat ilaat aningaasaataarupput, taamaattumillu nerisassaqarnissaminnut ikiorneqartariaqarlutik. Ajoqersukkat Jerusalemimiittut ikiuerusupput. Taamaattumik ajoqersukkat ilarpassuisa pigisamik ilaat tuniniarpaat, aningaasallu Jiisusip apustiliinukaallugit. Apustilillu ikiorneqarnissaminnut pisariaqartitsisunut agguaappaat.

 Anania nulialu, Safira, ilagiinnut Jerusalemimiittunut ilaapput. Nunaatimik ilaa tunivaat. Oqarfigineqanngillat taamaaliussasut. Namminneq taamaaliorniarlutik aalajangerput. Imaanngilarli Jiisusimut ajoqersuganngorlaat asagamikkit taamaaliortut. Taamaaliorpulli inuit isumaqalerniassammata tukkortorujussuullutik. Anania Safiralu aalajangerput aningaasat tamakkertuusaarlugit allanut ikiuutissatut tunniunniarlugit. Ilumoortumilli ilaannaat tunniuppaat. Sinneri tunniutinngilaat. Tamanna qanoq isumaqarfigaajuk? —

Anania apustilinukarpoq aningaasallu tamakkertuusaarlugit tunniullugit. Soorunami Guutip aningaasat tamaasa tunniutinngikkaat nalunngilaa, Petrusilu paasitippaa Anania sallusoq.

Taava Petrusi ima oqarpoq: ‘Anania, sooq Saatanimit taamaaliortinneqarpit? Nunami illit pigaat. Tuniniartariaqanngikkaluarpat. Tunereerakkulu aningaasat sumut atornissaat nammineq aalajangertussaavat. Sooq aningaasat tamaasa ilaannaajunngitsoq tunniuttuusaarpigit? Salluvutit, uagutsinnuinnaanngitsoq, aammali Guutimut.’

Taama ilungersunartigaaq. Anania salluvoq. Oqaatsini malillugit iliunngilaq. Taamaalioraanni unneqqaserlunneruvoq. Biibilimi eqqartorneqarpoq kingorna qanoq pisoqarnersoq. Ima allassimavoq: ‘Ananiap tusaramiuk Petrusi qanoq oqartoq uppippoq toqullunilu.’  Anania Guutimit pillarneqarpoq, akiarlugu anninneqarpoq ilineqarlunilu.

Akunnerit pingasut missaat qaangiummata Safira iserpoq uimi qanoq pisimanera nalullugu. Petrusip aperaa: ‘Nunaatersi tunigassiuk aningaasat taama amerlatigisut pissarsiaraasigit?’

Safira akivoq: “Aap, tassa taamaappoq.” Ilumuunngilarli! Aningaasammi ilaat tunniutinngilaat. Safira uimitulli salluvoq, taamaammat Guutip aamma toqutippaa. — Apustilit Suliaat 5:1-11.

Ananiap Safirallu taama pineqarnerat sumik ilinniarfigisinnaavarput? — Ilinniarfigisinnaavarput salluneq Guutip iluarinngikkaa. Kissaatigaa ilumoortumik oqaluttuaannassasugut. Inuppassuaqarpoq oqartunik sallulaarsinnaasugut. Isumaqarpit ilumoortut? — Nalunngiliuk sallu ataaseq peqqutigalugu nappaatit, anniaatit toqulu nunami atuutilersut? —

Eqqaamajuk Diaavulu arnamut siullermut, Evamut, salluliortoq. Oqarfigaa orpiup paarnaanik Guutip neriffigeqqunngisaanik nerigaluaruni toqunavianngitsoq. Evap tamanna upperaa. Paarnaanik nerivoq, Adamilu tunivaa. Ajortilinngorput, meeraallu tamarmik ajortilittut inunngussapput. Ajortuliornerallu pissutigalugu Adamip kinguaavi tamarmik anniaateqartalerput tamatumalu kingunerisaanik toqusarlutik. Tamakku qanoq aallartippat? — Sallusoqarmat.

Jiisusi ilumoorpoq oqarami ‘Diaavulu sallutuujusoq, aap, sallumut ataataasoq’! Salluliortuuvoq siulleq. Kingornatigut sallusut allat tamarmik Diaavulutut iliorput. Ilumuunngitsumik oqarusulissagaanni iluaqutaassaaq tamanna eqqaamassallugu. — Johannesi 8:44.

 Qaqugukkut sallusariaqartutut misigisinnaavit? — Eqqunngitsulioruit, ilaa? — Ajutoornikkut arlaannik aseruisoorsinnaavutit. Kia aserorsimagaa aperineqaruit taava qatanngutit pisuutissaviuk? Nalusuusaassaviulluunniit? —

Imaassinnaavoq aamma ilinniagassaqartutit, ilaannaalli suliarisimallugit. Taava oqassavit ilinniagassatit tamaasa suliarisimallugit? — Anania Safiralu eqqaamasariaqarpavut. Unneqqarinngillat, tamaasali tunniunnerarpaat. Taakkuninnga pillaanermigut Guutip ersersippaa qanoq eqqunngitsuliortigisut.

Qanorluunniit ilioraluarutta sallugutta ilaannaaluunniit oqaluttuarigutsigu ajorneruliinnassaaq. Biibilimi ima allassimavoq: ‘Ilumoortumik immissinnut oqaluffigisaritsi.’ Aamma ima allassimavoq: “Immissinnut salluliorfigisaqinasi.” Jehova sallunngisaannarpoq, taamaaliornissarpullu naatsorsuutigaa. — Efesosimiut 4:25; Kolossemiut 3:9.