UKIUT 2000-it matuma siorna meeraaqqamik meeqqanit allanit allaanerusumik inunngortoqarpoq. Alliartorpoq immikkut ittuulluni, aap, inuusimasuni pingaarnersaalluni. Taamanikkut timmisartoqanngilaq, biileqarani, fjernsyneqarani, qarasaasiaqarani internetteqaraniluunniit.

Nukappiaraq Jiisusimik atserneqarpoq. Inunni silatunersanngorpoq, inunnit allanit ilinniartitsillaqqinnerulluni. Allaat paasiuminaatsut nassuiarsinnaavai paasiuminarsisillugit.

Jiisusip sumiikkaluaraangamiluunniit inuit ilinniartittarpai. Ilinniartitsisarpoq sissamiikkaangami umiatsiamiikkaangamiluunniit. Aamma ilinniartitsisarpoq pulaaraangami, imaluunniit angalaqateqaraangami. Soorunami biileqanngilaq, taamanikkullu qimutsuitsoqanngilaq busseqaraniluunniit. Angalagaangami pisuttarpoq, aqqutaanilu inuit ilinniartittarlugit.

Inunnit allanit amerlasuunik ilinniarsinnaavugut. Kisianni tamanit pingaarnerpaat, Jiisusimit ilinniarsinnaavavut — taanna “Ajoqersuisorsuarmik” taasarparput. Uagutsinnullu ilitsersuutai Biibilimi nanisinnaavavut. Biibili atuarneqartoq tusarnaaraangatsigu soorlu Jiisusi tusarnaarlutigu.

Sooruna Jiisusi ajoqersuisorsuusoq? Pissutaasut ilagaat pikkorissumit ajoqersorneqarsimanera. Nalunngilaalu tusarnaarnerup qanoq pingaaruteqartiginera. Kinaana tusarnaartarsimagaa? Kinaana ajoqersuisorigaa? — Ataatani. Jiisusillu Guuti Ataatagaa.

 Jiisusip nunamukanngikkallarami qilammi Guuti najorsimavaa. Taamaattumik Jiisusi inunnit allanit allaanerulluinnarpoq, inunnimmi allanik qilammiittoqarsimanngilaq. Qilammi Jiisusi Ataataminut ernerulluarsimavoq tusarnaartarlugulu. Taamaammat Ataataminit ilikkakkaminik inuit allat ajoqersortarsimavai. Ataatannut anaanannullu tusarnaaraangavit, taava Jiisusi ilaartassavat.

Jiisusip ajoqersuillaqqinneranut pissutaasoq alla tassaavoq inunnik allanik nuannarinninnera. Inuit Guuti pillugu ilisimannilernissaannik ikiorusuppai. Jiisusip inersimasut nuannarai, aammali meeqqat nuannaralugit. Meeqqallu taassuma ilaginissaa nuannarisorujussuuaat, oqaloqatigiittaramik tusarnaartarmatillu.

Ullut ilaanni angajoqqaat ilaasa meeqqatik Jiisusimukaappaat. Kammalaataali isumaqarput Ajoqersuisorsuaq meerannguanik oqaloqateqarnissaminut ulapippallaartoq. “Peerniaritsi”, meeqqanut oqarput. Kisianni Jiisusi qanoq oqarpa? — Ima oqarpoq: “Meerannguit uannut qaaginnarlit; akornuseqinasigillu.” Jiisusip meerannguit ilagerusuppai.  Silatoorujussuugaluarluni pingaaruteqartorujussuugaluarlunilu meeqqat ajoqersornissaat piffissaqarfigaa. — Markusi 10:13,14.

Nalunngiliuk sooq Jiisusip meeqqat ajoqersortarai tusarnaartarlugillu? Ilaatigut pissutaasut ilagaat nalunnginnamiuk Guuti, Ataatani qilammiusoq, pillugu tusarnaarunik nuannaalissasut. Illit qanoq ilillutit allat nuannaartissinnaavigit? — Nuannaartissinnaavatit Guuti pillugu ilikkakkannik oqaluttuullugit.

Ilaanni Jiisusip meerannguaq atorpaa kammalaatini pingaarutilimmik ilinniartinniarlugit. Meeraq ajoqersukkami akornannut pisippaa, tassa ilinniartitami akornannut. Taava Jiisusip inersimasut taakku oqarfigai allanngussasut meerannguatut taassumatut ilissasut!

Jiisusi taama oqarami qanoq isumaqarpa? Angut angisoorsuaq inersimasoq meeqqatut ilersinnaava? Imaluunniit meeraq angisooq meeraaqqatut ilersinnaava? — Tusariassagit, meeraq utoqqaanermiit ilisimasaqarnerunngilaq, kisiannili ilikkagaqarusuttarpoq. Jiisusi ajoqersukkaminut oqarpoq, meeqqatulli maniguutsigissasut, meeqqatullu ilinniarusutsigissasut. Aap, tamatta allat ilinniarfigisinnaavavut. Tamattalu paasisariaqarparput Jiisusimit ilikkarsinnaasatta nammineq isumassarsiatsinnit pingaarnerujussuunerat. — Matthæusi 18:1-5.

Jiisusip ajoqersuisorsuuneranut pissutaasut ilagaat oqaloriaasiata tusarnaarlugu pissanganartuunera. Sunaluunniit paasiuminartumik nassuiarsinnaavaa.  Inuit Guuti pillugu paasinninnissaannik ikioraangamigit, timmissat, naasut allarpassuillu inuit nalunngisaat atorlugit oqaluttarpoq.

Ilaanni Jiisusi sivinganikkoortillugu inuppassuit ornippaat. Taava ingippoq oqaluutilerlugillu imaluunniit oqalugialerluni. Assimi takusinnaavat. Qaqqami oqaluutsimik taaneqartarpoq. “Qilaap timmiai isigeriarsigit”, Jiisusi oqarpoq. ‘Siaruarterinatillu. Katersuinngillat. Ataatassilu qilammiittup nerisittarpai. Ilissili taakkunannga pingaarnerujussuunnginnerpisi?’

Aamma oqarpoq: ‘Malugeriarsigit narsaatip naasui liljat qanoq naajartortartut; sulisanngillat qissisarnatilluunniit. Takoriarsigilli atisai qanoq kusanartigisut! Kunngiluunniit pisoorsuaq Salomo taama kusanartigisunik atisaqanngilaq. Guutip naasut isumagisarunigit, taava aamma ilissi isumagissannginnerpaasi?’ — Matthæusi 6:25-33.

 Paasiviuk Jiisusip sumik ilinniartinniaraatigut? — Kissaatigaa atisassavut, nerisassavullu isumakuluutigissanngikkivut. Guutimmi nalunngilaa atorfissaqartikkivut. Jiisusi oqanngilaq nerisassaqarniarluta, atisassaqarniarlutalu sulissanngitsugut. Kisianni oqarpoq Guuti pingaarnerutissagipput. Taamaaliorutta Guutip atisanik nerisassanillu amigaateqartissanngilaatigut. Illit tamanna upperaajuk? —

Inuit Jiisusip oqaluutereermatik qanormitaava eqqarsarpat? — Biibilimi allaqqavoq inuit tupigusuttorujussuusut taama ajoqersuimmat.  Tusarnaarnissaa pissanganarsimassaaq! Oqaasiilu inuit eqqortumik iliornissamut iluaqutigaat. — Matthæusi 7:28

Tassa Jiisusip ajoqersuutaasa ilinniarfiginissaat pingaartorujussuuvoq. Qanoq iliorsinnaasugut nalunngiliuk? — Uagutsinnut ilinniartitsissutigisai atuakkami allaqqapput. Atuagaq sorleq pineqarsoraajuk? — Tassaavoq Biibili. Tassa imaappoq Jiisusi ilinniarfigisinnaavarput Biibilimi allaqqasut tusarnaartarutsigit. Ilami allaat pissanganartumik oqaluttuaqarpoq, Guuti nammineq oqarnikuusoq Jiisusimut tusarnaartassasugut. Tusariassagit qanoq pisoqarnersoq.

Ullut ilaanni Jiisusip kammalaatini pingasut qaqqaliaqatigai. Taakkulu ateqarput Jaaku, Johannesi Petrusilu. Kingusinnerusukkut taakku tusarfigisarumaarpavut, Jiisusimmi kammalaatigilluagaasa taakku ilagaat. Kisianni tassa qaqqamiitsillutik Jiisusip kiinaa qaammariasaarpoq. Atisaalu seqinertut qaamatigilerput. Uani takoriassagit.

Taava nipi qilammit tutsiuppoq Jiisusip kammalaataasalu tusaasinnaasaat: “Tassa ernera asasara nuannarisara. Taanna tusarsiuk.” (Matthæusi 17:1-5) Kia nipigineraa nalunngiliuk? — Guutimuna nipaa! Aap, Guutiuna nammineq oqartoq, ernini tusaassagipput.

Uagummi ullumikkut? Guutip oqarneratut ernera Ajoqersuisorsuaq tusarnaartarparput? — Tamatta atorfissaqartipparput. Eqqaamaviuk qanoq taamaaliorsinnaasugut? —

Guutip ernera tusarnaarsinnaavarput Biibilimi inuunera pillugu allassimasut atuartarutsigit. Ajoqersuisorsuaq amerlasuunik iluaqutaasunik uagutsinnut oqaasissaqarpoq. Tusarukkit nuannaalissaatit, suli nuannaarnerulissaatit kammalaativit ilaat ilikkakkannik Biibilimeersunik oqaluttuukkukkit.