NALUNNGILIUK paqumisunneq qanoq isumaqartoq? — Paqumisuttoqartarpoq inuk alla nuannarinngikkaanni allatut isikkoqarmat allamiutulluunniit oqaluttarmat. Tassa inuk alla suli iluamik ilisarisimalernikuunagu ajortumik isummerfigigaanni paqumisuttoqartarpoq.

Isumaqarpit inuit allat allaanerunerat pissutigiinnarlugu ajorinissaat eqqortuusoq? — Naamik, ilaa? Paqumisunneq ajortuullunilu asannittuliornerunngilaq. Allat asanninngitsuliorfigissanngilavut uagutsinnit allaanerunerat pissutigiinnarlugu.

Nalunngisaqarpit illit amivit qalipaateqatiginngisaanik amilimmik, imaluunniit allamiutut oqaasilimmik? — Immaqalu nalunngisaqarputit nappaateqarnini imaluunniit ajutoornikuunini pissutigalugu allatut isikkoqartumik. Illit ilinnit allaanerusut inussiarnerfigalugillu asannittuliorfigisarpigit? —

Ajoqersuisorsuaq, Jiisusi Kristusi, tusarnaartarutsigu allanut inussiarnersuussaagut. Sumiuunerat imaluunniit amiisa qalipaataat soqutigissanngilarput. Tamanut inussiarnersuussaagut. Inuit tamarmik taama isumaqanngikkaluarput Jiisusilli tamatuminnga ilinniartippaatigut. Maanna tusalerparput qanoq iliorsimanersoq.

Ilaanni juuteq allanut paqumisuttartoq Jiisusimukarpoq imalu aperaluni: ‘Qanoq iliussaanga naassaanngitsumik inuusinnaajumallunga?’ Jiisusip nalunngilaa angut taanna oqarfigineqarusuttoq taamaallaat naggueqatini imaluunniit nunaqqatini kisiisa inussiarnisaarfigisariaqarlugit. Taamaattumik Jiisusip toqqaannartumik akinagu ima aperaa: ‘Guutip inatsisaani qanoq iliussasutit allassimava?’

 Angutip ima akivaa: “[Jehova] Guutit asassavat uummatikkut iluunngarlutit . . . tullillu ilittut asassavat.” Jiisusi oqarpoq: ‘Eqqortumik akivutit. Taamaaliorit, taava naassaanngitsumik inuussaatit.’

Nalunngiliuk ‘tullit’ kinaanersoq? — Qanoq pisoqarsimanersoq tusariaruk, taava paasissavat. Angutip taassuma inuit allaanerusut asannittumik inussiarnersumillu iliorfiginissaat kissaatiginngilaa, taamaattumillu asannittuliunnginnissaminut inussiarninnginnissaminullu utoqqatsissutissarsiorluni. Jiisusi ima aperaa: “Kinami tulleraara?” Kissaatiginnguatsiarpaa Jiisusi ima akissasoq: ‘Tullitit tassaapput ikinngutitit,’ imaluunniit ‘Tullitit tassaapput ilittut isikkullit tamarmik.’ Jiisusili taama oqanngilaq. Juutimilli Samariamiumillu oqaluttuaq oqaluttuaraa. Tusaariassagit.

Angut juutiusoq illoqarfimmit Jerusalemimit Jerikoliarpoq. Taavali inupiluit piiaasut takkupput saassullugulu. Aningaasaatai atisaalu tiguaat, naggataatigullu unatarujussuarlugu aqqusinermilu toqungajattoq qimallugu.

 Kinguninngua palasi saneqquppoq angullu ajoqusingaatsiarsimasoq takullugu. Illit qanoq iliorsimassagaluarpit? — Palasi aqquserngup illuatungaanut ingerlaannarpoq angullu ikiorniarnagu. Uninngilarluunniit.

Angut upperniartorujussuaq alla saneqquppoq. Levikkuuvoq naalaffimmi Jerusalemimiittumi kiffartortoq. Unilluni ikiuiniarnerpa? — Naamik, iliuuseqarani palasitulli ingerlaannarpoq.

Naggataatigut Samariamiu saneqquppoq. Assip qullerpaap talerpiata tungaaniittoq Samariamiu takusinnaaviuk? — Juuteq ajoqusersimaqisoq nunami nalasoq takuaa. Taamanikkununa juutit Samariamiullu imminnut iluarivallaanngitsut. (Johannesi 4:9) Samariamiu  qanoq iliussanerpa? Aamma ikiornagu qaangiinnassanerpaa? Imminut oqarfigissanerpa: ‘Sooq juuteq ikiussavara? Taassuma ikiussagaluarpaanga ajoqusersimasuuguma?’

Samariamiu taama eqqarsanngilaq. Angut ikiortissaqanngitsoq takuleramiuk nalligingaalerpaa qimaannarsinnaanagulu toquinnartillugu. Angut orneriarlugu ikii passutilerpai uuliamik viinnimillu tanillugit; taamaalilluni ikii mamilluarniassammata. Kingornalu ikii nimerpai.

Samariamiup mianersorluni angut ajoqusersimasoq siutituujutiminut qaqitippaa arriitsumillu ingerlarusaalerput. Akunnittarfimmut, tassa unnuisarfimmut, tikipput. Samariamiup angut tassunga inissippaa pisariaqartitaanillu tamanik isumagalugu.

Taava Jiisusip juuteq oqaloqatigisani ima aperaa: ‘Illit qanoq isumaqarpit? Taakkua pingasut arlaat kina ajoqusersimasup tulleraa?’ Illit qanoq akisimassagaluarpit? Palasiua, Levikkuua imaluunniit Samariamiuua? —

Juuteq ima akivoq: ‘Angut unittoq ajoqusersimasumillu isumaginnittoq, taanna tulleraa.’ Jiisusi oqarpoq: ‘Ilumoorputit. Illittaaq taamaalioriartorit.’ — Lukasi 10:25-37.

Ilaa, oqaluttuaq torrak? — Oqaluttuami paasitinneqarpugut  ‘tullivut’ kikkuunersut. Tassaaginnanngillat ikinngutivut. Aamma tassaaginnanngillat amitta qalipaateqataat oqaaseqativulluunniit. Naamik, Jiisusip ilinniartippaatigut allanut inussiarnersuussasugut, sumiuugaluarpata qanorluunniit isikkoqaraluarpata qanorluunniillu oqaaseqaraluarpata.

Jehova Guuti taamaappoq. Paqumisuttuunngilaq. Jiisusi ima oqarpoq: ‘Ataatavit qilanniittup seqerni ajunngitsunut ajortunullu nuisittarpaa siallersitsisarlunilu iluartunut iluaatsunullu.’ Guuti taamaattuummat, uaguttaaq kikkunnut tamanut inussiarnersuusariaqarpugut. — Matthæusi 5:44-48.

Arlaanni annersimasumik takuguit, taava qanoq iliussavit? — Taannami nunamit allameersuuppat imaluunniit amia allatut qalipaateqarpat? Aamma taanna ‘tulleraat’, ikiussavallu. Isumaqaruit ikiuinissannut mikivallaarlutit allanut ikioqqusinnaavutit, immaqa politiimut ilinniartitsisumulluunniit. Taamaalillutit takutissavat ‘tullit asallugu’, soorlu Samariamiu taamaaliortoq.

Ajoqersuisorsuup kissaatigaa allat inussiarnisaarfigalugillu ikiortassagivut, kikkuugaluarpataluunniit. Taamaattuminguna Samariamiumik inussiarnersumik oqaluttuaq oqaluttuarigaa.