“Pileqqaarnerannit qanoq pisoqarnissaa nalunaarutigaara, itsaanilli suli pinngitsut oqaatigaakka.” – Esaja 46:10

Naggatissap nalaa pillugu qanoq ilisimasaqarpugut?

• Danieli 7:13, 14

  1914-imi Jiisusi qilammi kunnginngorpoq.

• Matthæusi 24:3-14

  Inunnut pissutsit erloqinarumaarnerat Jiisusip siulittuutigaa.

• Saqqummersitat 12:7-9, 12

  Jiisusip kunnginngortinneqarnermi kinguninngua Saatani qilammiit nunamut igippaa. Saatani kamattupilussuuvoq “piffissakissutsi”, tassa Guutimit peersitaangajalernini, nalunnginnamiuk.

‘Oqarfigitigut suna nalunaaqutaassasoq silarsuup naggatissaanut.’ – Matthæusi 24:3

Biibilimi siulittuutit eqquuttut takuigit?

• Matthæusi 24:7; Lukasi 21:11

  Sorsunnerit, kaannerit, nunap sajuttarneri nappaalanerillu aatsaat taama amerlatigipput.

• 2 Timotheusi 3:1-5

  Apustilip Paulusip inuit ulluni kingullerni qanoq pissuseqarumaarnerat allaaseraa.

• Danieli 12:4

  Guutip innuttami Biibilimik paasinninnerunissaat aatsaat taama isumagitigaa.

• Matthæusi 24:14

  Naalagaaffimmik nutaarsiassaq nuannersoq nunarsuaq tamakkerlugu oqaluussissutigineqarpoq.

‘Jehovap ullussaa nalliukkumaarpoq unnuami tillinniatut.’ – 1 Thessalonikamiut 5:2

Naggatissaq qanittuararsuummat susariaqarpit?

• Johannesi 17:3

  Biibili pimoorussillutit atuaqqissaartaruk.

• Hebræerit 10:24, 25

  Ilikkagaqarnerujumallutit Jehovap Nalunaajaasuisa ataatsimiittarnerini najuuttarit.

• Jaaku 4:8

  Guutimut qanittumik attaveqarumallutit inuuninni pisariaqartunik allannguigit.

• Lukasi 21:34-36

  Allamut saasarneqarnak Jehovamik pallorfiginninnerit inuuninni pingaarnerpaatiguk.