PIGISAVUT ajunngitsut tamarmik Guutimit pipput. Seqineq pinngortippaa ullukkut qaammaqqutissatut, qaammallu ullorissallu pinngortillugit unnuakkut qaammaqqutissatut. Nunalu pinngortippaa uagut najugassatsitut.

Taakkuli Guutip pinngortitaasa siullersarinngilaat. Pinngortitaa siulleq sunaanersoq nalunngiliuk? Siullermik Guuti immisut ittunik pinngortitsivoq. Taakku takusinnaanngilavut, soorluttaaq Guuti takusinnaanngikkipput. Inngilinik taagorneqarput. Guutip inngilit pinngortippai qilammi najoqqulluni.

Inngili Guutip pinngortitaa siulleq immikkut ittuuvoq. Guutip ernerisa taanna siullersaraat, taassumalu ataatani suleqatigaa. Guuti ikiorpaa seqineq, qaammat, ullorissat nunalu manna pinngortimmagit.

Taamani nuna qanoq isikkoqarpa? Aallaqqaataani nuna inuuffissaanngilaq. Imarsuup nuna matulluinnarsimavaa. Guutilli kissaatigaa inuit nunami inuussasut. Taamaattumik nunamik piareersaatilerpaatigut. Qanoq iliorluni?

Qaamaneq pisariaqarpoq. Taamaattumik seqernup qaamanera Guutip nunamut qaamaqquaa. Unnuaqartarnissaq ulloqartarnissarlu aaqqissorpai. Taavalu Guutip nuna immap qaavatigut nuisippaa.

Aallaqqaataani nuna soqanngilaq. Assilissatut uumatut isikkoqarpoq. Naasoqanngilaq orpeqarnanilu uumasoqarnanilu. Aalisagaqanngilarluunniit. Guuti suli annertuumik suliassaqarpoq nuna alianaatsunngortissallugu uumasut inuillu najugassaannik.