MOSES Egyptenimut uterami qatanngunni Aron tupinnartulianik oqaluttuuppaa. Mosesip Aronillu tupinnartulianik tamakkuninnga takutimmatik Israelikkut tamarmik upperaat Jehovap najorai.

Taava Mosesip Aronillu Farao pulaarpaat. Oqarfigaat: ’Jehova Israelikkut Guutiat oqarpoq: „Innuttakka ullut pingasut aallarnissaannik akuerikkit, puilasuitsumi guutisiorfigeqqullunga.“’ Faraoli akivoq: ’Uanga Jehova upperfiginngilara. Israelikkullu aallarnissaannik akuerissanngilakka.’

Farao kamappoq inuit sulinngiffeqarumammata Jehova guutisiorfigiartorumallugu. Taamaattumik pinngitsaalivai suli annerusumik suleqqullugit. Israelikkut naalliutsitaanerminnut Moses pisuutippaat, Mosesillu tamanna aliasuutigaa. Jehovalli oqarfigaa isumakuloqqunagu. ’Farao sunnerumaarpara innuttakka aallarteqqullugit,’ Jehova oqarpoq.

Mosesip Aronillu Farao pulaaqqippaat. Taava tupinnartuliorput. Aronip ajaappissani nunamut naluppaa pulateriaarsussuanngortillugu. Faraolli ilisimatoortaasa ajaappissatik nunamut naluppaat, pulateriaarsuillu takkupput. Atali! Aronip pulateriaarsuutaata ilisimatuut pulateriaarsuutaat iivai. Taamaakkaluartorli Faraop Israelikkut aallaqqunngilai.

Taava Jehovap Farao sakkortuumik misigisaqartittariaqalerpaa. Qanoq iliornera nalunngiliuk? Perlunnik, imaluunniit naalliunnernik, qulinik Egyptenimut nalliutitsivoq.

Perluit ilarpassuisa kingornisigut Faraop Moses aatittarpaa oqarluni: ’Perluk taamaatitiguk, taava Israelikkut aallarnissaannik akuerissavakka.’ Perlulli taamaatikkaangat Faraop isummani allanngortittaraa. Inuit aallaqqunngilai. Kiisamili perluit qulingata kingornagut Faraop Israelikkut aallarnissaanik akuerai.

Perluit qulit tamaasa nalunngiligit? Quppernermi tullermi atuarsinnaavatit.