QANOQ ililluni Jerikop qarmarsui uppitinneqarpat? Soorlumi tassa qaartartorsuup eqqorsimagai. Taamanikkulli qaartartorsuaqanngilaq; qamutileqanngilarluunniit. Jehova tupinnartulioqqissimavoq! Qanoq pisimasoq paasiniariartigu.

Jehovap Josua qanoq oqarfigigaa tusaruk: ’Illit sakkutuutillu illoqarfik kaajallallugu ingerlaassaasi. Ullut arfinillit ullormut ataasiarlusi kaajallattassavarsi, angerutsip illerfia nassarlugu. Palasit arfineq-marluk siornagut ingerlassapput qarlortaassuarnik qarlortarlutik.

Ullut arfineq-aappaanni illoqarfik arfineq-marloriarlugu kaajallassavarsi. Taava qarlortaassuit sivisuumik nillersissavasi, inuillu tamarmik nipitoorsuarmik nillissapput. Taava qarmarsuit uppissapput!’

Josuap inuillu Jehovap oqaasii naalappaat. Illoqarfik kaajallappaat nipaqaratik. Oqaluttoqanngilaq. Qarlortaassuit qarlortarpalaarnerat ingerlasullu pisuppalunnerat kisimik tusarsaapput. Guutip innuttaasa akeraat Jerikomiittut annilaangasimassaqaat. Allunaasaq aappallarissoq igalaamit nivingasoq takuiuk? Kiaana igalaava? Rahabip. Rahab alapernaarsuisut peqqussutaannik iliorpoq. Ilaquttanilu tamarmik illumiipput qanoq pisoqarnissaa utaqqillugu.

Kiisami ullut arfineq-aappaanni illoqarfik arfineq-marloriarlugu kaajallanneqarpoq, qarlortaassuit supineqarput, sakkutuut nillerput, qarmarsuillu uppipput. Taava Josua oqarpoq: ’Illoqarfimmiittut tamaasa toqussigik illoqarfillu ikuallallugu. Suut tamaasa ikuallassigit. Siilvit, kuultit, kanngussaat savimernillu kisiisa pinnagit, Jehovap erlinnartuusivianut tunniunneqassammata.’

Alapernaarsuisunut marluusunut Josua oqarpoq: ’Rahabip illuanut iseritsi, taannalu ilaqutaalu tamaasa anisillugit.’ Alapernaarsuisut neriorsuisimanerattut Rahab ilaqutaalu annapput.