NUKAPPIARAQ una inequnaq, ilaa? Tassaana Samuel. Angullu Samuelip niaquagut assamminik attuisoq Israelimi palasiuneruvoq Elimik atilik. Samuel ataataata Elkanap anaanaatalu Hannap Elimut aappaat.

Samuel sisamaannarnik tallimanilluunniit ukioqarpoq. Maanili Jehovap illernartuutaani najugaqassaaq Eli palasillu allat najorlugit. Sunami-taava pillugu Elkanap Hannallu nukappiaraq Samuelitut nukangatigisoq tunniukkaat Jehova illernartuummi kiffartuuteqqullugu? Tamanna paasiniariartigu.

Ukiut arlaqanngitsut tamatuma siornagut Hanna aliasussimaqaaq. Meerartaarsinnaannginnami aliasussimaqaaq, meerartaarusoqigamimi. Taava ullut ilaanni illernartuummiilluni Hannap Jehova qinnuigaa oqarluni: ’Jehova-aa, puioqinanga! Ernertaartikkumma, neriorsuivunga ilinnut tunniukkumaarlugu inuunini naallugu kiffartuuteqqullutit.’

Hannap qinnutaa Jehovap tusarpaa, qaammatillu arlallit qaangiummata Samuel ernertaaraa. Hannap nukappiaraatini asaqaa, sulilu naalungiarsuusoq Jehova pillugu ajoqersortalerpaa. Uini oqarfigaa: ’Samuel miluttariaaruppat illernartuummukaatissavara tassani Jehova kiffartuuteqqullugu.’

Hanna Elkanalu taamaaliortut assilissami takusinnaavavut. Samuelilu angajoqqaaminit taama ajunngitsigisumik ajoqersorneqarami nuannaarpoq maani Jehovap illuani Jehova kiffartuussinnaagamiuk. Ukiut tamaasa Hanna Elkanalu inimut tassunga Guutimik pallorfiginnikkiartortarput, nukappiaraatertillu takusartarlugu. Ukiullu tamaasa Hanna qallersaammik taleqanngitsumik nutaamik Samuelimut mersukkaminik nassartarpoq.

Ukiut ingerlatillugit Samuelip Jehova illernartuummi kiffartuuttuarpaa, Jehovallu inuillu iluaraat. Palasiunerulli Elip erneri Hofni Pinehasilu ileqqorluttuupput. Ajortuliortaqaat, inuillu allat Jehovamut naalanngitsunngortittarlugit. Elip palasitut soraarsittariaqaraluarpai, taamaaliunngilarli.

Ajortut illernartuummi pisartut Samuelip Jehovamik kiffartuussinermini akornutiginngilai. Inuilli taama ikitsigisut Jehova asammassuk, Jehova sivisuumik inummut kimulluunniit oqalussimanngilaq. Samuel allimmat ima pisoqarpoq:

Samuel illernartuummi sinitsilluni nipimit itersarneqarpoq. Akivoq: ’Maaniippunga.’ Makipporlu Elimullu arpalluni, oqarlunilu: ’Qaaqqugamma aggerpunga.’

Elili akivoq: ’Qaaqqunngilakkit; innaqqinniarit.’ Taava Samuel innaqqippoq.

Taava aappassaanik qaaqquneqarpoq: ’Samuel-iaa!’ Taava Samuel makippoq aammalu Elimut arpalluni. ’Qaaqqugamma aggerpunga,’ oqarpoq. Elili akivoq: ’Qaaqqunngilakkit, ernera. Innarniarit.’ Taava Samuel innaqqippoq.

’Samuel!’ pingajussaanik nipi tutsiuppoq. Taava Samuel Elimut arpappoq. ’Maannakkut qaaqqunnguatsiarparma,’ oqarpoq. Elilli paasilerpaa Jehova qaaqqusisartoq. Taava Samuel oqarfigaa: ’Innarniarit, qaaqqoqqippatillu oqassaatit: „Oqalugit, Jehova, kiffat tusaammat.“’

Jehova qaaqquseqqimmat Samuel taama oqarpoq. Taava Jehovap Samuel nalunaarfigaa Eli ernerilu pillarniarlugit. Kingorna Hofni Pinehasilu filisterinut sorsunnermi toqutaapput, tamannalu tusaramiuk Eli issiavimmit niverluni nakkarpoq, qungatsini napillugu toqullunilu. Tassuuna Jehovap oqaasia eqquuppoq.

Samuel alliartorpoq, Israelimilu eqqartuussisut taanna kingullersaraat. Utoqqalimmat inuit qinnuigaat: ’Kunngimik uatsinnut naalakkersuisussamik ivertitsigit.’ Samuel taamaaliorumanngilaq, Jehova kunngigimmassuk. Jehovalli oqarfigaa inuit nipaat naalaannaqqullugu.