FILISTERIT Israelikkunnut sorsukkiartoqqipput. Davidip angajui pingasut Saulip sakkutooqatigiivinut ilaapput. Ullut ilaanni Isajip David oqarfigaa: ’Karrinik iffianillu angajunnut pajugit. Qanoq innersut paasiniakkit.’

David sakkutuut tammaarfiannut pigami akiuuttunut sallernut arpappoq angajuni ujarlugit. Inorujussuaq filisteriusoq Goliat sassarpoq Israelikkut mitaatiginiarlugit. Ullut 40-t ullaakkullu unnukkullu taamaaliortarpoq. Suaartarpoq: ’Ilissinni angummik qinersigitsi uannut akiuuttussamik. Ajugaaffigippanga toqullungalu, inussiaatigilissavatsigut. Uangali ajugaaguma toqullugu, inussiaatigilissavassi. Unammillerpassi: qinersigitsi uannut akiuukkumasumik!’

Davidip sakkutuut ilaat aperai: ’Filisterimik taassuminnga toqutsisup Israelimillu kanngunaataajaasup suna akissarsiarissavaa?’

’Saulip angut taanna pisuussuterpassuarnik tuniumaarpaa,’ akineqarpoq. ’Panimminillu nuliartaartissavaa.’

Israelikkulli tamarmik Goliat ersigaat angeqimmat. Meterit pingasut missiliorlugit angissuseqarpoq, sakkutuumillu ilaqarpoq eqqornaveeqqumminik nassartitaminik.

Sakkutuut ilaasa kunngi Saul nalunaarfigiartorpaat Davidip Goliat sorsukkumagaa. Saulilli David oqarfigaa: ’Illit filisterimut akiuussinnaanngilatit. Illit nukappiaraannaavutit, taannali inuunini tamaat sakkutuujusimavoq.’ David akivoq: ’Allarsuaq liiverlu ataatama savaataanik tigusisut toqunnikuuakka. Filisterilu taanna taakkunatut pineqassaaq. Jehovap ikiorumaarpaanga.’ Taava Saul oqarpoq: ’Aallaannarit, Jehovallu najorlisit.’

David kuummut aterpoq ujaqqanillu saattukujuunik tallimanik tigusilluni, pooqattaminullu ikillugit. Taava illusaatiminik nassarluni anivoq inorujussuarlu ornilerlugu. Goliatip David takuleramiuk takusani upperinngingajappaa. David toqussallugu ajornarunartinngeqaa.

’Akiuukkumaguit qaa!’ Goliat oqarpoq, ’Timillu toqungasoq timmissanut uumasunullu tunniukkumaarpara nereqqullugu.’ Davidili oqarpoq: ’Illit ornipparma panamik, naalikkamik qalugiusamillu nassarlutit, uangali ornippakkit Jehovap aqqa tunaaralugu. Ullumi Jehovap uanga assannut tunniukkumaarpaatit, uangalu toqussavakkit.’

Taava David Goliatip tungaanut arpappoq. Ujaqqamik pooqattaminit tigusivoq, illusaatiminut ilillugu, nukinilu tamakkerlugit illusariarluni. Ujarak Goliatip qaavanut tuppoq, uppipporlu toqulluni! Filisterit takuleramikku sapiitsortarsuartik uppititaasoq tamarmik tunummut saapput qimaallutillu. Israelikkunnit malersorneqarput ajugaaffigineqarlutillu.