ANGUTIT uku kikkut-uku, aamma susut-uku? Sorsukkiartorput, angutillu salliit erinarsorput. Immaqali aperiumassaatit: ’Sooq erinarsortut panaqarnatillu naaligaqanngillat akiuunnissamut?’ Paasiniariartigu.

Israelimi naggueqatigiit marluk naalagaaffianni Josafat kunngiuvoq. Kunngi Akabip Jesabelillu avannarlermi naggueqatigiit qulit naalagaaffianni naalakkersuinerata nalaani Josafat inuuvoq. Taannali kunngiuvoq ajunngitsoq, ataataalu Asa aamma kunngiulluarsimavoq. Tamanna pissutigalugu inuit kujallermi naggueqatigiit marluk naalagaaffianni najugallit ukiorpassuit ajunngitsumik ingerlapput.

Pisoqarporli inuit annilaarutigisaannik. Oqariartortut Josafat nalunaarfigaat: ’Sakkutoorpassuit Moabimeersut, Ammonimeersut Seʹirillu qaqqaaneersut saassukkiartorpaatsit.’ Israelikkorpassuit Jerusalemimi katersuupput Jehovamut ikioqqullutik. Naalaffimmukarput, tassanilu Josafat qinuvoq: ’Jehova Guuterput, qanoq iliuusissaaruppugut. Sakkutooqatigiit taakku taama amerlatigimmata sapersisitaalluinnassaagut. Ikiortigut.’

Jehovap tusarpai, kiffamilu ilaat inunnut oqaqquaa: ’Ilissi sorsussanngilasi, Guutili sorsussaaq. Uninngaannassaasi Jehovallu ilissinnik annaassinera isiginnaarlugu.’

Aqaguani ullaakkut Josafatip inuit oqarfigai: ’Jehova tatigisiuk!’ Taava erinarsortut sakkutuut saavannut pisippai, ingerlaaqatigiitsillutillu Jehova unnersiutigaat. Akeqqaminnut qanillimmata qanoq pisoqartoq nalunngiliuk? Jehovap akeqqat sakkutuui imminnut saassutsippai. Israelikkullu tikiummata akeqqat sakkutuui tamarmik toqusimapput!

Josafat silatuujuvoq Jehova tatigigamiuk, ilaa? Uaguttaaq silatuujussaagut tatigigutsigu.