NIVIARSIARAQ una qanoq oqalussoraajuk? Arnaq oqaluttuuppaa Jehovap pruffiitianik Elisamik, tupinnartunillu Jehovap taassumuuna naammassisaanik. Arnap Jehova naluaa Israelikkuunnginnami. Taava paasiniariartigu suna pillugu niviarsiaraq arnap illuaniittoq.

Arnaq Syriameersuuvoq. Uia tassa Na’aman, sakkutuut Syriamiut naalagaat. Syriamiut niviarsiaraq Israelikkuusoq taanna tigusarisimavaat, Na’amanillu nulianut aanneqarpoq kiffaassalluni.

Na’aman napparsimavoq, pupilluni. Pupissup timaata ilaa allaat katagartarpoq. Taamaattumik niviarsiaqqap Na’amanip nulia imaattumik oqarfigaa: ’Naalagara Jehovap pruffiitianut Israelimiittumut ornigutissagaluarami. Taassuma pupeerutitissagaluarpaa.’ Kingornagut tamanna arnap uianut oqaluttuarineqarpoq.

Na’aman ajorunnaarumaqaaq; taamaattumik aalajangerpoq Israelimukassalluni. Tassunga pigami Elisap illuanukarpoq. Elisap kiffani Na’amanimut oqariartoqquaa Jordanip kuussuani arfineq-marloriarluni uffaqqullugu. Na’aman kamalerpoq oqarlunilu: ’Nunatsinni kuussuit Israelimi kuussuarnit tamanit pitsaanerupput!’ Taama oqareerami Na’aman aallarpoq.

Kiffaasali ilaata oqarfigaa: ’Naalagara, Elisap peqqugaluarpatit ajornartorujussuarmik iliuuseqaqqullutit, taamaaliorsimassagaluarputit. Soormi oqarneratut uffariartuinnarnianngilatit?’ Na’amanip kiffani naalappaa Jordanillu kuussuani arfineq-marloriarluni uffarluni. Taamaaliormat timaa iluarsivoq.

Na’aman nuannaaqaaq. Elisamut uterpoq oqarfigalugulu: ’Maanna qularinngilara Israelikkut Guutiat nunarsuarmi tamarmi Guutiusoq ilumoortutuaq. Aajuna tunissutissara, tiguniaruk.’ Elisalli akivaa: ’Naagga, tigussanngilara.’ Elisap nalunngilaa eqqunngitsuliornerussasoq tigussaguniuk, Jehova ajorunnaarsitsisuummat. Elisalli kiffaata Gehazip tunissutissaagaluaq pilerigeqaa.

Taava Gehazi imaaliorpoq: Na’aman aallarmat, arpalluni malippaa. ’Elisa oqaqqusivoq aatsaannguummat tikeraartini tikissimasut, taamaattumik tunissutip ilaanik perusuinnalerluni,’ Gehazi sallulluni oqarpoq. Na’amanilli naluaa sallusoq; taava Gehazi tunivaa.

Gehazi angerlarmat qanoq iliorsimanera Elisap nalunngilaa Jehovammi tamatuminnga oqaluttuutereermani. Oqarpoq: ’Taamatut ajortulioravit Na’amanip pupinnera ilinnut pissaaq.’ Taamaalivorlu!

Tamanna qanoq ilinniarfigisinnaavarput? Siullermik, niviarsiaraq ilaarlugu Jehova pillugu oqaluttuartassasugut. Taamaalilluta inuppassuit ikiorsinnaavavut. Aappassaanik, pingaarniassanngitsugut soorlu Na’aman aallaqqaataani pingaarniartoq, Guutilli kiffai naalassagivut. Pingajussaanillu, Gehazitut sallussanngitsugut. Biibilimik atuarnermi ilikkagassaqaqaagut, ilaa?