MAANNA utilaarta ukiut arlaqanngitsut Esrap Jerusalemimukarnera sioqqullugu. Naalagaaffimmi Persiami Israelikkut Mordokaj aamma Ester pingaaruteqarnerpaartaraat. Ester kunngip nuliaraa, illualu Mordokaj pissaanikkut kunngip tulleraa. Tamanna qanoq pisimasoq tusariartigu.

Ester mikisunnguusoq angajoqqaavi toqusimapput, taamaattumillu Mordokajip perorsarsimavaa. Persiap kunngia Ahasverus illoqarfimmi Susanimi illussaarsuaqarpoq, kiffaasalu Mordokaj ilagaat. Ullut ilaanni kunngip nuliata Vasjtip uini naalanngilaa, taava kunngi allamik nuliartaarpoq. Arnaq kinami-taava qinerpaa? Arnaq inuusuttoq pinnersoq Ester.

Angut pingaarniartoq inuit sikiffigisaat takusinnaaviuk? Tassaavoq Haman. Persiami nuimasorujussuuvoq. Hamanip aamma Mordokaj issiasoq imminut sikeqquaa. Mordokajili sikikkumanngilaq. Iluarinngilaa angut taama ajortigisoq sikiffigissallugu. Hamanip tamanna kamaatigeqaa. Taavalu qanoq iliortoq tusariartigu.

Hamanip kunngi Israelikkut pillugit salluliuutinik oqaluttuuppaa. ’Inuupput ajortut inatsisinnut naalanngitsut,’ oqarpoq. ’Toqusariaqaraluarput.’ Ahasverusip naluaa nuliani Ester Israelikkuusoq. Taamaattumik Haman naalaarpaa, inatsisiliorporlu ullormi aalajangersimasumi Israelikkut tamarmik toqunneqassasut.

Inatsit tusaramiuk Mordokaj annilaaqaaq. Esterimut oqariartortitsivoq: ’Kunngi oqaloqatigisariaqarpat qinnuigalugulu annaateqqulluta.’ Qaaqqusaanani kunngimut sassarneq Persiami toqumik naleqartarpoq. Esterili qaaqqusaanani sassarpoq. Kunngip tigumiani kuultiusoq tassunga isaappaa, tamannalu isumaqarpoq toqunneqassanngitsoq. Esterip kunngi aamma Haman nerersuaqatigiinnermut qaaqquai. Tassani kunngip Ester aperaa sumik ajunngisaarfigeqqunersoq. Ester oqarpoq tamatuminnga oqarfigiumaarini taanna aamma Haman aqaguani nerersuaqatigiinnermut aggeqqikkumappata.

Nereqatigiitsillutik Esterip kunngi oqarfigaa: ’Innuttaaqatikkalu toqusussanngorpugut.’ Kunngi kamappoq. ’Kia sapiiserluni toqussagamisi?’ aperivoq.

’Inuk, akeraq, tassaavoq ajortoq una Haman!’ Ester oqarpoq.

Taeava kunngi suli kamannerulerpoq. Peqqussuteqarpoq Haman toqunneqassasoq. Kingornagut kunngip Mordokaj pissaanikkut imminut tullinngortippaa. Taava Mordokajip isumagaa Israelikkut ullormi toqunneqarfissaraluaminni imminnut illersorlutik sorsussinnaatitaanerat nutaamik inatsisiliarineqassasoq. Mordokaj taama pingaartigilermat inuppassuit Israelikkunnik ikiuilerput, akeqqaminnillu annatsitaapput.