UKIUT marlungajaat qaangiupput Babylon Mediamiunit Persiamiunillu tiguarneqarmat. Maannalu sumik pisoqartoq takoriaruk! Israelikkut Babylon qimappaat. Qanoq ilillutik aniguisitaappat? Kia aniguisippai?

Persiap kunngiata Kyrosip aniguisippai. Kyros suli inunngoqqajanngitsoq Jehovap pruffiitini Esajas taanna pillugu imaattumik allatsissimavaa: ’Ilinnut piumasara naammassiumaarpat. Isaaffiit ammajumaarput illoqarfik ilinnut tiguaqqullugu.’ Ilumullumi Kyros siulersuisuusoq Babylon tiguarneqarpoq. Mediamiut Persiamiullu unnuakkut illoqarfimmut isaapput isaaffitsigut parnaarneqanngitsoorsimasutigut.

Jehovalli pruffiitia Esajas aamma oqarsimavoq Kyros peqqussuteqassasoq Jerusalem naalaffialu qarmaqqinneqaqqullugit. Kyros taamatut peqqussuteqarpa? Aap. Kyrosip Israelikkut ima peqquai: ’Jerusalemimut aallaritsi Guutissilu Jehovap naalaffia qarmaqqillugu.’ Israelikkullu taamaalioriartortut assilissami takusinnaavatit.

Israelikkulli Babylonimiittut tamakkeratik Jerusalemimut angalanissaq sivisooq sapinngilaat. Ungaseqaarmi. 800 kilometerit missiliorlugit ungasissuseqarpoq, ilarpassuisalu napparsimanermit utoqqaanermilluunniit saperpaat. Ilaallu allanik peqquteqarlutik aallanngillat. Aallanngitsulli Kyrosip oqarfigai: ’Jerusalem naalaffialu qarmaqqinniarlugit angerlamut aallartut siilvimik kuultimillu tunissutinillu allanik tunisigik.’

Taamaattumik Israelikkut Jerusalemimut aallartut tunissuterpassuarnik tunineqarput. Aamma Kyrosip tunivai qummuattanik imertarfinnillu kunngip Nebukadnezarip Jerusalem piuneerukkamiuk Jehovap naalaffianit tigusimasaanik.

Qaammatit sisamat missiliorlugit angalareeramik Israelikkut piffissaq eqqorluarlugu Jerusalemimut apuupput. Ukiut 70-erpiaat qaangiussimapput illoqarfiup piuneerunneqarneraniit, nunallu inuerunneqarneraniit. Naalli Israelikkut nunavimminnut uteraluarlutik annikilliornartunik atugassaqarput, soorlu takussagipput.