SULLITTUT uku takukkit! Israelikkut ulappupput Jerusalemip qarmarsui qarmarlugit. Ukiut 152-it tamanna sioqqullugu kunngip Nebukadnezarip Jerusalem piuneerukkamiuk qarmarsui ingutsersimavai illoqarfiullu isaaffii ikuallatsillugit. Israelikkut Babylonimit angerlamut apuutiinnarlutik qarmarsui qarmaqqinngilaat.

Illoqarfimmimitaava qarmarsuaqanngitsumi ukiorpassuarni najugaqaramik qanoq misigippat? Toqqissisimanngeqaat. Akeraat imaaliallaannaq isaasinnaapput saassukkiartorlugit. Maannali angutip uuma Nehemiasip inuit ikiorpai qarmarsuit qarmaqqillugit. Nehemias kinaasoq nalunngiliuk?

Nehemias Israelikkuuvoq illoqarfimmit Mordokajip Esterillu najugaannit Susanimeersoq. Nehemias kunngip illussaarsuani suliffeqarsimavoq, immaqalu Mordokajip kunngillu nuliata Esterip ikinngutigilluarsimavaat. Biibilimili allassimanngilaq Esterip uia kunngi Ahasverus Nehemiasip sulissussimaneraa. Kunngi tulleq Artaxerxes sulissuppaa.

Eqqaamagunarpat Artaxerxes kunngiusoq ajunngitsoq Esramut aningaasarpassuarnik tunisisoq Jehovap Jerusalemimi naalaffiata iluarsagaanissaanut atugassanik. Esralli illoqarfiup qarmarsui ingutsersimasut qarmaqqinngilai. Nehemiasip suliassaq tamanna qanoq sulissutiginialeraa paasiniariartigu.

Artaxerxesip Esramut naalaffiup iluarsagaanissaanut aningaasanik tunisineraniit ukiut 13-it qaangiussimapput. Kunngimut Artaxerxesimut Nehemias immitsisuuneruvoq. Tamanna isumaqarpoq kunngimut viinni sassaattaraa, kunngillu toqunartutortinniarneqarnissaa pitsaalisaraa. Atorfia pingaartorujussuuvoq.

Ullut ilaanni Nehemiasip qatanngutaata Hananip angutillu allat Israelikkut nunaanneersut Nehemias ornippaat. Israelikkut ajornartorsiornerannik oqaluttuuppaat, Jerusalemillu qarmarsui suli qarmaqqinneqanngitsut oqaatigalugit. Nehemiasip tamanna aliatsaatigeqaa, Jehovalu qinnuigaa.

Ullut ilaanni Nehemias aliasuttoq kunngip malugaa, aperalugulu: ’Sooq taama aliasutsigivit?’ Nehemiasip oqaluttuuppaa aliasuutigigini Jerusalemip taama atugarliortiginera qarmarsuisalu suli qarmaqqinneqannginnerat. ’Suna kissaatigaajuk?’ kunngip aperaa.

’Jerusalemimukarlanga,’ Nehemias oqarpoq, ’qarmarsui qarmaqqinniassagakkit.’ Kunngi Artaxerxes ajunngisaaqaaq. Oqarpoq Nehemias aallarsinnaasoq, ikiorlugulu sanaartornissamut qisunnik pissarsiniarnerani. Jerusalemimut tikinnermi kinguninnguagut Nehemiasip inuit pilersaarutiminik oqaluttuuppai. Pilersaarut nuannaraat, oqarlutillu: ’Qaa, sanalluta aallartitta.’

Qarmarsuit qarmaqqinneqalersut takuleramikkik Israelikkut akeraat oqarput: ’Qaa, toqorariartortigik, qarmaanerlu unitsillugu.’ Nehemiasilli tamanna tusarpaa, sulisullu panalersorlugit qalugiusalersorlugillu. Oqarporlu: ’Akeqqavut ersigeqinasigik. Qatanngutisi, qitornasi, nuliasi angerlarsimaffisilu illersorumallugit sorsugitsi.’

Inuit qunusueqaat. Sakkutik ullukkullu unnuakkullu piareersimatippaat, qarmaajuarlutillu. Taava ullut 52-iinnaat qaangiummata qarmarsuit inerneqarput. Inuit toqqissillutik illoqarfiup iluaniissinnaalerput. Nehemiasip Esrallu inuit Guutip inatsisaanik ajoqersorpaat, inuillu pilluarput.

Pissutsilli Israelikkut Babylonimut tigusatut aallarunneqarnerata siornagutut inngillat. Persiap kunngiata naalakkersorpai, inuillu taanna kiffartuuttariaqarpaat. Jehovali neriorsuisimavoq kunngimik nutaamik aallartitsiumaarluni, kunngillu taassuma inuit eqqissinermik pajukkumaarai. Kunngi taanna kinaava? Qanoq ililluni eqqissineq nunamut atulersissavaa? Ukiut 450-it missiliorlugit qaangiummata aatsaat tamanna nalunarunnaarpoq. Taava pingaaqisumik pisoqarpoq: meerannguaq inunngorpoq. Tassaavoq oqaluttuarineqartussaq tulliuttoq.