NIVIARSIARAQ uani takusat aqqaneq-marlunnik ukioqarpoq. Jesusip assaagut tiguaa, anaanaalu ataataalu taakkua sanianniipput. Suna pillugu taama nuannaartigaat? Tusariartigu.

Niviarsiaqqap ataataa angutaavoq pingaarutilik Jaiʹrusimik atilik. Ullut ilaanni pania napparsimalerpoq unillunilu. Pitsaanerulinngilarli. Ajorsiartuinnarpoq. Jaiʹrus nulialu assut annilaangalerput, paasilerlugu niviarsiaraatinnguartik toqoqqajaasoq. Taanna panituaraat. Taava Jaiʹrus anivoq Jesus ujariartorlugu. Jesusip tupinnartuliai tusarsimavai.

Jaiʹrusip Jesus nanimmagu eqqaani inuppassuaqarpoq. Jaiʹrusili inuit akornisigut ingerlavoq Jesusillu isigaasa saannut pallorluni. ’Paniga napparsimaqaaq,’ oqarpoq. ’Aggilaarsinnaavit ajorunnaarsikkiartorlugu?’ qinnuigaa. Jesus neriorsuivoq aggerumaarluni.

Ingerlatillugit inuppassuit sakattaattuarput qanilliniarlugu. Tassanngaannaq Jesus unippoq. ’Kiaana attoraanga?’ aperivoq. Nukik imminit anisoq misigaa, malugaalu attorneqarluni. Kiaana attoraa? Arnap ukiut aqqaneq-marluk napparsimasimasup. Aggersimavoq Jesusillu atisaa attorlugu, ajorunnaarlunilu!

Maanna Jaiʹrus neriullualerpoq Jesusip qanoq ajornanngitsigisumik ajorunnaarsitsisinnaanera takugamiuk. Taavali oqariartortumik tikiuttoqarpoq. ’Jesus pisarissersoqinagu,’ oqariartortup Jaiʹrus oqarfigaa. ’Paniit toquvoq.’ Jesusip tusarpaa Jaiʹrusilu oqarfigalugu: ’Ernumaqinak. Paniit ajorunnaassaaq.’

Kiisami Jaiʹrusip illuanut tikiukkamik inuppassuit qiasut upittullu takuaat. Jesusili oqarpoq: ’Qiaqinasi. Niviarsiaraq toqunngilaq. Siniinnarpoq.’ Illarpulli Jesusilu quiassuaatigalugu, nalunnginnamikku niviarsiaraq toqusimasoq.

Taava Jesus niviarsiaqqap angajoqqaavi apustilimilu ilaat pingasut ilagalugit niviarsiarannguamut iserpoq. Assaagut tiguaa oqarlunilu: ’Makigit!’ Taavalu uummarpoq, soorlu uani takusinnaagit. Nikuippoq inimilu angalaalerluni. Taamaattumik-uku anaanaa ataataalu taama nuannaarpalutsigisut.

Jesusip toqusunit makititaani taanna siulliunngilaq. Makititaasoq Biibilimi oqaluttuarineqartoq siulleq tassaavoq uillarnerup illoqarfimmi Nainimi najugaqartup ernera. Kingorna Jesusip aamma Lazarus, Mariap Martallu qatanngutaat angut, makitippaa. Guutip kunngiutitaatut naalagaaleruni Jesusip inuit toqusimasut amerlasoorparujussuit makitikkumaarpai. Tamanna nuannerunaq, ilaa?