TAKUUK ajoqisumik pisoqartoq! Jesus toqutaavoq. Qisummut napasumut nivinngarsimavaat. Assaasigut isigaasigullu kikiallugu paagussimavaat. Suna pillugu Jesus taama iliorfigineqarpa?

Uumissorneqarami. Uumissuisut kikkuusut nalunngiliuk? Ilagaat inngili ajortoq Satan Diaavulu. Taanna tassaavoq Adamimik Evamillu Jehovamut naalanngitsunngortitsisimasoq. Aamma Satan tassaavoq ajoqisumik matuminnga Jesusip akeraanik pinerluttuliortitsisoq.

Jesus qisummut napasumut paagutinngikkallaramikkuli akeraasa naakkittaatsuliorfigaat. Eqqaamaviuk naatsiivimmut Getseʹmanemik taaneqartumut tikiuttut Jesusilu aallarullugu? Akeqqat taakku kikkuuppat? Tassaapput upperisarsiornikkut pisortat. Taava qanoq pisoqartoq tusariartigu.

Jesus upperisarsiornikkut pisortanit tigusarineqarmat apustilii qimaapput. Qunuleramik Jesus qimappaat akeqqami akornanniittoq. Apustililli Peter Johannesilu ungasissumukanngillat. Malippaat Jesusip qanoq pineqarnissaa takujumallugu.

Palasit Jesus sassartippaat angummut utoqqarmut palasiunerusimasumut Annasimut. Sivikitsumik tassaniipput. Taava Jesus palasiunerup Kajfasip illuanut ingerlappaat. Upperisarsiornikkut pisortarpassuit taassuma illuani katersuussimapput.

Maani Kajfasip illuani Jesus eqqartuunneqarpoq. Inuit sassartinneqarput Jesus salluliuutigeqqullugu. Upperisarsiornikkut pisortat tamarmik oqarput: ’Jesus toqunneqassaaq.’ Taava kiinaagut qitserarpaat tilluarlugulu.

Taama pisoqartillugu Peter illup silataaniippoq. Unnuaq qiianarpoq, ikumatitarlu ikinneqarpoq. Inneq kaajallallugu inuit uunnassertillugit kiffap arnap Peter isigaa oqarlunilu: ’Angut aamma una Jesusip ilagaa.’

’Taamaanngilaq!’ Peter akivoq.

Pingasoriarlutik inuit oqartarput Peter Jesusimut ilaginerarlugu. Tamatigulli Peter oqartarpoq ilumuunnginnerarlugu. Pingajussaanik Peter taama oqarmat Jesusip qiviarpaa isigalugulu. Peter isumatsappoq salluliorami, anillunilu qiarsuataalerpoq.

Tallimanngornermi seqineq nuilermat palasit Jesus ataatsimiittarfimminnut, sanhedrinimut, ingerlappaat. Tassani oqaloqatigiissutigaat qanoq pissanerlugu. Pontius Pilatusimut, nunap ilaanut Judæamut naalagaasumut, sassartippaat.

’Angut una ajortuuvoq,’ palasit Pilatus oqarfigaat. ’Toqunneqartariaqarpoq.’ Jesus apersoreeramiuk Pilatus oqarpoq: ’Ajortumik nassaarfiginngilara.’ Taava Pilatusip Jesus Herodes Antipasimut sassartippaa. Herodes Galilæamut naalagaavoq, Jerusalemimiilluni. Aamma Herodesip Jesus ajortumik iliorsimaneranik nassaarfiginngilaa. Taamaattumik Pilatusimut utertippaa.

Pilatusip Jesus iperarumavaa. Taannali pinnagu Jesusip akeraasa tigusaq alla iperagaaqquaat. Tassa tillittoq Barabbas. Ullup qeqqalersoq Pilatusip Jesus silamut pisippaa. Inunnut oqarpoq: ’Takussagissi kunngersi!’ Palasiunerilli nilliapput: ’Peerli! Toqutiguk! Toqutiguk!’ Taava Pilatusip Barabbas iperarpaa, Jesusilu aallaruppaat toqunniarlugu.

Tallimanngornermi ualilersoq Jesus qisummut napasumut paagunneqarpoq. Assilissami takussaanngikkaluarput, Jesusilli saniani illugiillutik pinerluttuliortut marluk qisunni napasuni toqunneqarput. Jesus toqunngitsiartoq pinerluttuliortut aappaata oqarfigaa: ’Naalagaaffinnut piguit eqqaaginga.’ Jesusillu akivaa: ’Neriorsorpakkit paratiisimeeqatigiumaarimma.’

Neriorsuutip tamatuma nuannissusia, ilaa? Paratiisi Jesusip pisaa sunaasoq nalunngiliuk? Paratiisi Guutip aallaqqaataani pinngortitaa sumiippa? Nunamiippoq. Jesusilu qilammi kunngitut naalagaaleruni angut taanna makitikkumaarpaa paratiisimi nutaami nunamiittussami inooqqullugu. Tamanna nuannaarutigisinnaavarput.