INUIT uku tassaapput Jesusip ajoqersugai. Soorlu oqarfigigaatik Jerusalemimut unipput. Tamarmik utaqqitillugit tassanngaannaq ittunnersuup illup ilua tamakkerpaa, soorlu anorersuaq pitorartoq. Taavalu oqqat innerinnaasullusooq ajoqersukkat tamarmik immikkut niaquisa qulaanni saqqummerput. Assilissami tamarmik immikkut qulaanni ikumasoqartoq takusinnaaviuk? Qanormi-taava isumaqarpa?

Tupinnartuliaavoq! Jesusip ataatani qilammi najoqqilersimavaa, Guutillu anersaava illernartoq ajoqersukkaminut kuillugu. Anersaap qanoq iliortikkai nalunngiliuk? Tamarmik oqaatsinik assigiinngitsunik oqalulerput.

Jerusalemimi inuppassuit nipi anorersuartut pitorartutut ittoq tusarpaat, ussallutillu qanoq pisoqartoq takujumallugu. Ilaat nunanit allanit aggersimapput Israelikkut piinsimik nalliussinerat nalliuttorsiutigiartorlugu. Tupigusoqaat! Namminneq oqaatsitik atorlugit ajoqersukkat Guutip nuanningaartuliai oqaluutigigaat tusarpaat.

’Inuit taakku tamarmik Galilæameersuupput,’ tikeraat oqarput. ’Qanormi-taava oqaatsit uagut nunatsinni assigiinngitsuni atugaasut tamaasa sapinngilaat?’

Taava Peter sassarpoq nassuiarlugulu. Oqalulerpoq oqaluttuaralugu Jesus toqunneqartoq Jehovallu toqusunit makitikkaa. ’Maanna Jesus qilammiippoq Guutip talerpiata tungaaniilluni,’ Peter oqarpoq. ’Anersaarlu illernartoq neriorsuutigineqartoq kuivaa. Taamaattumik tupinnartuliat taakku takuasi tusarlugillu.’

Peterip oqaasii tusaramikkik ilarpassui aliasupput Jesus taamatut pineqarsimammat. ’Qanoq iliussaagut?’ aperipput. Peterip oqarfigai: ’Inooriaasersi allanngortittariaqarparsi kuisillusilu.’ Ullormi tassani inuit 3000-it missiliorlugit kuisipput Jesusimullu ajoqersuganngorlutik.