Ilaqutaq qanimulluunniit ikinngutigisaq ajortuliaminik peqqissimissutiginninngitsoq ilagiinnut ilaajunnaarsitaagaangat aliasuutigingaartarparput. Tamatumunnga tunngatillugu Biibilimi siunnersuutigineqartunut isiginnittaaserput Guutimik qanoq asannitsiginitsinnik taassumalu aaqqissuussineranik qanoq ilumoorfiginnitsiginitsinnik ersersitsisarpoq. * Ilaajunnaarsitaasoqartarneranut tunngatillugu apeqqutaalertartut sammeriartigit.

Ilaajunnaarsitaasimasoq qanoq periaaseqarfigissavarput? Biibilimi ima allassimavoq: “Qatanngummik taaneqartoq kinguaassiuutitigut inuunerluttuuppat piumatuujulluniluunniit, guutipilussiortuulluni mittatilliisuulluniluunniit, imerajuttuulluni ujajaasuulluniluunniit, taanna [ilagisassanngilarsi]. Taamaattoq nereqatigissanngilarsiluunniit.” (1 Kor 5:11) Kinaluunniit “Kristusip ajoqersuutaanik aalajangiussinngitsoq” pillugu ima allassimasoqarpoq: “Taanna illusisinniaqinasiuk ilassiniaqinasiullu; taama ittumimmi ilassinnittoq taassuma suliaani ajortumi imminik peqataatippoq.” (2 Joh 9-11) Ilaajunnaarsitaasimasut peqatigineq ajorpavut anersaakkullu ittunut tunngasunik sammisaqaqatigineq ajorlugit. Vagttårnet-imi 15. novembari 1981-imoortumi, qupp. 16-imi ima allassimavoq: “Ilassilaaginnarnerluunniit ... oqaloqatigiinnermut immaqalu ikinngutigiilernermut aallarniutaasinnaavoq. Ilaajunnaarsitaasimasoq taamatut ilassilaarumassavarput?”

Ilaginaveersaarluinnarnissaa ilumut pisariaqarpa? Aap, tamatumunnga arlalinnik pissuteqarpoq. Siullermik, ilaginaveersaarluinnarutsigu tamanna Guutimik taassumalu oqaasianik ilumoorfiginninnitsinnut ersiutaassaaq. Imaanngilaq aatsaat ajornanngikkaangat Jehovamut naalattartugut, aamma imaannaanngikkaluaraangalluunniit naalattarparput.  Guutimik asanninnerput kajumississutigalugu taassuma peqqussutai tamaasa naalattarpavut, paasillugu taanna naapertuilluartuullunilu asannittuusoq aamma taassuma inatsisai uagutsinnut iluaqutaanerpaasut. (Es 48:17; 1 Joh 5:3) Aappassaanik, unioqqutitsisumik allamik isumataarsimanngitsumik peqateqartarunnaarnerput uagut nammineq ilagiinniittullu allat anersaakkut ileqqussatigullu mingutsinneqannginnissatsinnut illersuutigissavarput, aamma taanna peqatigisarunnaarutsigu ilagiit tusaamasaalluartuassapput. (1 Kor 5:6, 7) Pingajussaanik, ilumoorfiginnilluta najoqqutassianik Biibilimiittunik aalajangiusimanninnerput ilaajunnaarsitaasumut iluaqutaasinnaavoq. Ilagiit eqqartuussisinnaanermut ataatsimiititaliaata aalajangigaannik tapersersuinerput unioqqutitsisup, maannamut utoqqaanertat ikiuiniarnerannik itigartitsisarsimasup, uummataanut immaqa sunniuteqarsinnaavoq. Taanna asasaminik peqateqartarunnaarnini pissutigalugu immaqa ‘silattuaqissaaq’, iliuuserisimasami ilungersunarneranik paasinnilluni Jehovamullu uterniarluni iliuuseqarluni. — Luk 15:17.

Ilaajunnaarsitaasormi ilaqutarigutsigu? Taamaattoqartillugu ilaqutariittut ataqatigiilluarneq Jehovamik ilumoorfiginninnitsinnut misilinneqaataangaarsinnaavoq. Ilaqutarput ilaajunnaarsitaasimasoq qanoq periaaseqarfigissavarput? Tamatumunnga tunngatillugu nalaanneqarsinnaasut tamaasa sammisinnaanngilavut, pissutsilli atugaasartut tunngaviusut marluk misissoriartigit.

Ilaannikkut ilaajunnaarsitaasimasoqartarpoq ilaquttaminik najugaqateqartumik. Taassuma ilaajunnaarsitaanera ilaqutariittut attaveqatigiikkunnaassutaanngimmat ilaqutariittut ulluinnarni sammisartakkat suliassallu pisarnermissut ingerlaannarsinnaassapput. Taassumali iliuutsimigut ersersippaa ilaquttaminut uppertunut anersaakkut attaveqarunnaarniarluni aalajangersimalluni. Taamaattumik ilaqutaasut ilumoorfiginnittut taanna anersaakkut ittunut tunngasunik sammisaqaqatigisinnaajunnaarpaat. Assersuutigalugu ilaajunnaarsitaasimasoq ilaqutariit Biibilimik atuaqqissaaqatigiinneranni najuukkuni eqqartueqataasinnaanngilaq. Ilaajunnaarsitaasimasorli  ukiukitsuuppat angajoqqaajusut taassuminnga ilinniartitsillutillu perorsaanissartik suli akisussaaffigaat. Taamaattumik angajoqqaat asannittut aalajangersinnaapput taanna Biibilimik atuaqqissaaqatiginiarlugu. * — Uss 6:20-22; 29:17.

Aamma imaassinnaavoq ilaajunnaarsitaasup ilaquttani najugaqatigiunnaareersimagai. Taanna ilaqutariinnut tunngatillugu ilaatigut attaveqarfigisariaqartarsinnaagaluartoq taassuma attaveqarfiginera sapinngisamik akuttunerpaatinniarlugulu sivikinnerpaatinniartariaqarpoq. Ilaqutaasut kristumiut ilumoorfiginnittut ilaajunnaarsitaasimasup nooreersimasup attaveqarfiginissaanut pissutissarsiornavianngillat. Jehovamilli taassumalu peqatigiissortaanik ilumoorfiginninnertik kajumississutigalugu unioqqutitsisunik ilaajunnaarsitsinermut tunngatillugu aaqqissuussaq Biibilimik tunngavilik tapersersussavaat. Taakkua ilumoorfiginnillutik aalajangiusimanninnerat unioqqutitsisumut iluaqutaanerpaasussaavoq, taamaannerallu pissutigalugu taassuma perorsaatissinneqarnini immaqa iluaqutigilersinnaavaa. * — Hebr 12:11.