1, 2. Sooq Jehovap unneqqarissuunissatsinnik ilungersuutiginninnerput nuannaarutigisarpaa? Assersuuteqarit.

ANAANAQ erninilu pisiniarfimmiit anipput. Nukappiararlu tupalluni uneriasaarpoq. Pinnguaaraq pisiniarfimmi tigusimasani tigummivaa. Iliniarlugu imaluunniit anaanami pisiarisinnaaneraa aperiniarlugu puiortoorsimavaa. Aliatsalluni anaanani qiviarpaa. Anaanaata eqqissisarpaa, ernermilu pinnguaaraq utertinniassammagu utoqqatserniassammallu pisiniarfimmut uteqatigaa. Erninilu taamaaliormat anaanaata qamannga pisumik nuannaarutigaa tulluusimaarutigalugulu. Sooq?

² Angajoqqaat meeqqamik unneqqarissuunerup pingaaruteqassusianik paasinnileraangata nuannaarutigingaartarpaat. Aamma Ataatarput qilammiusoq “Guuti unneqqarissoq” taamatut misigisarpoq. (Tuss 31:6) Anersaakkut inersimanerujartortilluta unneqqarissuunissarput ilungersuutigigaangatsigu Jehovap nuannaarutigisarpaa. Jehova nuannaartikkusukkatsigu taassumalu asanninneraniittuinnarumagatta Paulusi isumaqatigaarput, taannami ima allappoq: ‘Sutigut tamatigut unneqqarikkusuppugut.’ (Hebr 13:18, NW) Unneqqarissuunissamut tunngatillugu sapernartissinnaasavut sisamat sammeqqaariartigit, kingornalu unneqqarissuunerup pilluaqqussutisiassartaasa ilaat sammissavavut.

3-5. (a) Imminut salloqittarnerup navianaataaneranut Guutip oqaasiani qanoq mianersoqquneqarpugut? (b) Immitsinnut ilumoorfiginissatsinnut suna iluaqutigisinnaavarput?

³ Imminut ilumoorfiginiarneq unamminiarnartuusinnaavoq. Naammalluinnanngitsuugatta imminut salloqittariannaavugut. Assersuutigalugu Jiisusip kristumiut Laodikeamiittut oqarfigai imminnut salloqittarsimasut pisuujusorigamik uffa tassaallutik anersaakkut ‘piitsut, tappiitsut tamaqanngitsullu’. Aap, taakku nallinnarluinnarput. (Saqq 3:17) Imminnut salloqittarnertik pissutigalugu navianartorsiungaarput.

⁴ Ajoqersukkap Jaakup mianersoqqussutaa una eqqaamagunarpat: “Guutisiortuusorisoq oqqaminilli naalatsitsinani imminik salloqittarpoq; taassuma guutisiornera sussaanngilaq.” (Jaak 1:26) Isumaqarutta oqqatsinnik atornerluiitigaluta Jehovamit akuerisaasumik pallorfiginnissinnaalluta imminut salloqittassaagut; Jehovamik pallorfiginninnerput sussaassanngilaq, imaluunniit asuliinnaassaaq. Guuti asuliinnaasumik pallorfigissanngikkutsigu suna iluaqutigisinnaavarput?

⁵ Guutip oqaasia sallusuissutaasoq Jaakup versit siuliini tarrarsuummut assersuuppaa. Kajumissaarpaatigut Guutip inatsisaanik naammalluinnartunik tarrarsussasugullusooq takusavullu naapertorlugit iliuuseqassalluta. (Jaaku 1:23-25 atuakkit). Biibili iluaqutigalugu immitsinnut ilumoorfigisinnaallutalu paasisinnaavarput sunik aaqqitassaqarnerluta. (Upp 3:40; Hagg 1:5) Aamma Jehova qinnuigisinnaavarput misissuiffigeqqulluta ingasattumillu kukkussutitsinnik nassuerutiginninnissatsinnut aaqqiinissatsinnullu ikioqqulluta. (Tuss 139:23, 24) Unneqqaserlunneq sanngiissutaavoq, mianersunngikkaannilu ileqquliunneqariataarsinnaavoq. Uagulli Ataatatta qilammiusup unneqqaserlunnermut isiginnittaasiatut  isiginnittaaseqartariaqarpugut. Tussiaat 5:7-imi ima allassimavoq: “Nungutittaraatit sallutuut. Naalakkap inuartut peqqusersiortullu maajugai.” Jehovap ikiorsinnaavaatigut maajugisaminik maajuginnilersinnaaqqulluta uatsinnullu isiginnittaatsimisut isiginnittaaseqalersinnaaqqulluta. Eqqaamajuk Paulusi ima allattoq: ‘Unneqqarikkusuppugut.’ Ullumikkut naammalluinnartuusinnaanngikkaluarluta unneqqarissuunissarput kissaatigalugulu ilungersuutigisarparput.

6. Sooq aappariit imminnut ilumoorfigeqatigiittariaqarpat, taamaaliornermikkullu iliuutsit navianartut suut iliuuserinavianngilaat?

⁶ Unneqqarissuuneq ilaqutariinni kristumiuusuni ilisarnaataasariaqarpoq. Taamaattumik uiusoq nuliaasorlu imminnut ammaffigeqatigiillutillu ilumoorfigeqatigiittariaqarput. Iliuutsit ajoqutaasut minguttuullu — assersuutigalugu aapparinngisamut qaninniarujoorneq, internetikkut isertorluni saniatigooqarneq pornografiimillu sammisaqarneq — aappariinnut kristumiunut naleqqutinngilluinnarput. Kristumiulli aappallit ilaat aapparminnut isertuillutik taamaaliorsimapput. Tamannalu unneqqaserluttuliorneruvoq. Kunngip Daavip aalajaatsup allatai uku maluginiakkit: “Sallutuut peqatigisarinngilakka, peqquserluttut ilagineq ajorpakka.” (Tuss 26:4) Aappaqaruit aappannut isertuillutit unneqqaserluttuliunngisaannarit!

7, 8. Oqaluttuat Biibilimiittut suut iluaqutigalugit meeqqat unneqqarissuunerup pingaaruteqassusia pillugu ilinniarsinnaappat?

 ⁷ Angajoqqaat unneqqarissuunerup pingaaruteqassusia pillugu meeqqaminnik ilinniartitsigaangamik oqaluttuat Biibilimiittut iluaqutigisinnaavaat. Maligassiuinerluttut ilaat tassaapput Akani tilleriarluni tillissimanerminik isertuiniartoq; Gehazi iluanaarumalluni sallusoq; aamma Judasi tillillunilu Jiisusi ajoquserniarlugu unneqqaserlulluni ajoqisumik iliuuseqartoq. — Jos 6:17-19; 7:11-25; 2 Kng 5:14-16, 20-27; Matt 26:14, 15; Joh 12:6.

⁸ Maligassiuilluartut ilaat tassaapput Jaaku kukkuluttornikkut aningaasanik ernermi pooqattaannut ilisisoqarsimasorigamiuk aningaasanik nassaarisimasaminnik utertitsinissaannik kajumissaarisoq; Jeftap pania pilliuteqangaartariaqaraluarluni ataatami neriorsuutaanik eqqortitsisoq; aamma Jiisusi siulittuut eqquutitikkumallugu ikinngutinilu illersorumallugit inupilunnut sapiilluni imminut ilisaritittoq. (1 Mos 43:12; Eqq 11:30-36; Joh 18:3-11) Oqaluttuat Biibilimiittut taakku unneqqarissuunermik pingaartitsineq pillugu angajoqqaat meeqqaminnik ilinniartitsinissaminnut iluaqutigisinnaasaasa ilaannaraat.

9. Unneqqarissuunermut tunngatillugu angajoqqaat meeqqaminnut maligassiuilluarumagunik sunaveersaartariaqarpat, aamma sooq maligassiuilluarnerat pingaaruteqarpa?

⁹ Angajoqqaat taamatut ilinniartitsisarunik ilinniartitsissutigisamissut iliuuseqartariaqarput. Apustili Paulusi ima aperaaq: “Illit allamik ilinniartitsisartutit imminut ilinniartinneq ajorpit? Oqaluussisartutit: ‘Tillissanngilatit,’ nammineq tillittarpit?” (Rom 2:21, NW) Angajoqqaat ilaasa meeqqatik unneqqarissuuneq pillugu ilinniartikkaluarlugit namminneq unneqqaserluttuliornermikkut taakku paatsiveerutitittarpaat. Immaqa angajoqqaat tillilaartarnertik salluliulaartarnertillu illersorniarlugu ima oqartarput: “Taamatut tigusilaarneq pissusissamisuuinnarpoq,” imaluunniit: “Salluliulaarneq ajoqutaanavianngilaq.”  Tillitarli qanorluunniit naleqanngitsigigaluarpat tillitaavoq, aamma salluliuutigineqartoq suugaluarpalluunniit salluneq salluliorneruvoq. * (Lukasi 16:10 atuaruk). Meeqqat ilumoortuusaarneq ingerlaannaq paasisarpaat, unneqqaserluttuliornerlu meeqqanut ajoqutaangaarsinnaavoq. (Ef 6:4) Angajoqqaalli maligassiuilluarnerannit unneqqarissuuneq ilinniarpassuk ilimanarnerussaaq inersimasunngorunik silarsuarmi unneqqaserluffiusumi Jehovamut ataqqinaataasumik pissusilersoriaaseqassasut. — Uss 22:6.

10. Uppeqatitsinnik oqaloqateqarnermut tunngatillugu suut mianersuutigisariaqarpavut?

¹⁰ Uppeqatitsinnik peqateqaraangatta unneqqarissuunissamik ineriartortitsinissatsinnut periarfissarpassuaqartarpugut. Kapitali 12-imi sammeriikkatsitut oqalussinnaanermik tunissummik atuinerput eqqumaffigisariaqarparput,  ingammik anersaakkut qatanngutitsinnik peqateqaraangatta. Allammi pillugit oqalunneq oqaatissuaaninngoriaannaavoq mamarliinermillu kinguneqarsinnaalluni. Tusarsimasarput ilumoortuunersoq nalullugu ingerlateqqikkutsigu imaassinnaavoq sallumik ingerlatitseqqiisugut. Pitsaanerungaassaaq ‘oqaasissatsinnik killiliinissarput’. (Uss 10:19) Imaassinnaavorlu ilumoortumik ilisimasaqartugut, imaattariaqanngilarli allanut ingerlateqqissagipput. Assersuutigalugu imaassinnaavoq tusarsimasarput susassarinngikkipput eqqartuinerluunniit asannittuliornerunngitsoq. (1 Th 4:11; 1 Petr 4:15) Inuit ilaasa kannguttaatsuunertik sorraatsuunertillu utoqqatsissutiginiartarpaat ilumoortumik oqalunnerarlutik, tamatigulli inussiarnersumik oqaluttassaagut. — Kolossemiut 4:6 atuaruk.

11, 12. (a) Ingasattumik ajortuliorsimasut ilaasa qanoq ajortuliornertik ajornerulersissimavaat? (b) Ingasattumik ajortuliornermut tunngatillugu salluliuutit suut Saatanimeersuuppat, qanorlu akiorsinnaavavut? (c) Jehovap peqatigiissortaanut qanoq unneqqarissuusinnaavugut?

¹¹ Ilagiinni siuttuusunut unneqqarissuunissarput pingaaruteqangaarpoq. Ingasattumik ajortuliortut ilaasa ajortuliamik isertorniarneratigut utoqqaanertanillu aperineqaraangamik sallunermikkut ajortuliornertik ajornerulersiinnartarpaat. Taakku Jehovamut kiffartortuusaarlutik ingasattumik ajortuliortarnermikkut marloqiusamik inooriaaseqalersimapput. Taamatut inooriaaseqartillutik qanorluunniit ilioraluarunik unneqqaserluttuliortuupput. (Tuss 12:3) Allat ilumoortut ilaannaat utoqqaanertanut eqqaasarpaat pingaaruteqartunillu isertuillutik. (ApS 5:1-11) Taakkua unneqqaserluttuliornerat sallunik Saatanimeersunik upperinninnerannit aallaaveqarajuppoq. — Takuuk ungalusaq “ Ingasattumik ajortuliornermut tunngatillugu salluliuutit Saatanimeersut”.

¹² Aamma Jehovap peqatigiissortaanut unneqqarissuunissarput pingaaruteqarpoq. Assersuutigalugu oqaluussinermi  nalunaarusioraangatta eqqoqqissaartumik nalunaarusiortariaqarpugut. Aamma kiffartoriaatsimut aalajangersimasumut qinnuteqarutta peqqissuserput atukkavullu pillugit eqqunngitsumik immersuissanngilagut. — Ussatit 6:16-19 atuakkit.

13. Niueqatigiinnermut tunngatillugu uppeqatitsinnut qanoq unneqqarissuusinnaavugut?

¹³ Aamma niueqatigiinnermut tunngatillugu uppeqatitsinnut unneqqarissuussaagut. Qatanngutit niueqatigiikkunik tamanna Guutimik pallorfiginninnerminnit immikkoortilluinnartariaqarpaat, assersuutigalugu naalagaaffilersaarfimmi oqaluussinermilu tamakkuninnga eqqartuinavianngillat. Kristumiut uppeqatiminnik sulisitsisut sulisutik unneqqariffigisariaqarpaat piffissaq eqqorlugu akissarsiamik ajunngitsorsiassamillu neriorsuutigeriikkaminnik inatsisitigulluunniit aalajangersakkat malillugit aningaasarsiaqartitsinermikkut. (1 Tim 5:18; Jaak 5:1-4) Aamma uppeqatitta sulisorippatigut sulinissamut piffissaq isumaqatigiissutigineqareersimasoq tamaat sulinermut atortariaqarparput. (2 Th 3:10) Naatsorsuutigissanngilarput anersaakkut qatanngutigiinnerput pissutigiinnarlugu immikkut pineqassalluta isumaqarluta sulisunit allanit periarfissarissaarnerussalluta, soorlu sulisitsisutta sulinngiffeqarnerutissallutalu ajunngitsorsiassaqarnerutissagaatigut. — Ef 6:5-8.

14. Kristumiut niueqatigiikkaangamik silatusaartumik qanoq iliortariaqarpat, aamma sooq?

¹⁴ Taavami uppeqatit niueqatigiinnerat aningaasaliinertaqaraangat, taarsigassarsisitsinertaqaraangat suliffimmilluunniit piginneqatigiittoqaraangat? Biibilimi pingaarutilimmik atoriaannaasumik siunnersuuteqarpoq: Isumaqatigiissutigineqartut tamaasa allassigit! Assersuutigalugu Jeremiap nunaammik pisigami uppernarsaat marluinngorlugu allappaa. Allagaq ilisimannittut najuutsillugit  atsiorneqarpoq toqqorneqarlunilu. (Jer 32:9-12; aamma takukkit 1 Mosesi 23:16-20). Uppeqammik niueqateqaraanni isumaqatigiissutigineqartut tamarmik sukumiisumik allanneqarnerat allatallu uppernarsarneqarlunilu atsiorneqarnera tatigeqatigiinnginnermut ersiutaanngilaq. Taamaaliornerli paatsooqatigiinnerit, pakatsinerit avissaartuutaasinnaasumillu isumaqatigiinngissutit pinaveersaartinneqarnissaannut iluaqutaavoq. Kristumiut niueqatigiittut eqqaamasariaqarpaat ilagiit ataasiussuseqarlutillu eqqisseqatigiinnerat niuernermit pingaaruteqangaarnerusoq. * — 1 Kor 6:1-8.

15. Jehovap niuernikkut peqquserluttuliornerit qanoq isumaqarfigai, kristumiullu peqquserluttulioriaatsit qanoq isumaqarfigaat?

¹⁵ Kristumiut aamma uppeqatiginngisaminnut unneqqarissuusariaqarput. Paulusi ima allappoq: ‘Sutigut tamatigut unneqqarikkusuppugut.’ (Hebr 13:18, NW) Pinngortitsisitta niuernermut tunngatillugu sutigut tamatigut unneqqarissuunissarput pingaartingaarpaa. Assersuutigalugu oqimaalutaaviit eqqortut atorneqarnissaata pingaaruteqangaarnera Ussatini arlaleriarluni allaatigineqarpoq. (Uss 11:1; 20:10, 23) Itsaq tuniniaaniaraanni tuniniagassanik aningaasanillu akiliutissanik uuttuiniartoqaraangat oqimaalutaaviit oqimaaluttallu atorneqartarput. Niuertut unneqqaserluttut pisiniartunut peqquserluttuliorniarlutik oqimaaluttat marluk assigiinngitsut oqimaalutaaviillu eqqoqqissaanngitsut atorajuppaat. * Jehovap tamanna  uumigilluinnarpaa! Jehovap asanninneraniittuinnarumalluta niuernikkut peqquserluttuliornerit suulluunniit ingalassimalluinnartariaqarpavut.

16, 17. Ullumikkut unneqqaserluttuliornerit suut nalinginnaappat, kristumiullu ilumoortut sunissartik aalajangiusimalluinnarpaat?

¹⁶ Saatani silarsuarmut matumunnga naalagaammat sumi tamani unneqqaserluttoqartarnera tupigusuutiginngilarput. Ullut tamaasa unneqqaserluttuliornissamut ussernartorsiortinniarneqartarpugut. Inuit suliffissarsioraangamik piginnaanitik, ilinniarsimasatik suliffimmilu misilittagarisimasatik pillugit sallullutik ilallattaarisarnerat nalinginnaavoq. Inuit nunasinissamut, akileraartarnermut, sillimmasiinermut allanullu tunngatillugu immersuigaangamik kissaatigisatik anguniarlugit paasissutissat ilumuunngitsut allakkajuppaat. Atuartut ilinniartullu ilarpassui misilitsinnerminni peqquserluttarput, suliassallu tunniutassat allakkaangatigit immaqa allat suliarisimasaat internetimut ilineqarsimasut ilaartarpaat namminneq allatarisimanerarlugit. Aamma inuit angusaqarniaraangamik atorfilinnut unneqqaserluttunut akiliillutik peqquserluttarnerat nalinginnaavoq. Silarsuarmi ‘namminissarsiortunik, aningaaserituunik ajunngitsunullu akeraasunik’ inuppassuaqarmat unneqqaserlunneq ilimagiinnagassaavoq. — 2 Tim 3:1-5.

¹⁷ Kristumiut ilumoortut unneqqaserluttulioriaatsit tamakkua ingalassimanissaat aalajangiusimalluinnarpaat. Inuilli unneqqaserluttut iluatsitsilluarpasinnerat pissutigalugu unneqqarissuujuarnissarput ilaannikkut sapernartissinnaavarput. (Tuss 73:1-8) Kristumiullu “sutigut tamatigut” unneqqarikkusukkamik aningaasatigut ajornartorsiuteqalersinnaasarput. Unneqqarissuuneq imminut akilersinnaava? Aap, ilaana! Sooq taamatut oqarsinnaavugut? Unneqqarissuuneq sunik pilluaqqussutisiassartaqarami?

18. Unneqqarissutut ilisimaneqarneq sooq pingaaruteqangaarpa?

¹⁸ Inuunermi pingaaruteqarnerpaasa ilagaat unneqqarissutut tatiginartutullu ilisimaneqarnissaq. (Takuuk ungalusaq “ Unneqqarissuujuaannarpunga?”). Tamannalu inuit tamarmik anguniarsinnaavaat! Eqqarsaatigeriaruk — illit piginnaanerit, isikkoqarnerit, tunuliaquttat allalluunniit iliuuseqarfigisinnaanngisatit qanorluunniit ikkaluarpata unneqqarissuusinnaavutit. Taamaakkaluartorli ullumikkut unneqqarissutut tusaamaneqarneq qaqutigoortuuvoq. (Mika 7:2) Immaqa unneqqarissuunerit pissutigalugu inuit ilaasa mitaatigissavaatsit, allalli unneqqarissuugavit iluarissallutillu tatigissallutillu ataqqissavaatsit. Jehovap Nalunaajaasuisa ilarpassuisa unneqqarissuunertik allaat aningaasaqarniarnikkut iluaqutigisimavaat. Assersuutigalugu taakkua ilaasa suliffitsik suliffigiinnarsimavaat suleqatitik unneqqaserluttut soraarsitaasut. Imaluunniit sulisut unneqqarissut pisariaqartinneqarmata ilaat suliffittaarsimapput.

19. Sutigut tamatigut unneqqarissuunerput uagutsinnut Jehovamullu attaveqarnitsinnut qanoq sunniuteqarsinnaava?

¹⁹ Unneqqarissuunerit pissutigalugu taamatut pilluaqquneqanngikkaluaruit allatigut pitsaanerusutigut pilluaqquneqarsinnaavutit. Assersuutigalugu ilerasuutissaqarnavianngilatit. Paulusi ima allappoq: ‘Nalunngilluarparput ilerasuutissaqarnata.’ (Hebr 13:18) Aamma unneqqarissuunerit Ataatatsinnit qilammiusumit asannittumit maluginiarneqartuaannassaaq, taassumami inuit unneqqarissut asavai. (Tussiaat 15:1, 2; Ussatit 22:1 atuakkit). Aap, unneqqarissuunerput Guutip asanninneraniittuinnassutigisinnaavarput, tamannalu pilluaqqussutaavoq annerpaaq. Maanna unneqqarissuunermut tunngassuteqartoq sammeriartigu: Jehovap sulinermut isiginnittaasia.