1-3. Petrusi sumik takorluuisin­neqarpa, aamma sooq isumaata paasinissaa uagutsinnut pingaaruteqarpa?

 UKIUMI 36-mi ukiakkut Petrusi illoqarfimmi umiarsualivit­talimmi Jorpamiippoq. Tassani illup sineris­samiittup qaavani qinuvoq. Illumi tassani ullualunni unnuisimavoq. Illup piginnittua Siimuut ammiortuuvoq. Juutit amerlanersaasa ammiortut ajorisarpaat ammiortullu illuani unnuerusun­naviarnatik. a Petrusili taakkunatut eqqarsanngilaq. Taamaattorli Jehovap kinaassusersiun­nginneq pillugu suli allamik ilinniar­tikkusuppaa.

² Petrusi qinunermini eqqaminiittunik sianigisaaruppoq. Juutip kialluunniit eqqissiun­naarutigisin­naasaanik takorluuisin­neqarpoq. Qilammiit annoraas­siarujus­suartut isikkulik ninginneqarpoq, tassaniippullu Moorsisip inatsisai naapertorlugit uumasut nereqqusaan­ngitsut. Qilammiit Petrusi peqquneqarpoq uumasunik taakkuninnga toqutseriarluni nerissasoq, Petrusili ima akivoq: “Nereqqusaan­ngitsumik minguttuumillu nerisiman­ngisaan­narpunga.” Ataasiaannarani pingasoriarlunili ima oqarfigitippoq: “Guutip minguersagai nereqqusaan­ngitsutut oqaatigisarun­naakkit.” (ApS 10:14-16) Petrusi paatsiveerusimaarpoq, Jehovamilli nassuiaan­neqalerpoq.

³ Petrusip takorluuisitaanera qanoq isumaqarpa? Isumaa paasisariaqarparput, Jehovammi inunnut isiginnittaasia pillugu pingaarutilimmik paasisaqarfigaarput. Aatsaallu Guutip inunnut isiginnit­taasiatut isiginnit­taaseqarutta Guutip kunngeqarfianik oqaluus­seqquneqarnerput naammas­silluarsin­naavarput. Petrusip  takorluuisitaanera paasiumallugu tamatuma siornatigut kingornatigullu pisimasut sammeriartigit.

4, 5. Korniiliusi kinaava, qinuneranilu qanoq pisoqarpa?

⁴ Petrusip ilisimanngilaa ippassaammat Cesariiami, Jorpamiit 50 kilometerit missaannisut ungasitsigisumi, qanoq pisoqartoq. Tassani angut Korniiliusimik atilik Guutimeersumik tusagaqarsimavoq. Korniiliusi Romamiut sakkutuuinut 100-nut naalagaavoq ‘upperluar­tutullu’ allaatigineqarluni. b Ilaqutariinni ittuulluartuuvoq ‘illuaniittullu tamarmik Guutimik mianerin­nittuullutik’. Juutit upperisaannut ilanngus­simasuunngilaq tassaagami juutiun­ngitsoq kipineqarsiman­ngitsoq. Taamaattorli juutit pisariaqar­titsisut isumagisarpai pigisatigut ikiortarlugit. Angut eqqortuliorusuttoq taanna “Guutimut qamannga pisumik qinukulasarpoq”. – ApS 10:2.

⁵ Ualikkut pingasut missaanni Korniiliusi qinutilluni takorluuisin­neqarpoq. Inngilimit ima oqarfigineqarpoq: “Guutip qinnutitit iluaralugit tusarlugillu piitsunut tunissutitit maluginiarpai.” (ApS 10:4) Taava inngilip Korniiliusi peqquaa angutit aallartissagai apustili Petrusi aggersariar­toqqullugu. Korniiliusi tassaalerpoq juutiun­ngitsuni kipineqarsiman­ngitsuni kristumiun­ngortoq siulleq.

6, 7. (a) Guutip imminut pilluni paasisaqarusullutik ikioqqusut qinnutaannik akisisar­neranik assersuuteqarit. (b) Misigisat taamaattut qanoq isummerfigisin­naavagut?

⁶ Nalitsinni inuit Guuti pillugu ilumoortumik  paasinnik­kusullutik qinnutaat Jehovap akisarpai? Aap, assersuuteqariarta. Arnaq Albaniami najugalik Napasuliaq Alapernaarsuiffimmik meeqqanik perorsaaneq pillugu allaaserisalimmik tunineqarpoq. c Nalunaajaasumut kasuttorsimasumut ima oqarpoq: “Paninnik perorsaaninni ikioqqullunga Guutimut qinorut­torlunga kasuttorputit! Guutip maanngar­tippaatit. Killitsis­sutigeqaara, pisariaqar­titannimmi tunivarma!” Arnaq paninilu Biibilimik misissuisalerput uialu kingusin­nerusukkut peqataasalerluni.

⁷ Taamatut misigisaqartuni taannatuaava? Naamerluinnaq! Nunarsuarmi sumi tamani assingusumik misigisaqartut amerlaqaat – amerlangaarmatalu nalaatsor­nerinnakkut pisimanavian­ngillat. Taava qanoq isummersin­naavugut? Siullertut, Jehovap imminut pilluni paasisaqarusullutik ikioqqusut qinnutaat akisarpai. (Kng 1. 8:41-43; Tuss 65:3) Aappaattut, oqaluus­sinitsinni inngilinit ikiorneqar­tarpugut. – Saqq 14:6, 7.

8, 9. Petrusi Guutimit qanoq paasitin­neqarpa, aamma qanoq qisuariarpa?

⁸ Petrusi suli illup qaavaniippoq. ‘Takorluuisitaaninilu qanoq paasisariaqarnersoq suli eqqarsaatigigaa’ Korniiliusip aallartitai illumut apuupput. (ApS 10:17) Petrusip nerisassat Moorsisip inatsisai naapertorlugit nereqqusaan­ngitsut pingasoriarluni neriuman­ngeqqammerpai. Maanna oqariar­tortitat peqqusinerattut angutip juutiun­ngitsup kipineqarsiman­ngitsup illuanukarusus­sanerpa? Jehovap anersaani illernartoq aqqutigalugu piumasaminik Petrusi paasitippaa. Petrusi ima oqarfigineqarpoq: “Angutit pingasut apersuutigaatsit. Taakku aallartitarigakkit ammukariarlutit nangaan­ngilluin­narlutit ingerlaqatigikkit.” (ApS 10:19, 20) Uumasunik nereqqusaan­ngitsunik Petrusip takorluuisitaanini piareersaatigisimassavaa anersaap illernartup siulersuineranik maleruaanis­saminut.

⁹ Petrusip paasigamiuk Korniiliusi inngilimit peqquneqarluni oqariar­tortitsisoq angutit taakku ‘iseqqoriarlugit tikeraar­tumisut inisimasorilerpai’. (ApS 10:23a) Tamatumannga erserpoq Petrusip Guuti qanoq piumasaqartoq paasillugulu eqqarsar­taatsini allanngoriar­tortilereersimagaa.

10. Jehovap innuttani qanoq siulersorpai, aamma apeqqutit suut eqqarsaatigis­savagut?

 ¹⁰ Ulloq manna tikillugu Jehovap innuttaminut piumasani paasitik­kiartuaartarpaa. (Uss 4:18) Anersaani illernartoq atorlugu “inussiaq aalajaallunilu silatooq” siulersortarpaa. (Mat 24:45) Ilaannikkut Guutip oqaasianik paasinnit­taaserput allanngortarpoq peqatigiis­sortatsin­nulluunniit tunngasutigut allannguisoqar­tarluni. Taamaattumik uku eqqarsaatigigutsigit pitsaassaaq: ‘Allannguisoqaraangat qanoq qisuariar­tarpunga? Guutip anersaani atorlugu siulersuinera kajumillunga malippara?’

11, 12. Petrusi Cesariiamut tikikkami qanoq iliorpa, aamma suna paasisimavaa?

¹¹ Petrusi takorluuisin­neqareernermi aqaguani Cesariiamukarpoq, ilagaalu inuit qulingiluat – tassa Korniiliusip oqariar­tortitai pingasut aamma qatanngutit juutiusut arfinillit Jorpameersut. (ApS 11:12) Petrusip takkunnissaa Korniiliusip ilimagigamiuk “eqqarlini ikinngutigil­luakkanilu [tamarmik juutiun­ngitsuugunartut] qaaqqusimavai”. (ApS 10:24) Petrusi tikiukkami iliuusererusun­ngisaan­narsimasamisut iliuuseqarpoq: Juutiun­ngitsup kipineqarsiman­ngitsup illuanut iserpoq! Petrusi nassuiaavoq: “Nalunngilarsi juutip naggueqatigin­ngisani peqatigeq­qusaanagulu pulaaqqusaan­ngikkaa, Guutilli uannut takutippaa inuk kinaluunniit minguttuumik taasassan­ngikkiga.” (ApS 10:28) Petrusip maanna paasivaa illup qaavaniitilluni takorluuisin­neqarnini nerisassanut nereqqusaasunut tunngatil­luguunnaan­ngitsoq ilinniutigissagini. ‘Inuk kinaluunniit [aamma juutiun­ngitsoq] minguttuumik taasassanngilaa.’

¹² Korniiliusip illuaniittut tamarmik Petrusi tusarnaarusuppaat. Korniiliusi oqarpoq: “Guutip saavani tamatta najuuppugut Jehovap ilinnut oqqersuutai tamaasa tusarumallugit.” (ApS 10:33) Takorlooriaruk illit soqutigin­nittumit taama oqarfigineqaraluaruit qanoq misigis­sagaluar­nersutit! Petrusi maluginiar­nartumik ima oqaaseqarpoq: “Maanna paasillualerpara Guutip kikkut tamaasa assigiimmik pisarai, imminillu mianerinnittut eqqortulior­tartullu sumiuunerat apeqqutaatinnagu iluarisarai.” (ApS 10:34, 35) Petrusip paasisimavaa Guutip isaani ammip qalipaataa, sumiuussuseq isikkorluunniit apeqqutaan­ngitsut. Petrusi nangilluni Jiisusip kiffartornera, toqunera makititaaneralu pillugit oqalulerpoq.

13, 14. (a) Ukiumi 36-mi Korniiliusip juutiun­ngitsullu allat kristumiun­ngornerannut tunngatillugu suna maluginiarnarpa? (b) Sooq inuit tunuliaqutaat tunngavigalugit naliler­tassanngilagut?

 ¹³ Maanna siornatigut pisiman­ngisaan­nartumik pisoqarpoq. “Petrusi suli tamakkuninnga eqqartuitillugu” anersaaq illernartoq ‘allamiunut kuineqarpoq’. (ApS 10:44, 45) Imermut morsutsitaaneq sioqqullugu anersaamik illernartumik taninneqar­toqarsimaneranik Biibilimi allaatigineqartuni taannatuaavoq. Petrusip paasigamiuk tamanna Guutimit iluarisaanermut ersiutaasoq peqqusivoq juutiun­ngitsut taakku “imermut morsutsin­neqassasut”. (ApS 10:48) Juutiun­ngitsut ukiumi 36-mi kristumiun­ngormata piffissaq juutit kisimik Guutimit iluarisaaf­figisaat naavoq. (Dan 9:24-27) Pisumi tamatumani Petrusip “qilaap kunngeqarfianut matuersaatit” pingajuat atorpaa. (Mat 16:19) Matuersaat tamanna juutiun­ngitsut kipineqarsiman­ngitsut anersaamik illernartumik taninneqarsin­naalernis­saannik ammaassivoq.

¹⁴ Guutip kunngeqarfia pillugu oqaluus­sisartuusugut nalunngilarput ‘Guuti kinaassusersior­tuunngitsoq’. (Rom 2:11) Guutip ‘piumasaraa inuit tamalaat annaanneqassasut’. (Tim 1. 2:4) Taamaattumik inuit isikkui tunngavigalugit naliliif­figinngisaan­nassavagut. Jiisusip peqquaatigut Guutip kunngeqarfia pillugu oqaluus­sissasugut. Tassa inuit tamaasa oqaluus­siffigis­savagut, ammip qalipaataa, sumiuuneq, isikkoq qanorlu upperisaqarneq apeqqutaatinnagit.

15, 16. Sooq Petrusi kristumiunit juutiusunit isornar­torsior­neqarpa, aamma Petrusip sooq taama iliornerluni qanoq nassuiarpaa?

¹⁵ Petrusi Jerusalem­mimukarpoq, qularnan­ngitsumik qanoq pisoqarsimanera oqaluttuarerusullugu. Sulili Jerusalemmimut tikiutin­ngitsoq tassaniittut tusareersimavaat “allamiut Guutip oqaasianik upperin­nilersimasut”. Petrusi tikeqqam­miinnartoq ‘kipisisar­nissamik aalajangiusiman­nittunit isornar­torsior­neqalerpoq’. ‘Kipineqarsiman­ngitsut illuannut iserluni nereqatigin­nissimanera’ eqqissiun­naassutigivaat. (ApS 11:1-3) Eqqissiun­naarutigisaat tassaanngilaq juutiun­ngitsut kristumiun­ngorsin­naanerat. Kristumiut juutiusut taakku isumaqarput juutiun­ngitsut Jehova guutisiorfigis­sagunikku Moorsisip inatsisai – ilaatigut kipineqarnermut tunngasut – maleruassagaat. Ersarippoq kristumiut juutiusut ilaasa suli Moorsisip inatsisai maleruarusukkaat.

¹⁶ Petrusip sooq taamaaliorsimanerluni qanoq nassuiarpaa? Apustilit Suliaat 11:4-16 naapertorlugit Guutip siulersuisimaneranut uppernarsaatit sisamat Petrusip eqqaavai: (1) Guutimeersumik takorluuisin­neqarnini (versit 4-10); (2) anersaamit peqquneqarnini (versit 11, 12); (3) Korniiliusip illuanut inngilip isersimanera (versit 13, 14); aamma (4) juutiun­ngitsut anersaamik illernartumik tunineqarsimanerat. (versit 15, 16) Petrusip oqalugiarnini naggaserpaa eqqarsaal­lannartumik ima aperaluni: “Guutip tunissummik akeqanngitsumik uagutsinnut Naalakkamut Jiisusimut Kristusimut uppertunut tunniussami assinganik [juutiun­ngitsut uppertut] tunimmagit taava qanoq-aamma Guuti akornusissavara?” – ApS 11:17.

17, 18. (a) Kristumiut juutiusut qanoq aalajangigas­saqalerpat? (b) Sooq ilagiittut ataasius­suseqar­tuarnissaq sapernarsinnaava, apeqqutillu suut eqqarsaatigisariaqarpagut?

¹⁷ Juutit kristumiuusut Petrusip tunngavilersuutai tusareerlugit maanna aalajangiisariaqalerput. Siumut isummius­sereertarun­naarlutik juutiun­ngitsut Kristusimik malinnit­tunngorlutik imermut morsutsin­neqarsimasut uppeqatigilik­kamissut ilassis­sanerpaat? Allassimavoq: “Tamakku [apustilit kristumiullu juutiusut allat] tusaramikkit isornar­torsiuiun­naarlutik Guuti ima unnersiutigilerpaat: ‘Guutip aamma allamiut peqqissiminissamut inuuneqaler­nissamullu periarfis­sissimavai.’” (ApS 11:18) Taamatut ajunngitsumik qisuariarmata kristumiut ataasius­suseqar­tuarsin­naasimapput.

 ¹⁸ Kristumiut ilumoortut ‘inuiaqatigiinnit, naggueqatigiinnit inuiannillu tamaneersuugamik qanorluunniillu oqaasiliugamik’ ataasius­suseqar­tuarniarnerat sapernarsinnaavoq. (Saqq 7:9) Tassa ilagiin­niittut naggueqatigiinnikkut, kulturikkut tunuliaqut­takkullu assigiin­ngitsorujus­suupput. Taamaattumik apeqqutit uku eqqarsaatigigutsigit pitsaassaaq: ‘Siumut isummius­sereertarun­naavissimavunga? Inuit allat inoqatiminnit qaffasin­neruniar­taraluartut uanga uppeqatikka taamaaf­figinaveersaar­tarpakka?’ Korniiliusikkut kristumiun­ngornerisa ukiorpaaluit kingorna Petrusip kukkussutaa eqqarsaatigiuk. Siumut isummius­sereertartunit sunnerneqarluni Petrusi kristumiut juutiun­ngitsut “ilagisarun­naarpai”, taamaat­tumillu Paulusimit naqqinneqar­tariaqarluni. (Gal 2:11-14) Tamatumannga erserpoq siumut isummius­sereerneq mianersuutigiuas­sagipput.

19. Antiokiami kristumiut juutiusut kikkunnut oqaluus­sisalerpat, qanorlu kinguneqarpa?

¹⁹ Jiisusip malinnittai juutiun­ngitsunut kipineqarsiman­ngitsunut oqaluus­sisalerpat? Maluginiaruk kingusin­nerusukkut Antiokiami Syriamiittumi qanoq pisoqartoq. d Illoqarfimmi tassani juuterpassuit najugaqarput, juutillu juutiun­ngitsullu akornganni akeqqersimaar­toqarpianngilaq. Taamaattumik kristumiut tassaniittut juutiun­ngitsunut oqaluus­sinissartik ajornan­nginnerutit­tarpaat. Kristumiut juutiusut ilaasa “nutaarsiassat nuannersut grækerisut oqaasilinnut oqaluus­sissutigilerpaat”. (ApS 11:20) Juutinut grækerisut oqaasilinuinnaq oqaluus­sinatik aammali juutiun­ngitsunut kipineqarsiman­ngitsunut oqaluussipput. Tamanna Jehovap pilluaqquaa, ‘amerlangaartullu uppertun­ngorput’. – ApS 11:21.

20, 21. Barnaba qanoq anneruniajuitsuunermik ersersitsiva, uagullu oqaluus­sinermi qanoq anneruniajuitsuusin­naavugut?

²⁰ Soqutigin­nittorpas­suaqarmat ilagiit Jerusalem­mimiittut Barnaba Antiokiamukar­tippaat. Soqutiginnittut amerlangaarmata kisimiilluni tamaasa oqaluus­siffigisin­naanngilai. Kina oqaluus­seqatiserisinnaavaa? Saulusi allamiunut apustilin­ngortus­saagami oqaluus­seqatis­saqqissaaq. (ApS 9:15; Rom 1:5) Barnaba Saulusip imminerminiit oqaluus­sillaqqin­nerunissaa annilaangagiin­narlugu ikioqqun­ngitsuussava? Naamerluinnaq, anneruniajuitsuugami nalunngilaa ikiorneqar­tariaqarluni. Taarsusiliarpoq Saulusi ujariar­torlugu, marluul­lutillu Antiokialiarput. Tassanilu ukioq  ataaseq suleqatigiillutik ilagiit tassaniittut nakussatsippaat. – ApS 11:22-26a.

²¹ Uagut oqaluus­sinitsinni qanoq anneruniajuitsuusin­naavugut? Anneruniajuitsuusut naluneq ajorpaat piginnaasatik killeqartut. Tamatta assigiin­ngitsunik nukittuf­feqarlutalu piginnaaneqarpugut. Assersuutigalugu ilaasa torrutiin­narlugu oqaluussineq imaluunniit illumiit illumut oqaluussineq pikkorif­figisarpaat, pulaaqqiinerli Biibilimillu misissueqateqar­talernissaq sapernar­tillugu. Oqaluus­seriaatsit ilaat pikkorif­figinerulerusukkukku ikioqqusin­naavutit. Taamaaliornikkut Biibilimik ilinniar­titsillaq­qinnerulersin­naavutit oqaluus­sinermilu nuannaar­nerulerlutit. – Kor 1. 9:26.

22, 23. Antiokiami kristumiut qatanngutiminnut asanninnertik qanoq ersersippaat, nalitsinnilu Guutip innuttai tamatumunnga assingusumik qanoq iliortarpat?

²² “Guutip siulersuineratigut ilinniartitat Antiokiami kristumiunik aatsaavissuaq taaneqarput.” (ApS 11:26b) Kristusimik malinnik­kusukkamik taamatut taaneqarnerat tulluarpoq. Juutiun­ngitsut kristumiun­ngormata juutit juutiun­ngitsullu imminnut qatanngutigiittut pisalerpat? Tamanna paasiumallugu ukiumi 46-mi kaannersuaqalermat qanoq pisoqartoq sammeriartigu. e Taamani kaannersuaqaraangat ingammik piitsut eqqugaasarput, taakkumi aningaasanik katersaqar­natillu nerisassanik peqqumaateqarneq ajoramik. Kaannersuaqarnerani tamatumani kristumiut juutiusut Judiiami najugallit ilarpassuisa piitsuusimagunartut ikiorneqar­nissartik pisariaqar­tippaat. Antiokiami qatanngutit – ilaatigut kristumiut juutiun­ngitsut – tamanna paasigamikku ‘ikiuiniarnermi atugassanik Judiiami qatanngutinut nassiussipput’. (ApS 11:29) Uppeqatigiittut asaqatigiinnermik ersersitsil­luangaaramik!

²³ Aamma nalitsinni Guutip innuttai taamaaliortarput. Nunani allani nunatsin­niluunniit qatanngutigut pisariaqar­titsisut paasigaangatsigu ikiorusungaar­tarpagut. Pinngortitami ajunaar­nersuaqar­tillugu – ilaatigut ulussaarsuarmit nunallu sajunneranit – qatanngutit eqqugaasut ikiorumallugit Immikkoor­tortaqarfiup Ataatsimiititaliaa ajunaar­nersuaqar­tillugu ikiuiniarnermut ataatsimiititaliamik pilersitsipal­lattarpoq. Qatanngutinik taakkunannga  eqqugaasunik ikiuigaangatta taakkununnga asanningaarnerput ersersit­tarparput. – Joh 13:34, 35; Joh 1. 3:17.

24. Petrusip Jehovamit takorluuisitaanerata ilinniutissartaa paasilluarlugu qanoq ersersis­sinnaavarput?

²⁴ Kristumiuugatta ilumoortut nalunngilarput Petrusip Jorpamiilluni illup qaavani takorluuisitaanerata ilinniutis­sartaata paasinissaa pingaaruteqartoq. Guuti kinaassusersior­tuunngitsoq kiffartorfigaarput. Taassuma piumasaraa kunngeqarfini pillugu oqaluus­siuassasugut, inuit sumiuunerat inunnillu allanit qanoq isigineqarnerat apeqqutaatinnagit. Taamaattumik tusarnaarumasut tamaasa Jehova pillugu ilinniar­nissamut periarfis­sinnissaat aalajangiusimajuartigu! – Rom 10:11-13.