1-4. Petrusi qanoq ajornar­torsiorpa, aamma illit taamatut atugaqaraluaruit qanoq misigis­sagaluarpit?

 PARNAARUS­SIVIMMUT isertitaagami Petrusip matorsuit savimerngit matorpallattut tusaavai. Petrusi sakkutuunut marlunnut kalunnernik qilersugaaqqavoq, taakkulu inissaanukaappaat. Tassani tiimerpassuarni immaqaluunniit allaat ullorpassuarni qanoq pineqar­nissani tusarsiivaa. Ineeqqami takusinnaasai taamaallaat tassaapput iikkat, itsuarfissaq paarsisullu.

² Taava Petrusi peqqarniitsumik eqqartuun­neqarpoq. Kunngip Herodasi Agrippap Siulliup Petrusi toqutaatik­kusuppaa. a Inuit nuannaar­tikkusuk­kamigit pilersaarusiorpoq ullup qaangiiffiup kingorna Petrusi taakkua saavanni toqunneqassasoq. Petrusi asuliinnaq taamatut oqarfigitinngilaq. Apustileqataami – Jaaku – kunngimit taassumannga qanittukkut toqunneqarsimavoq.

³ Takorlooruk Petrusi aqagumut toqutaasus­saalluni qanoq misigisimas­sanersoq. Petrusi unnummi tassani ineeqqaminiippoq taartuinnarmi. Ukiualuit tamatuma siorna Jiisusip oqaasii eqqarsaatiginerpai? Oqarfigitippormi qilersugaalluni ‘ornikkusun­ngisaminut pisinneqassasoq’ – tassa toqutaassasoq. (Joh 21:18, 19) Immaqa eqqarsaatigaa taamaat­toqarnissaanut piffissan­ngorsimanersoq.

⁴ Illit Petrusitut atugaqaraluaruit qanoq misigis­sagaluarpit? Amerlasuut nikallorujus­suassagaluarput neriuuteqan­ngitsutullu misigalutik. Kristusilli malinnittai neriuutaarutivinneq ajorput. Petrusip uppeqatimilu malersor­neqarnerminni iliuusii qanoq ilinniarfigisin­naavagut? Tamanna sammeriartigu.

5, 6. (a) Sooq aamma qanoq kunngi Herodasi Agrippa Siulleq ilagiinnik malersuiva? (b) Sooq Jaakup toqutaanera ilagiinnut misilin­neqaataava?

⁵ Kapitalip matuma siuliani sammivarput Korniiliusip, juutiun­ngitsup kipineqan­ngitsup, ilaqutaasalu kristumiun­ngornerat ilagiinnut pisimasuusoq pingaarutilik. Juutilli kristumiuun­ngitsut paasigamikku kristumiut juutiusut juutiun­ngitsullu guutisioqatigiit­talersut assut ajuallaatigisimassavaat.

⁶ Herodasi politik­keriugami eqqarsarial­laqqissoq isummerpoq kristumiut ajortumik pigunigit juutinit iluarineqas­salluni. Tusarsimassavaa apustilip Jaakup Jiisusi Kristusi qanitarisimagaa. Taamaattumik Herodasip “Johannesip qatanngutaa Jaaku panamik toqutaatippaa”. (ApS 12:2) Tamanna ilagiinnut misilin­neqaataavoq alianaqisoq! Jiisusip allanngornera tupinnar­tuliornerisalu ilaat allat apustilinit pingasuinnarnit takuneqarput, taakkualu ilagaat Jaaku. (Mat 17:1, 2; Mak 5:37-42) Taanna qatanngutaalu Johannesi aallussil­luartuummata Jiisusip “Kallerup Erneri”-nik taavai. (Mak 3:17) Taamaattumik Jaaku toqutaammat ilagiit apustili asanartoq, sapiitsoq aalajaatsorlu annaavaat.

7, 8. Petrusi parnaarus­saammat ilagiin­niittut suppat?

⁷ Agrippap neriuutigisaatut juutit Jaakup toqutaanera iluaraat. Tamanna sapiillis­sutigalugu Petrusi malersulerpaa. Kapitalip matuma aallaqqaataani allaatigineqartutut Petrusi parnaarussaavoq.  Immaqali Agrippap eqqaamavaa apustilit parnaarus­sivimmit tupinnar­tuliornikkut aniguisitaasimasut, atuakkami matumani kapitali 5-imi allaatigineqartutut. Taamaattumik Petrusip aniguin­nginnissaa qulakkeer­niarlugu Herodasip isumagaa Petrusi sakkutuunut marlunnut kalunnernik qilersor­tinneqassasoq paarsisullu 16-it paarlakaajaallutik ulloq unnuarlu paarissagaat. Aniguis­sagaluarpallu sakkutuut paarsisut taakku toqutaassapput. Pissutsini artornartuni taakkunani Petrusip uppeqatai qanoq iliorsin­naappat?

⁸ Ilagiin­niittut nalunngilaat sussanerlutik. Apustilit Suliaat 12:5-imi ima oqaluttuarineqarpoq: “Petrusi parnaarus­saaqqavoq, ilagiin­niittulli qamannga pisumik Guutimut qinnuttuarpaat.” Aap, qatanngutertik asasartik ilumoorlutik uummammit pisumik qinnuttuarpaat. Jaaku toqutaagaluartoq neriuutaarutin­ngillat qinunerlu iluaqutaan­ngitsutut isigilernagu. Jehovap qinnutitit pingaar­tingaarpai piumasaminullu naapertuuttut akisarlugit. (Hebr 13:18, 19; Jaak 5:16) Tamatta tamanna eqqaamajuartigu!

9. Kristumiut siulliit Petrusimik qinnussinerat qanoq ilinniarfigaarput?

⁹ Nalunngisaqarpit uppeqatinnik misilin­neqartunik? Immaqa malersugaapput, naalakkersuisunit akerlilersor­neqarput imaluunniit pinngortitami ajunaar­nersuarmit eqqugaallutik. Taakku qinnussin­naavatit. Immaqaluunniit ilisimavat uppeqatitit allatigut ajornar­torsiortut – soorlu ilaquttaminnit akerlilersor­neqartut, nikallungasut uppernik­kulluunniit misilin­neqartut. Qinunnginninni eqqarsaatigin­neqqissaartaruit  immaqa qatanngutit arlallit ajornar­torsiortut eqqaalersin­naavatit, taakkulu atiisigut taallugit Jehovamut ‘qinnutitsinnik tusartartumut’ qinnussin­naavatit. (Tuss 65:3) Eqqaamajummi aamma illit ajornar­torsiulis­sagaluaruit qinnunneqarnissat pisariaqar­tissagit.

10, 11. Petrusip parnaarus­sivimmiit aniguisin­neqarnera oqaluttuariuk.

¹⁰ Petrusip toqunissani annilaan­ngatigaa? Naluarput, nalunngilarpulli parnaarus­sivimmiin­nermini unnummi kingullermi paarsisunit nakkutigineqarluni sinittoq. Petrusi Jehovamut upperluar­tuugami ilimanarpoq nalunngikkaa qanorluunniit pineqas­sagaluaruni Jehovamit eqqaamaneqas­salluni. (Rom 14:7, 8) Petrusilli maanna pisussat tupinnartut ilimagisimanavian­ngilluinnarpai. Tassanngaannaq qaamaneq parnaarus­sivimmi ineeraanut qinngorpoq. Inngili saqqummeriasaarpoq, paarsisunit takuneqarsin­naagunarani, Petrusilu itersarpaa. Kalunnerillu peerneqarsin­naarpasin­ngitsut Petrusip assaanit katapput!

¹¹ Inngilip Petrusi naatsukullannik ima peqquaa: “Makipallagit! … Qiteruserit aloquserlutillu. … Qallersaatit atiuk.” Petrusip ingerlaannaq naalappaa. Naggataatigut inngili oqarpoq: ‘Malinnga.’ Petrusilu taamaaliorpoq. Nipaarsaarlutik ineeqqamiit anipput, paarsisut silataaniittut saneqquppaat anisarfiullu saviminiusup tungaanukarlutik. Matorsuaq taanna qanoq ammassavaat? Petrusip tamanna eqqarsaatigisimaguniuk akissutaa paasipallappaa. Matorsuaq qanilliartugaat “nammineq ammarpoq”. Anipput, aqqusinikkullu ingerlatillutik inngilip Petrusi qimappaa. Petrusip kisimi aqqusinermiitilluni paasivaa takorluuiin­narsimanani. Ilumut iperagaasimavoq! – ApS 12:7-11.

12. Sooq Jehovap Petrusimik aniguisitsinera tuppallersaatigisin­naavarput?

¹² Jehovap kiffaminik aniguisitsinis­saminut pissaaneqangaar­neranik eqqarsaatigin­neqqissaarneq tuppaller­nangaarpoq, ilaa? Kunngip Romamiut naalagaaf­fissuannit – taamanikkut aatsaat taama pissaaneqar­tigisumit – ivertin­neqartup Petrusi tigusarisimavaa. Taamaak­kaluartoq Petrusi imaalial­laannaq parnaarus­sivimmit anivoq! Nalunngilarpulli Jehovap kiffami ilaannaat tupinnar­tuliornikkut aniguisit­tarsimagai. Jaaku aniguisinngilaa, aamma Petrusi pillugu Jiisusip oqaasii kingusin­nerusukkut eqquummata Petrusi taamaaliorfigeq­qinngilaa. Aamma nalitsinni tupinnar­tuliornikkut aniguisin­neqarnissarput naatsorsuutigin­ngilarput. Nalunngilarpulli Jehova allanngorsiman­ngitsoq. (Mal 3:6) Toqu parnaarus­sivimmut  aniguif­figineqarsin­naanngitsumut assersuun­neqarsinnaavoq. Jehovalli qanittukkut ernini aqqutigalugu inuit millionillit toqusimasut aniguisillugit makitissavai. (Joh 5:28, 29) Erloqinar­torsior­nitsinni neriorsuut tamanna allallu iluaqutigingaarsin­naavagut.

13-15. (a) Mariiap illuani ilagiit katersuus­simasut Petrusip tikiunnera qanoq qisuariarfigaat? (b) Apustilit Suliaanni suna sammineqalerpa, Petrusillu anersaakkut qatanngutini qanoq sunniuteqarfigiuarpai?

¹³ Petrusip aqqusinermi taartuin­narmiitilluni sumukas­sanerluni eqqarsaatigaa. Taava eqqaalerpaa arnaq kristumiu Mariiamik atilik ungasin­ngitsumi najugaqartoq. Mariia, uillarnerugunartoq pigissaartoq, ilagiit katersuuf­figisin­naasaannik angisuumik illoqarpoq. Johannesi Makkorsip Mariia anaanagivaa, taannalu Apustilit Suliaanni maanna eqqaaneqaq­qaarpoq. Piffissallu ingerlanerani Petrusip taanna ernermisut isigilerpaa. (Pet 1. 5:13) Kingusik­kaluartoq unnuami tamatumani ilagiin­niittorpassuit Mariiap illuaniipput qamannga pisumik qinullutik. Qularnan­ngitsumik Petrusi iperagaaniassammat qinnuppaat. Takorloorsiman­ngisaan­narpaalli Jehovap qanoq akissagaatsik!

¹⁴ Petrusi illup kaajaluisaanut isaaffiup matuanut kasuttormat kiffaq arnaq Roodamik atilik ammaassiartorpoq. (Taassuma atia nalinginnaavoq grækerisullu “ruusamik” isumaqarluni). Petrusip nipaa tusaagamiuk tupigusungaarpoq! Nuannaangaarami Petrusi ammaannagu illumi isersimasut ornipallappai oqaluttuullugit Petrusi silataaniittoq. Silaqan­nginneraraluaraanni piniinnarpoq oqaqattaarluni taannaasoq. Taava ilaasa tusaasaqarsimanera upperilerpaat, oqarpullu inngiliusimassasoq. (ApS 12:12-15) Taamaat­toqarnerani Petrusi kasuttor­tuarpoq kiisamilu ammaanneqarluni.

¹⁵ Petrusi ammaallugu “takugamikku tupigusupput”! (ApS 12:16) Petrusip qanoq pisoqarsimaneranik oqaluttuuk­kumallugit nuannat­torsuit nipangersarpai. Aamma oqarfigai ilinniartitaq Jaaku qatanngutillu allat tamakku pillugit oqaluttuutissagaat. Taava Herodasip sakkutuuinit nanineqan­nginniassagami qimaavoq sumiiffimmilu isumannaan­nerusumi aalajaalluni kiffartor­tuarluni. Apustilit Suliaanni eqqaaneqaq­qinnera tassatuaavoq kapitali 15-imi kipineqarnermut tunngasumik akerleriissutip aaqqinnissaanut ikiuinera. Taava Apustilit Suliaanni sammineqalerpoq apustilip Paulusip oqaluussinera angalasarneralu. Qularutigin­ngilarpulli Petrusip uppeqatini sumiluunniit naapitani uppernikkut nakussatsittarai – soorlu Mariia illuaniittullu nuannaangaartut.

16. Sooq siunissami nuannaarutis­sarpassuaqar­nissarput naatsorsuutigisin­naavarput?

 ¹⁶ Jehovap ilaannikkut kiffani ilimagisin­naasaannit annerungaartumik nuannaarutigingaagaannillu tunisarpai. Petrusip uppeqatai unnuami tamatumani taama misigisimassapput. Nalitsinni Jehovamit pilluaq­quneqaraangatta aamma uagut taamatut misigisin­naasarpugut. (Uss 10:22) Siunissami nunarsuaq tamakkerlugu Jehovap neriorsuutaasa eqquunnerat misigis­savagut. Ilimanarpoq maannakkut takorloorsin­naasatsinnit tupinnangaar­nerussasut. Tassa Jehovamut aalajaat­tuarutta siunissami nuannaarutis­sarpassuaqar­nissarput naatsorsuutigisin­naavarput.

17, 18. Sooq inuit Herodasi guutisiorfigilerpaat?

¹⁷ Petrusip parnaarus­sivimmit aniguinera aamma Herodasip tupaallaatigaa kamaatigingaarlugulu. Petrusip piaartumik ujarneqarnissaa Herodasip peqqussutigaa. Taava taassuminnga paarsisuusimasut ‘killisior­neqarnissaat’ kingornalu ‘pillarneqar­nissaat’ – ilimanartumik toqutaanissaat – peqqussutigaa. (ApS 12:19) Ersarippoq Herodasi Agrippa naakkit­taatsuullunilu nallittuin­ngisaan­nartuusoq. Ajortuunini pillugu pillarneqarumaarpa?

¹⁸ Petrusimik toqutsiniarnini iluatsin­ngimmat ilimanarpoq Agrippa nikanarsagaasutut misigisoq. Usorsisimaarutis­saminilli iliuuseqar­nissaminut periarfis­saqalerpoq. Akeqqami ilaannit eqqisseqatigineqarumalluni orninneqarami inuppas­suarnut oqalugiar­nissaminut periarfis­sinneqarpoq. Lukkarsi allappoq Herodasip oqalugian­nginnermini ‘kunngisut atisani atigai’. Oqaluttuarisaanermik ilisimatooq juutiusoq Josefus allappoq Herodasip atisai sølviusut, taamaattumik qaamanermiik­kaangami qillalaartarpoq guutisullu isikkoqar­tarluni. Taava kunngi makitasooq taanna oqalugiarpoq. Inuillu tusarnaartut taassumanngalu iluareq­qusaarusuttut ima suaartalerput: “Inuk oqalunnani guuti oqaluppoq!” – ApS 12:20-22.

19, 20. (a) Sooq Herodasi Jehovamit pillarneqarpa? (b) Herodasi Agrippap tassanngaannaq pillarneqarnera sooq tuppallersaatigisin­naavarput?

¹⁹ Guuti kisimi taamatut ataqqineqar­tussaavoq, pisunillu isiginnittuuvoq! Herodasip inuit isumaqatigin­nginnerarsimasin­naagaluarpai naqqillugil­luunniit, taamaaliun­ngilarli. Ussatini allassimavoq ‘imminut pingaartinneq ajunaarnerup siulerisaraa’. (Uss 16:18) Tamatumalu ilumoornera Herodasip misigaa. ‘Jehovap inngiliata ingerlaannaq pillarmagu’ angut namminis­sarsiortoq makitasoorlu taanna maajunnartumik toqujartorpoq. “Quperlunit nerineqarluni  toquvoq.” (ApS 12:23) Josefus aamma allappoq Agrippa tassanngaannaq eqqugaasoq allallunilu kunngi nammineq inerniliisoq inuit iluareq­qusaartut akuersaaramigit toqusus­sanngorsimalluni. Aamma allappoq Agrippa ulluni tallimani napparsimareerluni toqusoq. b

²⁰ Immaqa isumaqarsin­naavugut inuit eqqunngitsuliortartut pillarneqarneq ajortut. Tamannali tupaallaatigin­ngilarput nalunngin­natsigu ‘Diaavulup inuit pissaaneqarfigigai’. (Joh 1. 5:19) Inuilli ajortut pillarneqarpasin­nginnerat Guutip kiffaasa aalajaatsut eqqissiun­naarutigisin­naavaat. Taamaattumik Herodasip toquneranik oqaluttuaq assingusullu tuppallersaatigisin­naavagut. Jehovammi akuliut­tarnera ersersin­neqarpoq, eqqaasin­neqarpugullu naapertuil­luarneq nuannaril­luinnaraa. (Tuss 33:5) Upperil­luinnarsin­naavarput naapertuil­luarnera tamanut atuutilerumaartoq.

21. Apustilit Suliaanni kapitali 12-imi pingaarnertut suna paasivarput, aamma sooq uagutsinnut tamanna tuppallernarpa?

²¹ Oqaluttuaq qiimmaal­lannartumik ima naavoq: “[Jehovap] oqaasia siammariar­tortuarmat uppertut amerliar­tuinnarput.” (ApS 12:24) Nalunaarusiamit tamatumannga erserpoq taamani oqaluussineq siumukar­tuartoq. Tamannalu nalitsinni oqaluus­sinerup Jehovamit pilluaq­quneqar­neranik eqqaasin­neqaatigaarput. Apustilit Suliaanni kapitali 12-imi apustilip ataatsip toqunera apustileqataatalu aniguinera taamaallaat oqaluttuarineqan­ngillat. Pingaar­nertulli Jehova qanorlu aniguisitsisoq oqaluttuarineqarpoq. Saatanip kristumiunik nungutitsiniaagaluarluni oqaluus­siunnaar­titsiniaagaluarlunilu saassussineri iluatsin­ngillat, aamma oqaluus­sinermik unitsitsiniaanerit allat tamarmik iluatsin­navianngillat. (Es 54:17) Jehovamilli Jiisusimillu Kristusimik tapersersuisut suliaat iluatsit­tuaannarpoq. Tamanna qiimmaal­lannaqaaq, ilaa? ‘Jehovap oqaasianik’ oqaluus­seqataanerput ataqqinaatigingaarparput.