KAPITALI 12
“Jehovamit pissatsinneqarnermikkut sapiillutik oqaluussipput”
Paulusi Barnabalu maniguullutik, pinertusaarlutik sapiillutillu oqaluussipput
Apustilit Suliaat 14:1-28 tunngavigalugit
1, 2. Paulusi Barnabalu Lystramiitillugit qanoq pisoqarpa?
LYSTRAMI nuannattorsuaqarpoq. Angut inunnguuseralugu nukillaarsimasoq angutinit takornartanit marlunnit ajorunnaarsinneqareerluni nuannaangaarluni pisseqattaarpoq. Inuit tupigusoqaat angutillu taakku marluk guutiusoralugit. Taamaattumik Zeusimut palasiusup angutinut taakkununnga nigaliliat pajugutigai. Nersussuillu angutivissat pilliutissatut toqutaalersut qatimaluppalunneri nipitoqaat. Paulusilli Barnaballu inunnit guutisiorfigineqarnertik unitsinniarsaraat. Atisatik alippaat inuppassuillu akornannut arpallutik kimigiiserfigaat guutitut pineqaqqunatik. Piniinnaraluartulli kiisami unitsippaat.
2 Taava juutit akerlilersuisut Antiokiamiit Pisiidiamiittumiit Ikonionnimiillu tikipput. Taakkua Paulusi Barnabalu salluliuutigimmatigit Lystramiittut isumaminnik allannguillutik uumigilerpaat. Paulusi guutisiorfiginiarsariunnaarlugu ujaqqanik milluulerpaat ilisimajunnaarnissaata tungaanut. Paulusi toqusorigamikku timaa illoqarfiup isaariaata silataata tungaanut annippaat qimallugulu.
3. Kapitalimi matumani apeqqutit suut sammissavagut?
3 Tamakkorpassuit pitinnagit susoqarpa? Lystramiut isumakkut allanngoriartaartut aamma Barnaba Paulusilu pillugit oqaluttuaq nalitsinni nutaarsiassanik nuannersunik oqaluussisartut qanoq ilinniarfigisinnaavaat? Barnaba Paulusilu aalajaallutik ‘Jehovamit pissatsinneqarnermikkut sapiillutik oqaluussisut’ nalitsinni utoqqaanertat qanoq ilaarsinnaavaat? – ApS 14:3.
“Amerlasoorpassuit uppertunngorput” (ApS 14:1-7)
4, 5. Sooq Paulusi Barnabalu Ikonionnimukarpat, tassanilu qanoq pisoqarpa?
4 Ullualuit tamatuma siorna akerlilersuisut juutiusut Romamiut illoqarfianniit Antiokiamiit Pisiidiamiittumiit Paulusi Barnabalu anisissimavaat. Paulusilli Barnaballu nikallornatik “isikkatik saniiarpaat”. (ApS 13:50-52; Mat 10:14) Eqqissisimallutik aallarput, nalunngilaammi juutit taakku Guutimit eqqartuunneqarumaartut. (ApS 18:5, 6; 20:26) Nuannaarlutik oqaluussisartutut angalanertik nangippaat. 150 kilometerit missaat kujataanut-kangisissumut pisupput qaqqarsuit Taurusimik taaguutillit qaqqarsuillu allat Sultanimik taaguutillit akornganni qutsissoq naggorissoq apuuffigalugu.
5 Paulusip Barnaballu Ikonionni, illoqarfik Romamiut nunasiaataata Galaatiap pingaarnersaasa ilaat, uniffigeqqaarpaat. a Tassani najugaqartut grækerit kulturiannit sunnerneqarsimapput. Aamma juuterpassuaqarpoq amerlasuullu juutit upperisaannut ilanngussimallutik. Paulusi Barnabalu pisarnermissut synagogimut oqaluussiartorput. (ApS 13:5, 14) Oqaluussinerat pissutigalugu “juutit grækerillu amerlasoorpassuit uppertunngorput”. – ApS 14:1.
6. Sooq Paulusi Barnabalu sunniuteqarluartumik ilinniartitsisinnaappat, qanorlu ilaarsinnaavagut?
6 Sooq Paulusip Barnaballu oqaluussinerat taama sunniuteqarluartigaa? Paulusip Allakkat Illernartut ilisimalluarpai. Guutip innuttaasa oqaluttuarisaanerat, siulittuutit Moorsisillu inatsisai atorluarlugit uppernarsarpaa Jiisusi tassaasoq Missiarsi neriorsuutigineqartoq. (ApS 13:15-31; 26:22, 23) Barnabap oqaatsimigut ersersippaa inoqatini asallugit. (ApS 4:36, 37; 9:27; 11:23, 24) Namminneq isumartik tunngaviginagu “Jehovamit pissatsinneqarnermikkut” oqaluussipput. Oqaluussininni taakku qanoq ilaarsinnaavigit? Imaaliorsinnaavutit: Guutip oqaasia ilisimasaqarfigillualeruk. Allassimaffiit oqaluussiffigisannut tulluartut atukkit. Qanoq tuppallersaasinnaanerlutit eqqarsaatigiuk. Nammineq isummat tunngaviginagu tamatigut Jehovap oqaasia tunngavigalugu ilinniartitsisarit.
7. (a) Nutaarsiassat nuannersut inuit qanoq isumaqarfigisarpaat? (b) Illit ilaquttavit ilaat nutaarsiassanut nuannersunut akerliuppata suna eqqaamassaviuk?
7 Ikonionnimiulli ilaannaasa Paulusi Barnabalu tusarnaarusuppaat. Lukkarsi nangilluni ima allappoq: “Juutilli uppertuunngitsut allamiut kamassaaramikkit qatanngutinut akeqqersimaartunngortippaat.” Taamaattumik Paulusi Barnabalu aalajangerput ‘sapaatit-akunnerini arlalinni tassaniiginnarlutik Jehovamit pissatsinneqarnermikkut’ nutaarsiassat nuannersut illersorniarlugit. Tamatuma kingunerisaanik ‘illoqarfimmiut avissaartuupput, ilaasa juutit tapersersoraat allat apustilit tapersersorpaat’. (ApS 14:2-4) Nalitsinni oqaluussinerput tamatumunnga assingusumik kinguneqartarpoq. Tusarnaarumasut ataasioqatigiilerput; tusarnaarumanngitsulli akerliliisarsinnaapput. (Mat 10:34-36) Illit ilaquttavit ilaat nutaarsiassanut nuannersunut akerliuppata eqqaamajuk uagut pilluta salluliuutit tusatsiakkallu pissutigalugit akerliusinnaasut. Illilli pissuserinnikkut ersersissinnaavat salluliuutit taakku ilumuunngitsut, taamaalioruillu immaqa ilaquttavit isiginnittaasertik allanngortissavaat. – Pet 1. 2:12; 3:1, 2.
8. Sooq Paulusi Barnabalu Ikonionnimit qimaasariaqarpat, tamannalu qanoq ilinniarfigaarput?
8 Kingusinnerusukkut Ikonionnimi akerlilersuisut Paulusi Barnabalu ujaqqanik milloorniarlugit pilersaarusiorput. Tamanna pillugu Paulusi Barnabalu paasitinneqaramik qimaapput illoqarfinnullu allanut oqaluussiartorlutik. (ApS 14:5-7) Nalitsinni oqaluussisartut tamatumunnga assingusumik silatusaartumik aalajangiisarput. Tusarliussarput ajortumik oqaatigineqaraangat sapiilluta illersortarparput. (Flp 1:7; Pet 1. 3:13-15) Kisianni nakuuserniartunit sioorasaarneqaraangatta inuunitsinnik uppeqatittalu inuunerinik navianartorsiortitsisinnaasumik iliuuseqarnaveersaartarpugut. – Uss 22:3.
‘Guutimut uumassuseqartumut saanniaritsi’ (ApS 14:8-19)
9, 10. Lystra sumiippa, Lystramiullu pillugit sunik ilisimasaqarpugut?
9 Paulusi Barnabalu Lystramukarput. Lystralu tassaavoq Romamiut nunasiaataat Ikonionnip kujataani-kippasissuaniittoq 30 kilometerit missaannisut ungasitsigisoq. Antiokia Pisiidiamiittoq Lystralu arlalitsigut assigiissuteqarput, Lystramili juutit ikittuinnaapput. Lystramiut grækerisut oqaluttarunaraluarlutik ilitsoqqussaralugu oqaatsimissut Lykaaniamiusoortarput. Illoqarfimmi tamatumani synagogeqarsimagunanngimmat Paulusi Barnabalu tamanit tikinneqarsinnaasumi oqaluussisalerput. Jerusalemmimi Petrusip angut inunnguuseralugu innarluutilik tupinnartuliornikkut ajorunnaarsimmagu inuppassuit uppertunngorput. (ApS 3:1-10) Maanna Lystrami Paulusip angut inunnguuseralugu nukillaarsimasoq ajorunnaarsippaa. (ApS 14:8-10) Tupinnartuliamilli tamatuminnga isiginnaartut Paulusip ilimaginngisaanik qisuariarput.
10 Lystramiut guutipilussiortuupput. Taamaattumik kapitalip matuma aallartinnerani allaatigineqartutut angut nukillaarsimasuugaluaq nikueriataarmat inuppassuit ingerlaannaq isumaqalerput Paulusi Barnabalu guutiusut. Barnaba tassaatippaat Zeusi, guutit qullersaat, Paulusilu tassaatillugu Hermesi, Zeusip ernera guutillu oqariartortittagaat. (Takuuk ungalusaq “ Lystra aamma Zeusimik Hermesimillu guutisiorneq”). Barnaballi Paulusillu inuppassuit taakku naqqippaat paasitikkusullugit guutiunatik Jehovamilli Guutimit ilumoortumit pissatsinneqaramik oqaluussisinnaallutik tupinnartuliorsinnaallutillu. – ApS 14:11-14.
‘Suunngitsut uku tunullugit Guutimut uumassuseqartumut – tamanik pinngortitsisumut – saanniaritsi.’ – ApS 14:15
11-13. (a) Paulusi Barnabalu Lystramiunut qanoq oqarpat? (b) Paulusip Barnaballu oqaasii ilaatigut qanoq ilinniarfigaagut?
11 Inuit taama qisuariaraluartut Paulusip Barnaballu suli oqaluussiffigerusuppaat. Oqaluttuamit tamatumannga paasivarput kristumiuunngitsunut ilaatigut qanoq oqaluussilluarsinnaanersugut. Maluginiaruk Paulusikkut soqutiginnilersitsisumik qanoq oqaaseqarnersut: “Angutit, sooq taamaaliorpisi? Uaguttaaq inuuvugut ilissitulli sanngiissutillit. Suunngitsut uku tunullugit Guutimut uumassuseqartumut – qilammik, nunarsuarmik, immamik taakkunaniittunillu tamanik pinngortitsisumut – saanniassagassi nutaarsiassanik nuannersunik oqaluussiffigaassi. Guutip siornatigut inuiaqatigiit tamarmik iluarisamittut iliornissaat akueraa, taamaakkaluartoq ajunngitsuliornermigut kinaanini takutippaa. Qilammit siallerfigitittarpaasi ukiullu qanoq ilinera naapertorlugu inerittorpassuarnik tunisarlusi, aamma sinnilissuarnik nerisassaqartittarlusilu qamannga pisumik nuannaartittarpaasi.” – ApS 14:15-17.
12 Oqaatsit eqqarsaallannartut taakku qanoq ilinniarfigisinnaavagut? Siullertut, Paulusi Barnabalu inoqatiminnit imminut pitsaanerusorinngillat. Guutiusorineqaraluarlutik guutitut pineqarusunngillat. Maniguullutilli oqarput tusarnaartimissulli inuinnaallutik sanngiiffeqarlutillu. Ilumoorpoq Paulusi Barnabalu anersaamik illernartumik tunineqarsimasut ilinniartitsissutinillu eqqunngitsunit sunnerneqarunnaarlutik. Aamma Kristusip naalakkersueqatiginissaa neriuutigaat. Nalunngilaalli aamma Lystramiut Kristusi naalakkunikku pilluaqquneqarlutik taamatut neriuuteqalersinnaasut.
13 Uagut oqaluussiffigisatsinnut qanoq isiginnittaaseqarpugut? Naligisatsitut isigivagut? Ilumoortut Guutip oqaasianeersut ilinniartitsissutigineranni nersorniarneqaraangatta Paulusikkutut maniguunnermik takutitsisarpugut? Charles Taze Russellip, ilinniartitsillaqqissuusup 1870-ip missaaniit 1916-ip tungaanut oqaluussinermi siuttuusup, maligassippaatigut. Ima allappoq: “Allakkagut pillugit imminulluunniit pilluta nersorneqarusunngilagut. Aamma Rabbimik ataqqinaataasunilluunniit allanik taaguuteqarusunngilagut.” Paulusikkutulli qatanngut Russell maniguuttuuvoq. Taakku ilaarlugit uagut nersorneqarnissarput pinnagu inuilli “Guutimut uumassuseqartumut” saannissaat kissaatigigatsigu oqaluussisarpugut.
14-16. Paulusip Barnaballu Lystramiunut oqaasii aamma allanik sunik ilinniutissartaqarpat?
14 Oqaatsinit taakkunannga ilinniarfigisinnaasarput alla tassaavoq Paulusip Barnaballu naleqqussarsinnaanerat. Juutit juutillu upperisaannut ilanngussimasut Ikonionnimiittut assiginagit Lystramiut Allakkat Illernartut inuiaqatigiillu Israalikkut Guutimut attaveqarnerat pillugit ilisimasaqarpianngillat. Lystramiut naggorissaasuupput. Lystrami siallertarmat narsaataat naggorissuupput. Nuna kusanarlunilu naggorissuummat Lystramiut Pinngortitsisup pissusiinik takunninnissamut periarfissaqarluarput. Paulusikkullu tamanna oqaluussinerminni aallaavigaat. – Rom 1:19, 20.
15 Uagut aamma naleqqussarsinnaavugut? Naggorissaasup inerittussanik assigiinnik narsaatini assigiinngitsuni ikkussuissaguni narsaatilerinermini assigiinngitsunik periaaseqartariaqartarpoq. Imaassinnaavoq narsaatit ilaat ikkussuiffigeriaannaasut allalli taamaannginnamik suliarineqaqqaartariaqartut. Taamatuttaaq uagut inerittussat assigiit ikkussortarpagut – tassa Kunngeqarfik pillugu oqariartuut Biibilimeersoq. Paulusikkullu ilaarsinnaavagut inuit oqaluussiffigisatta pissutsit atugaat upperisaallu paasiniartarutsigit. Taamaaliornitsigut naleqqussarsinnaallutalu paasissutissat taakku oqaluussinitsinni atorluarsinnaavagut. – Luk 8:11, 15.
16 Oqaluttuaq tamanna aamma allamik uagutsinnut ilinniutissartaqarpoq. Sapinngisatsinnik iliuuseqartaraluarluta ilaannikkut ikkussukkatta ilaat peerneqartarput allallu qaarsumut tullutik. (Mat 13:18-21) Taamaattoqarpat nikalloqinak. Paulusip kingusinnerusukkut kristumiut Romamiittut eqqaasippai ‘tamatta [ilaatigut inuit oqaluussiffigisagut] iliuutsigut naapertorlugit Guutimit eqqartuunneqassasugut’. – Rom 14:12.
‘Jehovamut isumagisassanngortippaat’ (ApS 14:20-28)
17. Derbe qimakkamikku Paulusi Barnabalu sumukarpat, aamma sooq?
17 Lystramiut Paulusi toqusimasoralugu illoqarfiup silataanukaammassuk kristumiut Paulusi ikioriarlugu unnuiffissarsivaat. Aqaguani Paulusi Barnabalu 100 kilometerisut ungasitsigisumut Derbemut aallarput. Angalanerminni ilungersunartumi Paulusi anniarsimassaqaaq, ujaqqanimmi milloorneqaqqammerpoq. Kisianni Barnabalu ingerlaqqiinnarput, Derbemullu tikikkamik ‘amerlasuunik ilinniartitanngortitsipput’. Taava qaninnerusumut Antiokiamut Syriamiittumukarnatik “Lystramut, Ikonionnimut Antiokiamullu uterput”. Sooq? ‘Ilinniartitat nakussatsillugillu uppernikkut aalajaaqqullugit kajumissaarniarlugit.’ (ApS 14:20-22) Maligassaalluangaaramik! Ilagiit pisariaqartitaat namminneq ilorrisimaarnissaminnit pingaarnerutippaat. Nalitsinni ilagiinnik nakkutilliisunit angalasartunit aamma oqaluussisartutut aallartitanit ilaarneqartarput.
18. Utoqqaanertanngortitsinnginnermi susoqartarpa?
18 Paulusi Barnabalu oqaatsikkut iliuutsikkullu nakussatsitsinermik saniatigut “ilagiinni tamani utoqqaanertanik toqqaapput”. ‘Anersaamit illernartumit aallartinneqaraluarlutik’ utoqqaanertanik Jehovamut isumagisassanngortitsinnginnerminni ‘qinullutillu iisinnginniarput’. (ApS 13:1-4; 14:23) Nalitsinni utoqqaanertanik toqqaaniarnermi aamma tamatumunnga assingusumik periaaseqartoqartarpoq. Utoqqaanertanngortussamik siunnersuuteqannginnerminni utoqqaanertaqatigiit qatanngutip angutip pineqartup piumasaqaatit Biibilimeersut eqqortittarnerai qinoreerlutik nalilertarpaat. (Tim 1. 3:1-10, 12, 13; Tit 1:5-9; Jaak 3:17, 18; Pet 1. 5:2, 3) Qanoq sivisutigisumik kristumiuusimanera kisimi aalajangiisuunani oqaloriaasianit, pissusianit qanorlu tusaamaneqarneranit erserpoq inuunerminni anersaamit illernartumit qanoq siulersortitsiginersoq. Savanik paarsisutut piukkunnartuussaguni nakkutilliisunut piumasaqaatit Biibilimiittut eqqortittariaqarpai. (Gal 5:22, 23) Ilagiinnik nakkutilliisut utoqqaanertanik toqqaasarneq akisussaaffigaat. – Aamma takuuk Timuutiusimut 1. 5:22.
19. Utoqqaanertat kimut akisussaatitaasussaappat, aamma Paulusi Barnabalu qanoq ilaartarpaat?
19 Utoqqaanertat nalunngilaat ilagiinnik pinnittarnertik pillugu Guutimut akisussaatitaasussaallutik. (Hebr 13:17) Paulusi Barnabalu ilaarlugit utoqqaanertat oqaluussinermi siuttuusarput, uppeqatitik oqaatsimikkut nakussatsittarpaat aamma ilagiit pisariaqartitaat namminneq ilorrisimaarnissaminnit pingaarnerutittarlugit. – Flp 2:3, 4.
20. Uppeqatitta aalajaallutik kiffartornerat pillugu atuakkagut qanoq iluaqutigisarpagut?
20 Paulusi Barnabalu oqaluussisartutut angalareerlutik Antiokiamut Syriamiittumut uteramik ‘Guutip aqqutigalutik iliuuseqangaarnera allamiullu uppernermut iserfissaannik mappiisimanera’ oqaluttuaraat. (ApS 14:27) Nalitsinni uppeqatitta sulinerat Jehovamillu pilluaqquneqartarnerat pillugit atuaraangatta ‘sapiilluta oqaluussinissatsinnut’ pissatsinneqartarpugut.
a Takuuk ungalusaq “ Ikonionni – Frygiamiut illoqarfiat”.