1-3. (a) Sooq apustilit juutit eqqartuus­siviisa qullersaannut sassartin­neqarpat, naatsumillu oqaatigalugu suna apeqqutaalerpa? (b) Sooq apustilit qanoq qisuariarnersut soqutigingaarparput?

 JUUTIT eqqartuus­siviisa qullersaanni eqqartuussisut kamangaarput. Apustilit eqqartuus­sivimmut tamatumunnga sassartitaapput. Sooq? Palasiunerup juutillu eqqartuus­siviisa qullersaanni siulersuisup Juuserfi Kajfarsip sukannersumik ima oqarfigai: “Paatsuugas­saanngitsumik peqquassi ateq taanna tunngavigalugu ilinniar­titseqqunasi.” Palasiunerup ateq Jiisusi taarusun­ngilaaluunniit. Ima nangippoq: “Ilinniar­titsissutissinnik Jerusalemmi tamakkerparsi angutillu taassuma toquneranut pisuutin­nissarput aalajangiusimallugu.” (ApS 5:28) Oqariartuutaa ersarippoq: Oqaluus­sisarun­naaritsi, taamaaliun­ngikkussimi kingunerlussammat!

² Apustilit sussappat? Jiisusip Guutimit oqartus­saassusiler­neqarluni oqaluus­seqqusimavai. (Mat 28:18-20) Inunnut qunulerlutik nipangersimaan­nassappat? Imaluunniit sapiillutik uppernertik aalajangiusimallugu oqaluus­siuassappat? Naatsumik oqaatigalugu: Guuti imaluunniit inuit naalassavaat? Apustili Petrusi apustilit allat sinnerlugit ersarissumik sapiilluni oqaaseqarpoq.

³ Kristumiuugatta ilumoortut juutit eqqartuus­siviisa qullersaannit apustilit qunusaar­neqarnerminni qisuariarnerat soqutigingaarparput. Uaguttaaq oqaluus­seqquneqarpugut, taamaattumik suliassiis­sutigineqartumik naammas­siniaanitsinni akerlilersor­neqarsin­naavugut. (Mat 10:22) Akerlilersuisut suliarput killiler­niarsarisin­naavaat inerteq­qutaatilerluguluunniit. Taama pisoqassappat sussaagut? Apustilit iliuuserisimasaat juutillu eqqartuus­siviisa qullersaannut sassartin­neqanngin­neranni pisut misissorutsigit uagut sunissatsinnut aalajangiiniar­nitsinni iluaqutigis­savagut. a

4, 5. Sooq Kajfarsi sadukiiarillu ‘assut kamallutik sinngalerpat’?

⁴ Eqqaamajuk Petrusi Johannesilu oqaluus­siunnaaq­quneqaq­qaaramik ima akisut: “Takusagut tusakkagullu eqqartorun­naarsin­naanngilagut.” (ApS 4:20) Tamatuma kingorna Petrusi Johannesilu apustilillu allat guutisiorfimmi oqaluus­siuarput. “Saalumuup Torsuusaasaani Sukalimmi” qulilimmi guutisiorfiup kangiata tungaani juutit naapeqatigiit­tarfianni apustilit aamma tupinnar­tuliortarput, soorlu napparsimasunik ajorunnaarsitsisarlutik anersaapilunnillu anisitsisarlutik. Inuit allaat Petrusip tarraanit alanngerfigineqaraangamik ajorunnaarsin­neqartarput. Ajorunnaarsin­neqartut ilarpassui nutaarsiassanut nuannersunut tusarnaartarput. Taamaattumik “angutit arnallu Naalakkamut uppertun­ngorlutik ilinniar­titanngortut amerlasoorpas­suanngorput”. – ApS 5:12-15.

⁵ Kajfarsi sadukiiarillu, immikkoor­niaqatigiit Kajfarsip ilaaffigisai, “assut kamallutik sinngalerput” apustilillu parnaarullugit. (ApS 5:17, 18) Sadukiiarit sooq kamappat? Apustilit ilinniar­titsissutigigamikku Jiisusi makitin­neqarsimasoq, sadukiiarilli toqusunik makittoqarsin­naaneranik upperin­ninngillat. Apustilit aamma oqarput inuit annaanneqas­sagunik Jiisusi upperisariaqaraat. Inuilli Jiisusi naalakkamissut isigilis­sappassuk sadukiiarit Romamiunit pillarneqar­nissartik annilaangas­sutigaat. (Joh 11:48) Taamaattumik tupaallaatigin­ngilarput apustilit sadukiiarinit oqaluus­siunnaaq­quneqarmata.

6. Malersor­neqarnitsinnut suna pissutaanerpaava, aamma sooq tamanna tupigusuutigin­ngilarput?

⁶ Nalitsinni malersor­neqarnitsinnut pissutaanerpaaq tassaavoq inuit upperisarsiornikkut siuttunit sunnerneqarlutik malersuisarnerat. Assersuutigalugu oqartussaasut tusagas­siutillu upperisarsiornikkut siuttunit sunnerneqarlutik oqaluus­sinerput unitsin­niartarpaat. Tamanna sooq tupigusuutigis­sanngilarput? Oqaluus­sinitsigut inuit paasisarmassuk upperisarsiornikkut siuttut ilinniar­titsissutigisaat Biibilimut naapertuutin­ngitsuusut. Aamma inuit eqqortuliorusuttut Biibilimi ilumoortut paasigaangamikkit upperisapalaanit ileqqulersuutinillu aqunneqarun­naartaramik. (Joh 8:32) Taamaattumik oqaluus­sinerput pissutigalugu upperisarsiornikkut siuttut uumigisarlutalu malersor­tarpaatigut.

7, 8. Inngilip peqqussutaa apustilinut qanoq sunniuteqarsimassava, apeqqullu suna eqqarsaatigisariaqarparput?

⁷ Parnaarus­sivimmi apustilit eqqartuun­neqarnissartik utaqqitillugu eqqarsaatigisimassavaat uppernertik pissutigalugu toqutaas­sanerlutik. (Mat 24:9) Unnuakkulli takorloorsiman­ngisaannik pisoqarpoq:  “Jehovap inngiliata parnaarussiviup matui [ammarpai].” b (ApS 5:19) Taava inngilip ima peqquai: “Guutisiorfim­mukarlusi … tusarliussaq nuannersoq oqaluus­sissutigiuarsiuk.” (ApS 5:20) Peqqussut tamanna apustilit eqqortulior­nerannut uppernarsaataavoq. Aamma aalajaat­tuarnis­saminnut nukittorsaatigisimassavaat. Apustilit upperluarlutik sapiillutillu “qaammariar­tornerani guutisiorfimmut iserput ilinniar­titsilerlutillu”. – ApS 5:21.

⁸ Apeqqutip uuma eqqarsaatiginissaa pingaaruteqarpoq: ‘Assingusumik nalaataqassaguma oqaluus­siuarnissannut uppersuseqarlungalu sapiissuseqas­sanerpunga?’ ‘Guutip kunngeqarfia pillugu ilisiman­nittutut nassuiaaq­qissaar­tarnerput’, tassa oqaluus­sinerput, inngilinit tapersersor­neqarlunilu siulersor­neqarmat nakussatsis­sutigisin­naavarput. – ApS 28:23; Saqq 14:6, 7.

9-11. Apustilit oqaluus­siunnaaq­quneqaramik qanoq akippat, taamaalior­nermikkullu qanoq maligas­sippaatigut?

⁹ Maanna Kajfarsip eqqartuus­sisullu allat apustilit killisior­tussanngorpaat. Parnaarus­sivimmi susoqarsimanersoq nalullugu nakkutilliisut apustilinik tassunga aallersin­neqarput. “Parnaarussivik isumannaatsumik parnaaq­qagaluartoq matuilu paarsisunit nakkutigineqaraluartut” ammaramikku isersimasoqan­nginnera takugamikku nakkutilliisut qanoq tupaallas­simatigissasut takorlooriaruk. (ApS 5:23) Guutisiorfimmi nakkutilliisut naalagaata paasilerpaa apustilit guutisiorfimmi Jiisusi Kristusi pillugu oqaluus­sileqqis­simasut, naak tamanna pillugu parnaarus­saaqqam­meraluartut. Taava nakkutilliisut naalagartillu guutisiorfim­mukariarlutik apustilit tigusareriarlugit juutit eqqartuus­siviisa qullersaan­nukaappaat.

 ¹⁰ Kapitalip matuma aallaqqaataani oqaluttuarineqartutut upperisarsiornikkut siuttut kamattut apustilit erseqqissumik oqarfigaat oqaluus­siunnaassasut. Apustilit qanoq akippat? Apustilit sinnerlugit Petrusi sapiilluni ima akivoq: “Inuit pinnagit Guuti naalakkersuisutut naalattus­saavarput.” (ApS 5:29) Apustilit taamaalior­nermikkut uagutsinnut maligas­siuipput. Guutip naalakkersuisunut naalaqqugaluaraatigut naalakkersuisut taakku pisinnaatitaan­ngillat pinngitsaalilluta Guutip piumasaatut iliorun­naarsis­salluta. Taamaattumik oqartussaasut oqaluus­sinerput inerteq­qutaatippassuk Guutimit oqaluus­seqquneqaratta nutaarsiassat nuannersut pillugit oqaluus­siunnaarsin­naanngilagut. (Rom 13:1) Malunnaarsaarluta Guutip kunngeqarfia pillugu oqaluus­siuassaagut.

¹¹ Apustilit akissutaat pissutigalugu eqqartuussisut “kamangaalerput toqukkusulerlugillu”. (ApS 5:33) Maanna apustilit toqunneqar­nissartik annilaangas­sutigaat, Jehovamilli ikiorneqar­tarnerminnit allaanerusumik tupaallaatigisaminnik ikiorneqalerput!

12, 13. (a) Gamaalialip eqqartuus­sisoqatini qanoq siunnersorpai, qanorlu taakku iliorpat? (b) Nalitsinni Jehovap innuttani qanoq ikiortarpai, ‘naapertuil­luarnerlu pillugu naalliutsitaas­sagutta’ suut qularutigis­sanngilagut?

¹² Gamaalialip ‘Moorsisip inatsisaanik ilinniar­titsisup tamanit [aamma eqqartuus­sisoqatiminit] ataqqisaasup’ apustilit illersorpai. c Apustilit “anisikkal­larneqar­nissaat peqqussutigalugu” oqalulerpoq. (ApS 5:34) Pikitsitsisimasut siuttuisa toqunerisa kinguninngua malinnittaasa avissaarlutik unissimanerat Gamaalialip oqaluttuaraa. Taamaattumik eqqartuussisut naammagit­taqqullugillu apustilinik unitsitsiniaaq­qusinngilaq. Siulersuisuammi Jiisusi qanittumi toquvoq. Gamaaliali ersarissumik ima oqarpoq: “Angutit taakku iliuuseqarfiginagit immineersigit. Tassami pilersaarut taanna suliarluunniit taanna inunnit pisuuguni maangaan­nassaaq, Guutimilli pisuuppat unitsis­sinnaas­sanngilasi. Mianersun­ngikkussi Guuti akiuleratarsin­naavarsi.” (ApS 5:38, 39) Gamaalialip siunnersuutaa eqqartuussisut maleruarpaat. Taamaak­kaluartoq apustilit iperartor­neqarput ‘Jiisusillu atia tunngavigalugu oqaluus­sisarun­naaqquneqarlutik’. – ApS 5:40.

¹³ Aamma ullumikkut Jehovap innuttani ikiorumallugit inuit nuimasut Gamaalialitut ittut atorsinnaavai. (Uss 21:1) Jehovap anersaani iluaqutigalugu naalakkersuisut pissaanillit, eqqartuussisut inatsisiliortullu piumasamisut iliortis­sinnaavai. (Neh 2:4-8)  ‘Naapertuil­luarneq pillugu naalliunnerput’ akueris­sagaluarpagu uku marluk qularutigis­sanngilagut. (Pet 1. 3:14) Siullertut, Guutip pinertusar­nissatsinnut ikiorsin­naavaatigut. (Kor 1. 10:13) Aappaattut, akerlilersortitta oqaluussineq ‘unitsis­sinnaas­sanngilaat’. – Es 54:17.

14, 15. (a) Apustilit iperartor­neqaramik qanoq qisuariarpat, aamma sooq? (b) Jehovamut kiffaasoq nuannaarluni pinertusaarsimasoq oqaluttuariuk.

¹⁴ Apustilit iperartor­neqarnertik pissutigalugu nikallorpat oqaluus­siunnaarusulerlutillu? Naamerluinnaq! “Juutit eqqartuus­siviisa qullersaannit anigamik nuannaangaarput.” (ApS 5:41) Sooq ‘nuannaangaarpat’? Soorunami anniartitaasimanertik nuannaarutigin­ngilaat. Nuannaarput nalunngin­namikku Jehovamut aalajaannertik Jiisusimillu malinnit­tuunertik pissutigalugit malersor­neqarlutik. – Mat 5:11, 12.

¹⁵ Kristumiut siulliit assigalugit nutaarsiassanik nuannersunik oqaluus­sinerput pissutigalugu malersor­neqaraangatta nuannaarluta pinertusaar­tarpugut. (Pet 1. 4:12-14) Soorunami sioorasaar­neqarneq, malersor­neqarneq parnaarus­saanerlu nuannarin­ngilagut. Kisianni Jehovamut aalajaakkatta qamuuna pilluangaar­tarpugut. Tamanna Henryk Dornikip misigaa. Taanna ukiorpassuarni naalakkersuisunit peqqarniitsumik malersor­neqartarsimavoq. Oqaluttuarpoq angajunilu 1944-mi aggustimi tigusanut inissiarsuar­nukaanneqarlutik. Akerlilersuisui oqarput: “Tunniutiin­narusun­ngilluinnarput. Upperisaq pillugu toqutaasin­naallutik nalunagu nuannaarutigaat.” Henryk ima nassuiaavoq: “Toqutaanissara kissaatigin­ngikkaluarlugu Jehovamut ilumoorfigin­nillungalu sapiillunga naalliunnera nuannaarutigaara.” – Jaak 1:2-4.

16. Apustilit oqaluus­siuarnissartik aalajangiusimallugu qanoq ersersippaat, oqaluus­seriaasiallu qanoq ilaarparput?

¹⁶ Apustilit ingerlaannaq oqaluus­seqqilerput. Qunusuillutik ‘ullut tamaasa guutisiorfimmi illumiillu illumut Kristusimik, Jiisusimik,  nutaarsiassat nuannersut pillugit oqaluus­siuarput’. d (ApS 5:42) Tassa aallussil­luarlutik oqaluus­siuarnissartik aalajangiusimavaat. Maluginiaruk Jiisusip Kristusip peqqusineratut inuit angerlarsimaf­fimmiittut oqaluus­siffigisaraat. (Mat 10:7, 11-14) Qularnanngilaq taamaaliornertik pissutigalugu ilinniar­titsissutiminnik Jerusalemmi tamakkeraat. Nalitsinni Jehovap Nalunaajaasuisa apustilit oqaluus­seriaasiat ilaarpaat. Illumiit illumut oqaluus­sisarnerput ilisarnaatigaarput. Kikkut tamaasa nutaarsiassanik nuannersunik tusarnis­saannut periarfis­sittarnerisigut suliatsinnik peqqissaarus­sinerput ersersit­tarparput. Illumiit illumut oqaluus­sinerput Jehovap pilluaq­qusimavaa? Ilaana! Inuit millionillit tusarnaarusus­simapput, ilarpas­suisalu aatsaat kasuttorfigineqaramik nutaarsiassat nuannersut tusarpaat.

17-19. Avissaar­tuutsitsisin­naasumik sumik ajornar­torsiuteqalerpa, aaqqikkumallugulu apustilit qanoq iliorpat?

¹⁷ Ilagiin­niittut akornanni maanna ajornar­torsiuteqalerpoq. Ilinniar­titanngorlaat amerlasuut Jerusalemmimut tikeraarput angerlan­nginnerminnilu ilinniar­nerorusullutik. Taamaattumik ilinniartitat Jerusalemmimi najugallit kajumillutik aningaasanik tunissuteqarput  tikeraartut nerisas­saqarnias­sammata pisariaqar­titaannillu allanik isumagin­nikkusukkamik. (ApS 2:44-46; 4:34-37) Ajornar­torsiuteqalerpulli. “Ullut tamaasa nerisassanik agguaanermi” uillarnerit grækerisut oqaluttut ‘mininneqartarput’ uillarnerilli hebræerisut oqaluttut mininneqas­sanatik. (ApS 6:1) Immikkoor­titsisoqarsimassaaq. Tamannalu ajornar­torsiutaavoq avissaar­tuutsitsisinnaasoq.

¹⁸ Apustilit ilagiinnut amerliar­tuinnartunut siulersuisoqatigiittut suliaqartut paasivaat ‘nerisassanik agguaajumallutik Guutip oqaasia ilinniar­titsissutigiun­naarunikku eqqortulius­sanatik’. (ApS 6:2) Taamaattumik ajornar­torsiut aaqqikkumallugu ilinniartitat oqarfigaat angutinik arfineq-marlunnik ‘anersaamik ilisimas­sutsimillu peqangaartunik’ toqqaassasut ‘suliassamik tamatuminnga isumagin­nittussanik’. (ApS 6:3) Angutit taakku piukkun­nartuusariaqarput nerisas­saannaat agguaan­neqartus­saanngimmata aammali aningaasat, pisiniarnerit taakkualu allattoq­qissaar­nissaat isumagineqar­tussaammata. Angutit siunnersuutigineqartut tamarmik grækerisut ateqarput, taamaattumik uillarnerit mininneqarsimasut isumalluar­nerulersimassapput. Siunnersuutigineqartut eqqarsaatigereerlugit qinoreerlutillu apustilit angutit arfineq-marluk akisussaaf­filerpaat ‘suliassamik isumagin­nittussan­ngortillugit’. e

¹⁹ Angutit arfineq-marluk taakku nerisassanik agguaanermik isumagin­nittussaammata imaappa nutaarsiassanik nuannersunik oqaluus­sisariaqarun­naartut? Naamerluinnaq! Angutit taakkua ilagaat Steffaanusi, taannalu aallussil­luarluni sapiillunilu oqaluus­sisartutut kingusin­nerusukkut allaatigineqarpoq. (ApS 6:8-10) Aamma Fiilippi, taakkua ilaat, ‘iivangkiiliulersaartumik’ taaneqartarpoq. (ApS 21:8) Tassa ersarippoq angutit arfineq-marluk taakku aallussil­luarlutik oqaluus­siuarsimasut.

20. Apustilit nalitsinni qanoq ilaarneqartarpat?

 ²⁰ Nalitsinni angutinik ilagiinni akisussaaf­feqaler­tussanik toqqaaniarnermi apustilit ilaarneqartarput. Angutit taakkua Guutimeersumik ilisimas­suseqarnertik anersaamillu illernartumit sunnerneqarnertik ersersit­tariaqarpaat. Angutit Biibilimi piumasaqaatigineqartunik eqqortitsisut utoqqaanertatut ilagiin­niluunniit kiffartortutut toqqarneqartarput. f (Tim 1. 3:1-9, 12, 13) Biibilimi piumasaqaatit anersaamit illernartumit isumassarsiarititaammata oqarsin­naavugut angutit taakku anersaamit illernartumit toqqarneqartut. Suliassarpas­suaqartarput, assersuutigalugu utoqqaat ikiorneqar­nissaat isumagisarpaat. (Jaak 1:27) Ilaallu ataatsimeersuar­nissanik piareersaanermik, sanaartornermik Napparsim­mavinnul­luunniit Attaveqar­titatut ulapputeqartarput. Ilagiinni kiffartortut ilagiin­niittunik paarsisuunermut ilinniar­titsinermul­luunniit attuumas­suteqan­ngikkaluartunik aamma suliassarpas­suaqartarput. Utoqqaanertat ilagiinnilu kiffartortut ilagiinni peqatigiis­sortanilu akisussaaf­fippassuaqaraluarlutik nutaarsiassat nuannersut oqaluus­sissutigiuar­tarpaat. – Kor 1. 9:16.

21, 22. Ilagiin­ngorlaat Jehovamit pilluaq­quneqarnerat sumit erserpa?

²¹ Ilagiin­ngorlaat malersugaanerminni Jehovamit ikiorneqarlutik pinertusaarsimapput ajornar­torsiullu ilagiin­niittut akornanni avissaar­tuutsitsisin­naagaluartoq aaqqippaat. Jehovap pilluaq­qusinera ersarippoq, imami allassimavoq: “Guutip oqaasia siammariar­tortuarpoq Jerusalemmimilu ilinniartitat amerliar­tupiloorlutik. Aamma palaserpassuit uppertun­ngorput.” (ApS 6:7) Taanna ilagiit anersaakkut siumukar­nerannik Apustilit Suliaanni oqaluttuat ilaannaraat. (ApS 9:31; 12:24; 16:5; 19:20; 28:31) Aamma nalitsinni nunani allani oqaluus­sinermi siumukarneq pillugu tusagaqaraangatta qiimmas­saatigisarparput, ilaa?

²² Upperisarsiornikkut siuttut kamattut kristumiunik siullernik malersuiuar­nerminni uninnatik ilagiit sakkortunerusumik malersulerpaat. Allaat Steffaanusi nakuuserfigineqarpoq. Tamannalu kapitalimi tulliuttumi sammissavarput.