1, 2. (a) Kristumiut siulliit nalaanni siulersuisoqatigiit apeqqutit pingaarutillit suut akisussan­ngorpaat? (b) Qatanngutit taakku eqqortumik aalajangiinis­saminnut qanoq ikiorneqarpat?

 APUSTILIT utoqqaanertallu Jerusalem­mimiittut pissangapput. Imminnut isigipput nalunagu pingaarutilerujus­suarmik aalajangiilerlutik. Kipineqarneq pillugu isumaqatigiin­ngissut pissutigalugu pingaarutillit uku apeqqutaalerput: Kristumiut Moorsisip inatsisai maleruar­tussaavaat? Jehovap kristumiut juutiusut juutiun­ngitsullu immikkoor­tittarpai?

² Angutit siuttuusut uppernarsaatinik eqqarsaatigin­neqqissaarsimapput. Guutip oqaasiani siulittuutit aamma misigisat Jehovap juutiun­ngitsut kristumiun­ngornerannik akuersineranik ersersitsisut eqqartorsimavaat. Tamarmiullutik pineqartoq pillugu ilisimasatik oqaatigisimavaat. Isumaqatigiin­ngissut pillugu aalajangiinissamut paasissutissat tamaasa pigereerlugillu Jehovap qanoq ilioqqugaatsik paasilluarsin­naavaat. Jehovalli siulersuinera ataqqissavaat?

3. Apustilit Suliaat kapitali 15-imi allassimasut qanoq ilinniarfigisin­naavagut?

³ Anersaap illernartup siulersuinera malissagunikku uppersuseqarlutillu sapiitsuusariaqarput. Aalajangiinerat pissutigalugu juutinit upperisarsiornikkut siuttuusunit uumigineqar­nerulersin­naapput. Aamma kristumiunit Moorsisip inatsisaanik maleruaaq­qusisunit akerlilersor­neqarsin­naapput. Siulersuisoqatigiit qanoq iliussappat? Tamanna sammeriartigu. Samminerani paasissavarput nalitsinni Jehovap Nalunaajaasuisa Siulersuisoqatigiivisa qanoq angutit taakku ilaartaraat. Aamma uagut aalajangigas­saqartilluta ajornar­torsiuteqar­tillutalu ilaarsin­naavagut.

4, 5. Jaakup siulittuut suna issuarpaa?

⁴ Jiisusip affarmik qatanngutaa Jaaku ataatsimiinnermi aqutsisuusimagunartoq oqalulerpoq. a Siulersuisoqatigiit eqqartuereerlutik tamarmiugunarlutik isummiussaat oqaatigaa. Ima oqarpoq: “Simmiuup sukumiisumik oqaluttuuteq­qammerpaatigut Guutip allamiut ilaat aterminik ateqaateqartussat innuttarilerumallugit qanoq aatsaavissuaq akuerigai. Tamannalu pruffiitit oqaasiinut naapertuuppoq.” – ApS 15:14, 15.

⁵ Siimuup, tassa Siimuut Petrusip, oqaasii aamma Barnabap Paulusillu misigisimasaminnit oqaluttuaat Jaakup tusarnaarsimavai. Oqaasiilu pissutigigunarlugit allassimaffiit Jehovap piumasaanik paasinnin­nissamut iluaqutaasinnaasut eqqaalerpai. (Joh 14:26) Taava Jaakup Amosi 9:11, 12-ilu issuarpai. Allakkat taakku Hebræerisut Allakkani Illernartuni taamani “pruffiitinit allakkanik” taaneqar­tartunut ilaapput. (Mat 22:40; ApS 15:16-18) Maluginias­sagunarpallu oqaatsit Jaakup issuagai nalitsinni Amosip allagaani atuarsin­naasatsinnit allaanerulaartut. Ilimanarpoq Jaakup Septuaginta, Hebræerisut Allakkanik Illernartunik grækerisut nutsigaq, issuarsimassagaa.

6. Allakkat Illernartut iluaqutigalugit Guutip piumasaa qanoq paasineqarpa?

⁶ Pruffiiti Amosi aqqutigalugu Jehovap siulittuutigaa ‘Daavip illua qarmaqqik­kumaarlugu’, tamannalu kunngeqarfiup Missiarsimit naalakkersuif­figineqartussap pilersin­nissaanut tunngas­suteqarpoq. (Ez 21:31, 32) Tamanna isumaqarpa Jehovap inuiaat Israalikkut kisiisa innuttarileq­qissagai? Naamik. Siulittuummi aamma allassimavoq inuit “inuiaqatigiinnit tamaneersut” katersor­neqarumaartut Guutillu ‘atianik ateqaateqarumaartut’. Eqqaamajuk Petrusi ima oqaqqammersoq: ‘Guutip uppernerat pissutigalugu uummataat minguiaramigit uagut [tassa kristumiut juutiusut] juutiun­ngitsullu assigiimmik pivaatigut.’ (ApS 15:9) Tassa isumaqarpoq Guutip piumasarigaa juutit juutiun­ngitsullu tamarmik tassaalissasut Kunngeqarfimmik kingornus­sisussat. (Rom 8:17; Ef 2:17-19) Siulittuutini isumassarsiarititaasuni sumiluunniit allassimanngilaq juutiun­ngitsut timikkut kipineqaq­qaartariaqartut juutilluunniit upperisaannut ilannguteq­qaartariaqartut.

7, 8. (a) Jaaku qanoq siunnersuuteqarpa? (b) Jaakup oqaasii qanoq paasissavagut?

 ⁷ Allakkani Illernartuni uppernarsaatit aamma Petrusip, Barnabap Paulusillu oqaasii tunngavigalugit Jaaku ima siunnersuivoq: “Isumaqarpunga allamiut Guutimut saattut akornuser­neqassan­ngitsut, kisianni allaffigis­sagigut guutilianut pilliutit, atoqatigiinnikkut eqqunngitsuliorneq, uumasut qimitat aallu itigarteq­qullugit. Itsarli Moorsisimit allakkat ullormi qasuersaarfimmi synagogini atuffas­sissutigineqar­taramik illoqarfinni tamani oqaluus­sissutigineqartarput.” – ApS 15:19-21.

⁸ Jaakup, ilimanartumik ataatsimiinnermi aqutsisuusup, oqartus­saaffigin­ngisaminik oqaaseqarluni aalajangiussani allanut atortin­niarsaraa? Naamerluinnaq. Oqarmat “isumaqarpunga” ersarippoq siulersuisoqatigiit naalagaaf­figinian­ngikkai. Oqaatigineqarsimasulli Allakkanilu Illernartuni siulittuutit naapertorlugit qatanngutit eqqarsaatigisin­naasaannik siunnersuuteqarpoq.

9. Jaakup siunnersuutaa sunik iluaqutis­sartaqarpa?

⁹ Jaakup oqaasii siunnersuutitsialaappat? Aap, kingusin­nerusukkummi apustilit utoqqaanertallu akueraat. Siunnersuutaa sunik iluaqutis­sartaqarpa? Siullertut, kristumiut juutiun­ngitsut Moorsisip inatsisai maleruar­tariaqan­nginnamikkit ‘akornuser­neqassan­ngillat’. (ApS 15:19) Aappaattut, kristumiut juutiusut ukiorpassuarni ‘Moorsisimit allakkat ullormi qasuersaarfimmi synagogini atuffas­sissutigineqar­tarnerannik’ tusarnaar­tarsimasut nalunngeqatigin­nissutaat innimigineqassaaq. b (ApS 15:21) Qularnan­ngitsumik Jaakup siunnersuutaa kristumiut juutiusut juutiun­ngitsullu imminnut attaveqatigiil­luarnerulis­sutigissavaat.  Pingaar­nerpaamillu Jehovap piumasaanut naapertuummat taassuma iluarissavaa. Guutip innuttaasa eqqisseqatigiin­nerannut ataasioqatigiin­nerannullu akornutaasin­naasumik ajornar­torsiummik aaqqiis­sutitsialaavoq. Tamannalu nalitsinni uagutsinnut maligas­saalluarpoq.

10. Nalitsinni Siulersuisoqatigiit kristumiut siulliit siulersuisoqatigiivi qanoq ilaartarpaat?

¹⁰ Kapitalip matuma siuliani allaatigineqartutut kristumiut siulliit siulersuisoqatigiivi ilaarlugit nalitsinni Jehovap Nalunaajaasuisa Siulersuisoqatigiivi Jehovamut, Kisimi Oqartus­saasumut, aamma Jiisusimut Kristusimut, ilagiinnut niaquusumut, sutigut tamatigut siulersor­tittarput. c (Kor 1. 11:3) Qanoq taamaaliortarpat? Albert D. Schroeder, 1974-imiit 2006-imi marsimi nunarsuarmi inuujun­naarluni qilaliarnermi tungaanut Siulersuisoqatigiinnut ilaasor­taasimasoq, ima oqarpoq: “Pingasun­ngornerit tamaasa Siulersuisoqatigiit ataatsimiittarput Jehovap anersaavanit siulersor­neqarnissamik qinnummik tamatigut aallarner­neqartartumik. Suliarineqartut tamarmik aalajanger­neqartullu tamarmik Guutip oqaasianut, Biibilimut, naapertuul­luinnar­nissaat qulakkeer­niarlugu sapinngisaq tamaat iliuuseqar­toqartarpoq.” Aamma Milton G. Henschel, 2003-mi marsimi nunarsuarmi inuujun­naarluni qilaliarnermi tungaanut ukiorpassuarni Siulersuisoqatigiinnut ilaasor­taasimasoq, Napasuliap Alapernaarsuiffiup Biibilimik Ilinniarfia Gileadimi klassit 101-issaanni naammas­sinnittunut pingaarutilimmik apeqquteqarpoq. Ima aperivoq: “Nunarsuarmi allamik peqatigiif­feqarpa taakkua siulersuisui pingaarutilimmik aalajangiin­nginnerminni Guutip oqaasianik, Biibilimik, misissuisartunik?” Soorunami naamik!

11. Siulersuisoqatigiit aalajangigaannik ilagiit qanoq paasitin­neqarpat?

¹¹ Kipineqarnermik isumaqatigiin­ngissut pillugu Jerusalemmimi siulersuisoqatigiit isumaqatigiillutik aalajangiisimapput. Ilagiin­niittut ataasius­suseqar­tuarnias­sagamik siulersuisoqatigiit aalajangigaannik ersarissumik qiimmaal­lannartumillu paasitin­neqartariaqarput. Qanoq ajunngin­nerpaamik taamaalior­toqarsinnaava? Oqaluttuaq ima nangippoq: “Apustilit, utoqqaanertat  ilagiin­niittullu tamarmik aalajangerput ilatik toqqakkatik Paulusi Barnabalu ilagalugit Antiokiamut aallassasut. Juudarsi Barsabamik taaneqartartoq aamma Siilarsi, angutit qatanngutinik siulersuisut ilaat, aallartippaat.” Aamma allakkanik Antiokiami Syriamiittumi Kiliikiamilu ilagiinnut tamanut atuffas­sissutigineqar­tussanik nassartin­neqarput. – ApS 15:22-26.

12, 13. (a) Juudarsip Siilarsillu aallartin­neqarnerat sooq silatusaarnerua? (b) Siulersuisoqatigiinnit allakkat qanoq iluaqutaappat?

¹² Aallartitat taakkua sisamat erseqqis­sassavaat oqariartuut tassaagin­nanngitsoq kipineqarneq pillugu apeqqummut akissutaasoq, kisianni tassaasoq siulersiusoqatigiinnit ilitsersuussutit nutaat. Juudarsi Siilarsilu ‘qatanngutinut siulersuisunut ilaagamik’ siulersuisoqatigiinnut sinniisussatut piukkunnarput. Angutit ‘toqqakkat’ taakku iluaqutigalugit kristumiut juutiusut Jerusalem­mimiittut aamma kristumiut juutiun­ngitsut ilagiinni allaniittut attaveqaqatigiil­luarnerulissapput. Angutit taakkua aallartin­neqarnerat silatusaar­nerullunilu asannit­tuliorneruvoq. Qularnan­ngitsumik Guutip innuttaasa tamanna eqqisseqatigiin­nerulis­sutigalugulu ataasioqatigiin­nerulis­sutigaat.

¹³ Allakkani kipineqarneq pillugu aamma kristumiut juutiun­ngitsut Jehovamit iluarineqarumallutik pilluaq­quneqarumal­lutillu susariaqarnerat pillugu ersarissumik allassimasoqarpoq. Allakkani pingaarnertut ima allassimavoq: “[Anersaap] illernartup sunniineratigut aalajangerpugut allanik nammagas­sikkumanasi pisariaqartut ukua saniatigut: Guutilianut pilliutit, aak, uumasut qimitat atoqatigiin­nikkullu eqqunngitsuliorneq itigartit­tuarsigit. Tamakku qanillinaveersaar­tuarussigit ingerlal­luassaasi. Inuulluaritsi!” – ApS 15:28, 29.

14. Inuit allat avissaar­tuukkaluartut sooq Jehovap innuttai ataasius­suseqarpat?

¹⁴ Nalitsinni Jehovap Nalunaajaasui nunarsuaq tamakkerlugu ataasius­suseqarput. Naak 8.000.000-nit amerlanerugaluarluta ilagiillu 100.000-nit amerlanerugaluartut assigiimmik upperisaqarpugut assigiimmillu suliaqar­tarluta. Inuit allat avissaar­tuukkaluartut eqqissiviil­liortoqar­taraluartorlu qanoq ililluta taama maluginiar­nartigisumik ataasius­suseqarsin­naavugut? Pingaarnertut, Jiisusip Kristusip “inussiaq aalajaallunilu silatooq”, tassa Siulersuisoqatigiit, aqqutigalugit siulersuinera aamma kajumilluta siulersor­tikkumasarnerput pissutigalugit ataasius­suseqarpugut. – Mat 24:45-47.

15, 16. Kipineqarneq pillugu isumaqatigiin­ngissut qanoq aaqqinneqarpa, aamma sooq ajunngitsumik kinguneqarpa?

¹⁵ Apustilit Sulianni nangilluni oqaluttuarineqarpoq qatanngutit Jerusalemmimiit Antiokiamut tikikkamik ‘ilinniartitat tamaasa katersor­teriarlugit allakkat tunniukkaat’. Qatanngutit tassaniittut siulersuisoqatigiit ilitsersuutaat qanoq qisuariarfigaat? Allakkat “atuareeramikkit qiimmas­sarneqarnertik nuannaarutigaat”. (ApS 15:30, 31) “Aamma Juudarsi Siilarsilu … oqalugiaqat­taarnikkut qatanngutinik qiimmas­saallutillu nakussatsitsipput.” Taamaalioramik angutit taakku ‘pruffiitinik’ taaneqartarput – soorlu Barnaba, Paulusi allallu aamma taamatut taaneqartartut. Oqaaserlu “pruffiiti” isumaqarpoq Guutip piumasaanik ilisimatitsisoq. – ApS 13:1; 15:32; Mos 2. 7:1, 2.

¹⁶ Ersarippoq Jehovap siulersuisoqatigiit aalajangigaat pilluaqqugaa. Tamatuma kingunerisaanik ilagiin­niittut tamarmik qiimmaallapput. Suna qiimmaal­lassutigaat? Qularnan­ngitsumik siulersuisoqatigiit ersarissumik piffissarlu eqqorluarlugu ilitsersuinerat. Ilitsersuinerallu Guutip oqaasianik anersaallu illernartup siulersuineranik tunngaveqarpoq. Aamma ilagiit qiimmas­saatigisimassavaat aalajangiineq qatanngutinit asannittunit misigin­neqataasunillu ingerlateq­qinneqarmat.

17. Nalitsinni ilagiinnik nakkutilliisut Paulusimik, Barnabamik, Juudarsimik Siilarsimillu qanoq ilaarsisarpat?

¹⁷ Taamani pisut ilaarlugit nalitsinni Jehovap Nalunaajaasuisa  Siulersuisoqatigiivi nunarsuaq tamakkerlugu qatanngutigiis­suarnut piffissaq eqqorlugu ilitsersuisarput. Aalajangikkatik pillugit ilagiit ersarissumik paasitit­tarpaat. Ilaatigut taamaaliortarput ilagiinnik nakkutilliisut aqqutigalugit. Qatanngutit angutit imminut pilliutigeriaannaasut taakku ilagiinnut tikikkaangamik ersarissumik ilitsersuisarput qiimmas­saasarlutillu. Paulusi Barnabalu ilaarlugit ‘ilinniar­titsisarput qatannguterpassuillu ilagalugit Jehovap oqaasianik nutaarsiassat nuannersut pillugit oqaluus­sisarlutik’. (ApS 15:35) Aamma Juudarsi Siilarsilu ilaarlugit ‘oqalugiaqat­taarnikkut qatanngutinik qiimmas­saallutillu nakussatsitsisarput’.

18. Qanoq qulakkeersin­naavarput Jehovamit pilluaq­quneqar­tuarnissarput?

¹⁸ Nunarsuarmi avissaar­tuuffiusumi kristumiut tamarmik qanoq eqqisseqatigiit­tuarlutillu ataasius­suseqar­tuarsin­naappat? Eqqaamajuk Jaaku kingusin­nerusukkut ima allammat: “[Ilisimassuseq] pavannga pisoq pingaarnertut minguitsuuvoq tamatumalu saniatigut eqqisseqatigiis­sitsisuulluni, uteriitsuunani, naalakkumasarluni … Aamma naapertuil­luarnerup inerititaa pissutsini eqqissisimaf­fiusuni eqqisseqatigiis­sitsisut pillugit siaruar­terneqartarpoq.” (Jaak 3:17, 18) Naluarput Jaaku taamatut allakkami Jerusalemmimi siulersuisoqatigiit ataatsimiinnerat eqqarsaatigisimaneraa. Kisianni Apustilit Suliaat kapitali 15-imi allassimasunik misissuinitsinni paasivarput aatsaat ataasius­suseqaraangatta ilitsersuus­sutinullu naalakkaangatta Jehovap pilluaq­qusaraatigut.

19, 20. (a) Sumit erserpa Antiokiami ilagiit eqqisseqatigiil­lutillu ataasius­suseqartut? (b) Paulusi Barnabalu maanna susinnaalerpat?

¹⁹ Antiokiami ilagiin­niittut maanna eqqisseqatigiil­lutillu ataasius­suseqarnerat ersarippoq. Qatanngutit Jerusalem­mimeersut ilitsersuussutaat akerlilersornagit kristumiut Antiokiamiittut Juudarsip Siilarsillu tikeraarnerat qujamasuutigingaarpaat. Taakku pillugit ima allassimavoq: “Sivisujaamik tassaneereerlutik qatanngutinit angalal­luarnissamik kissaan­neqarlutik aallartitsisiminnut [Jerusalem­mimiittunut] utertin­neqarput.” d (ApS 15:33) Qularnan­ngitsumik aamma qatanngutit Jerusalem­mimiittut angutit taakkua marluk angalanertik pillugu oqaluttuaat tusaramikku nuannaangaarput. Jehovammi ajunngisaangaarnera pissutigalugu suliassin­neqarnertik naammas­silluarpaat.

 ²⁰ Paulusi Barnabalu Antiokiamiiginnartut maanna allamut saasartinnatik oqaluus­sinermi siulersuinertik aallussin­naalerpaat. Nalitsinni nakkutilliisut angalasartut ilagiinnut tikeraaraangamik aamma taamaaliortarput. (ApS 13:2, 3) Taakku Jehovap innuttaanut pilluaq­quneqaataangaarput! Jehovap Paulusi Barnabalu allamik suliasseq­qillugit qanoq pilluaqquai? Kapitalimi tulliuttumi tamanna sammissavarput.