IMMIKKOORTOQ 1
Inuuneq nalerisimaarnartoq – takorluugaannaava?
ANGERLARSIMAFFIK atortorissaaruterpassualik ilorrisimaarnarpasissinnaavoq. Iserluguli immaqa nuanniippoq. Meeqqat angisuut isumaluppasillutik angajoqqaatik akisarpaat „aap“ imaluunniit „naamik“. Anaanaasup ajuusaarutigisarpaa uimi soqutigineq ajormani. Ataataasoq akornusersortikkusunngilaq. Ungasissumi aappariit taakkua angajoqqaavi utoqqalisut angerlarsimaffimminniipput meeqqatik ernuttatillu qaammaterpassuarni takusimanngisatik maqaasillugit. Aammali ilaqutareeqarpoq taamatorpiaq ajornartorsiuteqaraluarlutik pilluartunik nalerisimaartunillu. Ajornartorsiutitik qaangersinnaasimavaat. Qanoq iliortarnersut eqqarsaatiginikuuviuk?
2 Nunami ineriartorfiusumi najugallit ilaqutariit takorlooriassagitit. Ilaqutariit arfineq-marlunnik inoqutillit illupalaannguami najugaqarput. Naluaat nerisassat suminngaanniit pissarsiarissallugit — inuit kaannersuaqarunnaarsitsisinnaannginerannik piitsuujunnaarsitsisinnaannginnerannillu eqqaasitsissut alianartoq. Naak nunarsuatsinni ilaqutariit ilarpassui piitsuugaluarlutik nuannaartuupput. Sooruna?
3 Nunani pisuuni allaat aningaasatigut ajornartorsiortoqalersinnaavoq. Japanimi pigissaartoqaleruttormat ilaqutariit illusipput. Isertitaqarnerulernissartik naatsorsuutigalugu illuminnut akiliinerusalerput. Taavali „ballonngi qaartoorpoq“. Illortik akilersorsinnaajunnaarpaat akikinaarujussuarlugulu tunisariaqalerlugu. Illumi tassani najugaqanngikkaluarlutik akiitsutik suli akilersorpaat. Tamatuma saniatigut aamma kreditkorti (aningaasaatit sinnerlugit tigusisinnaatitaanertik) eqqarsarluaqqaarlutik atortannginnamikku akiligassanik takkuttoqartarmat akilerniarlugit ilungersuutigaat. Illumi ittuusoq hestinut aningaasanoortarpoq, ilaqutariillu akiitsui amerliartuinnarlutik. Ilaqutariippassuilli allannguisinnaasimapput iluarusunnerulissutigisaminnik. Qanoq iliorsimanersut paaserusussinnaaviuk?
4 Sumiluunniit najugaqaraluaraanni inuit attaveqatigiinnerat isumakulunnartoqalersinnaavoq ajornartorsiulersitsisumik.
Suliffimmi ingutsisoqarsinnaavoq. Naammassisat immaqa allanit sinngagineqalersinnaapput pissutissaqanngitsumik isornartorsiorneqaatigilerlugit. Immaqa ullut tamaasa uuminartumik pissusilimmik suleqateqartoqarpoq. Imaassinnaavoq meeqqat atuarfimmi qinngasaarneqartartut, uumisaarneqartartut ilaginnaannarneqartartulluunniit. Kisimiittunik pilersuisorpassuaqarpoq, nalunngilaallu tamanna allanut attaveqarnermut oqilisaataanngitsoq. Ajornartorsiuterpassuit tamakku pisuullutik inuuniarneq amerlasuunut ajornakusooqaaq.5 Uippakajaarneq maluginagu qaleriiaatiinnaartunik ajornartorsiortitsilersinnaavoq naammaginnikkunnaariataarnissap tungaanut. Taamaattumik uippakajaarneq ‘nipaatsumik toqutsisumik’ taaneqartarpoq, uippakajaartuaannarnerlu ‘toqunartutut arriitsumik sunniukkiartuaartutut’ oqaatigineqartarluni. „Ullumikkut sulisartut tamarmik nunarsuaq tamakkipajaarlugu uippakajaarnermik tamatumalu kingunerisaanik nappaatinik sunnerneqarsimapput,“ taama oqarpoq professori Robert L. Veninga University of Minnesotameersoq. Nappaatit uippakajaarnerup kinguneri USA-mut dollarinik 200 milliardinik ukiumut akeqartartut oqaatigineqartarpoq. Uippakajaarneq Amerikap avammut nioqqutissiaanik nutaamik taagorneqartalersimavoq, oqaaserlu „uippakajaarneq“ nunarsuarmi oqaatsit pingaarnerit ilarpassuinut ilaalersimalluni. Pilersaarutigisaraluit uippakajaarluni angumerinngitsooraanni ilerasuttoqalersinnaasarpoq. Agguaqatigiissillugu ullormut nalunaaquttap-akunneri marluk ilerasuttoqartartoq misissuinerup takutippaa. Ilaasali uippakajaarneq qaangersimavaat inuunerminnilu ingerlallualerlutik.
6 Ulluinnarni ajornartorsiutit qanoq qaangerneqarsinnaappat nalerisimaarlunilu inuulerluni? Inuit ilaasa immikkut ilisimasallit atuakkiaat siunnersortissarsiorfigisarpaat. Atuakkalli taamaattut tatiginarpat? Meeqqanik perorsaaneq pillugu, oqaatsinut 42-nut nutserneqartumik 50 millioninngorlugulu naqiterneqartumik atuakkiortoq Dr. Benjamin Spock ilaanni oqarpoq „aalajangersimasuunermik takutitsisinnaannginneq tassaasoq . . . Amerikami angajoqqaat ajornartorsiutiginerpaasaat“. Nangillunilu oqaatigaa immikkut ilisimasallit, ilaatigut nammineq, ajornartorsiummut pisuusut. „Kingusinaarluta aatsaat paasivarput ilisimasaqarniarnersuatta angajoqqaat imminut tatigiunnaartikkai,“ taama nassuerpoq. Taamaattumik pissutissaqarluarpoq ima aperissalluni: ’Kia siunnersuutai maannakkut siunissamilu inuunermi nalerisimaalersitsisinnaappat?’