SUNA PILLUGU sallusuissut? Apeqqutigineqarsimasut pingaarnerpaartaasa ilaat pillugit. Immaqa aamma illit apeqqutit uku eqqarsaatigisimavatit:

• Guutip soqutigaatigut?

• Sorsunnerit naalliuutillu qaquguluunniit atuukkunnaassappat?

• Toqugutta qanoq pissaagut?

• Toqungasunut neriuutissaqarpa?

• Guutimit tusarneqarlunga qanoq qinusinnaavunga?

• Qanoq pillualersinnaavunga?

Apeqqutit tamakku sumi akissutissarsiniarsinnaavigit? Inuit aperigukkit paasissavat assigiinngitsunik isumaqartut. Qularnanngitsumillu atuakkanik atorniartarfimmi atuagaarniarfimmiluunniit nanissagaluarpatit atuagarpassuit inuit akissutissarsiffigisinnaasorisaat. Amerlanertigulli atuakkat tamakku imminnut akerleriittarput. Immaqa ilaat maannakkorpiaq tunngaveqarluarpaluttumik akissutissarsiffigineqarsinnaapput, sivitsunngitsorli pisoqavallaalersimassapput, iluarsarneqassapput allanilluunniit taarserneqassallutik.

Ataatsimilli atuagaqarpoq ilumoortumik akissutissalimmik — tassa Guutip oqaasia Biibilitut ilisimaneqartoq. Jiisusi Guutimut qinunermini ima oqarpoq: „Oqaatsitit sallusuissutaapput.“ (Johannesi 17:17) Apeqqutinut qulaani allassimasunut Biibilimi akissutigineqartut paasiuminartut ilumoortullu paasisaqarfigisinnaavatit quppernerit tulliuttut atuarukkit.

SOOQ APEQQUT PILERSOQ: Silarsuaq ajussutsimik naapertuilluanngissutsimillu ulikkaartoq inuuffigaarput. Upperisarsioqatigiippassuit ajoqersuutigaat inuit naalliunnerat Guutip piumasarigaa.

BIIBILIMI AJOQERSUUTIGINEQARTUT: Guuti ajussutsimut pisuunngilaq. Jobimik allakkani 34:10-mi ima allassimavoq: „Guuti ajortumik iliunngisaannarpoq, Ajugaqanngitsoq peqquserluttumik iliorneq ajorpoq. “Guuti inunnut siunertaqarpoq asanninnerminut ersiutaasumik. Taamaattumik Jiisusip ima qinunissatsinnik ilinniartippaatigut: „Ataatarput qilanniittutit! . . . Naalagaaffiit tikiulli, piumasat qilammisut nunamissaaq pili.“ (Matthæusi 6:9, 10) Aap, Guutip ima soqutigitigaatigut siunertani neriorsuutigisani naammassiniarlugu ilimagisinnaasat qimmungaarlugit iliuuseqarluni. — Johannesi 3:16.

Aamma takukkit Mosesimik allakkat siulliit 1:26-28, Jaakup allagai 1:13 aamma Petrusip allagai siulliit 5:6, 7.

SOOQ APEQQUT PILERSOQ: Maannamut inuppassuit sorsunneq pissutigalugu suli toqusarput. Inuit tamarmik naalliuutinit arlaatigut sunnerneqartarput.

BIIBILIMI AJOQERSUUTIGINEQARTUT: Guuti siulittuivoq siunissami nunarsuarmi tamarmi eqqissisitsiumaarluni. Guutip naalagaaffia qilammiittoq nunarsuarmut naalakkersuilerpat inuit ’sorsunnissamut sungiusarunnaassapput’. ’Saffiussavaalli panatik assallatserummut savissaliaralugit.’ (Esaja 2:4) Guutip naapertuilluanngitsuliornerit naalliuutillu tamaasa nungutikkumaarpai. Biibilimi ima neriorsuuteqarpoq: „[Guutip] qulliit tamaasa isaannit allarterumaarpai, toqulu peerukkumaarpoq, aliasuttoqarunnaarlunilu nilliasoqarunnaarlunilu anniartoqarunnaassaaq siulliit [ilaatigut naapertuilluanngitsuliornerit naalliuutillu ullumikkut atuuttut] peermata.“ — Saqqummersitat 21:3, 4.

Aamma takukkit Tussiaat 37:10, 11, Tussiaat 46:10 aamma Mikap allagai 4:1-4.

SOOQ APEQQUT PILERSOQ: Silarsuarmi upperisarsiornerit amerlanersaanni toqup kingorna ingerlaqqittartumik inuup iluaniittoqarnera ajoqersuutigineqarpoq. Isumaqartoqarpoq toqungasut inuusunik ajoqusiisinnaasut imaluunniit Guutip ajortut pillartarai anniarfimmi ikualasumi naassaanngitsumik anniartitaasussatut eqqartuullugit.

BIIBILIMI AJOQERSUUTIGINEQARTUT: Toqunermini inuk piujunnaartarpoq. Oqaluussisartup oqaasii 9:5-imi ima allassimavoq: „Toqungasut sunnguamilluunniit ilisimasaqanngillat.“ Toqungasut ilisimasaqaratillu misigisinnaanatillu sumilluunniit iliuuseqarsinnaannginnamik inuusunik ajoqusiisinnaanngillat — ikiuisinnaanngilluinnarlutillu. — Tussiaat 146:3, 4.

Aamma takukkit Mosesimik allakkat siulliit 3:19 aamma Oqaluussisartup oqaasii 9:6, 10.

SOOQ APEQQUT PILERSOQ: Inoorusuppugut, asasavullu ilagalugit inuuneq nuannaarutigisinnaajumavarput. Asasatsinnik takunneqqikkusungaarnerput pissusissamisuuginnarpoq.

BIIBILIMI AJOQERSUUTIGINEQARTUT: Toqungasut amerlanersaat makitinneqassapput. Jiisusi neriorsuivoq ’ilivermiittut ilivernit aniumaartut’. (Johannesi 5:28, 29) Makititaasut Guutip aallaqqaammulli siunertaa naapertorlugu nunarsuarmi paratiisiusumi inuunissaminnut periarfissinneqassapput. (Esaja 65:21-25) Siunissamut neriorsuutigineqartumut tamatumunnga ilaapput inuiaat naalattut peqqilluinnarnissaat naassaanngitsumillu inuunissaat. Biibilimi ima allassimasoqarpoq: „Iluartut nuna kingornutissavaat najugaqassallutillu tassani naassaanngitsumik.“ — Tussiaat 37:29.

Aamma takukkit Jobimik allakkat 14:14, 15, iivangkiiliu Lukasip allagaa 7:11-17 aamma Apustilit Suliaat 24:15.

SOOQ APEQQUT PILERSOQ: Inuit upperisarsioqatigiinnit tamangajanneersut qinusarput. Inuppassuilli misigisarput qinnutitik tusarneqartanngitsut.

BIIBILIMI AJOQERSUUTIGINEQARTUT: Jiisusip ilinniartippaatigut ’qinugaangatta oqaaserpassualiortassanngitsugut’ imaluunniit ’oqaatsivut uteqattaartassanngikkivut’ (NV). (Matthæusi 6:7) Kissaatigigutsigu Guutip qinnutivut tusassagai taassuma iluarisaatut qinusariaqarpugut. Taamaaliorsinnaajumalluta Guutip piumasaa pillugu ilinniartariaqarpugut tamatumunngalu naapertuuttumik qinusariaqarluta. Tamanna Johannesip allagaani siullerni 5:14-imi ima nassuiarneqarpoq: „Piumasaminut naapertuuttumik qinnuigigutsinni tusarumaaraatigut.“

Aamma takukkit Tussiaat 65:3, iivangkiiliu Johannesi allagaa 14:6, iivangkiiliu Johannesi allagaa 16:23, 24 aamma Johannesip allagai siulliit 3:22.

SOOQ APEQQUT PILERSOQ: Inuppassuit isumaqarput aningaasat, tusaamasaanerup imaluunniit pinnissutsip pillualersissinnaagaatik. Taamaattumik tamakku noqqaassutigisarpaat.

BIIBILIMI AJOQERSUUTIGINEQARTUT: Pilluarnissamut ’matuersaammik’ tunineqarpugut oqaatsini Biibilimi allassimasuni ukunani: „Inatsisit allassimaffiat taanna . . . eqqarsaatigiuaannaruk tassanilu allassimasut tamaasa maleruaqqissaarlugit; taava iluatsitsilluassaatit pilluarumaarlutillu.“ (Josva 1:8) Aatsaat piviusumik pillualissaagut inuussutissanik anersaakkut ittunik pisariaqartitsinerput matussuserniarlugu iliuuseqarutta. Inuussutissanut anersaakkut ittunut ilaavoq Guuti pillugu taassumalu inunnut siunertaa pillugu sallusuissut. Sallusuissut tamanna Biibilimiittoq ilisimagutsigu pingaaruteqarluinnartumik pingaaruteqanngitsunillu immikkoortitsinissamut iluaqutigissavarput. Aalajangiinitsinni iliuuseqarnitsinnilu sallusuissummit Biibilimeersumit siulersortikkutta inuunerput siunertaqarluarnerussaaq.

Aamma takukkit Ussatit 3:5, 6, 13-18 aamma Timotheusimut allakkat siulliit 6:9, 10.

 Maannamut apeqqutit arfinillit akissutaat Biibilimiittut sammillatsiarpavut. Paasisaqarnerorusuppit? Sallusuissummik paasisaqarusuttut ilagippatsit qularnanngitsumik apeqqutit uku eqqarsaatigisimassavatit: ’Guutip ilumut soqutigigunisigut, soormitaava oqaluttuarisaanermi ajussuseqangaarnera naalliuuteqangaarneralu akuerai? Qanoq ilaqutariittut ingerlalluarnerulersinnaavugut?’ Apeqqutit tamakku allarpassuillu Biibilimi sukumiisumik naammaginartumillu akineqarput.

Taamaakkaluartorli ullumikkut inuppassuit Biibilimiit akissutissarsiniarnissartik nangaassutigaat. Isumaqarput Biibili atuagaasoq pisariusoq paasiuminaatsortaqarpallaartorlu. Biibili atorlugu akissutissarsinissannut ikiorneqarusuppit? Jehovap Nalunaajaasuisa ikiorusungaarpaatsit. Iluaqutaalluarsinnaasut marluk taasinnaavavut.

Siullermik, atuagaq Biibilimi sorpiaat ajoqersuutigineqarpat? neqeroorutigaarput. Inuit ulapittut iluaqutissaattut allataavoq apeqqutit pingaaruteqartorujussuit akissutaat paasiuminartut Biibilimiittut misissorsinnaaniassammatigik. Aappassaanik, Biibilimik kursusernissamik akeqanngitsumik neqeroorfigisinnaavatsigit. Jehovap Nalunaajaasuisa ilaata Biibilimik ilinniartitsinissamut piukkunnaateqartup angerlarsimaffinni allamiluunniit pulaartarsinnaavaatit sapaatip-akunnerilu tamaasa pisussaaffittaqanngitsumik sivisunngikkaluartumik Biibilimik sammisaqaqatigalutit. Nunarsuaq tamakkerlugu inuit millionillit pissarsiffigilluarlugu taamatut ikiorneqartarput. Taakkua ilarpassui isumaqalersimapput ’sallusuissut nanillugu’.

Sallusuissut tassaavoq erlinnartuutit pingaarnerpaartaat. Sallusuissut upperisapalaanut, siooranermut paatsiveerunnermullu inussiaajunnaarsinneqaatigaarput. Sallusuissut nuannaalissutigalugulu neriuuteqalissutigalugulu inuunitsinni siunertaqalissutigaarput. Jiisusi ima oqarpoq: „Sallusuissut ilisimalissavarsi, sallusuissutsillu inussiaajunnaarsissavaasi.“ — Johannesi 8:32.