Hebræerit 11:1-40
11 Upperneq tassaavoq neriugisap eqquunnissaanik qularuteqannginneq, takussaanngitsut piviusuunerannut uppernarsaat ersarissoq.*
2 Itsaq inuusut* upperneq pissutigalugu Guutimit iluarineqarnerminnik uppernarsaavigineqarput.
3 Uppernikkut paasivarput qilammiittut nunarsuarmiittullu* Guutip oqaasianit inissititerneqartut takussaasullu takussaanngitsunit pinngortinneqartut.
4 Aabeli upperami Kainip pilliutaanit naleqarnerusumik Guutimut pilliuteqarpoq. Uppernerlu taanna tunngavigalugu tunissutini Guutimit akuerineqarmata naapertuilluartuunerminik uppernarsaavigineqarpoq, toqusimagaluarlunilu uppernermigut suli oqaluppoq.
5 Enoki uppermat Guutip naalliunnartumik toqoqqunagu nuuppaa, tamannalu pissutigalugu nassaarineqanngilaq. Nuutsinneqarninili sioqqullugu Guutimit iluarineqarnerminik uppernarsaavigineqarpoq.
6 Guuti piviusuusoq qamanngalu pisumik ujarlersiminik akissarsisitsisartoq uppereqqaarlugu qanillineqarsinnaammat uppersuseqanngitsoq Guutimit iluarisaasinnaanngilaq.
7 Nooa upperami suli takuneqarsinnaanngitsut pillugit Guutimit mianersoqquneqareerluni Guuti mianeralugu umiarsualiorpoq.* Ilaqutaalu taamaalillutik annaanneqarput. Upperneratigut ersersinneqarpoq inuit ajortut pillarneqartariaqartut, upperamilu naapertuilluartuutitaavoq.
8 Aaperaat upperami nunamut kingornussassaminut aallaqquneqarpoq. Sumukassanerluni nalugaluarlugu naalalluni aallarpoq.
9 Upperami nunami neriorsuutigisami takornartatut inuuvoq. Aamma Iisaaq Jaakulu, neriorsuummik kingornusseqatigisassani, tuperni najugaqatigai
10 illoqarfik piviusunik toqqavilik, Guutimit ilusilersorneqarlunilu* sananeqartoq, utaqqigamiuk.
11 Saara aamma upperami neriorsuisumillu tatiginnikkami utoqqalivallaareeraluarluni naartusinnaanngorpoq.
12 Tamanna pissutigalugu angut ataaseq kinguaassiorsinnaajunnaareeraluartoq ullorissatut amerlatigisunik sissamilu sioqqatut kisinneqarsinnaanngitsutut amerlatigisunik kinguaaqalerpoq.
13 Taakku tamarmik neriorsuutit eqquuttut takunngikkaluarlugit upperlutik toqupput. Ungasianiilli takuaat, tikilluaqquaat nunamilu takornartaanertik najugaqarallarnertillu tamanut nalunaarutigalugu.
14 Taama oqaluttut namminneq najugarisassaminnik ujaasillutik tamanut ersersittarpaat.
15 Qimatartilli eqqarsaatigiuarsimagaluarunikku uternissamut periarfissaqarsimassagaluarput.
16 Maannali pitsaanerusoq, tassa qilammeersoq, anguniarsaraat. Taamaattumik Guutip taakku taakkualu ikioqqullutik imminut saaffiginnittarnerat* kannguginngilai. Illoqarfimmimmi piareersaassimavai.
17 Aaperaat upperami misilinneqarnermini Iisaap pilliutiginissaanut piareersimavoq. Aaperaap neriorsuutinik nuannaarluni pissarsisimasup ernituani pilliutiginiaraluarpaa
18 ima oqarfigineqareeraluarluni: “Kinguaannik taaneqartussat Iisaamit kingoqqisuussapput.”*
19 Nalunngilaa Guutip allaat toqusunit makitissinnaagaa, assersuutaasumillu ernera toqumit utertinneqarpoq.
20 Iisaap aamma upperami Jaaku Eesaauilu Guutimit siunissami ajunngisaarfigineqarnissaannik kissaappai.
21 Jaaku upperami toqulerluni Juuserfip erneri marluk Guutimit ajunngisaarfigineqarnissaannik kissaallugillu ajaappissani najummatserfigalugu Guutimut qinuvoq.
22 Juuserfi upperami toqulerluni Israalip qitornaasa Egyptenimiit aninissaannik eqqartuillunilu saanini pillugit* ilitsersuivoq.*
23 Moorsisip angajoqqaavi upperamik ernerminnik qaammatini pingasuni isertuipput. Taamaaliorput ernertik inoorlaaq inequnarluinnartoq takugamikku kunngillu peqqussutaa siooraginnginnamikku.
24 Moorsisi upperami inersimalereerluni Faaruup paniata erneranik taaneqaqqunngilaq.
25 Aalajangerpoq ajortip nuannersui qaangiutipallattartut nuannaarutiginagit Guutip innuttai ajortumik pineqartut ilaginiarlugit.
26 Akissarsiassani isigiuaramiuk tanitatut* nikanarsagaaneq Egyptenip erlinnartuutaanit naleqarnerutippaa.
27 Upperami kunngip kamannera siooraginagu takussaanngitsorli pinertusaarluni isigiuarlugulusooq Egypteni qimappaa.
28 Upperami angajulliliatik suujunnaarsitsisumit ajoquserneqaqqunagit* qaangiiffik* nalliussillugulu matserfiit aammik tanippai.
29 Guutip innuttai upperamik Immakkut Aappalaartukkut nunatut panertigisukkut ikaarput, Egyptenimiulli ikaariaraluaramik immamit iineqarput.
30 Israalikkut upperlutik Jeerikop qarmarsui ulluni arfineq-marlunni kaajallaqattaareermatigit nakkaapput.
31 Atortittartoq Raahabbi upperami isertortumik alapernaarsuisunik inussiarnersumik tikilluaqqusivoq, tamannalu pissutigalugu naalanngitsut toqutaaqatiginngilai.
32 Amerlanerusut allaatigisariaqarnerpakka? Giidiuut, Baarakki, Samsonni, Jefta, Daavi, Saamuali pruffiitillu allat allaatigissagaluarukkit sivisuallaassaqaaq.
33 Upperamik kunngeqarfiit ajugaaffigaat, naapertuilluarneq atuutilersippaat, neriorsuutit pissarsiaraat, løvit qarni matuaat,
34 inneq sunniutaarutsippaat, panamik toqutaanngillat, sanngiikkaluarlutik pissatsitaapput, sorsuttartorsuanngorput sakkutoorpassuillu saassussisut ajorsarterujussuarlugit.
35 Arnat toqusortatik makititaasut ilageqqilerpaat. Allat pitsaanerusumik makititaajumallutik akiliunneqarlutik utertinneqarnissartik akuerinnginnamikku naalliutsitaapput.
36 Allat illaruaatigineqarnermikkut iperartorneqarnermikkullu, allaallu kalunnernik qilersugaanikkut parnaarussaanikkullu, misilinneqarput.
37 Ujaqqanik milloorneqarput, usserneqarput, pilattorneqarput panamillu toqunneqarlutik. Pissakilliornerminni, annikilliornerminni ajortumillu pineqarnerminni savat savaasallu amiinik atisaqarlutik angalaarput.
38 Inuit taamaattunik ilagisaqarnissamut naleqqutinngillat. Inoqajuitsuni qaqqanilu angalaartarlutillu qaarusunnut qunnernullu qimarnguffissarsiortarput.
39 Taakkua tamarmik uppernertik pillugu iluarineqarnerminnik uppernarsaavigineqaraluarlutik neriorsuutip eqquunnera misiginngilaat.
40 Guuti uagutsinnut pitsaanerusumik siunertaqarmat uagutsinnit siulliullutik naammalluinnartunngortinneqanngillat.
Ilanngussat
^ Imalt.: “qularunnaarnartoq”.
^ Imalt.: “Siuaasagut”.
^ Imalt.: “piffissarititaasut”.
^ Nutsiinn.: “karsiliorpoq”. Matumani angallat karsitut teqeqqulik toqqissorlu pineqarunarpoq.
^ Imalt.: “titartarneqarlunilu”.
^ Imalt.: “taakkunanngalu Guutimik taaneqartarnini”.
^ Imalt.: “Kinguaannik taaneqartussaq Iisaamit kingoqqisuussaaq”.
^ Imalt.: “ilisaanissani pillugu”.
^ Imalt.: “peqqusivoq”.
^ Imalt.: “Kristusitut”.
^ Nutsiinn.: “attorneqaqqunagit”.
^ Imalt.: “poorski”. Nassuiaatit takukkit.
