Johannesi 11:1-57
11 Maanna angut Laazarusimik atilik napparsimavoq. Taanna Betaaniamiuuvoq Mariiap qatanngutaatalu Martap nunaqarfianneersuusoq.
2 Tassa taanna Mariia uuliamik tipigissumik Naalakkamut kuisisoq nutsaminillu isigaanik allarterisoq. Taassuma qatanngutaa Laazarusi napparsimavoq.
3 Taamaattumik qatanngutaasa arnat Jiisusi ima oqariartortitsivigaat: “Naalagaq, ikinngutigilluakkat* napparsimavoq.”
4 Jiisusilli tamanna tusaramiuk oqarpoq: “Guutip ernera ataqqinarsisinneqaqqullugu Laazarusip napparsimanera toqumik kinguneqarnani Guutip ataqqineqarneranik kinguneqassaaq.”
5 Jiisusip Marta, Mariia Laazarusilu asavai.
6 Laazarusili napparsimasoq tusareeraluarlugu ulluni marlunni sumiiffimminiiginnarpoq.
7 Taava ilinniartitani oqarfigai: “Judiiamukaqqitta.”
8 Ilinniartitaasa oqarfigaat: “Ilinniartitsisoq,* Judiiamiut ungasissorsuunngitsukkut ujaqqanik milloorniaraluaraatsit uteqqinniarpit?”
9 Jiisusi akivoq: “Ullormut akunnerni aqqaneq-marlunni qaamasarpoq, ilaa? Ullukkut pisuttup inunnut qaammaqqut takusinnaagamiuk naakkiunneq ajorpoq.
10 Unnuakkulli pisuttoq qaamaneqannginnami naakkiuttarpoq.”
11 Taama oqareerluni nangippoq: “Ikinnguterput Laazarusi sinilersimavoq, itersariartussavarali.”
12 Taava ilinniartitaasa oqarfigaat: “Naalagaq, sinikkuni peqqissiumaarpoq.”
13 Jiisusilli toqunera eqqartorpaa. Isumaqarpulli qasuersaarluni sininneq pigaa.
14 Taava Jiisusip oqarfigilluaannarpai: “Laazarusi toquvoq,
15 uangalu taqqavaniinnginnera ilissi pillusi nuannaarutigaara, maannami uppernikkut suli nakussatsinnerussagassi. Ornitsigu.”
16 Taava Tuumap, Marlulissamik taaneqartartup, ilinniartitaqatini oqarfigai: “Toqoqatiginiassagatsigu aallaqatigisigu.”
17 Jiisusi tikimmat Laazarusi ulluni sisamani ilivermeereersimavoq.
18 Betaania Jerusalemmimit 3 kilometeriinnaat* missiliorlugit ungasissusilimmiippoq.
19 Juuterpassuillu Marta Mariialu qatanngutiminnik annaasaqarneranni tuppallersarniarlugit najoriartorsimavaat.
20 Martap Jiisusi aggersoq tusaramiuk parsiarpaa. Mariiali angerlarsimaannarpoq.
21 Taava Marta Jiisusimut oqarpoq: “Naalagaq, maaniissimagaluaruit qatanngutiga toqusimassanngikkaluarpoq.
22 Taamaattorli suli upperaara Guutip sumilluunniit qinnuigigunni tuniumaaraatit.”
23 Jiisusip oqarfigaa: “Qatanngutit toqusunit makititaassaaq.”
24 Martap oqarfigaa: “Nalunngilara ullormi kingullermi toqusunit makititaajumaartoq.”
25 Jiisusip oqarfigaa: “Uanga toqusunik makititsisuullungalu inuussutaavunga. Uannut uppertoq toqugaluaruniluunniit inuuleqqissaaq.
26 Kinaluunniillu inuusoq uannullu uppertoq toqunngisaannassaaq. Tamanna upperaajuk?”
27 Akivaa: “Aap, Naalagaq, upperaara tassaasutit Kristusi, Guutip ernera, nunarsuarmut tikiuttussaq.”
28 Taama oqareerluni qatanngumminut Mariiamukarpoq allallu tusaatinnagit oqarfigalugu: “Ilinniartitsisoq maaniippoq, takorusuppaatillu.”
29 Mariiap tamanna tusaramiuk nikuipallariarluni Jiisusi ornippaa.
30 Jiisusi suli Martamik naapitsiffimminiikkami nunaqarfimmut isersimanngilaq.
31 Juutit illumi tuppallersaallutik isersimasut Mariia nikuipallariarluni anisoq takugamikku ilivermut qiajartorsoralugu malippaat.
32 Mariiap Jiisusi takugamiuk ornippaa isigaasalu saavanni aqullaaginnarluni oqarfigalugu: “Naalagaq, maaniissimagaluaruit qatanngutiga toqusimassanngikkaluarpoq.”
33 Jiisusip Mariia qiasoq juutillu ilagisai qiasut takugamigit qamannga pisumik* anersaaruluppoq aliatsallunilu.
34 Aperivoq: “Sumut ilivisiuk?” Akivaat: “Naalagaq, qaagit, takusartigu.”
35 Jiisusi qullilivoq.
36 Taava juutit oqarput: “Asasimangaaramiuk!”
37 Kisianni ilaat oqarput: “Angutip uuma tappiitsoq isigisaqarsinnaanngortissinnaaguniuk Laazarusip toqunissaa pinngitsoortissimasinnaanngikkaluarnerpaa?”
38 Jiisusi qamannga pisumik anersaaruloqqippoq ilivermukarlunilu. Iliveq qaarusuliaavoq ujaqqamik matusaq.
39 Jiisusi oqarpoq: “Ujarak illikarsiuk.” Martap, toqusup qatanngutaata, oqarfigaa: “Naalagaq, ullut sisamat toqungareerami tippareersimassaaq.”
40 Jiisusip oqarfigaa: “Oqarfigeriinnginnerpakkit upperuit Guutip pissaaneqangaarnera takussagit?”
41 Taava ujarak illikarpaat. Jiisusi qilammut qiviarpoq oqarlunilu: “Ataata, tusaramma qutsavigaakkit.
42 Tusartuaannarimmami nalunngilara. Inuppassuilli maani eqqanniittut aallartitarigimma upperiniassammassuk taama oqarpunga.”
43 Taama oqareerluni nipituumik suaarpoq: “Laazarusi, anigit!”
44 Angut toqungasimasoq isikkamigut assammigullu nimersimalluni kiinnamigullu annoraaminermik ulinneqarsimalluni anivoq. Jiisusip oqarfigai: “Pisunniassammat nermussaajarsiuk.”
45 Taamaattumik juutit Mariiamut ornigussimasut Jiisusillu iliuuserisaanik takunnittut ilarpassuisa upperfigilerpaat,
46 ilaalli iliuuserisaanik oqaluttuariartorlutik farisiiarinukarput.
47 Taava palasit nuimasut farisiiarillu juutit eqqartuussiviisa qullersaannut ilaasortat katersuutsippaat oqarlutillu: “Angut taanna amerlasuunik tupinnartuliortarmat qanoq iliussaagut?
48 Unitsinniarlugu iliuuseqanngikkutta tamarmik upperfigilissavaat, aamma Romamiut guutisiorfipput inuiaqatigullu tiguariartussavaat.”
49 Taakkuali ilaata Kajfarsip, ukioq taanna palasiunerusup, oqarfigai: “Paasisaqanngilluinnarsimavusi,
50 aamma eqqarsaatigisimanngilarsi inuup ataatsip inuit tamaasa pillugit toqunera inuiaqatitta tamarmik suujunnaarsitaanerannit nammineq iluaqutiginerussallugu.”
51 Taamali oqarnissani nammineq isumassarsiarinngilaa, ukiorli taanna palasiunerugami Jiisusi inuiaqatigiit pillugit toqusariaqartoq siulittuutigaa.
52 Inuiaqatigiilli kisiisa pinnagit Guutilli qitornai siammarsimasut katersorniarlugit toqusariaqarpoq.
53 Ullorlu taanna aallarnerfigalugu toqunnissaa pilersaarusiulerpaat.
54 Taamaattumik Jiisusi juutit akornganni tamanut saqqumisumik angalasarunnaarluni illoqarfimmut Efraimimut, nunap immikkoortuanut inoqajuitsup eqqaaniittumut, aallarpoq ilinniartitanilu ilagalugit tassaniiginnarluni.
55 Maanna juutit qaangiinersiorfiat nalliutingajalermat inuppassuit nunamit tamarmeersut qaangiiffik sioqqullugu ileqqulersuutit malillugit minguersarniarlutik Jerusalemmimut majuarput.
56 Jiisusi ujarpaat, guutisiorfimmiittullu imminnut oqarfigipput: “Qanoq isumaqarpisi? Ilimagaasiuk nalliussiartussasoq?”
57 Palasilli nuimasut farisiiarillu peqqusisimapput Jiisusi tigusariniassagamikku kinaluunniit sumiinneranik ilisimannittoq nalunaaruteqassasoq.
Ilanngussat
^ Imalt.: “asasat”.
^ Nutsiinn.: “Rabbi”.
^ Nutsiinn.: “staadiat 15-iinnaat”. Staadia ataaseq 185 meteriuvoq.
^ Nutsiinn.: “anersaamigut”.
