Johannesimit 2. 1:1-13
1 Angummit utoqqarmit* arnamut* toqqakkamut qitornaanullu asasannut. Uanga kisima asanngilassi, ilumoortumilli ilisimannilersimasut tamarmik asavaasi
2 ilumoortoq uatsinniittoq uatsinniittuartussarlu pissutigalugu.
3 Guutip Ataatap Jiisusillu Kristusip, Ataatap Ernerata, ajunngisaangaarnermik, nallittuinermik eqqissinermillu tunissavaatigut, aamma ilumoortoq pillugu ilinniartillutalu asassavaatigut.
4 Qitornavit ilaat Ataatamit inanneqarnitsitut ilumoortoq malillugu inuusut paasillugu nuannaangaarpunga.
5 Maanna, arnaq, ima kajumissaarpakkit: Asaqatigiissaagut. (Inassut nutaaq allaatiginagu aallaqqaammulli inassutigineqartoq allaatigaara).
6 Ataatap inassutaanik maleruaajuarneq asanninnermut ilaavoq. Aallaqqaammulli tusakkassitut inassut imaappoq: Asannittuliortuaritsi.
7 Tammartitsiniartut, Jiisusip Kristusip inuttut timeqarluni tikiussimaneranik upperinninngitsut, amerlaqaat. Taanna tammartitsisuullunilu Kristusimik akerlilersuisuuvoq.
8 Tamaviaarluta angusimasagut annaajumanagit mianersoritsi. Taamaaliorussi tamakkiisumik akissarsissaasi.
9 Kinaluunniit Kristusip ilinniartitsissutaanik aalajangiusimanninngitsoq eqqunngitsumillu ilinniartitsisoq Guutimik ataasioqateqanngilaq. Ilinniartitsissutaanilli aalajangiusimannittoq Ataatamik Ernermillu ataasioqateqarpoq.
10 Taama ilinniartitsinani ilissinnukartoq angerlarsimaffissinnut tikilluaqqunagulu ilassissanngilarsi.
11 Taamami ittumik ilassinnittoq ajortuliaanik tapersersuisuuvoq.
12 Amerlasuut pillugit allaffigerusukkaluarlusi pappiaqqamik pilikkimillu allaffigerusunngilassi. Neriuutigaarali nuannaangaaleqqullusi ornissinnaassallusi kiinarsillusilu oqaloqatigisinnaassallusi.
13 Angajuit, toqqakkap, qitornai inuulluaqqusipput.
