Korintimiunut 1. 5:1-13
5 Paasitinneqarpunga allaat Guutimik ilisimanninngitsunit ileqqorineqanngitsumik akorngassinni atoqatigiinnikkut eqqunngitsuliortoqartoq,* tassa angutip ataatami nulia inooqatigigaa.*
2 Tamanna tulluusimaarutigaasiuk? Aliasuutigisariaqaraluarparsi angutillu taamaaliortup ilissinnit peersinneqarnissaa isumagalugu.
3 Timikkut najunngikkaluarlusi eqqarsaatikkut* najorpassi, ilissinnilu najuuttutut illunga angut taamaaliortoq eqqartuutereerpara.
4 Naalakkatta Jiisusip aqqani katersuukkussi ilisimallugulu eqqarsaatikkut* Naalakkattalu Jiisusip pissaaneragut najorissi
5 inuk taamaattoq Saatanimut pisissavarsi ilagiinnut ajortumik sunniuteqartarunnaaqqullugu ilagiillu anersaavat* Naalakkap ulluani annaanneqaqqullugu.
6 Tulluusimaarutissaqanngilasi. Nalugassiuk seernarsaatimininnguup naqittagaq tamaat pullatsittaraa?
7 Seernarsaatitoqaq piiarsiuk naqittagaaqqullusi nutaaq, tassami seernarsaateqannginnassi. Savaaraaterpummi, Kristusi, qaangiiffimmi* pilliutigineqareerpoq.
8 Taamaattumik seernarsaatitoqaq, ajortimut ajussutsimullu assersuutaasoq, atornagu iffiarli-qaqortoq* seernarsaateqanngitsoq, minguitsumut ilumoornermullu assersuutaasoq, atorlugu nalliussiniarta.
9 Allakkanni allaffigaassi atoqatigiinnikkut eqqunngitsuliortartut* ilagisarunnaaqqullugit.
10 Imaanngilaq atoqatigiinnikkut eqqunngitsuliortartut,* piumatuut, ujajaasut guutipilussiortulluunniit ilaginngilluinnassagisi. Taamaakkaluarpammi kikkut tamaasa qimattariaqassagaluarassigit.
11 Maannakkulli allaffigaassi kinaluunniit qatanngummik taaneqartoq atoqatigiinnikkut eqqunngitsuliortoq,* piumatooq, guutipilussiortoq, asissuisoq,* imerajuttoq ujajaasorluunniit ilagisarunnaaqqullugu, aap, nereqatigissanngilarsiluunniit.
12 Ilagiit avataanniittut eqqartuunnissaat suliassarinngilara. Ilissi ilagiinniittut eqqartuuttannginnerpisigit?
13 Guutillu avataanniittut eqqartuuttannginnerpai? “Ajortoq ilagiinnit peersissiuk.”
Ilanngussat
^ Grækerisut: porneia. Nassuiaatit takukkit.
^ Nutsiinn.: “pigigaa”.
^ Nutsiinn.: “anersaakkut”.
^ Nutsiinn.: “anersaakkut”.
^ Imalt.: “isiginnittaasiat”.
^ Imalt.: “poorskimi”. Nassuiaatit takukkit.
^ Imalt.: “qaqortuliarli”.
^ Nassuiaatit takukkit.
^ Nassuiaatit takukkit.
^ Nassuiaatit takukkit.
^ Imalt.: “oqaatsitigut nakuusertartoq”.
