Lukkarsi 3:1-38
3 Kaasarip Tibeeriusip ukiut naalakkersuiffiisa 15-issaanni – Pontiusi Pilaatusi Judiiami kaasarimut sinniisuutillugu, Herodasi* Galiliiami naalakkersuisuutillugu, qatanngutaa Fiilippi Ituriiami Trakoniitisimilu naalakkersuisuutillugu, Lysaaniasi Abiliinimi naalakkersuisuutillugu,
2 palasip nuimasup Annassip palasiunerullu Kajfarsip nalaanni – Zakkariap ernera Johannesi inoqajuitsumi Guutimit tusarlerneqarpoq.
3 Taava ajortuliat isumakkeerneqassappata peqqissiminermut takussutissaasumik imermut morsutsitaasariaqarneq pillugu oqaluussiumalluni kuussuup Jordanip eqqaanukarpoq.
4 Tamanna pruffiitimit Iisaajamit allakkani allaatigineqarpoq: “Inoqajuitsumi suaartartoqarpoq: ‘Jehovap aqqutissaa piareersarsiuk! Aqqutissai narlorsarsigit.
5 Qooqqut tamarmik ulikkaarneqassapput, aamma qaqqat qattorngillu tamarmik toqqissunngussapput. Aqquserngit sangujoraartut tamarmik narlorsarneqassapput, aqquserngillu maniitsut manississapput.
6 Inuillu tamarmik Guutip annaassinera* takussavaat.’”
7 Inuppassuit imermut morsutsinneqarusullutik aggiasut Johannesip oqarfigisarpai: “Pulateriaarsukasiit toqunartullit,* kia oqarfigigamisi Guutip kamannissaanit aniguisinnaasusi?
8 Taamaattumik peqqissiminermut naapertuuttumik inerititaqaritsi. Eqqarsassanngilasi: ‘Aaperaat ataatagaarput.’ Oqarfigaassimi: Guutip ujaqqat uku tassaalersissinnaavai Aaperaap qitornai.
9 Ulimaat orpimmik kipisinissamut ipissareersimavoq. Orpik sunaluunniit ajunngitsunik inerititaqanngitsoq kipineqassaaq ikuallanneqarlunilu.”
10 Inuppassuillu aperaat: “Taavami qanoq iliussaagut?”
11 Akivai: “Atisassamaatillip peqanngitsoq tunissavaa, aamma nerisassaatilik taamaaliorli.”
12 Allaat akileraartitsisartut imermut morsutsinneqarusullutik takkupput aperalugulu: “Ilinniartitsisoq, qanoq iliussaagut?”
13 Akivai: “Akileraarutissatut aalajangersarneqarsimasut sipporlugit akileeqqusisassanngilasi.”
14 Aamma sakkutuut ima aperaat: “Qanoq iliussaagut?” Akivaalu: “Pinngitsaaliillusi akiliisitsisarnasilu sallullusi unnerluussisassanngilasi, akissarsiasili* naammagisigit.”
15 Inuit Kristusip tikiunnissaa ilimagigamikku tamarmik Johannesi Kristusiunersoq eqqarsaatigaat.
16 Taamaattumik Johannesip tamaasa oqarfigai: “Uanga imermut morsutsippassi, uannilli oqartussaassuseqarnerusoq aggerpoq. Aloqutaasalu singiisa qilerussaarnissaannut ajukkuppunga. Taassuma anersaamut illernartumut innermullu morsutsikkumaarpaasi.*
17 Karrertaajaaffiutini* saleqqissaarniarlugu qajuusiassallu peqqumaasivimmut katersorniarlugit nivaataq teqqalatitsissut tigumiarpaa. Qalipakuili innermik qamissinnaanngitsumik ikuallakkumaarpai.”
18 Aamma assigiinngitsorpassuit pillugit kajumissaarivoq nutaarsiassallu nuannersut inunnut oqaluussissutigiuarlugit.
19 Galiliiamili naalakkersuisup Herodasip qatanngummi nulia Heroodiasi pillugu iliuuserisimasanilu ajortut tamaasa pillugit Johannesip avoqqaarimmani
20 ajortuliani ima ilaqqippai: Johannesi parnaarussaatippaa.
21 Inuit tamarmik imermut morsutsitaammata aamma Jiisusi morsutsitaavoq. Qinutillugu qilak ammarpoq,
22 anersaarlu illernartoq tuisut isikkoqarluni qulaanut aarsaarpoq, nipilu qilammit tutsiuppoq: “Illit tassaavutit Ernera, asasara. Akuerisaraakkit.”
23 Jiisusi ilinniartitsisalerami 30-t missaannik ukioqarpoq, isumaqartoqarpoq taassuma ataatagigaaJuuserfi.Juuserfip Eli ataatagaa,* Elillu siuaavisa tulleriiaarnerat imaappoq:
24 Mattati,Levi,Miilki,Jannaaji,Juuserfi,
25 Mattatiiarsi,Aamosi,Naahummi,Esli,Naggaji,
26 Maati,Mattatiiarsi,Siimianni,Juusekki,Jorda,
27 Johananni,Riisa,Zerubaabeli,Sealtiali,Neeri,
28 Miilki,Addi,Kosarmi,Elmadarmi,Eri,
29 Jiisusi,Eliezari,Joorimmi,Mattati,Levi,
30 Simmiuut,Juudarsi,Juuserfi,Juunami,Eliakimmi,
31 Miilia,Menna,Mattatta,Naatat,Daavi,
32 Iisaaji,Obedi,Buuarsi,Salmonni,Naasonni,
33 Amminaadabi,Aarni,Hezronni,Peerezi,Juuda,
34 Jaaku,Iisaaq,Aaperaat,Teera,Naakori,
35 Seruuki,Riiu,Peeleki,Ebari,Seela,
36 Keenani,Arpaksadi,Simmi,Nooa,Lemekki,
37 Metuusalemmi,Enoki,Jaredi,Mahalaliili,Keenani,
38 Enosi,Setsi,Adami,Guuti.
Ilanngussat
^ Tassa Herodasi Antipassi. Nassuiaatit takukkit.
^ Imalt.: “annaassisutut atugassaa”.
^ Imalt.: “Pulateriaarsuit toqunartullit piaraat”.
^ Imalt.: “inuussutissasili”.
^ Tassa anersaamik illernartumik taninneqassapput innermillu suujunnaarsinneqarlutik.
^ Nassuiaatit takukkit.
^ Imalt.: “sakeraa”. Biibilimi siuaasat allattorneqarneranni angut sakiusoq ataatatut ilaannikkut taaneqartarpoq.
