Saqqummersitat 7:1-17
7 Tamatuma kingorna inngilit sisamat nunarsuup teqeqquini sisamani nikorfasut aamma nunarsuaq, imaq orpiilluunniit anorlerfigineqaqqunagit nunarsuup anoraanik sisamanik noqitsisut takuakka.
2 Takuaralu inngili alla seqerngup nuiffianit* Guutip uumassuseqartup naqissutaa tigumiarlugu qangattartoq. Taassuma inngilit sisamat nunarsuarmik immamillu ajoqusiinissamut piginnaatitaasut suaarpai:
3 “Guutitta inussiaataasa qaavinik naqissusiinissatta tungaanut nunarsuaq, imaq orpiillu ajoqusissanngilasi.”
4 Tusarparalu 144.000-t naqissuserneqartut. Israalimi naggueqatigiinnit tamaneersut naqissuserneqarput:
5 Naggueqatigiinnit Juudakkunnit 12.000-t,naggueqatigiinnit Ruubenikkunnit 12.000-t,naggueqatigiinnit Gaadikkunnit 12.000-t,
6 naggueqatigiinnit Aasarikkunnit 12.000-t,naggueqatigiinnit Naftalikkunnit 12.000-t,naggueqatigiinnit Mannarsikkunnit 12.000-t,
7 naggueqatigiinnit Simmiuukkunnit 12.000-t,naggueqatigiinnit Levikkunnit 12.000-t,naggueqatigiinnit Issakaarikkunnit 12.000-t,
8 naggueqatigiinnit Zeebulonnikkunnit 12.000-t,naggueqatigiinnit Juuserfikkunnit 12.000-t,naggueqatigiinnit Biiniakkunnit 12.000-t.
9 Tamatuma kingorna inupparpassuit inuiaqatigiinnit, naggueqatigiinnit inuiannillu tamaneersut qanorluunniillu oqaasillit kimilluunniit kisinneqarsinnaanngitsut takuakka. Issiavissaarsuup Savaaqqallu saavanni qaqortunik takisuunik atisaqarlutik palmit avalequtaannik tigumiarput.
10 Nipituumillu suaartartuarput: “Aniguisitaaneq Guutitsinnit, issiavissaarsuarmi issiasumit, Savaaqqamillu pivoq.”
11 Inngilit tamarmik issiavissaarsuaq, utoqqaanertat pinngortitallu uumassuseqartut sisamat kaajallallugit nikorfapput, tamarmillu issiavissaarsuup saavani pallorlutik Guuti guutisiorfigaat
12 ima oqarlutik: “Amen! Guuterput ilisimassuseqartoq, pissaaneqartoq nukittoorlu qaqugorsuarmut kipisuitsumillu unnersiutigineqarli, pingaartinneqarli, qutsavigineqarli aamma ataqqineqarli. Amen.”
13 Taava utoqqaanertat ilaata aperaanga: “Qaqortunik takisuunik atisallit kikkuuppat suminngaanneerpallu?”
14 Ingerlaannaq akivara: “Naalagara, illit nalunngilat.” Oqarfigaanga: “Taakku tassaapput annikilliornartorsuarmit aniguisut. Atisatik takisuut errorsimavaat Savaaqqallu aavanik qaqortitillugit.
15 Tamanna pissutigalugu Guutip issiavissaarsuata saavaniipput, guutisiorfimmilu Guutip pigisaani ullukkut unnuakkullu kiffartorput. Guutillu issiavissaarsuarmi issiasup tuperminik qulangerumaarpai.
16 Nerisassanik imermillu amigaateqaqqissanngillat, aamma seqinermit kiassuarmilluunniit naalliutsinneqassanngillat
17 Savaaqqap issiavissaarsuup eqqaaniittup* paarissallugillu puilasunut inuussutaasunut siulersussammagit. Guutillu qulliit tamaasa isaannit allarterumaarpai.”
