Tittusi 2:1-15
2 Illilli, ilinniartitsissummut ineriartornartumut* naapertuuttumik ilinniartitsiuassaatit.
2 Angutit utoqqaat ileqquminnik aqutsisinnaassapput, pimoorussisuussapput, isumakkut peqqissuussapput, upperluartuussapput, asanningaartuussapput erloqinartunilu pinertusaarsinnaassallutik.
3 Taamatuttaaq arnat utoqqaat Guutimut ataqqinaataasumik pissuseqassapput, nikassaallutik salluliuutiginnittassanngillat, viinnimik atornerluisuussanngillat* ajunngitsullu pillugit ilinniartitsisassallutik.
4 Taamaalillutik arnat inuusunnerusut siunnersorsinnaassavaat* uiminnik asanneqqullugit, meeqqaminnik asanneqqullugit,
5 isumakkut peqqissooqqullugit, minguitsooqqullugit, angerlarsimaffimminnik isumaginnittaqqullugit, ajunngitsooqqullugit kajumillutillu uiminnut naalattaqqullugit. Taamaalilluni Guutip oqaasia nikassarneqassanngilaq.
6 Taamatuttaaq angutit inuusunnerusut isumakkut peqqissooqqullugit kajumissaartuassallugillu
7 sutigut tamatigut ajunngitsuliornikkut maligassiuissaatit. Pimoorussillutit minguitsoq pillugu* ilinniartitsisassaatit.
8 Akerlilersuisut kanngusuleqqullugit uagullu pilluta ajortumik oqaaseqarnissamut pissutissaqaqqunagit ineriartornartumik* isornartorsiorneqarsinnaanngitsumillu oqaluttassaatit.
9 Inussiat piginnittutik akerlilernagit sutigut tamatigut iluarisaattut iliornikkut kajumillutik naalassallugillu
10 tilliffigissanngilaat, tatiginarluinnartuunertilli takutissavaat. Taamaaliorunik Aniguisitsisitta, Guutip, ilinniartitsissutaanut sutigut tamatigut ataqqinaataassapput.*
11 Guutimmi ajunngisaangaarnera inunnik tamalaanik aniguisitsinissaatigut erserpoq.
12 Ajunngisaangaarnerata ilinniartippaatigut guutiitsuussutsimik pilerissusipilunnillu itigartitsinissamik nalitsinnilu isumakkut peqqilluta, naapertuilluarluta Guutimullu tunniusimalluta inuunissamik.
13 Aamma neriuutitta nuannersup eqquunnissaa Guutittalu angingaartup Aniguisitsisittalu Jiisusip Kristusip alutornassutsiminnik ersersitsinissaat utaqqivarput.
14 Kristusip uagut pilluta inuunini tunniuppaa inatsisinik unioqqutitsinernit tamanit iperagaaqqulluta* inuiaqatigiillu immikkut pigisani ilumoorlutik ajunngitsuliortartut minguiarumallugit.
15 Oqartussaassuseqarluarlutit tamakku pillugit ilinniartitsiuarlutillu kajumissaariuarlutillu* oqaaqqissaariuarit. Ilinnik nikassaasoqanngikkili.
Ilanngussat
^ Imalt.: “peqqissinartumut; iluaqutaasumut”.
^ Nutsiinn.: “viinnisungaarnermut inussiaataassanngillat”.
^ Imalt.: “ilinniartissinnaassavaat”.
^ Imalt. immaqa: “minguillutillu”.
^ Imalt.: “peqqissinartumik; iluaqutaasumik”.
^ Imalt.: “kusassaataassapput”.
^ Nutsiinn.: “akiliulluta utertikkumalluta”.
^ Imalt.: “qiimmassaajuarlutillu”.
