Kikkut? Kikkulluunniit – ataatsimiigiaqqaartut sivisuumillu ikinngutigisimasavut – ataatsimiinnitsinni najuuttut. (Rom 15:7; Hebr 13:2) Imaassinnaavoq najuuttoq uppeqatigigipput nunamit allamit tikeraartoq imaluunniit unittoorsimasuusoq ukiorpassuarni aatsaavissuaq ataatsimiigiartoq. Pisuni taamaattuni illit qanoq misigissagaluarnersutit takorlooruk. Qamannga pisumik ilassineqarnerit nuannaarutigissagaluarpat, ilaa? (Matt 7:12) Ataatsimiinnerup siorna kingornalu naalagaaffilersaarfimmi ilassiuisarnissamut pissutissaqarluarpoq. Tamanna nuannisaqatigiinnermut iluaqutaasoq Jehovamut ataqqinaataavoq. (Matt 5:16) Ilimanarpoq najuuttut tamarluinnaasa oqaloqatigisinnaanngikkivut. Sapinngisatsinnilli iliuuseqarutta kikkut tamarmik tikilluaqqusaasutut misigissapput. *

Inoroorsaarneq ilumoortoq pisuni immikkut ittuniinnaanngitsoq, soorlu eqqaaniaanermiinnaanngitsoq, tamatigulli ersersinneqartarpoq. Ataatsimiigiaqqaartut kristumiutut asaqatigiinnerput iliuutsikkut ersersinneqartoq misigalugulu takugunikku immaqa Guuti unnersiutigerusulissallugulu minguitsumik pallorfiginneqatigilerusulissavaatigut. – Joh 13:35.