Aap! Biibili Guutimin­ngaanneersuuvoq, taassumalu ‘nikallungasunik tuppallersaasartup tuppallersarpaatigut’. (Korintimiunut 2. 7:6) Biibili nakorsaariaatsimut najoqqutas­siaanngik­kaluartoq imminut toqunnissamik eqqarsaateqartut iluaqutigisarsimavaat. Aamma illit siunnersuutit atoriaannaasut iluaqutigisin­naavatit.

•  Biibilimi atoriaan­naasunik sunik siunnersuuteqarpa?

•  Inunnik inoorusuk­kunnaartunik Biibilimi oqaluttuaqarpa?

•  Imminut toqunnissamik eqqarsaateqaruit Biibilimi versit suut iluaqutigisin­naavigit?

•  Ikinngutit oqarpat inoorusuk­kunnaarluni

•  Siornatigummi imminut toqunniarsimaguma?

• ● Misigis­sutsitit oqaasin­ngortikkit.

   Biibilimi qanoq allassimasoqartoq: “Ikinngutaasup asannissutsi tamatigut takutittarpaa, qatanngutaasorlu erniusimavoq annikil­liornermi ikiortis­saalluni.” – Ussatit 17:17.

   Tassa imaappoq: Nanertisimanitsinni inunnit allanit ikiorneqar­nissarput pisariaqar­tipparput.

   Misigis­sutsitit oqaluttuarin­ngikkukkit imminut artorsiin­nassaatit. Oqaluttuaruilli iluaallal­lutillu allamik isiginnit­taaseqalissaatit.

   Ima misiliigit: Ullumi oqaloqateqarit, immaqa ilaquttannik imaluunniit ikinngutinnik tatigisannik. a Aamma misigis­sutsitit allattorlugit oqaasin­ngortis­sinnaavatit.

• ● Nakorsiarit.

   Biibilimi qanoq allassimasoqartoq: “Peqqissut pinnatik napparsimasulli nakorsamik pisariaqar­titsipput.” – Matiusi 9:12.

   Tassa imaappoq: Napparsimagutta nakorsiassaagut.

   Imminut toqunnissamik eqqarsaateqarneq eqqarsar­taatsikkut napparsimanermut imaluunniit misigis­sutsikkut nanertisimanermut ersiutaavoq. Eqqarsar­taatsikkut napparsimaneq kanngunar­tuunngilaq, soorlu timikkut napparsimaneq kanngunar­tuunngitsoq. Eqqarsar­taatsikkut napparsimaneq nanertisimanerlu katsorsar­neqarsin­naapput.

   Ima misiliigit: Piaarnerpaamik nakorsiarit.

• ● Eqqaamajuk Guutip soqutigimmatit.

   Biibilimi qanoq allassimasoqartoq: “Timmiaaqqat tallimat aggorsimasuminin­nguanik marlunnik akeqartillugit tuniniar­neqartan­nginnerpat? Taamaattoq ataasiin­narluunniit Guutimit arajutsineqarneq ajorpoq. … Taamaattumik erseqinasi, timmiaararpas­suarnit naleqar­neruvusi.” – Lukkarsi 12:6, 7.

   Tassa imaappoq: Guutip isaani naleqangaarputit.

   Immaqa kisimiittutut misigivutit, Guutilli qanoq atugaqartutit takusinnaavaa. Asangaarpaatit – aamma inoorusuk­kunnaaraluaruil­luunniit. Tussiaat 51:19-imi allassimavoq: ‘Uummat artorsaateqangaartoq itigartit­tarinngilat, Guuti.’ Guutip asagamisit kissaatigaa inuuinnas­sasutit.

   Ima misiliigit: Guutip asannin­neranik uppernarsaatit Biibilimi misissukkit. Assersuutigalugu takuuk Napasuliaq Alapernaarsuiffik nr. 3 2018-imoortoq ima qulequtalik: “Guutip soqutigaatit?”

• ● Guutimut qinugit.

   Biibilimi qanoq allassimasoqartoq: “[Guutip] isumassormasi isumakuluutisi tamaasa taassumunnga miloriussigit.” – Petrusimit 1. 5:7.

   Tassa imaappoq: Guutip kissaatigaa qanoq misigininnik sunalu ernumas­sutiginerit oqaluttuutissagit.

   Guutip eqqissinermik qamannga pisumik tunissavaatit atukkavillu naammagalugit atornis­saannut nukissaqar­tillutit. (Filippimiut 4:6, 7, 13) Tassa qamannga pisumik imminut qinusut tapersersor­niarlugit neriorsorpai. – Tussiaat 55:23.

   Ima misiliigit: Ullumi Guutip atia atorlugu taassumunnga qinugit, qanorlu misigininnik oqaluttuullugu. (Tussiaat 83:19) Ikioqqullutit qinnuigiuk.

• ● Siunissamut neriorsuutit Biibilimeersut eqqarsaatigisakkit.

   Biibilimi qanoq allassimasoqartoq: ‘Neriuut taanna inuunitsinnut kitsatut, isumannaatsutut nikinneq ajortutut, ippoq.’ – Hebræerit 6:19, quppernerup ataani ilanngussaq.

   Tassa imaappoq: Anorersuarmi umiarsuaq aalarujus­suartarpoq, kitsamilli orrajaal­lisinneqarsinnaavoq. Taamatuttaaq misigis­sutsitit allanngorarsin­naapput, neriuulli Biibilimeersoq toqqissial­laatigisinnaavat.

   Neriuut tamanna kissaataan­naanngilaq, Guutilli anniaatinut pissutaasunik piiaanis­saminut neriorsuutaanik tunngaveqarpoq. – Saqqummersitat 21:4.

   Ima misiliigit: Biibilimi neriorsuutit pillugit paasisaqar­nerujumallutit quppersakkami Tusagassat nuannersut Guutimeersut!-mi ilinniagassaq 5 atuaruk.

• ● Nuannarisannik sammisaqarit.

   Biibilimi qanoq allassimasoqartoq: “Uummatikkut nuannaarneq peqqinnartuuvoq.” – Ussatit 17:22.

   Tassa imaappoq: Nuannarisatsinnik sammisaqar­nitsigut eqqarsar­taatsikkut misigis­sutsikkullu peqqinnerulersin­naavugut.

   Ima misiliigit. Nuannarisannik sammisaqartarit, soorlu nipilersuutinik qiimmaal­lannartunik tusarnaarlutit imaluunniit atuakkamik nuannersumik atuarlutit. Aamma iliuuseqalaagin­narnikkul­luunniit allanik ikiuinikkut nuannaar­nerulersin­naavutit. – Apustilit Suliaat 20:35.

• ● Timikkut peqqissuuniartarit.

   Biibilimi qanoq allassimasoqartoq: ‘Timikkut sungiusarneq iluaqutaalaartarpoq.’ – Timuutiusimut 1. 4:8.

   Tassa imaappoq: Timigissarneq, sinilluartarneq peqqinnar­tunillu nerisarneq iluaqutaasarput.

   Ima misiliigit: Minutsini 15-iinnarniluunniit sukkalaartumik pisuttuarit.

• ● Eqqaamajuk misigissutsit inuunermilu pisartut allanngor­tarmata.

   Biibilimi qanoq allassimasoqartoq: “Inuunersi aqagu qanoq issanersoq naluarsi.” – Jaaku 4:14.

   Tassa imaappoq: Immaqa aaqqiis­sutissaqan­ngissorisannik artorsaateqarputit, imaassin­naavorli qanittukkut aaqqissasoq.

   Atukkatit ullumikkut artornaraluartut aqagu allanngorsin­naapput, taamaattumik atukkatit maanna qanoq naammagalugit atorsin­naanerlugit paasiniarsariuk. (Korintimiunut 2. 4:8) Piffissap ingerlanerani atukkatit allanngus­sajunnarsipput, imminulli toqunneq allanngor­tinneqarsin­naanngilaq.

   Ima misiliigit: Inuit nikallungangaaramik allaat toquinnarusuttut pillugit Biibilimi atuarit. Maluginiaruk piffissap ingerlanerani ilimagin­ngikkaluarlugu iluaallas­simasut. Assersuuteqariarta.

 Aap, toquinnarusuttunik Biibilimi oqaluttuaqarpoq. Guuti taakkuninnga avoqqaarin­ninnani ikiorumallugit iliuuseqarpoq. Aamma illit ikiorusuppaatit.

Elia

•  ● Kinaava? Elia pruffiitiuvoq sapiitsoq, ilaannikkulli nikallungasin­naasarpoq. Jaaku 5:17-imi allassimavoq ‘Elia uatsitulli misigis­suseqartoq’.

•  ● Sooq inoorusuk­kunnaarpa? Ilaanni Elia ersilluni kisimiittutut naleqan­ngitsutullu misigaaq. Taamaattumik Jehova qinnuigaa ‘toqutiin­naqqulluni’. – Kunnginik 1. 19:4.

•  ● Suna iluaqutigaa? Eliap qanoq misiginerluni Guuti oqaluttuuppaa. Guutip qanoq nakussatsillugulu qiimmassarpaa? Guutip isumassorpaa pissaanerminillu takutitsivigalugu. Aamma qularun­naarsippaa suli atorfis­saqartin­neqartoq ikiortis­saqartillugulu.

•  ▸ Eliamut tunngasut allassimaffiit atuakkit: Kunnginik 1. 19:2-18.

Juubi

•  ● Kinaava? Juubi pisoorsuullunilu ilaqutarpas­suaqarpoq. Guutimut aalajaatsuuvoq.

•  ● Sooq inoorusuk­kunnaarpa? Juubip inuunera allanngorluinnarpoq ajornar­torsiutillu imaagin­navillutik. Pigisani tamaasa annaavai, meerai tamarmik ajunaarlutik toqupput, perulun­nartumik nappaateqalerpoq, allaallu ajornar­torsiutinut nammineq pisuunerarlugu unnerluutigineqarpoq. Juubi oqarpoq: “Taamaannera qatsuteqaara, inuuinnarusun­ngilanga!” – Jobi 7:16.

•  ● Suna iluaqutigaa? Juubi Guutimut qinuvoq allanillu oqaloqateqarluni. (Jobi 10:1-3) Ikinngummit misigin­neqataasumit Elihumit qiimmas­sarneqarpoq, pissutsinut atukkaminut eqqortumik isiginnit­taaseqar­nissamut ikiorneqarluni. Tamanillu pingaar­nerusumik, Juubip Guutimit ikiorneqarnini siunnersor­neqarninilu akueraa.

•  ▸ Juubimut tunngasut allassimaffiit atuakkit: Jobi 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Moorsisi

•  ● Kinaava? Moorsisi itsaq Israalikkunnut siulersuisuuvoq pruffiitiullunilu aalajaatsoq.

•  ● Sooq inoorusuk­kunnaarpa? Moorsisi akisussaaf­ferujus­suaqarpoq, naammagit­taalliorfigineqar­tuarpoq qasungaarlunilu. Guuti ima kimigiiserfigaa: “Toquinnannga!” – Mosesimik 4. 11:11, 15.

•  ● Suna iluaqutigaa? Moorsisip qanoq misiginerminik Guuti oqaluttuuppaa. Guutip Moorsisi suliaanik oqilisaappaa artorsin­neqanngin­niassammat.

•  ▸ Moorsisimut tunngasut allassimaffiit atuakkit: Mosesimik 4. 11:4-6, 10-17.