Allaaserisami matumani

•  Sooq najortigiillusi oqaloqatigiissavisi?

•  Oqaloqatigiinneq qanoq aallartin­neqarsinnaasoq

•  Inuusut­toqativit isumaat

 Inuit ilaat oqartarput sms-ernermut naleqqiullugu oqaloqatigisaq isigalugu oqalunnissaq sapernar­tittarlugu eqqissiun­naarutigisarlugulu.

 “Oqaloqatigisaq isigalugu oqalunnissaq sapernar­nerujus­suusarpoq, tassami allannermiit allaaneruvoq oqaatsitit naqqissin­naanagillu piiarsin­naannginnakkit.” – Anna.

 “Allaqatigiinnermi soorlu tassa oqaasissat immiuteriikkat, oqaloqatigiinnermi soorlu tassa toqqaan­nartumik immiunneqarluni. Ima eqqarsaan­naavittarpunga: ‘Kukkusumik oqassan­ngilanga!’” – Jean.

 Allatulli ajornaqaaq, allanik oqaloqateqarnissat ilikkar­tariaqarpat. Assersuutigalugu ikinngutis­sarsioruit, suliffis­sarsioruit suliffiil­luunniit annaajuman­ngikkukku imaluunniit peerartaar­nissamut piareersimaleruit oqaloqatigin­nissinnaanerit pingaaruteqarpoq.

 Nikalloqinalli. Allanik oqaloqateqarnissat merserisariaqanngilat. Qanorluunniit ittuututigigaluaruit ilikkarsinnaavat.

 “Soorunami kukkusumik oqartoorsin­naasassaatit kanngutsilaar­tarlutillu. Imminulli quiagiin­nartassaatit.” – Neal.

•   Aperisarit. Inuit suut soqutigineraat eqqarsaatigiuk, tamatumunngalu tunngasumik apeqquteqarlutit. Assersuutigalugu:

   “Illit aasaq manna atuanngiffimmi angalavit?”

   “Nittartagaq soqutiginartoq una takunikuuiuk?”

   “Aamma tusarpiuk…?”

   Aalajangersimasumik eqqartugaqarusukkuit oqaloqatigerusutallu soqutigisaqaqatigisassinnik eqqaasaqarit. Assersuutigalugu atuarfeqatigiippisi imaluunniit suliffeqatigiippisi? Oqaloqatigiinneq aallartin­niarlugu tamanna aallaavigalugu apeqquteqarit.

   “Illit nammineq soqutiginartitat pillugu qanoq soqutiginartumik apeqquteqarsin­naanerlutit eqqarsaatigiuk.” – Maritza.

   Mianersuutassaq: Killisiuerpalaartumik apeqquterpas­suaqarnaveersaarit. Aamma susassarin­ngisannik aperinaveersaarit. Assersuutigalugu ima aperiguit: “Suna illit siooraginerpaaviuk?” imaluunniit “Sooruna tungujortunik atisaqar­tuaannarpit?” imaassinnaavoq akiuman­ngitsoq. Apeqqut kingulleq allaat uparuaarpalaartumik nipeqarsinnaavoq.

   Aamma apeqqutigisat nammineq qanoq isumaqarfiginerlugu oqaluttuukkukku oqaloqatigiuminar­nerussaatit, oqaloqatigisallu killisior­neqartutut misigis­sanngilaq. Taamaalioruit apeqqaris­saarpalunnak oqaloqatigiissaasi.

   Biibilimi najoqqutassiaq: “Inuup eqqarsaatai imertut itisuutut ipput; silassorissoq taakkuninnga qalooraasin­naasarpoq.” – Ussatit 20:5, Testamentitoqaq 1990-imi naqitigaq.

•   Tusarnaarluartarit. Oqaloqatigiinnersi nuannersuussappat illit tusarnaarluarnissat pingaar­neruvoq qanoq oqaaseqatigininniit.

   “Oqaloqateqaraangama oqaloqatigisama ilisarisimanerulernissaa anguniar­tarpara. Taava tullissaani oqaloqatigiilerutta paasisara nutaaq pillugu apeqqutigis­sallugu eqqaamaniar­tarpara.” – Tamara.

   Mianersuutassaq: Oqaasissatit siumut eqqarsaatigival­laaqinagit. Oqaloqatigisavit oqaasii tusarnaarluar­tarukkit pissusis­samisoortumik akisinnaassaatit.

   Biibilimi najoqqutassiaq: “Kinaluunniit tusaaniapal­lattassaaq, oqalunniapal­lattassanngilaq.” – Jaaku 1:19.

•    Soqutigin­nilluarit. Oqaloqatigisat soqutigil­luarukku oqaloqatigiinnersi nuanner­nerussaaq.

   “Oqaloqatigisavit malugisin­naappagu oqaasissai ilumut tusarusukkitit oqaloqatigiinnersi nuannersuussaaq. Taava nipangersimalaar­tarnersi soqutaanavianngilaq.” – Marie.

   Mianersuutassaq: Apeqqutitit mianersuuttakkit. Assersuutigalugu oqaruit: “Kavaajat kusanaq, qassilerpiuk?” taava immaqa isumaqassaaq susassarin­ngisannik apeqquteqartutit.

   Biibilimi najoqqutassiaq: “Nammineq iluaqutissasi kisiisa eqqarsaatiginagit aammali allat iluaqutissaat eqqarsaatigisigit.” – Filippimiut 2:4.

 Oqaloqatigiinnersi qanoq nuannersumik naggasersin­naaviuk? Angut inuusuttoq, Jordan, ima siunnersuuteqarpoq: “Nuannersumik naggasiigit. Assersuutigalugu oqarsin­naavutit ‘Nuanneqaaq oqaloqatigalutit’ imaluunniit ‘Ulloq atorluariuk’. Taamaalioruit ilimanarpoq naapeqqikkussi oqaloqatiginiarnissaa sapernar­tinngin­nerussagit.”