Ilumoorpa, imaluunniit eqqunngila?

1.   Ikinnguterpas­suaqaruit kiserliulin­ngisaan­nassaatit.

2.   Internetikkut attaveqaqatigiit­tarfinnut ilanngukkuit kiserliulin­ngisaan­nassaatit.

3.   Mobilikkut allaqateqartaruit kiserliulin­ngisaan­nassaatit.

4.   Allat ikiortarukkit kiserliulin­ngisaan­nassaatit.

 Sooq?

•   Ikinnguterpas­suaqaraluarlutit suli kiserliorsin­naavutit.

   “Ikinngutikka soqutigaakka, ilaannikkulli misigisarpunga taakkua soqutigin­ngikkaannga. Ikinngutivit akornan­niitsillutit misigiguit nuannarin­ngikkaatsit pisariaqar­tinngik­kaatsil­luunniit kiserlior­narnerpaajuvoq.” – Anne.

•   Internetikkut attaveqaqatigiit­tarfinnut ilannguk­kaluarlutit suli kiserliorsin­naavutit.

   “Soorlu inuit plakatinik katersisartut taamatupajaaq ilaat ikinngutinik katersiniartarput. Iigarli plakatinik ulikkaaraluarpat asaneqartutut misigititsinavianngilaq. Ilumoortunik ikinnguteqan­ngikkuit internetikkut ikinngutitit plakatitulli iluaqutiginavian­ngilatit.” – Elaine.

•   Mobilikkut allaqateqar­taraluarlutit suli kiserliorsin­naavutit.

   “Ilaannikkut kiserlioraangavit ikinngutinnit allagarsisimanerlutit takuniarlugu mobiilit alakkaqat­taartarpat. Attavigineqarsimanak takugukku kiserlior­neruliin­narsinnaavutit!” – Serena.

•   Allat ikiortaraluarlugit suli kiserliorsin­naavutit.

   “Ikinngutinnut tukkortuuniar­tuaannarpunga, misigivungali akillunga taama pineq ajoraannga. Tukkortuunera peqqissimis­sutigin­ngilara, eqqumiigivarali akillunga iluamik ajunngisaarfigisarsiman­ngimmannga.” – Richard.

 Inerniliineq: Kiserliorneq eqqarsaatini pilertarpoq. Arnaq inuusuttoq Jeanettemik atilik oqarpoq: “Qamanngaan­neersuuvoq, allamin­ngaanneersuunngilaq.”

 Ikinnguteqan­ngitsutut kiserlior­tutullu misigiguit qanoq iliorsinnaavit?

Imminut tatiginerulerit.

 “Imminut tatigin­nginneq kiserliornermik kinguneqarsinnaavoq. Naleqan­ngitsutut misigiguit allanut soqutigin­ninnissat ammanissallu sapernassaaq.” – Jeanette.

 Biibilimi allassimavoq: “Inoqatit imminut asanittut asassavat.” (Galaatiamiut 5:14) Ikinnguteqarluas­sagutta imminut naammagisimaar­tariaqarpugut – soorunami pingaakujup­pallaalernata. – Galaatiamiut 6:3, 4.

Imminut nalligeqinak.

 “Kiserliorneq sioqqani kiviartornertut ippoq. Kiviartorninni qaqiniarnissat ajornar­neruleriar­tussaaq. Kiserliorlutit eqqarsar­tuaruit imminut nalligigalut­tuinnassaatit. Taava allat ilagerusuk­kunnaas­savaatsit kiserlior­nerulis­sallutillu.” – Erin.

 Biibilimi allassimavoq: “Asanninneq … namminis­sarsiorneq ajorpoq.” (Korintimiunut 1. 13:4, 5) Tassa imminuinnaq eqqarsaatigival­laarutta allanut asanninnerput annikil­liartuin­nassaaq ikinngutitaar­nissarpullu sapernar­nerulis­salluni. (Korintimiunut 2. 12:15) Unalu eqqarsaatigiuk: Allat iliuusii kisiisa tunngavigalugit nuannaar­niartaruit nuannaalivin­navianngilatit! Aap, oqartaruit “Sianerfigineqarneq ajorpunga” aamma “Qaaqqusaan­ngisaan­narpunga” pilluarnissat allanut isumagisas­sanngor­tissavat. Taava allat ilinnut aqutsilis­sannginnerpat?

Kinaluunniit ikinngutigeqinagu.

 “Inuit kiserliortut malugeq­qusaartarput, allaat kimulluunniit malugeq­qusaalersin­naapput. Pisariaqar­tinneqartutut misigerusuin­naraluarput. Inuilli ilaasa taama misigiteriarlutit atornerluin­narsinnaavaatsit. Taava aatsaat taama kiserlior­tigilissaatit.” – Brianne.

 Biibilimi allassimavoq: “Ilisimasunik peqateqartoq ilisimas­suseqalersarpoq, sianiitsunilli ikinnguteqartoq ajortumeer­tussaasarpoq.” (Ussatit 13:20) Soorlu inuup kaattup sunaluunniit nerisin­naasaraa, taamatuttaaq ikinngutis­saaleqisut qanorluunniit ikkaluartunik ikinngutis­sarsiulersin­naapput. Allaat inupiluit aqutsiniartut ikinngutigilersoorsin­naavaat isumaqaramik tamanna nalingin­naasuusoq pitsaanerusunillu ikinngutitaarsin­naanatik.

 Inerniliineq: Kikkut tamarmik kiserliorsin­naasarput – annertuumik annikin­nerusumil­luunniit. Kiserliorneq artornarsin­naagaluartoq misigis­susiinnaavoq. Misigis­sutsigut eqqarsaatitsinnit sunnerneqak­kajuttarput, eqqarsaatigullu aqussin­naavagut.

 Aamma allanut piumaffigin­ninninni piviusorsiortuugit. Jeanette siusinnerusukkut oqaaseqartoq oqarpoq: “Imaanngilaq kinaluunniit qaqugorsuarmut ikinngutin­naarissagit, inoqarporli ilinnik soqutigin­nittunik. Soqutigineqar­tarnerit naammappoq. Tamanna kiserliulin­nginnissannut iluaqutigissavat.”

 Siunnersuutit allat: Atuaruk “ Ikinnguteqarneq pillugu isumakuluutitit qaanger­niarsarikkit.”