Nunarsuaq tamakkerlugu oqaluussisarnerput pingaarnertut Jehovap Nalunaajaasuinit kajumissutsimik tunissuteqartarnikkut aningaasalersorneqarpoq. a Aningaasanik nakkaatitsiviit ataatsimiittarfitsinni inissitaapput, aamma quppernermi matumani tuniseriaatsit allat allaatigineqarput. Ilagiinni aningaasartuutit matussuserniarlugit imaluunniit nunarsuaq tamakkerlugu suliarput tapersersorniarlugu tunisisoqarsinnaavoq.

 Jehovap Nalunaajaasui pissarsiamik qulinginik, oorisiaminnik aalajangersimasumik imaluunniit isertitamik procentiinik aalajangersimasunik piumaffigineqarneq ajorput. (2 Korinthimiut 9:7) Ataatsimiinnitsinni aningaasanik katersuiniartitsisoqarneq ajorpoq isernerlu akeqarani. Imermut morsutsitsinermut, ilisinermut, katinnermut allanulluunniit upperisarsiornermut tunngassutilinnut akiliisitsineq ajorpugut. Kaaginik tuniniaanikkut, loppemarkedititsinikkut, bingortitsinikkut, nereqatigiissitsinikkut, eqquniaatitsinikkut allatigulluunniit aningaasannanniarneq ajorpugut, aamma inuit tunissuteqarnissaannik piumaffigineq ajorpavut. Tunissuteqartut kikkuuneri ilisimaneqarneq ajorput. (Matthæusi 6:2-4) Nittartagarput Biibililersaarutaativullu aningaasaliiffigineqarsimasunik pilerisaaruteqarneq ajorput.

 Jehovap Nalunaajaasuisa ilagiivini tamani qaammatit tamaasa ataatsimiinnerni kikkunnut tamanut ammasuni naatsorsuutinik nalunaarusianik saqqummiussisoqartarpoq. Ilagiit immikkut tamarmik naatsorsuutaat misissoqqissaarneqartarput aningaasat eqqortumik agguaanneqarnissaat qulakkeerniarlugu. – 2 Korinthimiut 8:20, 21.

•   Nakkaatitsiviit: Naalagaaffilersaarfinni, ataatsimeersuartarfitsinni ataatsimiittarfitsinnilu allani nakkaatitsivinnut aningaasanik ikisisoqarsinnaavoq.

•   Nittartakkatsigut tunisineq: Nunarpassuarni qupperneq “Jehovap Nalunaajaasuinut tunissuteqarit” aqqutigalugu akiliissutit elektroniskiusulluunniit allat atorlugit tunissuteqartoqarsinnaavoq. b Taakku atorlugit Jehovap Nalunaajaasuisa ilaat qaammammut tunissutissaminnik aningaasanik aalajangersimasunik amerlassusilinnik ‘immikkoortitsisarput’. – 1 Korinthimiut 16:2.

•   Pisuussutit, pappilissat aningaasanik nalillit, testamenti, inuunermut sillimmasiussat imaluunniit pensionisiat: Taakku atorlugit tunissuteqarusukkuit Jehovap Nalunaajaasuisa immikkoortortaqarfiannut paasiniaagit.

 Qupperneq “Jehovap Nalunaajaasuinut tunissuteqarit” aqqutigalugu illit najukkanni tunissuteqarnissamut qanoq periarfissaqarnersoq paasiniarsinnaavat.