2013-imi januaarimi Napasuliaq Alapernaarsuiffik ukiut 40-ssaanni kalaallisut saqqummertarpoq. Kalaallisut oqaatsivut inunnit 57.000-iinnarnit atorneqarput.

Jehovap Nalunaajaasui nunatsinni 150-t missaannaanniikkaluartut Napasuliaq Alapernaarsuiffik kalaallisooq 2300-nngorlugu naqiterneqartarpoq. Tassa, Napasuliaq Alapernaarsuiffik-mik atuartartut amerlanersaat Nalunaajaasuunngillat.

Nuummi nutserivimmik nakkutilliisoq tv-kkut apersorneqarami ima nassuiaavoq: “Kalaalerpassuit Biibilimik soqutiginningaarput, taamaattumillu Napasuliaq Alapernaarsuiffik atuartarpaat.”

Nutserisoq kalaaleq tusagassiortumit aperineqarami sooq atuagassiaq nuannarinerini ima akivoq: “Atuagassiamik atuartarnera nammineq iluaqutiginikuuara. Assersuutigalugu paasivara peqqillunga qanoq inuusinnaallunga. Pujortartorujussuunikuuvunga nalunngikkaluarlugu qanoq peqqinnanngitsigisoq. Biibilimili allassimavoq peqqilluta inoorusukkutta timerput minguitsuutittariaqaripput.”

Aamma ilanngutassiami eqqaaneqarpoq Jehovap Nalunaajaasui 1950-ikkut qiteqqunneranniilli nunatsinni oqaluussisarlutillu atuakkanik atuagassianillu kalaallisuunik saqqummersitsisartut. Kalaallit qallunaallu namminneq piumassutsiminnik nutsereqataasarput, anguniagariuarpaallu nutsikkamik paasiuminartuullutillu nutsiinnagaarpalunnginnissaat.

Nalunaajaasoq ukiorpassuanngortuni nunatsinni najugaqartoq ima oqarpoq: “Ukiuni 25-ni kalaallinut nalunaajaasarpunga, takusinnaavaralu namminneq oqaatsitik atorlugit Biibililersaarutinik saqqummersittakkatsinnik atuarsinnaanerat qanoq pingaaruteqartigisoq. Illoqarfiit nunaqarfiillu ilaat ukiup ingerlanerani qaammatialuinnarni umiatsiamik aqqusaarneqarsinnaasarput, inuillu taakkunaniittut ilaat atuagassiaatitsinnik nuannarinnipput. Taakku tikillugit pajussinnaanngikkaangatsigit allaffigisarlugillu atuagassianik nassittarpavut.”

2013-imi januaari aallarnerfigalugu Napasuliaq Alapernaarsuiffik kalaallisooq marluinngorlugu saqqummersinneqartalerpoq, tassa atuaqqissaarutissamik aammattaaq tamanoortumik saqqummersoqartalerpoq. Aamma atuagassiat taakku marluk nittartakkami jw.org-imi “Biibililersaarutit” toqqariarlugu atuarneqariaannaallutillu aaneqariaannaapput.