ជំរឿនបណ្ដាជន ១៨:១-៣២
១៨ បន្ទាប់មក ព្រះយេហូវ៉ាបានមានប្រសាសន៍ទៅកាន់អេរ៉ុនថា៖ «អ្នកនិងកូនប្រុសៗរបស់អ្នក រួមទាំងវង្សត្រកូលអ្នក ត្រូវទទួលខុសត្រូវចំពោះកំហុសណាដែលទាក់ទងនឹងកន្លែងបរិសុទ្ធ+ ព្រមទាំងកំហុសណាដែលទាក់ទងនឹងមុខងារជាសង្ឃផងដែរ។+
២ ឯពួកលេវីជាបងប្អូនអ្នកដែលមកពីកុលសម្ព័ន្ធលេវី ជាកុលសម្ព័ន្ធនៃបុព្វបុរសអ្នក ចូរនាំពួកគេមកដើម្បីពួកគេអាចចូលរួមបំពេញកិច្ចបម្រើក្រោមការដឹកនាំរបស់អ្នក+និងកូនប្រុសៗអ្នក នៅមុខត្រសាលជំនុំដែលមានហឹបនៃសេចក្ដីរំលឹក។+
៣ ពួកគេត្រូវជួយអ្នកបំពេញកិច្ចការទាំងអស់នៅឯត្រសាលជំនុំ។+ ប៉ុន្តែ ពួកគេមិនត្រូវចូលទៅជិតទីបូជានិងប្រដាប់ប្រដានៅកន្លែងបរិសុទ្ធឡើយ ដើម្បីកុំឲ្យពួកគេឬអ្នកត្រូវស្លាប់។+
៤ ពួកគេនឹងធ្វើការជាមួយអ្នក ហើយបំពេញភារកិច្ចរបស់ខ្លួនទាក់ទងនឹងត្រសាលជំនុំ ព្រមទាំងកិច្ចបម្រើទាំងអស់ដែលទាក់ទងនឹងកន្លែងនោះ។ ក្រៅពីពួកគេ គ្មានអ្នកណាមានសិទ្ធិចូលមកជិតអ្នកទេ។+
៥ អ្នកត្រូវបំពេញភារកិច្ចខ្លួននៅកន្លែងបរិសុទ្ធ+និងនៅទីបូជា+ ដើម្បីកុំឲ្យខ្ញុំខឹង+នឹងបណ្ដាជនអ៊ីស្រាអែលតទៅទៀត។
៦ ខ្ញុំបានញែកពួកលេវីពីចំណោមបណ្ដាជនអ៊ីស្រាអែល ហើយឲ្យពួកគេជាអំណោយដល់អ្នក+ ព្រោះពួកគេបានត្រូវប្រគល់ជូនខ្ញុំជាយេហូវ៉ា ដើម្បីបំពេញកិច្ចបម្រើនៅត្រសាលជំនុំ។+
៧ អ្នកនិងកូនប្រុសៗអ្នកត្រូវបំពេញភារកិច្ចជាសង្ឃ គឺបម្រើនៅទីបូជា និងបំពេញកិច្ចការទាំងអស់នៅក្រោយវាំងនន។*+ ព្រោះខ្ញុំបានឲ្យមុខងារជាសង្ឃដល់អ្នកជាអំណោយ។ បើអ្នកផ្សេងទៀត*ចូលមកជិតត្រសាលជំនុំ អ្នកនោះនឹងត្រូវស្លាប់ជាមិនខាន»។+
៨ ព្រះយេហូវ៉ាមានប្រសាសន៍ថែមទៀតទៅអេរ៉ុនថា៖ «ខ្ញុំឲ្យអ្នកមើលការខុសត្រូវលើវិភាគទានដែលបណ្ដាជនអ៊ីស្រាអែលយកមកជូន។+ ខ្ញុំបានប្រគល់មួយចំណែកឲ្យអ្នកនិងកូនប្រុសៗរបស់អ្នក ពីអ្វីៗបរិសុទ្ធដែលបណ្ដាជនយកមកជូន។ នេះជាចំណែករបស់អ្នករាល់គ្នាជារៀងរហូតតទៅ។+
៩ ឯគ្រឿងបូជាបរិសុទ្ធបំផុតដែលត្រូវដុតជូនខ្ញុំ នឹងបានជារបស់អ្នក គឺរាល់គ្រឿងបូជាដែលបណ្ដាជនយកមកជូន ជាមួយនឹងគ្រឿងបូជាពីស្រូវ+ គ្រឿងបូជាសម្រាប់អំពើខុសឆ្គង+ និងគ្រឿងបូជាសម្រាប់អំពើរំលង។+ នេះជាអ្វីដែលបរិសុទ្ធបំផុតដល់អ្នកនិងកូនប្រុសៗរបស់អ្នក។
១០ អ្នកត្រូវបរិភោគគ្រឿងបូជានោះនៅកន្លែងបរិសុទ្ធបំផុត។+ ប្រុសៗទាំងអស់អាចបរិភោគបាន។ នេះជាអ្វីដែលបរិសុទ្ធដល់អ្នក។+
១១ បន្ថែមទៅទៀត គ្រប់អំណោយដែលបណ្ដាជនអ៊ីស្រាអែលយកមកជូន+ ជាមួយនឹងគ្រឿងបូជាសម្រាប់លើកចុះឡើង+ នឹងបានជារបស់អ្នកដែរ។ ខ្ញុំប្រគល់អ្វីទាំងអស់នេះដល់អ្នក និងកូនប្រុសស្រីរបស់អ្នកជាដរាបតទៅ។+ សមាជិកក្នុងក្រុមគ្រួសារអ្នក ដែលស្អាតបរិសុទ្ធអាចបរិភោគបាន។+
១២ «ឯប្រេង ស្រូវ និងស្រាទំពាំងបាយជូរជាផលដំបូង+ដ៏ល្អបំផុតដែលគេយកមកជូនខ្ញុំយេហូវ៉ា ខ្ញុំនឹងឲ្យដល់អ្នកដែរ។+
១៣ ដូច្នេះ ផលដំបូងទាំងអស់ក្នុងស្រុកដែលគេយកមកជូនព្រះយេហូវ៉ា នឹងបានទៅជារបស់អ្នក។+ សមាជិកក្នុងក្រុមគ្រួសារអ្នក ដែលស្អាតបរិសុទ្ធអាចបរិភោគបាន។
១៤ «អ្វីៗទាំងអស់ដែលបណ្ដាជនក្នុងស្រុកអ៊ីស្រាអែលញែកជាបរិសុទ្ធទុកជូនខ្ញុំ ត្រូវបានជាចំណែករបស់អ្នក។+
១៥ «កូនច្បងទាំងអស់+របស់បណ្ដាជន និងកូនដំបូងរបស់សត្វ ដែលគេយកមកជូនខ្ញុំជាយេហូវ៉ា ត្រូវបានទៅជារបស់អ្នក។ ប៉ុន្តែ ត្រូវឲ្យគេលោះកូនច្បងរបស់បណ្ដាជន+និងកូនដំបូងរបស់សត្វដែលមិនស្អាតបរិសុទ្ធវិញ។+
១៦ បើអាយុចាប់ពីមួយខែឡើងទៅ តម្លៃកំណត់សម្រាប់លោះនោះ គឺប្រាក់ប្រាំហ្សេគិល*+ តាមទម្ងន់ហ្សេគិលដែលគេប្រើនៅកន្លែងបរិសុទ្ធ។ មួយហ្សេគិលស្មើនឹង២០កេរ៉ា។*
១៧ ប៉ុន្តែ កូនឈ្មោលដំបូងរបស់គោ ចៀម ឬពពែ គេមិនត្រូវលោះទេ+ ព្រោះសត្វទាំងនោះស្អាតបរិសុទ្ធ។ អ្នកត្រូវប្រោះឈាមសត្វទាំងនោះនៅលើទីបូជា+ ហើយដុតខ្លាញ់វាឲ្យផ្សែងហុយឡើង ដើម្បីជាក្លិនឈ្ងុយជូនព្រះយេហូវ៉ា។*+
១៨ សាច់សត្វទាំងនោះនឹងបានជារបស់អ្នក ក៏ដូចជាសាច់ទ្រូងនៃគ្រឿងបូជាសម្រាប់លើកចុះឡើងនិងសាច់ភ្លៅស្ដាំដែរ។+
១៩ គ្រប់អំណោយបរិសុទ្ធដែលបណ្ដាជនអ៊ីស្រាអែលយកមកជូនខ្ញុំយេហូវ៉ា+ ខ្ញុំប្រគល់ដល់អ្នកនិងកូនប្រុសស្រីរបស់អ្នកជាដរាបតទៅ។+ នេះជាកិច្ចព្រមព្រៀងអំបិល* រវាងព្រះយេហូវ៉ានិងអ្នក ព្រមទាំងកូនចៅអ្នក»។
២០ ព្រះយេហូវ៉ាមានប្រសាសន៍បន្តទៅអេរ៉ុនថា៖ «នៅក្នុងស្រុករបស់បណ្ដាជនអ៊ីស្រាអែល អ្នកនឹងមិនទទួលដីធ្លីជាមត៌កទេ ហើយក៏គ្មានដីជាចំណែកដូចពួកគេដែរ+ ព្រោះខ្ញុំជាចំណែកនិងជាមត៌ករបស់អ្នកហើយ។+
២១ «ខ្ញុំប្រគល់១ភាគ១០នៃវិភាគទានរបស់បណ្ដាជនអ៊ីស្រាអែល ឲ្យកូនចៅលេវីទុកជាមត៌ក+ ដោយសារពួកគេបំពេញកិច្ចការនៅត្រសាលជំនុំ។
២២ ឯបណ្ដាជនអ៊ីស្រាអែលវិញ ពួកគេមិនអាចចូលទៅជិតត្រសាលជំនុំទៀតបានឡើយ។ បើពុំនោះទេ ពួកគេនឹងមានកំហុសឆ្គង ហើយត្រូវស្លាប់ជាមិនខាន។
២៣ ពួកលេវីត្រូវបំពេញកិច្ចបម្រើនៅត្រសាលជំនុំ ហើយត្រូវទទួលខុសត្រូវចំពោះកំហុសឆ្គងរបស់បណ្ដាជន។+ ក្នុងចំណោមបណ្ដាជនអ៊ីស្រាអែល ពួកលេវីមិនអាចមានដីធ្លីជាមត៌កឡើយ។+ នេះជាច្បាប់ដែលអ្នករាល់គ្នាត្រូវកាន់តាមគ្រប់ជំនាន់តរៀងទៅ។
២៤ ព្រោះខ្ញុំយេហូវ៉ា ខ្ញុំបានប្រគល់១ភាគ១០នៃវិភាគទានរបស់បណ្ដាជនដែលជូនដល់ខ្ញុំ ឲ្យដល់ពួកលេវីទុកជាមត៌ករួចហើយ។ ហេតុនេះហើយបានជាខ្ញុំប្រាប់ថា៖ ‹ក្នុងចំណោមបណ្ដាជនអ៊ីស្រាអែល ពួកគេមិនត្រូវមានដីធ្លីជាមត៌កឡើយ›»។+
២៥ បន្ទាប់មក ព្រះយេហូវ៉ាបានមានប្រសាសន៍ទៅកាន់ម៉ូសេថា៖
២៦ «អ្នកត្រូវប្រាប់ពួកលេវីថា៖ ‹អ្នករាល់គ្នានឹងទទួលវិភាគទាន១ភាគ១០ពីបណ្ដាជនអ៊ីស្រាអែលទុកជាមត៌ក ព្រោះនេះជាចំណែកដែលខ្ញុំឲ្យដល់អ្នករាល់គ្នា។+ ប៉ុន្តែ អ្នករាល់គ្នាក៏ត្រូវជូនវិភាគទាន១ភាគ១០ពីចំណែកនោះដល់ខ្ញុំជាយេហូវ៉ាវិញដែរ។+
២៧ វិភាគទានដែលអ្នករាល់គ្នាជូនជាស្រូវ ស្រា និងប្រេង នឹងត្រូវចាត់ទុកដូចជាផលរបស់អ្នករាល់គ្នាផ្ទាល់ ដែលយកមកពីទីលានបញ្ជាន់ស្រូវ+ ពីកន្លែងគាបផ្លែទំពាំងបាយជូរយកទឹកធ្វើស្រា និងពីកន្លែងគាបយកប្រេងដូច្នោះដែរ។
២៨ តាមរបៀបនេះ អ្នករាល់គ្នាក៏អាចជូនវិភាគទានដល់ព្រះយេហូវ៉ាវិញដែរ គឺពីចំណែកដែលអ្នករាល់គ្នាបានទទួលពីបណ្ដាជន។ វិភាគទានទាំងនោះដែលអ្នករាល់គ្នាជូនព្រះយេហូវ៉ា ត្រូវប្រគល់ឲ្យអេរ៉ុនជាសង្ឃ។
២៩ ក្នុងអំណោយទាំងអស់ដែលអ្នករាល់គ្នាបានទទួល ត្រូវយកចំណែកដែលល្អបំផុតជូនដល់ព្រះយេហូវ៉ា+ ព្រោះនោះជាអ្វីដែលបរិសុទ្ធ›។
៣០ «អ្នកត្រូវប្រាប់ពួកលេវីទៀតថា៖ ‹ពេលណាអ្នករាល់គ្នាជូនចំណែកដែលល្អបំផុតដល់ព្រះ ចំណែកនោះនឹងត្រូវចាត់ទុកដូចជាផលរបស់អ្នករាល់គ្នាផ្ទាល់ ដែលយកមកពីទីលានបញ្ជាន់ស្រូវ ពីកន្លែងគាបផ្លែទំពាំងបាយជូរយកទឹកធ្វើស្រា និងពីកន្លែងគាបយកប្រេងដូច្នោះដែរ។
៣១ អ្នករាល់គ្នានិងក្រុមគ្រួសារ អាចបរិភោគចំណែកនោះនៅកន្លែងណាក៏បាន ព្រោះនោះជាថ្លៃឈ្នួលរបស់អ្នករាល់គ្នាចំពោះកិច្ចបម្រើក្នុងត្រសាលជំនុំ។+
៣២ បើអ្នករាល់គ្នាជូនចំណែកដែលល្អបំផុតដល់ព្រះ នោះអ្នករាល់គ្នានឹងមិនមានកំហុសឆ្គងក្នុងរឿងនេះទេ។ អ្នករាល់គ្នាមិនត្រូវប្រើអ្វីបរិសុទ្ធដែលបណ្ដាជនអ៊ីស្រាអែលយកមកជូនតាមរបៀបមិនត្រឹមត្រូវឡើយ។ បើមិនដូច្នោះទេ អ្នករាល់គ្នានឹងត្រូវស្លាប់ជាមិនខាន›»។+
កំណត់សម្គាល់
^ នេះសំដៅលើវាំងននដែលនៅខាងមុខបន្ទប់បរិសុទ្ធបំផុត
^ នេះសំដៅលើអ្នកដែលមិនមែនមកពីក្រុមគ្រួសារអេរ៉ុន
^ មួយហ្សេគិលស្មើនឹង១១,៤ក្រាម។ មើលសេចក្ដីពន្យល់បន្ថែម ផ្នែកខ១៤
^ មួយកេរ៉ាស្មើនឹង០,៥៧ក្រាម។ មើលសេចក្ដីពន្យល់បន្ថែម ផ្នែកខ១៤
^ ឬ«ក្លិនដែលធ្វើឲ្យព្រះយេហូវ៉ាពេញចិត្ត»
^ នេះសំដៅលើកិច្ចព្រមព្រៀងដែលស្ថិតស្ថេរ ហើយមិនអាចផ្លាស់ប្ដូរបាន
